প্রেরিত20
1আকু চেচ্চোওয়াইওয়া চিচোপা জিংপুনতেনুওয়া প্রভু ইশুকো য়োংতোংবিহিংয়া মোউমসা পাউলহা আবিহিংয়া দেংওয়াতা সাডুংপা জিংকো তামসা আউসো নোমসা মাকেডোনিয়া জায়গাতা হোয়ে।2আউতা দেকানতেনুওয়া জায়গা জায়গতা হোমসা প্রভুকো য়োংতোংবিহিংয়া সাডুংপা জিংকো তামসা আউসো নোপে। আকো নোইতা আকুহা গ্রিক জায়গাতা দেয়োংয়ে,3আসা তারি সুংরি চোইপা আউতারাং য়ুংয়ে। আকো নোইতা পাউলহা তিকো জাহাজতা বাইপুমসা গেংপা সিরিয়া জায়গাতা হোরো তামসা নোয়ে। আদো হোদাংনুওয়া য়হুদিবিহা আকো তোইতা মেংতাপা নোদিংয়ো তামসা জাংওয়া নুওয়াং আকুহা সিদা চ্যইয়ে। এপা জিংপুনাহা আকুহা জাহাজসো মোহোপা তেইপুমসা মাকেডোনিয়া জিংমসা হোরো তামসা নোয়ে।4আকুহিংপা দোসরা দিংঙাবিরে নিমি। আবিহা বেরিয়া শহরতা য়ুংওয়া পুরোসকো চেংওয়া সোপাত্রস, থেসলোনিকে শহরতা য়ুংওয়া আরিসতাকরস আসা সিকোন্দস, দুর্বি শহরতা য়ুংওয়া গায়োস, তিমোথী আসা এশিয়া জায়গাসো লেওয়া টুকিকোস আসা ত্রফিমোস নিমি।5আবিহা কাবিরোমা নাগাই হোয়ে, আসা কাবিহিং ত্রোআস শহরতা খুইমসা য়ুংয়ে।6কাবিহা নিস্তার মানক্যা চাপুনতেনুকো নোইতা ফিলিপ্পী শহরসো ঝাহাদিকো ন্যাতা জিংমসা হোমি নিমি আসা সাঙায়ুকো নোইতা আবিহিংয়া ত্রোআস শহরতা দোসুয়ে। আউতা কাবিহা হাতি ইয়্যা চোইপা য়ুংয়ে।7আইতাবার জিরুং কাবি আউতা নিওয়া প্রভুকো য়োংতোংবিহিংপা প্রভু ভোজ আংকো সোতা আউতা জমা জিংয়ে। পাউলহা আবিকো প্যাকোসো জুকুং হাপকোংসো নোনেকো নিমসা লিসুং চোইপা য়্যইসু-জাংসুয়ে।8কাবিকো জমা জিংওয়াকো তোইকো সিরিতা উইসে দিব্রিবি লারাইদিংওয়া নিমি।9য়ুতিকোস তাওয়া ইচো পোজা চোব্যইতা গাদিংওয়া নিমি। পাউল য়্যইওয়া য়্যইওয়া কোকোইত্তা আকু পোজাহা জিংদাংপুমসা উওয়া-উওয়া কোকোইত্তা জিংজুয়ে। আসা তিন তালাসোহা লিতা মোংটোতা হুইচায়ে। আকুহিং লোপাকো হ্যানুওয়া আকুহা সিপুনতেমি নিমি।10আত্রংহা পাউল লিতা ঊইমসা আকুহিং ওয়্যাতোংমসা আকো হুরাপা নিওয়া দিংঙাবিহিং জাংয়ে, “নাবিহা মাচ্চুংগে, হাংপাতানাহা ই পোজাহা ঙারোমি নিও!”11আকো নোইতা আবিহা তোইকো সিরিতা হোয়ে আসা তাংসা য়ুসুমসা প্রভু ভোজ চায়ে। প্রভু ভোজ চাপুনতেনুকো নোইতা পাউলহা মাজেংয়াংনু চোইপা আবিহিংপা য়্যইসুয়ে। আকো নোইতা আকুহা আউসো নোমসা হোপুয়ে,12আসা য়োংতোংবিহা আকু পোজাহিংয়া সাতা সাপিয়ে। আকু পোজা ঙারোমকো সোতা আবিহা তাংসা গাগ্রুসপে।13ত্রোআসসোহা পাউলহিং ল্যামসা কাবি তাংসা তিকো জাহাজ বাইমসা আসোস শহরতা হোয়ে। পাউল মেংচে আসোস চোইপা তেইপুমসা হোরো তাওয়াকো সোতা আকুহা আপনিহিং আসোসতা দেকানু মেংচে তিকো জাহাজতা বাইরো তামসা নোয়ে।14কাবি আসোসতা চোইয়ানতেনুওয়া আকুরে লেমসা জাহাজতা বাইয়ে আসা কাবি তাংসা য়ুসুমসা মিতিলেনে শহরতা হোয়ে।15আকো জুকুং কাবিহা ঝাহাদিকো ন্যাতা জিংমসা কিয়োস বোইদাকো আবেইতা আসা ই ইহা সামোস বোইদাতা দেকায়ে। আউসোহা আকো জুকুংহা মিলেতোস শহরতা দেরেহে।16উইসে দিন এশিয়াতা য়ুংসুকোদোয়ে তামসা আকুহা এপিসিস মোহোপা গেংপা হোপুরো তামসা নোয়ে, হাংপাতানাহা আকুহা পেনতিকোসকো দিনতা দেপানেরো তাওয়া নোমসা য়রুশালেমতা হোকো তুরুউ-মুরুউপা জোদিংমি।17মিলেতোস শহরসোহা পাউলহা এপিসিসতা নিওয়া মন্ডলিকো মাটা ওয়ারাংপাবিহিং মোউপায়ে।18আবি দেরেনতেনুওয়া আকুহা জাংয়ে, “এশিয়াতা লেওয়া দিনসো কাহা নাবিহিংপা য়ুংনুওয়া কা আকু দিনবিহা হেপা পেংপামে আকুহা নাবিরাং গেমগা।19য়হুদিবিকো মেংতাপা নোওয়াকো সোতা নেকো নেত্তা মেংতাপা জিংচাংয়ে, আদো কাহা নম্র জিংমসা মিতি জ্যইপামসা প্রভুকো সেওয়া জোয়ে।20নাবি তাংসাকো সা-সাতা হোমসা ঝিপানুওয়া কাহা নাবি এনতাপা জিংকো তামসা হাই নুওয়াংরে তুংসিংতা মেএতো।21কাহা য়হুদি আসা দোসরা জ্যাবিকো দিংঙাবি তাংসাহিং আপনি আপনিকো পাপহিং হুতেমসা সেংজাকোতা লায়োংকো আসা ইশুকোতা দেংকো তামসা হিংপায়ে।22“নেহা কাহা পবিত্র লাংবেসো জাংওয়া হিংমসা য়রুশালেমতা হোদাংয়ে। আউতা কাহিংয়া হাং জিংকোমে কা মেগে।23আদো এসেহা কা গেমি নিও, দিংঙাবিসো মেংতাপা আসা জেলবিতা কোইচ্যানেরোওয়া তামসা পবিত্র লাংবেহা কাহিং জায়গা জায়গাতা সিদা চ্যইপামি নিও।24আদো কুং সাদিহা আপনিকো সোতা হাইরে পাংক্যইপা মোতো। আদো কাহিংয়া এসে মেংচে ঘ্যইরোওয়া, সেংজাহা দিংঙা জ্যাহিংয়া লামতুপা জোমি নিও তামসা এনতাওয়া দেরেং বেইপাওয়া কামহিংয়া কা তাংসা জোকো ছুকো, হানি কাম প্রভু ইশু কাহিংনাং পিচামি নিমে।25নেহা কাং, কা নাবিকো প্যাকোতা সেংজাকো রাজ্যকো নুওয়াং হিংপামসা ওয়াংমি নিও। ন্যাসারাং নাবিহিংপা চিত্তা কাহা হাত্রংরে মোদোসুরোওয়া তাওয়া নুওয়াং কা গেমি নিও।26আকো সোতা কা নাবিহিং প্রমান পিচামসা জাংরোওয়া, নাবিকো প্যাকোতা হাংসু দাংপুবা আকো দোষ কাহিং মাজিংরোওয়া।27হাংপাতানাহা সেংজাহা উদ্ধার জোকো আসা জোদাংওয়া কামকো তোইতা হানি নুওয়াংরে মাল্যাপা কা নাবিহিংয়া তাংসা জাংপুনতেও।28নেহা নাবিহা আপনিবিরাং আপনিবিহিং কাংচা আসা পবিত্র লাংবেসো নাবিহিং জিম্মা পিচাওয়াকো সোতা দিংঙাবিকো পারাবিহিংনে কাং। সেংজাকো মন্ডলিকো এনতাওয়া গোইত্র জিং, হাংপাতানাহা প্রভু ইশুহা আকু দিংঙাবিহিংয়া আপনিকো য়ুতিসো চোইমি নিও।29কা গেদিংয়ো, কা হোপুনতেনুওয়া চুংচাকো চুসুং-মাইসুংক্যইওয়া মাংশ্রি ত্যাবাপা দিংঙাবিহা নাবিকো প্যাকোতা ওয়াংরোওয়া আসা মন্ডলিহিং কোইচ্যাপাকো মাল্যারোওয়া।30নাবিকো প্যাকোসোরাং আজ্যাপা য়্যইওয়া দিংঙাবি নোরোওয়া। আবিহা প্রভুকো য়োংতোংবিহিং আবিকো মেংতাওয়া ন্যাতাতা পুরাকো কেংরোওয়া।31এপাজিংপুনুওয়া হোশিয়ার য়ুং, আসা কুং লো সুংনিং চোইপা জেইংসুং লিসুং মিতি জ্যইপামসা প্রভুকো ইচো ইচো য়োংতোংবিহিং জাংওয়া নুওয়াংহা মালিরিংকো।32“নেহা কা নাবিহিংয়া সেংজাকো খুইতা পিচারোওয়া আসা আকো লামতুওয়া দেরেংকো তোইতা ল্যাতেরোওয়া। আকু লামতুওয়াকো দেরেংসো নাবিহিং দেংওয়াতা সাডিংপা জোরোওয়া আসা দিংঙাবিহিং আশিষকো মাটা বানাইরোওয়া।33“কাহা হাংসুকোরে জাতাং, সুন, আসা আংদুংবিতা মিমিচাতো।34নাবি আপনিবিরাং গেমি নিও, কুং খুইসো কাম জোমসা কাহিং আসা কুং ব্যারোবিহিং ঘ্যইওয়া কা দাংচায়ে।35হাংপাতানাহা ‘য়ুউচাওয়াবিরোমা পিচাওয়াবিহা এনতাওয়াগা’ তামসা প্রভু ইশু আপনিরাং জাংওয়া নুওয়াংহিংয়া নোমসা মুছুওয়া দিংঙাবিহিং কাংকো হাসে চুবা মাসাপা কাম জোনেরোওয়া তামসা কা তাংসা নুওয়াংবি তিংপামি নিও।”36এসে জাংমসা পাউলহা আবিহিংপা তুরুই চুনুইমসা পাচাইয়ে।37আবিহা তাংসা কাইমসা পাউলহিং ওয়্যাটোংমসা য়ুওয়্যাইতা চুম্মন জোমসা নিংপুয়ে।38পাউলহা আবিহিংপা চাংসুমসা ন্যাসারাং নাবিহিংপাহা কা হাত্রংরে মোদোসু তাওয়া নুওয়াংতা আবিহা লামতুপুমসা তুংসিং চিচাপুয়ে। আকো নোইতা আবিহা পাউলহিংয়া তিকো জাহাজতা চোইপা সাতেহে।
The Seed Company