প্রেরিত3
1সাইয়ু পত্রসসো য়হুন্নাহা জেইসুংকো ৩ বাজি দেমসাতা পাচাইকো হোদাংমি। আত্রংহা পাচাইওয়াকো সময় নিমি।2য়হুদিবিকো দেমসাকো লাংঙাংতা সুন্দর তাওয়া মিংকো লাপুংতা ইচো কোকোই তেইমকোইওয়া দিংঙা গাচাংমি। দিংঙাবিহা আকুহিংয়া সদাইদিন পুপামসা আউতারাং সোংচাংমি। আকুহা দেমসাতা পাচাইকো ওয়াংওয়া দিংঙাবিকোতা হাইক্রি য়াচোইচাংমি।3পত্রস আসা য়হুন্নাহিং দেমসাতা ওয়াংপাওয়া তিংমসা আকুহা আবিহিংপারে হাইক্রি য়াচায়ে।4আবিহা আকুহিং এনতাপা ন্যইয়ে, আসা পত্রসহা আকুহিংয়া জাংয়ে, “কাবিকোতা কাং!”5ই হিংমসা আকুহা হাইক্রি মুংচাকোমে তামসা ন্যইয়ে।6পত্রসহা আকুহিংয়া জাংয়ে, “কুংতাহা সুনসো জাতাংহা মোতো, আদো হাইনি, আকুরাং কা নাতিহিংয়া পিচারোওয়া। নাসরত ইশু খ্রীষ্টকো মিংতা লোমসা তেই।”7এপা জাংমসা আকুহা আকু দিংঙাকো দাংক্রেং খুইতা চুংমসা লোপায়ে। আত্রংরাং আকু দিংঙাকো কোকোইকো তুরুইবি আসা তাংবাকো লেংটোসেবিতা সে ওয়াংয়ে।8আসা আকুহা লোমসা তেইয়ে। আকুহা তেইমসা টোইংমসা সেংজাকো লেহদি লেহমসা সেংজাহিং তাচামসা আবিহিংপা দেমসাকো নাপোতা হোয়ে।9আসা নাপোতা হোনুওয়া উইসে দিংঙাবিহা আকুহিং তেইওয়া আসা সেংজাহিং তাচাওয়া তিংয়ে।10দেমসাকো সুন্দর তাওয়া লাপুংতা গামসা হাইক্রি য়াচাংওয়াহা ইরাংগা তামসা আবিহা আকুহিংয়া নাইয়ে। আসা হেপা তেইকো চুমমে? তামসা আবিহা আজিপ্পারাং আআংপেপেচপুয়ে।11আকু সাংওয়া দিংঙাহা সোলোমন তাওয়া লাংগাংতা পত্রসসো য়হুন্নাহিংপা হুইদিংওয়া তিংমসা তাংসা দিংঙাবিহা আআংপেপেপা জিংপুমসা আউতা থুইসপায়ে।12ই তিংমসা পত্রসহা দিংঙাবিহিং জাংয়ে, “ইস্রাইলকো দিংঙাবাই, ই দিংঙাকো তোইতা নাবিহা হাংপা আআংপেপেপা জিংদিংগা? কাবি আপনিকো সেসো আসা আপনিকো ভক্তি জোওয়াসো ইহিং তেপোইমি ত্যাবাপা হাংপা মিসরোইপা ন্যইমগা?13এপা মোকো, য়োংকো আটা অব্রাহাম, ইসাক আসা য়াকুবকো সেংজারাং আপনিকো কাম জোওয়া ইশুহিংয়া জেজেংপা জোয়ে। নাবিহা ইশুহিংয়া স্যানেরোওয়া তামসা স্যইপুয়ে। পিলাতোসহা আকুহিংয়া ল্যাপিকো কেংদো নাবিহা মাল্যাকো তামসা জাংয়ো।14আকুহা পবিত্র আসা চোসোওয়া দিংঙা নিমগা, আদো নাবিহা ইশুহিং মাল্যাপা ইচো দিংঙা স্যাচাংওয়া বারাব্বাহিং ল্যাপিকো তামসা জাংসুয়ে।15সাদি পিচাওয়াহিংয়া নাবিহা স্যাপুইয়ো, আদো সেংজাহা আকুহিংয়া সিপুওয়াসো ঙারোপামি নিও। ইহা কাবিরে আজিপ্পারাং তিংমি নিও।16ইশুকো তোইতা দেংওয়াকো সোতা ইচো কোকোই তেইমক্যইওয়া দিংঙাহা সে মুংচায়ো। ইশুকো মিং হিংমসা ইকো তুংসিংতা দেংওয়া ওয়াংয়ে, আসা ইকো দেংওয়াকো সোতারাং নেহা নাবিহা ইহিংয়া এনতাপা সাংচাপুওয়া তিংকোরে তিংয়ো।17“ও কুং আপু এবাই, কা গেদিংয়ো, নাবি আসা নাবিকো মাটাবিহা ইশু হাংসুমে তামসা মানাইমসারাং স্যাপুমগা।18“আদো খ্রীষ্টহা কোইচ্যানেরোওয়া তামসা সেংজাহা উইসে লো নাগাইসোরাং অগমবক্তাবিসোরাং জাংপুনতেওয়াবিহা আকুহা এপা তাংসা জোমি নিও।19আকো সোতা নেহা নাবিহা আপনি আপনিকো পাপবিহা কাবি পাপ জোমরাংগা তামসা সেংজাকোতা লায়োং, আসা আকুহা নাবিকো তাংসা পাপবিহা ওয়েংপাপিরোওয়া। এপারাং নাবিহা সেংজাকোসো আপনিকো লাংবেতা তিমেপা জিংমসা সে মুংচারোওয়া,20আসা সেংজাহা নাবিকো সোতা জেংওয়া মুক্তি পিচাওয়া জাইপু খ্রীষ্টহিং ন্যাসারাং নিংপুরোওয়া। আকুহা ইশুরাংগা।21আদো সেংজাকো অগমবক্তাবিকো জাংমি ত্যাবাপা সেংজাহা তাংসা নুওয়াং চুবে বানাইওয়া সময়, মাদেয়াংনু চোইপা ইশুহা লোডিংবাতারাং য়ুংনেরোওয়া।22মোসারে এপা জাংমি নিমগা:‘প্রভু নাবিকো সেংজাহা নাবিকো সোতারাং নাবিকো জ্যাসোরাংকা ত্যাবাওয়া ইচো অগমবক্তাহিং নিংপুরোওয়া।আকো জাংওয়া তাংসা নুওয়াং নাবিহা হিংনেরোওয়া।23“আদো অগমবক্তাকো নুওয়াং মাহিংওয়া তাংসা জ্যাকো দিংঙাবিহিংয়াসেংজাকো দিংঙাবিকোসো তানাং ওয়েংপামসাদাংপুরোওয়া।’24“শামুয়েল আসা আকো নোইকো তাংসা অগমবক্তাবিরে হিনি জুকুংকো জিংদিংওয়া ই নুওয়াংকো তোইতারাং জাংমি নিমগা।25অগমবক্তাবিকোসো জাংতেওয়া নুওয়াংবিহা নাবিকো সোতারাংগা, আসা সেংজাহা নাবিকো আটা-আজাবিহিংপা চিত্তা নাপোইওয়াকো করাররে নাবিকো সোতারাংগা। য়োংকো আটা অব্রাহামহিং, সেংজাহা নাকো চেংচুবিসো কা বাসিমতিকো তাংসা জ্যাবিহিং আশিষ পিচারোওয়া তামসা জাংমি নিমগা।26নাবিহিং মেংতাপা কাম জোওয়াবিসো লাপোংমসা আশিষ পিচাকো তামসা সেংজাহা আপনিকো কাম জোওয়া ইশুহিং নাগাইহা নাবি ইস্রাইলিবিকোতারাং নিংপুমগা।”
The Seed Company