প্রেরিত22
1“আপু এবাই আসা আপাবাই, নাবিকো নাগাইতা কা জাংনেওয়া কুং নুওয়াং নেহা হিং।”2পাউল হিব্রু ক্যাতা য়্যইওয়া হিংমসা আবিহা চিচিইপা য়ুংয়ে।3পাউলহা জাংয়ে, “কা কিলিকিয়াকো জায়গাকো তার্সোস শহরতা কেওয়া ইচো য়হুদিগা, আদো কা ই য়রুশালেম শহরতা দেমশা উটকেওয়া গামলিয়েলকো নাগাইতা দেয়ো। য়োংকো আটা আজাসোরাং মানেমসা ওয়াংওয়া লিংপাংকো হিগাসো ঝিপাওয়া কা এনতাপা ঝিমি নিও। হিনিয়া নাবিহা সেংজাকো তোইতা হাসেকো জেজেংওয়া তিংপাওয়া নিমমে, কারে এসেকোরাং তিংপায়ে।4কা নাগাইহা মুক্তিকো ন্যাতাতা তেইওয়া দিংঙাবিহিং সিপদাংক্যইপা কোইচ্যাপামি নিমগা। কাহা মেমে আসা পোজাবিহিং প্যইমসা জেলতা সুংচাংমগা।5ই কুং জাংওয়া নুওয়াং আজিপ্পারাংগা তামসা টেবো পাউ আসা জোংসুওয়াকো দিংঙাবিরে জাংকো চুরোওয়া। আবিরাং কাহিংয়া দমস্কসতা নিওয়া য়হুদি আপু এবিকো মিংতা চিঠি পিচায়ে। আসা আকু চিঠিতাহা কাহিংয়া প্রভু ইশুতা দেংওয়া দিংঙাবিহিং প্যইকো অধিকার মুংচামি নিমগা। আকো সোতা কা আবিহিংয়া য়রুশালেমসো পারামসা আবিহিং কোইচ্যাইপাকো দমস্কসতা হোয়ে।”6“দমস্কসতা দেকাদাংনুওয়া বারা বোজেদাংমি। আত্রংহা লোডিংবাসোহা একবিরি চাইচাইপা হাহাইপা কুং তোইতা লারাইয়ে।7কা লিতা ইপে। আত্রংরাং কাহা এপা জাংওয়া শব্দ হিংয়ে, ‘শাউল, ও শাউল, নাতিহা কাহিংয়া হাংপা কোইচ্যাপাদিংগা?’8কাহা জাংয়ে, ‘প্রভু! নাতিহা হাংসুগা?’ প্রভুহা জাংয়ে, ‘কাহা নাসরতকো ইশু, হাংসুহিং নাতিহা কোইচ্যাইপাদিংমে’।9কাহিংপা নিওয়া দিংঙাবিহা হাহাইওয়াহিংয়া তিংয়ে, আদো শব্দহিংয়া মাহিংতো।10কাহা জাংয়ে, ‘ও প্রভু, কা নেহা হাং জোকোগা?’ প্রভুহা কাহিংয়া জাংয়ে, ‘লোমসা দমস্কস শহরতা হোতু, সেংজা নাতিহিং খুইতেওয়া কামবিকো তোইতাহা নাতিহিংয়া আউতারাং জাংরোওয়া।’11আকু চাইচাইপা হাহাইওয়াকো সোতা কাহা মিচো মাতিংপা জিংপুয়ে। কুং ব্যারোবিহা কাহিংয়া ত্যইংপুমসা দমস্কস চোইপা পুরায়ে।12“আকু শহরতা হননিয়া মিং নিওয়া ইচো দিংঙা য়ুংমি। আকুহা মোসাকো লিংপাংহিং পালন জোওয়া তাংজি নিওয়া দিংঙা নিমি। আসা দমস্কসতা য়ুংওয়া য়হুদিবি তাংসা আকুহিং আদর জোচাংমি।13আকু দিংঙারাং কুং আবেইতা ওয়াংয়ে আসা জামসা জাংয়ে, ‘কুং এ শাউল, নাতিহা ন্যাসারাং তিংকো ছুকো।’ আকু এপা জাংওয়া কোকোইত্তা কাহা আকুহিং তিংকো চুয়ে।14আকো নোইতা আকুহা কাহিং জাংয়ে, ‘নাতিহা য়োংকো আটা আজাবিকো সেংজাকো জোকো কেংওয়া গেকো ছুকো তামসারাং আকুহা নাতিহিং জেংমি নিও। নাতিহা তাংজি নিওয়া ইশুহিং তিংকো চুয়ে আসা আকো নামুসো য়্যইওয়া হিংকো চুয়ো!15হাংপাতানাহা নাতিহা আকো প্রমান জিংমসা আপনিকো তিংওয়া আসা হিংওয়া তাংসা নুওয়াংবি দিংঙাবিকো নাগাইতা হিংপানেরোওয়া।16এপা জিংপুনুওয়া নেহা হাংপা গোইপাকোগা? লো আসা বাপ্তিস্মা লাং, আসা ইশুকো মিং লাংমসা আপনিকো পাপসো চোসোপা জিং।’17“আউসোহা কা য়রুশালেমতা লায়োংয়ে আসা দেমসাতা জামসা পাচাইদিংনুওয়া দর্শন তিংয়ে।18কা দর্শনতাহা প্রভুহিং তিংয়ে আসা প্রভুহা কাহিং জাংয়ে, ‘সেন্নেপা য়রুশালেমসো হোতু, হাংপাতানাহা নাতিহা কুং তোইতা জাংওয়া প্রমানবিহা ইকো দিংঙাবিহা মাহিংরোওয়া।’19“কাহা জাংয়ে, ‘ও প্রভু, কুং তোইতা আবি তাংসা গেমি নিও, কা তাংসা জোংসুওয়া সাবিতা নাতিহিং দেংওয়াবিহিং প্যইমসা ডুমসা জেলতা সুংয়ে।20নাতিহিং প্রমান পিচাওয়া স্তিপানহিং য়ুতিকো-য়ুতি জিংপক্যইপা স্যানুওয়া কা আউতা নিমগা। আকুহিং স্যাওয়াবিহিংপা চাংসুমসা কাহা আবিকো আংদুংহিং খুইমসা য়ুংদিংমগা।’21আদো প্রভুহা জাংয়ে, ‘নাতিহা হ্যাতু, নাতিহিংয়া কা টানাং-টানাং চোইপা দোসরা জ্যাবিকোতা নিংপুরোওয়া।’”22এসে জাংপুনতেনু চোইপা দিংঙাবিহা পাউলকো নুওয়াং হিংদিংমি। আদো আকো নোইতা আবিহা ঙাসুমসা জাংসুয়ে, “ইহিংয়া স্যানেরোওয়া! ইহিংয়া স্যানেরোওয়া! নেহা ইহিংয়া মাস্যাপা ল্যামতু।”23এপারাং আবিহা ঙাসুমসা ওয়াংয়ে আসা আপনি আপনিকো গুইওয়া আংদুংবি লুমসা ডিংবাতা দুনা য়িমসা ঙাসুয়ে। 24ই তিংমসা রোমি সেনাপতিহা পাউলহিং নাপোতা পুরামসা সাটাসো পোকো তামসা জাংয়ে, “সাটাসো পোনুওয়া য়হুদিবিহা হাংপাসা সেদ্রাংপামে” আকু নুওয়াংহা ইহা জাংকো দোয়ে তামসা।25সিপাইবিহা সাটাসো পোওকো তাইনুওয়া পাউলহা আবেইতা জাওয়া ক্যাপ্টেইনহিং জাংয়ে, “নাতিহা রোমি নাগরিকহিংয়া দোষ মাতিংপাপা পোচামুংকোগা? রোমি আইনহা এপা জোকো জাংমি নিংগা?”26ক্যাপ্টেইনহা সেনাপতিকোতা হোমসা ই নুওয়াং হিংপামসা জাংয়ে, “ও উটকেওয়া! নাতিহা হাং জোকো কেংদাংগা? নাতিহা গেমগা? ই দিংঙাহা রোমি নাগরিকরাং গুং!”27ই নুওয়াং হিংমসা সেনাপতিহা নাপোতা হোমসা পাউলহিং উইকায়ে, “নাতিহা আজিপ্পারাং রোমি নাগরিকগা?”
পাউলহা জাংয়ে, “ওই, কাহা রোমি নাগরিকরাং!”28সেনাপতিহা জাংয়ে, “কাহা উইসে ন্যাস্যা পিচামসা রোমি নাগরিক জিংমগা।”
পাউলহা জাংয়ে, “কাহা কেনুসোরাং রোমি নাগরিক।”29এপা জাংওয়া হিংতানি পাউলহিং ডুকো লেওয়া দিংঙাবিহা নুনুই ওয়েংপে, হাংপাতানাহা পাউলহা রোমি নাগরিক জিংমসারে আকো দোষ মাতিংপাপা এপা সাংগ্লি জিংপাওয়াকো সোতা আকু সেনাপতিরে চুসুংপুয়ে।30য়হুদিবিহা পাউলহিংয়া হাংপা দোষ তিংপামে, আকো নুওয়াংহা সেনাপতিহা গেকো কেংদিংমি। আকো সোতা জুকুং হাপকুংসো সেনাপতিহা মাটা পাউবি আসা লাচি জাংওয়াকো তাংসা দিংঙাবিহিং মোউমসা জোংসপাকো জাংয়ে, আসা পাউলহিং পুরামসা তাংসাকো প্যাকোতা জাপায়ে।
পাউলহা জাংয়ে, “ওই, কাহা রোমি নাগরিকরাং!”28সেনাপতিহা জাংয়ে, “কাহা উইসে ন্যাস্যা পিচামসা রোমি নাগরিক জিংমগা।”
পাউলহা জাংয়ে, “কাহা কেনুসোরাং রোমি নাগরিক।”29এপা জাংওয়া হিংতানি পাউলহিং ডুকো লেওয়া দিংঙাবিহা নুনুই ওয়েংপে, হাংপাতানাহা পাউলহা রোমি নাগরিক জিংমসারে আকো দোষ মাতিংপাপা এপা সাংগ্লি জিংপাওয়াকো সোতা আকু সেনাপতিরে চুসুংপুয়ে।30য়হুদিবিহা পাউলহিংয়া হাংপা দোষ তিংপামে, আকো নুওয়াংহা সেনাপতিহা গেকো কেংদিংমি। আকো সোতা জুকুং হাপকুংসো সেনাপতিহা মাটা পাউবি আসা লাচি জাংওয়াকো তাংসা দিংঙাবিহিং মোউমসা জোংসপাকো জাংয়ে, আসা পাউলহিং পুরামসা তাংসাকো প্যাকোতা জাপায়ে।
The Seed Company