প্রেরিত21
1এপিসিস মন্ডলিকো মাটা দিংঙাবিহিংপা নোপুনতেনুওয়া তিকো জাহাজসোহা গেংপা কোস তাওয়া বোইদাতা কাবিহা দেকায়ে। আকো জুকুংহা রোদস বোইদাতা দেকায়ে আসা আউসোহা পোতারা শহরতা দেয়োংয়ে।2আউতা কাবিহা ফৌনিকে লোইবিতা চোইপা হোওয়া জাহাজ মুংয়ে আসা আউতারাং বাইপুমসা হোপুয়ে।3কাবিহা সাইপ্রস বোইদাকো আবেইতা আকো ম্যাম্যাচেসো সিরিয়া লোইবিতা হোয়ে। সিরিয়া জায়গাকো তুরোস তাওয়া শহরতা দেকামসা জাহাজসোহা সোংসাবি নোপাকো জাপায়ে।4আত্রংহা কাবিরে উইয়ে, আসা আউতা য়ুংওয়া প্রভুকো য়োংতোংবিহিং কাবিহা দোসপামসা হাতি ইয়্যা চোইপা আবিহিংপারাং য়ুংয়ে। পবিত্র লাংবেসো জাংওয়া হিংমসা আবিহা পাউলহিং য়রুশালেমতা মোহোকো জাংয়ে।5আদো হাতি ইয়্যা চোইপা য়ুংপুনতেনুকো নোইতাহা আবিকো প্যাকোসো নোপুমসা হোপুয়ে। আউতা নিওয়া প্রভুহিং দেংওয়া আপু এবি, মেমেবি আসা চেংচুংবি কাবিহিংয়া শহরকো বাইরে চোইপা সারেকো লেহে। কাবিহা তাংসা ঝাহাদিকো আরিতা তুরুই চুনুইমসা পাচাইসুয়ে।6আকো নোইতাহা কাবিহা আউসো নোপুনতেনুওয়া জাহাজতা বাইয়ে আসা আবিহা আপনিবিকো সাতা লাকাপে।7তুরোস শহরসোহা কাবিহা টোলেমাইস শহরতা দেকামসা জাহাজসো ঊইয়ে। কাবিহা আউতা নিওয়া প্রভুহিং দেংওয়া দুওয়া এবিহিং দোসপাকো হোয়ে। আসা সাইয়ুহা আবিহিংপারাং য়ুংপে।8আকো জুকুংহা আউসো নোমসা কাবিহা কইসোরিয়া শহরতা দেকায়ে। আউতাহা কাবিহা প্রভুকো এনতাওয়া দেরেং হিংপাওয়া ফিলিপকো সাতা য়ুংয়ে। ফিলিপহা য়রুশালেমতা সেওয়া জোকো জেংওয়া নীচোতাহা ইচো দিংঙা নিমি।9আউতাহা দিচো বিয়ৌ মাজিংয়াংওয়া চেমেবি নিমি। আবিকোতাহা অগমবাণী য়্যইওয়া ঙেরোং নিমি।10কাবিহা সাইয়ু নিহয়ু ফিলিপকো প্যাপ্যাম্যাম্যাবিহিংপা য়ুংনুওয়া য়হুদিয়া লুংবিসো অগাবোস মিং নিওয়া ইচো অগমবক্তা কাবিকোতা লেহে।11আকুহা পাউলকো বুজিংওয়া কোংন্যা নোপামসা আপনিকো খুই আসা কোকোইহিং আকু বুজিংওয়াসোরাং জিংমসা জাংয়ে, “পবিত্র লাংবেহা এপা জাংমি নিও, ‘য়রুশালেমতা হোনাহা য়হুদি মাটাবিহা ই বুজিংওয়াকো গিরিওয়াহিংয়া এপা জোমসারাং তাইরোওয়া আসা দোসরা জ্যাবিকোতা স্যইপুরোওয়া’।”12ই নুওয়াং হিংমসা কাবি আসা আউতা নিওয়া দিংঙাবি তাংসা পাউলহিংয়া য়রুশালেম মোহোকো তামসা জাংসুয়ে।13আদো পাউলহা জাংয়ে, “নাবিহা হাংপাসা এপা কাইসুমসা কুং তুংসিংহিং কোইচ্যাপাকো কেংমগা? কাহা য়রুশালেমতা সুংচাপুকোদাং মোকো, আদো কাহা প্রভু ইশুকো সোতা সিকোরে তৈয়ার নিও।”14পাউলহিং য়োইকো মোচুনুওয়া কাবিহা “সেংজাকো জোকো কেংওয়া তাংসা জিংকো” তামসা চেকেপা য়ুংপে।15আকো নোইতা কাবিহা আপনিকো সোংসাবি তৈয়ার জোমসা য়রুশালেমকো ন্যাতা হোপুয়ে।16কইসোরিয়াতা নিওয়া প্রভুতা দেংওয়া ইচো নিহসো আপু এবিরে কাবিহিংপা লেহে। আবিহা কাবিহিংয়া সাইপ্রস বোইদাসো লেমসা য়ুংওয়া নাগাইসোরাং প্রভুতা দেংওয়া মনাসোনকো সাতা জিংপাকো সায়ে।17কাবি য়রুশালেমতা চোইয়ানুওয়া আকো মন্ডলিকো প্রভুকোতা দেংওয়াবিহা য়াংতামসা কাবিহিং য়ুংকো পিচায়ে।18আকো জুকুং পাউলহা কাবিহিং পুরামসা য়াকুবকো সাতা হোরায়ে। য়াকুবকো সাতা য়রুশালেম মন্ডলিকো তাংসা মাটা ওয়ারাংপাবি দেরেওয়া নিমি।19দোসুনতেনুকো নোইতাহা পাউলহা তাংসা ওয়ারাংপাবিকো প্যাকোতা এনতাওয়া দেরেং হিংপানুওয়া সেংজাহা হেপা জিংওয়া কামবি জোমমে, আকু তাংসা আবিহিং ল্যায়ে।20পাউলকো জাংওয়া হিংমসা আবি তাংসা সেংজাহিং তাচায়ে। আকো নোইতা আবিহা পাউলহিং জাংয়ে, “ইতারে হাজার হাজার য়হুদিবিহা প্রভুকো তোইতা দেংমসা মোসাকো পিচাওয়া লিংপাংতা জাংওয়া সেই পালন জোদিংয়ো।21নেহা ‘মোসাকো লিংপাংতা জাংতেওয়া জোমঘ্যই’ আসা আপেবিকো জুপাকো খতনারে জোমঘ্যই। আসা য়হুদিবিকো জাংওয়াতারে তেইমঘ্যই তামসা উদ্যাতা য়ুংওয়া য়হুদিবিহিং নাতিহা ঝিপাদিংত্যাহ্যা তাওয়া নুওয়াং আবিহা হিংমি নিও।22এপা জিংপুনুওয়া নেহা কাবিহা হাং জোকোগা? নেহা আজিপ্পা নাতিহা ইতা ওয়াংমি নিও তামসা আবিহা হিংরোওয়া।23আকো সোতা কাবিকো জাংওয়া হিংপি। ইতাহা নেহা নাপোইসুমসা য়ুংসুওয়া দিচো দিংঙাবি নিও, আসা আবিকো নাপোইওয়া সময় ত্যইনতেয়ো।24নেহা নাতিহা আবিহিং পুরামসা দেমসাতা হোমসা চোসোপা জিংওয়া কামতা ভাগ লাংচা। আবিকো পুরিং লুইপাকো জাং, আসা ন্যাস্যাবিহা নাতিরাং তাপি। এপারাং নাতিহা লিংপাং মানেওয়া তিংমসা নাতিহিং চুওয়া দোষহা আজিপ্পা মোকোমুং তামসা তাংসা দিংঙাবিহা সিদা চ্যইরোওয়া।25আদো দোসরা জ্যাকো প্রভুহিং দেংওয়া দিংঙাবিহিংয়া মুর্তিকো নাগাইতা লেংপাওয়া চাওয়াবি মাচাকো, য়ুতি মাআংকো আসা নেটোং এমসা স্যাওয়া সেংচেংকো বিয়া মাচাকো আসা নুংনাংসুওয়াসো বার্গাং য়ুংকো তামসা কাবি নোমসা চিঠি লামসা কাইপুনতেমি নিও।”26আকো সোতা আকো জুকুং পাউলহা আকু দিচো দিংঙাবিহিং পুরামসা আবিহিংপা আপনিহিংনে চোসোপা জোয়ে। আসা আকো নোইতা পাউলহা চোসোপা জিংমসা নাপোইওয়া ত্যইপামসা বলি পিচাওয়া দিনহা হাত্রংমে তাওয়া নুওয়াংহা পাউবিহিং সিদা চ্যইপাকো দেমসাকো নাপোতা হোয়ে।27নাপোইমসা সানীয়ুকো দিন জিংপুনতেমি। আত্রংহা এশিয়া জায়গাসো লেওয়া য়হুদিবিহা পাউলহিং দেমসাতা তিংয়ে। আবিহা আউতা নিওয়া উইসে দিংঙাবিহিং দুদুইপায়ে আসা পাউলহিং প্যইপামসা28ঙামসা জাংয়ে, “লেই, ইস্রাইলকো দিংঙাবাই য়ুজ্রু। ই দিংঙারাংগা ইতা উতা হ্যামসা য়াংবি ইস্রাইলিবিকো তোইতা মেংতাপা য়্যইওয়াহা! মোসাকো লিংপাং মিঝিকো আসা দেমসাতা জেসাং মুহুইকো তামসা ঝিপাওয়াহা ইরাংগা। আকো তোইতা ইহা দোসরা জ্যাকো দিংঙাবিহিংয়া দেমসাতা পারামসা পবিত্র জায়গাহিংয়া অপবিত্র জোপুমি নিও।”29হাংপাতানাহা আবিহা এপিসিসসো লেওয়া দোসরা জ্যাকো দিংঙা ত্রপিমোসহিংয়া পাউলহিংপা শহরতা তিংমি নিমি। পাউলহা আকুহিংয়া দেমসাকো নাপোতা পারায়ে তাওয়া আবিহা নোদিংমি নিমি।30ই নুওয়াংকো সোতা তাংসা শহরবিতা চেচ্চোওয়্যাইপা জিংপুয়ে আসা দিংঙাবিহা হুরাপা দেপায়ে। আবিহা পাউলহিংয়া হেইসোইমসা বাইরে নোপায়ে আসা আত্রংতারাং দেমসাকো লাপুং গিইপুয়ে।31আবিহা পাউলহিংয়া স্যাপুইদাংতেমি। আত্রংরাং য়রুশালেমকো তাংসা শহরবিতা স্যাসু চোংসুপুদাংতেয়ো তাওয়া দেরেং রোমি সেনাপতিহা হিংয়ে।32আকুহা তাত্রিংপা সিপাইবি আসা কেপ্ট্যাইনবিহিং পুরামসা ঠুইপুমসা দিংঙাবিকো প্যাকোতা হোয়ে। আবিহিং ওয়াংপাওয়া তিংমসা পাউলহিং ডুদিংওয়া দিংঙাবিহা ডুকো ল্যায়ে।33সেনাপতিহা পাউলহিং প্যইয়ে আসা নিহসো সাংগ্লিসো জিংকো জাংয়ে আসা দিংঙাবিহিং উইয়ে, “ইহা হাংসুগা আসা হাং জোংগা?”34আদো উইসে নিওয়া দিংঙাবিতাহা লেরাবিহা দোসরা নুওয়াং আসা লেরাবিহা দোসরা নুওয়াং জাংসুয়ে। আকো সোতা সেনাপতিহা আজিপ্পা নুওয়াংহা হাংমমে কোইকোরাং মোচুতো। এপা জিংপুনুওয়া পাউলহিংয়া সিপাইবিকো য়ুংওয়াতা পুরায়ে।35সিপাইবিহা পাউলহিং পুরামসা হাদাংনুওয়া উইসে দিংঙাবিহা আকো নুনুই হুইসোইয়ে। কাইবুসো তোইতা হোদাংনুওয়া দিংঙাবিহা পাউলহিং স্যাকো কেংয়ে, এপা জিংপুনুওয়া দিংঙাবিসো বাচাইকো তামসা সিপাইবিহা আকুহিংয়া পুউপুমসা পুরায়ে।36আত্রং চোইপা দিংঙাবিহা পাউলহিং স্যানেরোওয়া তামসা চেচ্চোওয়্যাইপা ঙাসুদিংমি।37সিপাইবিকো সাকো নাপোতা হোদাংনুওয়া পাউলহা সেনাপতিহিংয়া গ্রিক ক্যাসো জাংয়ে, “কা নাকো নাগাইতা হাইক্রি জাংকো চুকোগা?”
সেনাপতি জাংয়ে, “নাতিহা গ্রিক ক্যারে গেমগা?38নাতিহা আকু চার হাজার কুইমবিকো গিরি মিশ্রি মোকোমগা, হাংসু নেগাতিগা স্যাসপাতেমসা চিচ্চোওয়া জায়গাতা পুরামি নিমমে?”39পাউলহা জাংয়ে, “কা মোকোমি, কাহা কিলিকিয়া জায়গাকো এনতাওয়া মিং নিংওয়া তারোস শহরতা কেওয়া ইচো য়হুদি। কাহিং ই দিংঙাবিকো নাগাইতা হাইক্রি য়্যইকো পিচা।”40সেনাপতিহা য়্যইকো পিচায়ে আসা পাউলহা কাইবুতা জামসা দিংঙাবিহিং চেকেপা য়ুংকো তামসা খুইসো লাবে চামসা জাংয়ে। দিংঙাবিহা চিচোপা জিংপুনতেনুওয়া পাউলহা হিব্রু ক্যাসো জাংয়ে।
সেনাপতি জাংয়ে, “নাতিহা গ্রিক ক্যারে গেমগা?38নাতিহা আকু চার হাজার কুইমবিকো গিরি মিশ্রি মোকোমগা, হাংসু নেগাতিগা স্যাসপাতেমসা চিচ্চোওয়া জায়গাতা পুরামি নিমমে?”39পাউলহা জাংয়ে, “কা মোকোমি, কাহা কিলিকিয়া জায়গাকো এনতাওয়া মিং নিংওয়া তারোস শহরতা কেওয়া ইচো য়হুদি। কাহিং ই দিংঙাবিকো নাগাইতা হাইক্রি য়্যইকো পিচা।”40সেনাপতিহা য়্যইকো পিচায়ে আসা পাউলহা কাইবুতা জামসা দিংঙাবিহিং চেকেপা য়ুংকো তামসা খুইসো লাবে চামসা জাংয়ে। দিংঙাবিহা চিচোপা জিংপুনতেনুওয়া পাউলহা হিব্রু ক্যাসো জাংয়ে।
The Seed Company