প্রেরিত7
1আকো নোইতা টেবো পাউহা স্তিফনসহিং উইয়ে, “ই নুওয়াংহা আজিপ্পারাংগা?”2স্তিফনসহা জাংয়ে, “আপু এ আসা আপাবাই, হিং! মহিমাকো সেংজাহা য়োংকো আটা অব্রাহাম হারান লোইতা য়ুংনুরোমা নাগাইহা মেসোপোটামিয়াতা নিনু সেংজাহা অব্রাহামকো নাগাইতা তিংরেহে।3আসা আকুহিং জাংয়ে, ‘নাতিহা আপনিকো লোই আসা আপনিকো দিংঙাবিকো প্যাকোসো নোমসা, কুং তিংপাওয়া লোইতা হাতু।’4আত্রংহা আকুহা কোল্দিবিকো লোইসো নোমসা হারানতা লেমসা য়ুংয়ে, আসা আকো আপা সিপুনতেনুকো নোইতা সেংজাহা আকুহিংয়া আকু লোইসোহা ইতা পারায়ে, নে নাবি হাংতা য়ুংদিংমে।5আত্রংকো সময়তা সেংজাহা অব্রাহামহিংয়া ই লোইতা তাংবা এওয়া মোংতোরে মিচাতো। আদো সেংজাহা ই লোইহা নাতি আসা নাকো চেংচুংবিহিং পিচারো তামসা জাংতেমি নিমগা। ই জাংতেনুওয়া অব্রাহামকো চেং চুংবিরাং মাজিংয়াংমগা।6সেংজাহা এপা জাংমি নিমগা, ‘নাকো চেংওয়া চেমেবিহা দোসরা লোইতা হোমসা য়ুংনেরোওয়া, আসা আকো দিংঙাবিহা আবিহিংয়া চারশো বর্ষা চোইপা ডেইয়া ত্যাবাপা জোমসা কোইচ্যাপামসা এরোওয়া।’7আদো সেংজাহা জাংয়ে, ‘নাবিহা হানি জ্যাকো ডেইয়া জোমসা য়ুং, আকু জ্যাহিংয়া কা কোইচ্যাপারোওয়া। আকো নোইতাহা আবিহা আউসো নোপামসা ই লোইতারাং কাহিং সেওয়া জোমসা তাচারোওয়া।’8“আসা সেংজাহা অব্রাহামহিংপা খতনা জোকো তামসা নাপোইতেয়ে। আকো নোইতা অব্রাহামহা আপনিকো চেংওয়া ইসহাকহিং চেংপায়ে। আসা অব্রাহামহা ইসহাককো আপা জিংমসা সায়্যায়ুতা ইসহাকহিং খতনা জোয়ে। ইসহাকহা য়াকুবকো আপা জিংপুয়ে, আসা য়াকুবহা বার্চো জিরিকো আপা জিংপুয়ে।9“য়াকুবকো চেংওয়া য়োসেফহিংয়া দোসরা ডুওয়াবিহা মোসোংপা জোচাংমি। আবিহা আকুহিংয়া মিশ্র লোইকো দিংঙাবিকো খুইতা পিইচাপুয়ে, আসা আকুহা ডেইয়া জিংপুয়ে। আদো সেংজাহা য়োসেবহিংপা নিমি।10আসা আকুহিং তাংসা কোইচ্যাওয়াসো ওয়েংপায়ে। সেংজাহা য়োসেফহিং লামতুপা জোয়ে আসা দুংজি পিচায়ে, মিশ্র লোইকো জাইপু ফিরোনহা ই তিংমসা আকুহিংয়া আকু লোই আসা আকু সাকো তাংসাকো গিরি বানাইয়ে।11“আকো নোইতাহা তাংসা মিশ্র লোইকো আসা কানানতাহা অনিকাল জিংপুমসা টেবো দুঃখ ওয়াংয়ে, আসা য়োংকো আটাবিহা চাওয়া অংসেরে মোমুংতো।12মিশ্র লোইতা অংসেবি নিনা তাওয়া হিংমসা য়াকুবহা আপনিকো চেংওয়াবিহিং হাংসুরোমা নাগাই আউতা নিংপুয়ে।13ন্যাসারাং ইকোই অংসে চোইয়াকো হোনুওয়া য়োসেফহা আকো আপুসো এবিহিং আপনি হাংসুমে তামসা নাইপায়ে, আসা য়োসেফকো প্যাপ্যামাম্যা ফিরোনকোতারাং ওয়াংয়ে।14য়োসেফহা আপনিকো আপা য়াকুবহিং আসা আপনিকো তাংসা পামিবিহিং আকোতা মোউয়ে। আবিহা সুংকাইসো চোইংঙাচো নিমি।15য়াকুবহা মিশ্রতা হোয়ে আসা আকুহা আউতা সিপুয়ে আসা য়োংকো আটা আজাবিরে আউতারাং সিপুয়ে।16আকো নোইতাহা আবিকো সিপুওয়া জুপাহা শকেম তাওয়া জায়গাতা সায়ে, আসা তোম্যইতা এহে। অব্রাহামহা আকু মোংটোহা হোমোরকো চেংওয়াবিকোতা ন্যাস্যা পিচামসা চোইওয়া নিমি।17“হাত্রং সেংজাহা অব্রাহামহিংপা নাপোইওয়া সময় আবেইতা দেয়োং, আত্রংহা মিশ্র লোইতাহা ইস্রাইলিবিহা বেইপুমসা আবিহা মিশ্র লোইতা উইসে জিংপুনতেমি।18আকো উইসে লো নোইতাহা মিশ্র লোইতা য়োসেফহিং মানাইওয়া দোসরা জাইপু জিংয়ে।19আসা আকুহা য়োংকো জ্যাবিহিংয়া মিচিপা জোমসা কোইচ্যাপাচাংমি, আসা য়োংকো আটা আজাবিকো চুবে কেওয়া চেংবিহিংয়া সিচাপুকো তামসা বাইরেতা বাদোই পাচাংমি।20“আত্রংরাং মোসা কেয়ে। আকুহা সেংজাকো নাগাইতাহা জেজেংপা নিমি। আকুহিংয়া তারি সুংরি চোইপা আপনিকো আপা-আয়ুহা সাতা ম্যইমসা এহে।21আকুহিংয়া ম্যইমসা এমক্যইপুমকো সোতা বাইরেতা বাদোইপুনুওয়া ফিরোনকো চেমেহা আকুহিং য়োচাপুমসা পুরায়ে। আসা আপনিকো চেংওয়া বানাইমসা তুইচায়ে।22মোসাহিংয়া মিশ্রবিকো তাংসা দুংজি ঝিপায়ে, আসা মোসা আপনিকো য়্যইওয়াতা আসা কামবিতা সে তাপুমসা দেপুয়ে।23“হাত্রং আকু লো নিহকাই দেকা, আত্রংহা আপনিকো আপু এবি ইস্রাইলিবিহিং দোসপারো তামসা আকো তুংসিংতা উইয়ে।24আপনিকো জ্যাকো এবিতাহা ইচোহিংয়া মাতুপা জোওয়া তিংমসা মোসাহা আকুহিংয়া য়োইয়ে আসা আকু মাতুপা জোওয়া মিশ্রি জ্যাকো দিংঙাহিংয়া স্যামসা আপনিকো এহিং মোতুপা জোওয়াকো বাদলা লাংয়ে।25সেংজাহা কুং খুইসো আবিকো উদ্ধার জোরোওয়া তামসা কুং আপু ব্যারোবি গেমমে তামসা মোসাহা নোদিংমি। আদো আবিহা মোকোইতো।26“আকো জুকুংহা আবিহা তাইবিলারাই স্যাসুদিংনুওয়া মোসা দেরেহে, আসা আকুহা আবিহিং চাংসপাকো কেংয়ে, ‘দিংঙাবাই, নাবিহা আপু এগা, হাংপা ইচোহা ইচোহিং মোসোংপা জোসুমগা?’27আদো আপনিকো সাবেইকো তোইতা মোতুপা জোওয়া দিংঙাহা আকুহিংয়া এপা জাংমসা ফিপুয়ে, ‘কাবিকো তোইতা কাইজি আসা মাটা জিংকো নাতিহিংয়া হাংসু জেংগা?28আইংজিকো আকু মিশ্রিহিং স্যামি ত্যাবাপা নাতিহা কাহিংনে স্যাকো কেংমগা?’29এপা জাংওয়া হিংমসা মোসাহা ক্যাপুমসা মিদান লোইতা হোমসা য়ুংওয়ায়ে। আউতাহা আকো নিহসো চেংওয়া কেহে।30“লো নিহকাই পেংপুনুওয়া সিনাই লাগাকো চিচ্চোওয়া জায়গাকো বুউবুউওয়া সাম্যাসো ল্যারাইদিংওয়া মেহসো ইচো লোডিংবাকো পোইং মোসাকোতা তিংরেহে।31মোসাহা ‘হাংমেতা?’ তামসা আআংপেপেচপুয়ে, আকো আবেইতা হোমসা কানুওয়া আকুহা সেংজাকো এপা জাংওয়া হিংয়ে,32‘কা নাকো আটা সেংজাগা: অব্রাহাম, ইসহাক আসা য়াকুবকো সেংজা।’ মোসাহা পিপিং-দোদোউপা জিংপুয়ে, আসা আকুহা চুসুংমকো সোতা আউতারে ন্যইমক্যইতো।33আত্রংহা সেংজাহা আকুহিং জাংয়ে, ‘নাকো কোকোইকো কোরোং লুউ, হাংপাতানাহা নাতি হাংতা জাদিং, আকুহা পবিত্র জায়গাগা।34মিশ্রতা নিওয়া কুং দিংঙাবিকো কোইচ্যাওয়া কা তিংমি নিও, আসা আবিকো চিলিংসুওয়া কা হিংয়ে, আবিহিং ওয়েংপাকো কা ঊইমসা লেমি নিও। নেহা হ্যাতু, কা নাতিহিংয়া মিশ্রকো লোইতা নিংপুরোওয়া।’35“ইরাং মোসা, হাংসুহিং আপনিকো জ্যা ইস্রাইলিবিহা এপা জাংমসা পেইতেমে, ‘হাংসু নাতিহিংয়া কাবিকো তোইতা মাটা আসা কাইজি বানাইমসা নিংপুমগা?’ আকুহিংয়া সেংজাহা বুউবুউওয়া সাম্যাতা দোসুওয়া লোডিংবাকো পোইংসো কাইজি আসা উদ্ধার পিচাওয়া বানাইমি নিমগা।36আকু দিংঙারাং মিশ্রকো লোইসোহা অ্যালুইওয়া ঝাহাদি আসা লো নিহকাই চিচ্চোওয়া জায়গাতা উইসে আআংপেপেচপুক্যইওয়া কামবি তিংপামসা বাইরে পারায়ে।37আকুহা আকু মোসারাংগা, হাংসু ইস্রাইলিবিহিং এপা জাংমি নিমে, ‘সেংজা কাহিং জাপামি ত্যাবাপা নাবিকো আপু এবিকো প্যাকোসো নাবিকো সোতা ইচো অগমবক্তাহিং জাপারোওয়া।’38ইস্রাইলিবিহিং চিচ্চোওয়া জায়গা সিনাই লাগাকো লিতা য়ুংনুওয়া মোসাহা আবিহিংপা চিত্তা নিমগা, লোডিংবাকো পোইং সিনাই লাগাতাহা আকুহিংপারাং য়্যইসুচাংমি, আসা মোসাহা লোডিংবাকো পোইংকো ঝিপাওয়ারাং য়াংবিহিং হিংপায়ে।39“আদো য়োংকো আটা আজাবিহা মোসাকো জাংতেওয়া মোঘ্যইরো তায়ে। আবিহা আকুহিং ওয়েংপামসা মিশ্র লোইতারাং লাকাপুরো তাহে।40“আবিহা হারুনহিং এপা জাংয়ে, ‘কাবিকো নাগাই নাগাই হ্যাওয়া ইচো নিহসো চোইসুংবি বানাইপি, হাংপাতানাহা কাবিহিং মিশ্র লোইসো নোপামসা পারাওয়া ই মোসাহিংয়া হাং জিংপুমে কাবি মেগে।’41“আকু দিনতাহা আবিহা ইপু বের্চেংকো মুর্তি বানাইমসা বলি পিচায়ে, এপা জোমসারাং আবিহা আপনিকো খুইকো কামবিতা গাগ্রুসুয়ে।42আদো সেংজাহা আবিহিংয়া পেইপুয়ে, আসা আবিহিংয়া ডিংবাকো পুইমাবিহিং হুইচোইপুকো তামসারাং ল্যাপুয়ে, এপারাং অগমবক্তাবিকো তাংজিকো হিগাতা লামি নিও,‘ও ইস্রাইলকো দিংঙাবাই!নাতিহা লো নিহকাই চোইপা চিচ্চোওয়া জায়গাতা কাহিং ভেটি আসা বলিবি পিচাংগা?43আদো নাবিহা মোলেক চোইসুংকো তাম্বু আসা রেফান চোইসুং তাওয়া পুইমাকো মুর্তি পুউমগা। আকু মুর্তিবিহা নাবিরাং হুইকো বানাইওয়া মুর্তি নিমগা। আকো সোতা কা নাবিহিংয়া বেবিলোন লোইসোপারাং তানাং নিংপুরোওয়া।’44“চিচ্চোওয়া জায়গাতা য়োংকো আটাবিহিংয়া ‘সেংজাকো তিংপাওয়া তাম্বুহা পবিত্র নিমগা।’ মোসাহা আকু তাম্বুহিংয়া সেংজাকো খুইতেওয়া সেইরাং বানাইমি নিমগা।45সেংজাহা ই লোইতা য়ুংওয়া দোসরা জ্যাকো দিংঙাবিহিংয়া ঘিপুইয়ে, য়হোশুহা ই লোইহিং জিয়োমসা এচানুওয়া আবিহা আকু পবিত্র তাম্বুহা ই লোইতা পায়ে। আকো নোইতাহা দাউদ জাইপুকো সময় চোইপা আকু পবিত্র তাম্বুহা নিমগা।46“সেংজাকো লামতুওয়াহা দাউদকোতা নিমি, আসা আকুহা য়াকুবকো সেংজাকো য়ুংওয়া ইচো দেমসা লোপাকো য়ায়ে।47আদো আকো চেংওয়া সোলোমনরাং আকু দেমসা লোপায়ে।48আদো খুইসো লোপাওয়া দেমসাবিতাহা টেবো সেংজাহা মায়ুংমগা। হেপা অগমবক্তাবিকো হিগাতা জাংতেমি নিমমে,49‘লোডিংবাহা কুং গাদিংগা আসা বাসিমতিহা কুং কোকোইকো তাংবা এওয়াগা। নাবিহা কুং সোতা হেপা জিংওয়া দেমসা লোপাকোগা?’ সেংজাহা জাংমগা, ‘কুং সাওয়া জায়গাহা হানিগা?50ই তাংসা কুং খুইসোরাং লোপাওয়া মোকোমগা?’51“ও লুংটুই বেপা জিংওয়া তুংসিং, আসা নানুং মাহিংওয়া দিংঙাবাই, নাবিহা হাত্রংদো পবিত্র লাংবেহিংয়া মেংতাপা জোমগা। আপনিকো আটাবি ত্যাবাপা নাবিরে পবিত্র লাংবেসো তিংপাওয়া নুওয়াংহিংয়া হাত্রংরে মাহিংমগা।52নাবিকো আটাবিহা অগমবক্তাবিতাহা হাংসুহিং এনতাপা জোমি নিংগা? সেংজাকো পবিত্র কাম জোওয়া দিংঙা ওয়াংপাদাংয়ে তামসা জাংওয়া অগমবক্তাবিহিংনে নাবিহা স্যাপুয়ো। আসা নাবিহা আকু পবিত্র কাম জোওয়া দিংঙাহিংয়া ল্যহপামসা স্যাপুয়ে।53লোডিংবাকো পোইংবিকো পিচাওয়া লিংপাং নাবিহা মুংচায়ো, আদো আকো পালনহা মোজোতো।”54স্তিফনসকো নুওয়াং হিংমসা লাচি জাংওয়াতা গাদিংওয়া দিংঙাবিহা সেদ্রাংপুয়ে আসা আকো তোইতা সেতাং কিট্টিপা মাংসুয়ে।55আদো স্তিফনসহা পবিত্র লাংবেসো মেইপুমসা লোডিংবাতা মিসরোইপা ন্যইয়ে, আসা সেংজাকো মহিমাতা ইশুহিং সেংজাকো দাংক্রেং কাটুতা জাদিংওয়া তিংয়ে।56আকুহা জাংয়ে, “কাং, কা লোডিংবা ওয়েচপুওয়া তিংয়ে আসা দিংঙাকো চেংওয়াহিংয়া সেংজাকো দাংক্রেং কাটুতা জাদিংওয়া তিংদিংয়ো”57আদো আবিহা সিওপা ঙাসুমসা লোসুয়ে, আসা আপনি আপনি নানুং মেইয়ে আসা আবিহা চিত্তা আকো তোইতা য়েসপায়ে,58আসা আবিহা আকুহিংয়া শহরসো বাইরে নোপামসা পুরায়ে আসা আকো তোইতা লুংটুই টোসুয়ে। আকু তিংবিহা আপনিকো আংদুংবি শাউল মিং নিওয়া ইচো ওয়াংটেংটেংগেংওয়া দিংঙাকো কোকোই কাটুতা এহে।59হাত্রং আবি স্তিফনসকো তোইতা লুংটুইবি টোসুদিং, আত্রং আকুহা পাচাইয়ে, “ও প্রভু ইশু, কুং লাংবেহিং চি লাংপি।”60আকুহা চুইনুইমসা সাডিংপা ঙামসা জাংয়ে, “ও প্রভু, ই পাপকো দোসহা ইবিকো তোইতা মুহুইকো।” এসে জাংমসা আকুহা আপনিকো সাদি ল্যাপুয়ে। স্তিফনসহা জোংসুওয়া সাতা
The Seed Company