প্রেরিত4

1পত্রসসো য়হুন্নাহা দিংঙাবিহিংপারাং য়্যইসুদিংনুওয়া পাউবি, য়হুদি দেমসাকো সিপাইবিকো মাটা আসা সদুকিবি আবিকোতা লেহে।2আবিহা সেদ্রাংপুমি নিমি, হাংপাতানাহা পত্রসসো য়হুন্নাহা ইশুকোতাহা সিমসারে ঙারোমগা তামসা দিংঙাবিহিং ঝিপাদিংমি আসা হিংপাদিংমি নিমি।3আত্রংহা আবিহা পত্রসসো য়হুন্নাহিং প্যইপুয়ে। আসা আকো সাইয়ু চোইপা জেলতা এহে, হাংপাতানাহা আত্রংহা মারি মোকেপদাংতেমি।4আদো আবিকো জাংওয়া হিংমসা উইসে দিংঙাবি দেংয়ে, আসা দেংসুওয়া পোজা দিংঙাবিহা পাঁচ হাজার গাংদাং মাগাংদাংপা নিমি।
5আকো জুকুংহা ইবিকো মাটা ওয়ারাংপাবি, তাংজিকো উটকেওয়াবি আসা ওয়ারাংপাবি য়রুশালেমতা জোংসুয়ে।6টেবো পাউ হোনাস, কৈয়াপা, য়হুন্না, আলেকজান্ডার আসা টেবো পাউকো প্যাপাম্যামাবি তাংসা আউতা নিমি।7আবিহা পত্রস আসা য়হুন্নাহিং প্যাকোতা জাপামসা উইয়ে, “হানি সেসো আসা হাংসুকো মিংতা নাবিহা ই তেইমক্যইওয়াহিং সাংপামগা?”
8পবিত্র লাংবেসো জুপাতা মেইপুমসা পত্রসহা আবিহিং জাংয়ে, “দিংঙাবিকো মাটা আসা য়হুদি মাটা ওয়ারাংপাবাই,9হিনি কাবিহা কোকোই তেইমক্যইওয়া দিংঙাকো সোতা ইচো এনতাওয়া কাম জোওয়াকো বিষয়তা আকুহা হেপা জোমসা সাংচাপুমগা তামসা উইনাহা,10নাবি আসা ইস্রাইলকো তাংসা দিংঙাবি গেচাকো, নাবিহা ক্রুসতা থ্যইপুওয়া আসা সেংজাহা সিপুওয়াসো ঙাপাওয়া, আকু নাসরত ইশু খ্রীষ্টকো মিংতা ই দিংঙাহা নাবিকো নাগাইতা সাংমসা জাদিংমি নিও।11তাংজিকো হিগাকো ই নুওয়াং আকো তোইতারাং লামগা,‘ইহা আকু লুংটুইরাংগা, হানি নাবি, সা বানাইমবি মোঘ্যইরো তামসা হুইতেমি নি! আকু লুংটুইরাং নেহা আরিকো মাটা লুংটুই জিংপুমি নিও।’
12দোসরা হাংসুকোতারে মুক্তি মোতো, হাংপাতানাহা য়াংবিহিংয়া বাচাইকোহা লোডিংবাকো লিতা দিংঙাবিকোতাহা হাংসুকোতারে আকু মিংহা পিচাওয়া মোতো।”
13হাত্রং আবি পত্রসসো য়হুন্নাহিং মাচ্ছুংপা য়্যইওয়া তিং, আত্রংহা ইবিহা হাইরে মেগেওয়া দিংঙা গুং, তামসা সিদা চ্যইমসা আবিহা আআংপেপেচপুয়ে, আসা ইবিহা ইশুহিংপা চিত্তা নিয়ুং তাওয়া আবিরে সিদা চ্যইয়ে।14আদো সাংচাপুওয়া দিংঙাহিং ইবিহিংপা জাদিংওয়া তিংমসা আবিহা হাইরে য়্যইমকোইতো।15আকো সোতা ইবিহিংয়া লাচি জাংওয়াসো বাইরেতা হ্যাকো তামসা আবিহা এপা জাংসুমসা হুইসুয়ে,16“ই দিংঙাবিহিংয়া নেহা য়াংবিহা হাং জোকোগা? হাংপাতানাহা আজিপ্পারাং ইবিকোসোহা ইচো আআংপেপেচপুওয়া কাম জিংমি নিও তামসা য়রুশালেমতা য়ুংওয়া তাংসা দিংঙাবিকোতা বেইপুমি নিও, আসা য়াংবিরে ইহা মোকোমি তামসা জাংমক্যই।17আদো ই নুওয়াং দিংঙাবিকোতা মেবেইকো তামসা, ন্যাসারাং ই মিংতা হাংসু দিংঙাবিহিংপারে নাবিহা হাইরে মোয়্যইকো, তামসা য়াংবিহা ইবিহিংয়া চুসুংপানেরোওয়া।”
18আসা আবিহিং মোউমসা “নেহা ইসো য়ুতাহা ইশুকো মিংতা মোয়্যই আসা হাইরে মাঝিপা” তামসা আবিহা জাংয়ে।
19আদো পত্রসসো য়হুন্নাহা আবিহিং জাংয়ে, “সেংজাকো নুওয়াং মাহিংপা নাবিকো নুওয়াং হিংকো সেংজাকো নাগাইতাহা এনতাওয়াগা না এনতাওয়া মোকোমগা? নাবি আপনিবিরাং এনতাপা নো।20হাংপাতানাহা কাবিকো তিংওয়া আসা হিংওয়া নুওয়াংবিহা কাবিহা মোয়্যইপা য়ুংমক্যইমগা।”
21আবিহা দন্ড পিচাওয়া হাইরে ন্যাতা মোদোমসা আবিহিংয়া ন্যাসারাং সিওপা চুসুংপামসা ল্যাপপিয়ে, হাংপাতানাহা আউতা হাই জিংপুমি নি আকো সোতা তাংসা দিংঙাবিহা সেংজাহিং তাচাদিংমি।22হাংপাতানাহা হানি দিংঙা আআংপেপেচপুওয়া কামসো সাংচাপুমিনি, আকু দিংঙাকো লোহা নিহকাইরোমা সিওপুমতেমগা।
23জোংসুওয়াসো নোচামুংতানি পত্রসসো য়হুন্নাহা আপনিকো ব্যারোবিকোতা লেয়ে, আসা মাটা পাউবিসো য়হুদি মাটা ওয়ারাংপাবিকো জাংওয়া তাংসা নুওয়াংবিহা আবিহিং ল্যায়ে।24হাত্রং আবিহা ই নুওয়াং হিং, আত্রংহা আবিহা চিত্তা সেংজাহিং সেদিংপা ঙাসুমসা জাংয়ে, “ও প্রভু, হাংসু লোডিংবাসো বাসিমতি, ঝাহাদি আসা আউতা নিওয়া তাংসাহিং দিংমমে,25হাংসু পবিত্র লাংবে আপনিকো কাম জোওয়া য়োংকো আটা দাউদকো নামুসো জাংমমে,‘দোসরা জ্যাবিহা হাংপা সেদ্রাংপুমগা?দিংঙাবিহা মোতুওয়া নুওয়াংবিহা হাংপা নোমগা?26সেংজাকো তোইতাহাআসা আকো স্যাকেংত্যাওয়া খ্রীষ্টকো তোইতা বাসিমতিকো জাইপুবি জাসুয়ে,আসা মাটাবিরে আবিকো তোইতা চিত্তা জোংসুয়ে।’
27“হাংপাতানাহা আজিপ্পারাং নাকো স্যাকেংত্যাওয়া, নাকো পবিত্র কাম জোওয়া ইশুকো তোইতা হেরোদ আসা পেনতিয়োস পিলাতস নিহসোসা, দোসরা জ্যা আসা ইস্রাইলিবিহিংপা ই শহরতারাং জোংসুয়ে।28আদো আবিহা নাকো সে আসা নাগাইসো নাকো নোওয়া সেই মেংচে কাম জোয়ে।29নেহা ও প্রভু, আবিকো চুসুংপাওয়াতা ন্যইপি, আসা নাকো ডেইয়াবিহিং মাচ্ছুংপা নাকো য়্যইদি য়্যইকো পিচা।30আপনিকো কাম জোমবিহিং নাকো পবিত্র কাম জোওয়া ইশুকো মিংতা হাইমবি সাংপাকো আসা আঅংপেপেচপুওয়া কামবি জোমসা তিংপাওয়া সেবি পিচা।”
31আবিহা পাচাইওয়া ত্যইনতেনুওয়া আবিকো গাসুওয়াতারাং নিংঙা হায়ে, আসা আবিহা তাংসা পবিত্র লাংবেসো মেইপুয়ে, আসা আবিহা সাডিংপা জিংমসা সেংজাকো য়্যইদি য়্যইয়ে।
32দেংবিকোতাহা তাংসা ইচো তুংসিং আসা ইচো লাংবে জিংপুয়ে, আসা আবিকোতাহা ইচোরে আপনিকো মোংটো-কেটোবি ইহা কুংগা তামসারে মাজাংমি। আদো আকুহা আবি তাংসাকো বুউতারাং নিমি।33আকু জেংওয়া পোইংবিহা পুরা সেসো প্রভু ইশুকো ঙারোওয়াকো নুওয়াং হিংপাচাংমি, আসা আবি তাংসাকোতা সেংজাকো লামতুওয়া নিমি।34জেংওয়া পোইংবিকো প্যাকোতাহা হাংসুহিংনে হাইরে মোঘ্যইমি, হাংপাতানাহা হাসে ইচো মোংটো-কেটো আসা সাকো গিরিবি নি, আবিহা আকু মোংটো পিইচামসা35জেংওয়া পোইংবিকো নাগাইতা সারেচাংমি, আসা হাংসুহিং হাই ঘ্যই আবিহা তাংসাহিং চোপিচাংমি।
36এপারাং সাইপ্রস বোইদাকো লেবিকো জিরিকো য়োসেফ, হাংসুহিং জেংওয়া পোইংবিহা বার্নাবাস তামসা মিং এপিমি নিমমে! (বার্নাবাস তাওয়াহা দোসরাহিং সাহস পিচাওয়া দিংঙা),37আকুহা আপনিকো মোংটো পিইচামসা ওয়াংওয়া ন্যাস্যাহা জেংওয়া পোইংবিকো নাগাইতা এপিয়ে।

The Seed Company

https://app.library.bible/content/3b30f21af95962d0