প্রেরিত27
1কাবিহা ইটালি লোইতা ঝাহাদিসো জিংপুমসা হোরো তামসা জাংপুনতেনুওয়া আবিহা পাউলহিংয়া দোসরা জেলতা য়ুংওয়াবিহিংপা টেবো জাইপুকো সেনাকো ক্যাপ্টেইন য়ুলিয়সকোতা ল্যাতেহে।2কাবি এড্রামিটেনোস শহরসো লেমসা এশিয়া জায়গাকো উইসে জাহাজ জাপাওয়া জিংমসা হোদাংওয়া তিকো জাহাজতা বাইমসা হোপে। মাকেডোনিয়া লোইতা নিওয়া থেসলোনিকে শহরসো ওয়াংওয়া আরিসতাকরসরে কাবিহিংপা চিত্তা নিমি।3আকো জুকুং কাবিহা সিদোন শহরতা চোইয়ায়ে। আকু জায়গাতাহা ক্যাপ্টেইন য়ুলিয়াসহা পাউলহিং জেজেংপা জোমসা আকু জায়গাতা নিওয়া ব্যারোবিহিংপা দোসপাকো আসা হাইক্রি ঘ্যইওয়া সেই দাংচোইকো তামসা জাংপিয়ে।4আউসোহা কাবিহা হোয়ে। আদো জাহাজকো নাগাইসোরাং বিংঙা হ্যাওয়াকো সোতা কাবিহা বিংঙা নাপাপুমসা বাচেকো সোতা সাইপ্রস বোইদাকো আরি আরি জিংমসা হোনেয়ো।5কিলিকিয়া আসা পামফিলিয়া লুংবিকো আবেইতা নিওয়া ঝাহাদি পেংপুমসা কাবিহা লুকিয়া লুংবিতা নিওয়া মাইরা শহরতা দেয়োংয়ে।6আউতা ক্যাপ্টেইন য়ুলিয়োসহা আলেক্জাদ্রিয়া শহরসো ইটালি লোইতা হোওয়া জাহাজ দোসুয়ে আসা আকুহা কাবিহিংয়া আকু জাহাজতারাং বাইপায়ে।7বিংঙা নাগাইসো বিওয়াকো সোতা কাবিহা উইসে দিন চোইপা স্যাকা স্যাকাপা নাগাই গ্যইপুমসা কেনিদোস শহরকো আবেইতা দেখায়ে, আউতা দেকানুওয়া বিংঙাহা কাবিহিংয়া আউসো নাগাই হোকো মিচাতো। আকো সোতা কাবিহা ক্রেট বোইদাসো নাপাপুমসা সালমোন তাওয়া জায়গাসো হোয়ে।8উইসে ওয়্যামরা-সিমরাপা বোইদাকো চেব্রে চেব্রে কাবি লাসিয়া শহরকো আবেইতা নিওয়া জেজেংওয়া বান্ডারগা তাওয়া জায়গাতা দেয়োংয়ে।9ঝাহাদিতা হ্যাকো গোইপুমকো সোতা আসা বিংঙা হ্যাওয়া সময় আবেইতা দেয়োংতেওয়াকো সোতা আবিহা আউসো নাগাই হোকো মোচুপুনতেমি। আকো সোতা পাউলহা দিংঙাবিহিংপা হুইয়ে,10“ব্যারোবাই, কাহিংয়া এপা জিংদিংয়ে, নেহা য়াংবিমি তিকো জাহাজতা বাইমসা ইসোবেমি হোনাহা জাহাজ আসা ইতা নিওয়া সোংসা মেংচে দাংপুওয়া মোকো, আদো য়োংকো সাদিরে হাপুকো বেপা নিও।”11আদো ক্যাপ্টেইনহা পাউলকো জাংওয়া নুওয়াং মাহিংতো। আদো আকুহা জাহাজ চালাইওয়া আসা জাহাজকো গিরিওয়াকো জাংওয়া নুওয়াং হিংয়ো।12চিকিংওয়া সময় পেংপাকো সোতা আকু জায়গাহা জাহাজ জাপাকোরে এনতাপা মোতোমি। এপাজিংপুনুওয়া উইসে দিংঙাবিহা হেপা জোমসা জিংদো আউসো হোমসা ফোনিকোস শহর চোইয়াকো কেংদিংমি। ক্রেট বোইদাতা নিওয়া আকু ফোনিকোস শহরহা মাংতা দিতা আসা দাংতা দিতা ন্যাওয়া নিমি। ঝাহাদিতা বিংঙা হ্যাওয়া13মাংসো স্যাকাপা বিংঙা ভিপায়ে। তাংসা দিংঙাবিহা নেহা য়াংবিহা হোকো চুরোওয়া তামসা নোসুয়ে। আবিহা জাপামসা এওয়া জাহাজকো সিংদি দেইমসা আসা জাহাজহিংয়া ক্রেট বোইদাকো আবেই আবেইতা পুরায়ে।14আদো আম্যই নোইতাহা বোইদাবিসোহা টেবো বিংঙা হ্যাপায়ে। আকু বিংঙাহিংয়া দাংকো নুকো বিংঙা তামসা জাংমি।15বিংঙাহা জাহাজহিংয়া তুইপেং লাপাপে আসা আকু বিংঙাকো নাগাইতা কাবিহা হাইরে জোমক্যইতো আসা কাবিহা জাহাজহিংয়া হাংতা হাবা হ্যাচাপুকো তামসা ল্যাপুয়ে।16কোলোদা তাওয়া বোইদাকো মাংতা দেকানতেনুওয়া বোইদাহা বিংঙাহিংয়া আস্যস্যই য়োইপিয়ে আউতারে কাবিহা জাহাজকো নুনুই তাইমসা এওয়া নোওয়াইহিংয়া দেইমসা জাহাজতা এহে।17আকো নোইতা জাহাজ বাংপোইমবিহা টেরবো পার্দিসো তিকো জাহাজহিং য়্যাপুতিহিং হুরাপা তাইয়ে। নেহা জাহাজহা লিবিয়াকো আরিতা বার্পুইবিরিতা জিচাপুকোমে তামসা চুসুংপুয়ে। এপা জিংপুনুওয়া জাহাজ বাংপোইমবিহা জাহাজকো তাম্বু হুইপাপুয়ে আসা জাহাজহিংয়া বিংঙাকো তোইতা ল্যাপুয়ে।18আকু চুসুং-মাইসুংক্যইওয়া বিংঙা ভিওয়া ভিওয়া জিংয়ে আসা আকো জুকুংহা আবিহা জাহাজতা নিওয়া সোংসাবিহা বাদোইপুয়ে।19সাসুংয়ু নোইতা জাহাজ বাংপোইনু ঘ্যইওয়া সোংসাবিরে আপনিকো খুইসোরাং ঝাহাদিতা বাদোইপুয়ে।20উইসে দিন চোইপা বিংঙা টেবো হ্যাওয়াকো সোতা কাবিহা সিনি, পুইমারে মাতিংপুনুওয়া কাবিহা বাচেরো তাওয়া আশারে য়াংপে।21দিংঙাবিহা আমা মাচাওয়াহা উইসে দিন বাংপুনতেমি। পাউলহা তাংসাকো নাগাইতা জামসা জাংয়ে, “আপু এবাই, নাবিহা কুং নুওয়াং হিংপিনেকোগা আসা ক্রেটসোহা ওয়াংমতুকোগা। আত্রংহা কুং জাংওয়া নুওয়াং হিংপিনাহা য়োংকো তোইতা এপাজিংওয়া কোইচ্যাওয়াবিহা মোয়োংকোগা আসা হাইক্রি সোংসাবিরে বাডোইম ঘ্যইকোগা।22আদো কা নেহা জাংরোওয়া মাচ্চুংগে! হাংসুকোরে সাদি মায়াং, জাহাজ মেংচে হ্যাপুরোওয়া।23কা সেংজাকো দিংঙাগা আসা আকুহিং মেংচে সেওয়া জোমগা, আকো ইচো লোডিংবাকো পোইংহা হিনি লিসুং কুং আবেইতা লেমসা জাংয়ে,24‘ও পাউল, মাচ্ছুংগে, নাতিহা রোমি টেবো জাইপুকো আবেইতা হোনেরোওয়া আসা নাকো সোতা সেংজাহা নাতিহিংপা হাদাংওয়া তাংসা দিংঙাবিহিং বাচাইরোওয়া।’25আকো সোতা কুং আপু এবাই, মাচ্চুংগে! হাংপাতানাহা সেংজাকো জাংওয়া নুওয়াং আজিপ্পারাং তাংসা জিংনেরোওয়া তাওয়া কা দেংমি নিও।26নেহা য়াংবিহা ইচো বোইদাকো আরিতা সুচ্চপুরোওয়া।”27কাবিকো জাহাজহা এপা বিংঙাকো প্যাকোতা এড্রিয়াস তাওয়া ঝাহাদিতা হুরাপোইওয়া চৌদ্দ দিন বাংপুনতেমি। লিসুংহা জাহাজ বাংপোইমবিহা ইচো জায়গাকো আরিতা দেখাদাংয়ে তামসা নোয়ে।28এপা জিংপুনুওয়া আবিহা তিকো চোমেংহিং সিংদিসো নোওয়ে। আসা নোওনুহা চাল্লিস মিটার চোমেং নিমি। আস্যই তানাং হ্যামসা ন্যাসারাং নোওনুওয়া তিশ মিটার মেংচে নিমি।29তি আস্যস্যই মেংচে নিমকো সোতা আবিহা জাহাজহিংয়া প্যাটারুংবিতা সুচ্চপুকোমে তামসা চুসুংসুপুয়ে। আকো সোতা আবিহা জাহাজকো নোইস্যাকো ডিচো সিংদিবি হুইপামসা জাহাজহিং কেপায়ে, আসা হাত্রং হাপকুং জিংকোমে তামসা পাচাইসুয়ে।30আকো নোইতাহা জাহাজ বাংপোইমবিহা নাগাই সিংদি হুইপামবেপা জোমসা আত্যই চোংওয়া নোওয়াইহিংয়া জাহাজসো হুইপায়ে আসা ক্যাপুকো কেংয়ে।31আদো পাউলহা ক্যাপ্টেইন আসা সিপাইবিহিং জাংয়ে, “ই জাহাজ বাংপোইমবি ক্যাপুনাহা য়াংবিহা হাংসুরে মাবাচে।”32ই নুওয়াং হিংমসা সিপাইবিহা জাহাজতা তাইমসা এওয়া আত্যইচোংওয়া নোওয়াইহিংয়া সিংদি ঠেমসা তিতা জ্যইপুয়ে।33হাপকুং হোহোইপা জিংপানুওয়া পাউলহা দিংঙাবিহিং হাইক্রি চাওয়াবি চানেরো তামসা জাংয়ে। “নাবিহা সেংদুওয়াকো সোতা মাচাপা য়ুংওয়াহা চৌদ্দ দিন জিংপুনতেহে।34কা নেহা নাবিহিং জাংচারোওয়া, হাইক্রি চাওয়াবি চা। হাংপাতানাহা বাচেকো লাগি য়াংবিহা চানেরোওয়া। মাচ্চুংগে, সেংজাকো জাংমি ত্যাবাপা হাংসুহিংনে হাইরে মাজিংরোওয়া।”35এসে জাংমসা আকুহা কোব্রেং চুংয়ে আসা তাংসাকো আবেইতা সেংজাহিং গারানি তামসা ছিমসা চাদাংয়ে।36আকো নোইতাহা তাংসা মাচ্ছুংপা হাইক্রি চাওয়া-আংওয়াবি চাসুয়ে।37আকু জাহাজতা কাবিহা তাংসা দুইশো ছিয়াত্তর জনা দিংঙা নিমি।38তাংসা গাইপা চাপুনতেনুওয়া জাহাজহিং ফেলেংপাকো তামসা আবিহা আউতা নিওয়া তাংসা গেহুংবিহা বাডোইপুয়ে।39আসা সিনি ত্যইপানুওয়া জাহাজ বাংপোইমবিহা ঝাহাদিকো আরিকো জায়গাহিংয়া নাইমক্যইতো, আদো ঝাহাদিকো আরিকো বার্পুইবিরি তিংয়ো আসা জাহাজহিংয়া আউতা জাপাকো কেংয়ে।40আকো সোতা আবিহা জাহাজ কেপাওয়া সিংদিহিং ঠেমসা লিতা ঝাহাদিতা বাডোইপুয়ে আসা জাহাজহিং কেংক্রেং দাংক্রেং হুরাপা তাইওয়া সিংদিরে হুইপায়ে। আকো নোইতাহা তাম্বুহিং তোইতা তোরোইমসা আবিহা জাহাজহিং বার্পুইবিরিতা পুরাদাংয়ে।41আদো তিকো লিতা নিওয়া মোংটোতা জাহাজহা সুচ্চপুমসা ছুইপুয়ে। আসা নোইস্যা কাটুহা তিকো চুরা লোওয়াকো সোতা ওয়্যাপুদাংয়ে।42আত্রংহা কৈদিবিহা ক্যাপুকোদোওয়া তামসা নোমসা সিপাইবিহা আবিহিংয়া স্যাকো নোয়ে।43আদো ক্যাপ্টেইনহা পাউলহিংয়া বাচাইকো কেংয়ে। আকো সোতা আকুহা হাংসুহিংনে স্যাকো মিচাতো। হাংসু তিসো নোইপুমসা হ্যাকো চুবা নাগাই হ্যাপুই তামসা জাংয়ে।44আসা লেরাহা জাহাজকো হাইক্রি ছুইপুওয়া কেংপ্রাবি চুংচামসা নুবাই হ্যাতু তামসা জাংয়ে। এপা জোমসারাং কাবি তাংসা এনতাপা আরিতা চোইয়ায়ে।
The Seed Company