প্রেরিত2
1হাত্রং পেন্তিকোস তাওয়া য়হুদিবিকো মানক্যা দেয়োং, আত্রংহা ইশুকোতা দেংওয়া তাংসা দিংঙাবিহা ইচো জায়গাতারাং গাসুয়ে।2আত্রংহা একবিরি লোডিংবাসো টেবো বিংঙা ত্যাবাপা ইচো আওয়াজ লেয়ে, আসা আবিকো গাসুওয়া সাতা মেইপুয়ে।3আসা মেহকো লেবেবি ত্যাবাপা আবিকোতা তিংরেহে, আসা পাংতি পাংতি জিংমসা আবি তাংসাকো তোইতা হুইরেহে।4আকো নোইতা আবি তাংসা পবিত্র লাংবেসো মেইপুয়ে, আসা পবিত্র লাংবেকো সে মুংমসা আপনিকো মেগেওয়া ক্যাবি য়্যইসুয়ে।5বাসিমতিতা নিওয়া তাংসা লোইকো সেংজাসো চুসুংওয়া য়হুদিবি আত্রংহা য়রুশালেমতা গাসুদিংমি।6আত্রংহা ই ক্যা হিংমসা উইসে দিংঙাবিহা আউতা দেরেহে। আসা তাংসা আবিহা আবিহিংয়া আপনি আপনিকো ক্যাসো য়্যইসুদিংওয়া হিংমসা আবিহা আআংপেপেচপুয়ে।7আবিহা তাংসা আআংপেপেপা জিংপুয়ে, আসা আঙিং-উংয়িংপা জিংমসা জাংসুয়ে, “ই য়্যইমবিহা তাংসা গালীলিবি মোকোমগা?8এপা বেনাহা হাংপাসা ইবিহা তাংসা য়োংকো আপনি আপনিকো ক্যা য়্যইদিংওয়া য়াংবি হিংদিংগা?9য়াংবিহা ইতা পার্থিবি, মাদিবি আসা এলামিবি, আসা মেসোপোটামিয়া, য়হুদিয়া, কাপাদোকিয়া, পোন্তোস আসা এশিয়াতা য়ুংওয়াবি নিও।10আসা ফিগরিয়া, পামফিলিয়া, মিশ্র লোই, আসা কুরেনিকো আবেইতা লিবিয়াকো জায়গাবি আসা রোমসো লেওয়া য়হুদিবি আসা য়হুদিকো লিংপাং মানেওয়া দোসরা জ্যাকো দিংঙাবিরে ইতা নিও।11ক্রেটতা য়ুংওয়াবি আসা আরবিবিরে ইতা নিও। আদো ইবিহিংয়া য়াংবিহা আপনি আপনিকো ক্যাতা সেংজাকো টেরবো কামবিকো তোইতা হিংপাদিংওয়া য়াংবিহা হিংদিংয়ো।”12আবিহা তাংসা আআংপেপেপা জিংপুমসা আঙিং-উংয়িংপা জিংমসা ইচোহা ইচোহিংয়া উইসুয়ে, “ই জাংওয়াহা হাংগা?”13আদো দোসরাবিহা লেংসুমসা জাংসুয়ে, “ইবিহা য়ু গাইপুমি নিও।”14পত্রসহা এগারচো পোইংবিহিংপা জামসা তাংসা হিংকোইপা সেতিংপা ঙামসা জাংয়ে, “ও য়হুদিয়াকো দিংঙাবাই! আসা য়রুশালেমতা য়ুংওয়া ডুওয়া এবাই, ইতাহা হাং জিংপুমে, আকুহা কা নাবিহিং কোইপারোওয়া। নেহা কুং জাংদাংওয়া নুওয়াংবি এনতাপা হিংপি।15“নাবিকো নোমবেপা ইবিহা য়ু মাগাইয়াংতো, হাংপাতানাহা হাপকুং ৯ বাজিকো পোতাতাহা হাংসুরে মাগাইমগা।16আদো জোয়েল অগমবক্তাকো জাংওয়া নুওয়াংহা হিনিরাং তাংসা জিংমি নিও,17‘নোইস্যাকো দিনবিতাহা এপা জিংরোওয়া তামসাসেংজাহা এপা জাংমি নিও, কা তাংসাদিংঙাবিকো তোইতা কুং লাংবে হুইপারোওয়া,আসা নাবিকো চেংওয়া, চেমেবিহা অগমবাণীয়্যইরোওয়া, আসা নাবিকো ওয়াংটেংটেংগেংবিহা দর্শন তিংরোওয়া,আসা নাবিকো ওয়ারাংপাবিহা মাংবুইরোওয়া।18কা আপনিকো ডেইয়া ডেইয়ামেবিকো তোইতা আকু দিনতাহা কুং লাংবে হুইপারোওয়া,আসা আবিহা অগমবাণী য়্যইরোওয়া।19তোইতা ডিংবাতা আআংপেপেচপুওয়া কামআসা লিতা বাসিমতিতা চিহ্নবি তিংপারোওয়া,ই জাংওয়াহা য়ুতি, মে আসা মুদুই।20প্রভু লারেমসা লেপাওয়া টেবো হাহাইওয়া দিনলেনুরোমা নাগাইহা সিনিহা নাতুংপা জিংপুরোওয়াআসা তারিহা য়ুতি ত্যাবাপা অ্যালুইপা জিংপুরোওয়া।21আসা হাংসু হাংসু সেংজাকো মিং চুমসা মোউচা,আবিহা পাপসো বাচেরোওয়া।’22“ও ইস্রাইলকো দিংঙাবাই, ই নুওয়াং হিং! নাসরতকো ইশুহা এপা জিংওয়া দিংঙা নিমগা। আকুহিংয়া সেংজাহা সে নিওয়া কামবি, আআংপেপচপুওয়া কামবি আসা চিহ্নবিসো সেংজা আপনিরাং ইশুহিং নিংপুমি তামসা প্রমান তিংপামি নিও। নাবিহা গেমগা সেংজাহা নাবিকো প্যাকোতা জোওয়া কামবিহা আকোতা জিংমসা জোমগা।23সেংজা আপনিকো নোচেং আসা দুংজিসোরাং ইশুহিংয়া নাবিকো খুইতা ত্যইপুয়ে, আসা নাবিহা আকুহিংয়া মেংতাওয়া দিংঙাবিকো খুইতা ত্যইমসা ক্রুসতা স্যাপাপুয়ে।24আদো আকুহিংয়া সেংজাহা সিপুওয়াসো ঙারোপামসা ঙাপামি নিও, হাংপাতানাহা সিদিংকো অধিকারতা য়ুংকোহা আকুহিংয়া এনতাপা মোতো।25দাউদ জাইপুরে আকো তোইতা জাংমি নিমগা,‘কুং প্রভুহিংয়া হাত্রংদো কা কুং আবেইতা তিংয়ে,হাংপাতানাহা কা ইতা উতা মাজিংকো তামসা আকুহা কুং দাংক্রেং কাটুতা নিও।26আকো সোতা কা কুং তুংসিংসো গাগ্রুমি নিও,আসা য়াংতাওয়াকো লেহদি লেহদিংয়ো।কা সিপুদো আজিপ্পারাং ঙারোরোওয়া তাওয়া আশা নিও।27হাংপাতানাহা নাতিহা কুং সাদিহিংয়া মোংটোকো লিতা মাল্যাতেরোওয়া, নাতিহা আপনিকো পবিত্র দিংঙাকো জুপাহা মাঅ্যাহপারোওয়া।28নাতিহা কাহিংয়া হাত্রংরে মিসিওয়া ন্যাতাবি তিংপামি নিও। নাতিহাকাহিংয়া আপনিকো নাগাইতা য়াংতাপামসা গাগ্রুপারোওয়া।’29“ও ডুওয়া এবাই আসা হুম্রিবাই, য়োংকো আটা দাউদকো তোইতা মেকেদ্যাইপা য়াংবিহা জাংকো চুরোওয়া। আকুহা সিপুয়ে আসা লিইচপুয়ে, আসা হিনিকো দিন চোইপা আকো তোম্যই নিকোরে নিও।30আদো দাউদহা অগমবক্তা নিমকো সোতা ই নুওয়াংহা গেমি নিমগা। সেংজাহা নাপোইমি নিমগা, হাংপাতানাহা সেংজাহা আকো চেংচুবিতাহা আকো গাদিংতা ইচোহিং গাপারোওয়া।31নাগাইসোরাং ই তিংমসা আকুহা খ্রীষ্টকো ঙারোওয়াকো বিষয়তা জাংয়ে, আকুহা মোংটোকো লিতারে মুহুইতেতো, ‘আকো জুপারে মোংটোকো লিতা মাঅ্যাহতো’।32“ই ইশুহিংনাং সেংজাহা ঙাপামি নিও। ই নুওয়াংকোহা কাবি সাক্ছি নিও।33নেহা আকুহা সেংজাকো দাংক্রেং কাটুতা তোরোইচপুমি নিও, আসা আপাকোসো পবিত্র লাংবেকো প্রতিজ্ঞা মুংচায়ে। আসা আকুহা ই লাংবেহা নেহা আকো দিংঙাবিকো তোইতা হোপিমি নিও, হানি নুওয়াং নে নাবি হিংদিংমে আসা তিংদিংমে।34লোডিংবাতা হোমসা দাউদহা সেংজাকো দাংক্রেং কাটুতা মাগাতো, আদো আকুহা এপা জাংয়ে: ‘সেংজাহা কুং প্রভুহিং জাংয়ে, নাতিহা কুং দাংক্রে কাটুতা গা,35হাত্রং চোইপা কা নাতিহিং মেংতাপা জোমবিহিং নাকো কোকোইকো তাংবাতা মেএহ।’36“আকো সোতা ইস্রাইলকো তাংসা প্যাপ্যাম্যাম্যাবিহা গেনেরোওয়া, আকু ইশু, হাংসুহিং নাবিহা ক্রুসতা থ্যইমে, সেংজাহা আকুহিংয়া প্রভু আসা বাচাইওয়া খ্রীষ্ট নিদ্যাসারাং বানাইয়ে।”37পত্রসকো জাংওয়া নুওয়াং হিংমসা দিংঙাবিকো তুংসিংতা কোইপুয়ে, আসা আবিহা পত্রস আসা দোসরা জেংওয়া পোইংবিহিং উইয়ে, “ও আপু এবাই, এপা বেনাহা নেহা কাবিহা হাং জোকোগা?”38আত্রং পত্রসহা জাংয়ে, “নাবি তাংসা আপনি আপনিকো পাপহিং পশ্চতাপ জোমসা পাপহিং ল্যাতে, আসা ইশু খ্রীষ্টকো মিংতা বাপ্তিস্মা লাং, সেংজাহা নাবিকো পাপকো ছমা জোপিরোওয়া, আসা নাবিহা সেংজাকো ঙেরোং পবিত্র লাংবেহিং মুংচারোওয়া।39হাংপাতানাহা ই নাপোইতেওয়াহা নাবি আসা নাবিকো চেংওয়া চেমেবিকো সোতা আসা তানাং তানাং য়ুংবিকো সোতাগা, হাংসু-হাংসুহিং প্রভু য়োংকো সেংজা মোউমে।”40পত্রসহা আবিহিং উইসে নুওয়াংবিসো কোইপামসা জাংয়ে, “নেকো মেংতাওয়া দিংঙাবিসো নাবিহা আপনিহিং বাচাইচা।”41উইসে দিংঙাবিহা পত্রসকো জাংওয়াতা দেংয়ে আসা বাপ্তিস্মা লাংয়ে। আত্রংকো দিন বাপ্তিস্মা লাংওয়া দিংঙাবিহা ৩ হাজার লাংদাংপা নিমি।42আবিহা জেংওয়া পোইংবিহিংপা ঝিকো, সেওয়া জোকো, আসা গাসুমসা চাওয়া আংওয়াতা আসা পাচাইওয়াতা য়ুংচাংমি।43জেংওয়া পোইংবিহা আআংপেপেচপুওয়া কামবি জোমসা উইসে চিহ্নবি তিংপাচাংমি। এপা জিংপুনুওয়া তাংসা দিংঙাবিহা সেংজাকোসো চুসুংপুদাংয়ে।44প্রভুকোতা দেংবিহা হাত্রংদো দোসপাচাংমি। আবিকোতা নিওয়া তাংসা আবিহা পোসুচাংমি।45আবিহা আপনিকো মোংটো-কেতোবি আসা সোংসাবি পিইচামসা হাংসুহিং হাই ঘ্যই আবিহিং পোপিচাংমি।46হাত্রংদো আবিহা য়হুদিবিকো দেমসাতা চিত্তা জোংসুচাংমি, আসা সা-সাতা তাংসা গাগ্রুমসা চাওয়া আংওয়াবি চাসুচাংমি,47আসা হাত্রংদো আবিহা সেংজাহিং তাচাচাংমি দোসরা দিংঙাবিরে আবিহিংয়া জেজেংপা জোচাংমি, আসা উদ্ধার মুংবিহা আবিকো প্যাকোতা প্রভুহা সদাইদিন সিও-সিওপা বেইপাপিয়ে।
The Seed Company