প্রেরিত23
1পাউলহা জোংসুওয়াকো হুরাপা ন্যইমসা জাংয়ে, “ও আপু এবাই, হিনি চোইপা কা কুং নোওয়াবিহিং সেংজাকো নাগাইতা এনতাপা এমি নিও।”2পাউলকো ই নুওয়াং হিংমসা টেবো পাউ হোনোনিয়াহা আকো আবেইতা জাওয়া দিংঙাবিহিং পাউলকো নামুতা য়াপাকো তামসা জাংয়ে।3আদো পাউলহা হোনোনিয়াহিংয়া জাংয়ে, “ও হাংপাপা চুইমাং ন্যাওয়া ব্যারা! নাতিহিংনে সেংজাহা য়াপারোওয়া। নাতিহা লিংপাংতা কাহিং ন্যায় জোকো য়ুংমসারে ন্যায় মোজোপা কাহিংয়া হাংপাসা ডুপাদাংমগা?”4পাউলকো আবেইতা নিমবিহা জাংসুয়ে, “নাতিহা সেংজাকো জাপাওয়া টেবো পাউহিংনে য়েংমগা?”5পাউলহা জাংয়ে, “আপু এবাই, আকুরাং টেবো পাউগা তামসা জাংওয়া নুওয়াং কা মেগেয়াংমি। আপনি দিংঙাবিকো তোইতা অধিকার জোওয়া মাটাকো তোইতা মেংতাপা মোতুপা য়্যইওয়া নুওয়াং য়্যইমতুরোওয়া তামসা তাংজিকো হিগাতা লাওয়া নুওয়াংহা কা গেমি নিও।”6জোংসুওয়াতাহা সদুকি আসা ফরিসিবিকো দিংঙাবিহা গাদিংয়ে তাওয়া নুওয়াং গেমসা পাউলহা সাডিংপা ঙামসা জাংয়ে, “আপু এবাই, কা ফরিসিবিকো চেংওয়া ফরিসিরাংগা। সিপুওয়া দিংঙাহা ন্যাসারাং ঙারোমগা তামসা জাংওয়া আশা জোওয়াকো সোতা ইতাহা কুং নুওয়াংবি জিংদিংয়ো।”7পাউল ই নুওয়াং জাংওয়াকো সোতা সদুকি আসা ফরিসিবিকো প্যাকোতা স্যাসু লুসুদাংয়ে আসা তাইবিলারাই ওয়েংসপুয়ে।8হাংপাতানাহা সদুকিবিহা দিংঙা সিমমা ন্যাসারাং ঙারোমগা তাওয়া নুওয়াংতা মাদেংমগা। লোডিংবাকো পোইং আসা লাংবেহা নিকোরে মোতো তামসা জাংচাংমি। আদো ফরিসিবিহা আকু সুংচো নুওয়াংবিতাহা দেংমি।9আকো সোতা জোংসুওয়াতা টেবো চেচোওয়্যাইপা জিংপুয়ে। ফরিসিবিকো ইচো নিহসো তাংজিকো উটকেওয়াবিহা জামসা সদুকিবিহিং সিওপা মেংতাপা জোমসা জাংয়ে, “কাবিহা ই দিংঙাকোতাহা হাইরে দোষ মাতিংতো। ই দিংঙাহিংপা লাংবে আসা লোডিংবাকো পোইংবি য়্যইমরাং গুং তাওয়াতা হাং জিংপুমগাসা!”10আবিকো স্যাসুওয়াহা নাগাইকোরোমা সিয়োপুয়ে। স্যাসুওয়াতা পাউলহিংয়া য়্যাসু-ডুসুমসা স্যাপুকোমে তামসা চুসুংমসা সেনাপতিহা পাউলহিংয়া জোংসুওয়া সাসো নোপামসা সিপাইবিকো সাতা পুরাতু তামসা সিপাইবিহিং নিংপুয়ে।11আত্রংকো লিসুংরাং প্রভুহা পাউলকো আবেইতা লেমসা জাংয়ে, “সাডিংপা য়ুং, মাচ্ছুংগে! ই য়রুশালেমতাহা কুং নুওয়াং জাংমি ত্যাবাপারাং নাতিহা রোমতারে জাংয়ানেরোওয়া।”12আকো জুকুং হাপকুংসো ইচো নিহসো য়হুদিবিহা জোংসুমসা পাউলহিং স্যাকো হুইসুয়ে আসা আবিহা এপা জাংসুমসা নাপোইসুয়ে, “পাউলহিং মাস্যাইনু চোইপা কাবিহা আমারে মাচারো আসা তিরে মাআংরো।”13এপারাং স্যারোওয়া তামসা নাপোইওয়াবিহা নিহকাইচোরোমা সিয়োপা নিমি।14আকো নোইতা আবিহা মাটা পাউবি আসা লেরা য়হুদি মাটা ওয়ারাংপাবিকোতা হোমসা জাংয়ে, “কাবিহা পাউলহিং মাস্যানু চোইপা হাইরে মাচারো তামসারাং নাপোইমি নিনা।15নেহা নাতিবিহা সেনাপতিহিং ‘জোংসুওয়াকো কাটুসো পাউলকো দোসরা নুওয়াংবিরে হিংরো’ তামসা পাউলহিং সাসো নোপাপি। আত্রংহা জোংসুওয়াতা ওয়াংপাওয়া কোকোইত্তা কাবিহা আকুহিংয়া ন্যাতাতারাং স্যাপুরোওয়া।”16আদো আবিকো পাউলহিং স্যারো তামসা নোওয়া নুওয়াংহা আকো দাহা সিদা চ্যইয়ে। আকুহা সেনাপতিকো সাকো নাপোতা হোমসা ই নুওয়াংহা পাউলহিং হিংপায়ে।17পাউলহা ইচো ক্যাপ্টেইনহিং মোউমসা জাংয়ে, “ই পোজাহা সেনাপতিহিংপা দোষপামসা হাইক্রি জাংকো নিনাহে ইহিংয়া আকোতা সাপি।”18ক্যাপ্টেইনহা পাউলকো দাহিংয়া সেনাপতিকোতা সামসা জাংয়ে, “কৈদি পাউলহা কাহিং মোউমসা ‘ই পোজাকো হাইক্রি নুওয়াং জাংকো নিনাহে’ তামসা জাংওয়াকো সোতা কা নাকোতা পারাপিমি নিনা।”19সেনাপতিহা আকো খুই চুংমসা আস্যই তানাং পুরামসা উইয়ে, “হাং জাংকো নিংগা? জাংপুই।”20পোজাহা জাংয়ে, “জুকুং য়হুদিবিহা ‘পাউলহিংয়া জোংসুওয়াতা দোসরা নুওয়াং উইকো মুংচাকো তামসা’ নাকোতা জাংরো তাসুমি নিও।21আদো নাতিহা আবিকো নুওয়াংহা মাহিংগে! হাংপাতানাহা নিহকাইচোরোমা সিয়োপা য়হুদিবিহা ‘পাউলহিং মাস্যাপা হাইরে মাচারো আসা তিরে মাআংরো’ তামসা নাপোইপুনতেমি নিও। আবিহা নেহা আকুহিং স্যাকো গুংসুদিংয়ো আসা নাতি হাত্রং জাংকোমে তামসা খুইসুদিংয়ো।”22ই নুওয়াং হিংতেনুওয়া সেনাপতিহা পোজাহিং ই নুওয়াং নাতিহা কাহিং জাংয়ে তামসা হাংসুহিংনে মাহিংপাপি তামসা নিংপুয়ে।23আকো নোইতা সেনাপতিহা নিহসো ক্যাপ্টেইনহিং মোউমসা জাংয়ে, “কইসোরিয়া শহরতা হোকো দুইশো সিপাইবি, সুংকাইসো ত্যাচো ওইংঙাতা বাইওয়া সিপাইবি আসা দুইশো লেংজা পুউওয়া সিপাইবিহিং তৈয়ার জো। আবিহা জিরুং নয় বাজি কাচিতারাং হোকো তৈয়ার জিংনেরোওয়া।24পাউলকো বাইওয়া ওইংঙাবিরে তৈয়ার জো, আসা আকুহিং এনতাপা টেবো কাইজি পেলিকোসকোতা পুরাতু”।25এসে জাংপুনতেনুওয়া আকুহা পেলিকোসহিং এপাজিংওয়া ইচো চিঠি লায়ে।26“টেবো কাইজি ফেলিকোস, কা কলেদিয়োস লুসিয়োসসো গারানি!27পাউল তাওয়া ই দিংঙাহিং য়হুদিবিহা স্যাকো তামসা প্যইমি নিও, আদো ইহা রোমিকো দিংঙা গুং। ই নুওয়াং সিদা চ্যইমসা কাহা আপনিরাং সিপাইবিহিং পুরামসা ইহিংয়া আউসো ওয়েংপামসা পারায়ে।28ইহা হাং মোতুপা জোমে তামসা কা য়হুদিবিকো জোংসুওয়াতারে হোরায়ে।29আদো ইহা সিনেকো বেপা আসা জেলতা তুংমসা এনেকো বেপা মেংতাওয়া হাইরে মোজোয়াংতুং। আকো দোষহা আবিকো লিংপাংকো তোইতা উইপুওয়াকো তোইতা মেংচেগুং।30য়হুদিবিহা ই দিংঙাহিংয়া স্যাকো মৌকাতা নিও তামসা জাংওয়া নুওয়া হিংওয়াকো সোতা ইহিংয়া তাত্রিংপা কা নাকোতা নিংপুদাংমি নিও। ইহিং দোষ লাগাইওয়া য়হুদিবিহিংনে নাকোতারাং তাংসা ল্যাপু তামসারাং কা আজ্ঞা পিচামি নিও।”31আকো সোতা সিপাইবিহা সেনাপতিকো জাংওয়া সেই পাউলহিং পুরামসা হোয়ে। আবিহা পাউলহিংয়া আকু লিসুংরাং এন্টিপাটিস শহর চোইপা সায়ে।32আকো জুকুংহা তেইওয়া সিপাইবিহা পাউলহিংয়া ওইংঙাতা বাইওয়া সিপাইবিকোতা এতেমসা আবিহা য়রুশালেমতা লারেহে।33আবিহা কইসোরিয়াতা চোইয়ায়ে আসা পাউলহিং টেবো কাইজিকোতা সেনাপতিকো চিঠি নিপারাং স্যইপুয়ে।34আকু চিঠি পড়াইমসা টেবো হাকিমহা পাউলহিং উইয়ে, “নাকো সাহা হাংতাগা?”
পাউলহা জাংয়ে, “কাহা কিলিকিয়া জায়গাসো উটকেওয়া।”35আসা টেবো কাইজিহা জাংয়ে, “এপা বেনাহা নাতিহিং মেংতাপা জোমবি ইতা দেয়োংনু মেংচে য়্যইসুরো।” আকো নোইতা টেবো কাইজিহা পাউলহিং এনতাপা খুইমসা হেরোদ জাইপুকো জেলতা একো তামসা জাংয়ে।
পাউলহা জাংয়ে, “কাহা কিলিকিয়া জায়গাসো উটকেওয়া।”35আসা টেবো কাইজিহা জাংয়ে, “এপা বেনাহা নাতিহিং মেংতাপা জোমবি ইতা দেয়োংনু মেংচে য়্যইসুরো।” আকো নোইতা টেবো কাইজিহা পাউলহিং এনতাপা খুইমসা হেরোদ জাইপুকো জেলতা একো তামসা জাংয়ে।
The Seed Company