প্রেরিত1
1ও থিয়োফিলাস, ইশুকো জোকো আসা ঝিপাকো কেংওয়া তাংসা নোওয়াবিকো বিষয়তা কুং হানিরোমা নাগাইকো হিগাতা লামি নিও। 2আপনিকো জেংওয়া পোইংবিহিং ইশুহা পবিত্র লাংবেসো জাংপুনতেনুওয়া আকুহা লোডিংবাতা তোরোইচপুনুকো দিন চোইপা তাংসা নুওয়াংবি আকু হিগাতা লামি নিও।3ইশু সিওয়াকো নোইতা আকুহা আপনিহিং তিংপায়ে আসা প্রমান জোয়ে, আকুহা নিহকাইইয়ু চোইপা য়োংতোংবিহিংপারাং নিমি, আসা সেংজাকো রাজ্যকো নুওয়াং আবিহিং জাংয়ে।4সাইয়ু ইশুহা আবিহিংপা চাকো গানুওয়া আকুহা আবিহিং এপা জাংয়ে, “নাবিহা য়রুশালেমসো হাংতারে মাহ্যা। আদো সেংজা আপাকো আজিপ্পারাং পিচারো তাওয়া পবিত্র লাংবেকো ঙেরোংহিং খুইমসা য়ুং। ই নুওয়াং নাবিহা নাগাইসোরাং কুংসো হিংতেয়ো।5য়হুন্নাহা তিসো বাপ্তিস্মা পিচায়ে, আদো নেহা ওয়াংপাওয়া দিনবিতাহা পবিত্র লাংবেসো নাবিহা বাপ্তিস্মা জিংরোওয়া।”6সাইয়ুহা য়োংতোংবি ইশুহিংপা চিত্তা নিনুওয়া আকুহিং উইয়ে, “প্রভু, নাতিহা ই সময়রাং ইস্রাইল রাজ্যহিংয়া রোমানকো খুইসো ছুটকারা জোকোগা?”7ইশুহা আবিহিংয়া জাংয়ে, “সেংজা আপাহা আপনিকো সময়হিংয়া আপনিকো অধিকারতা এমি নিওয়াহা নাবিহা গেমগ্যই।8আদো পবিত্র লাংবে নাবিকো তোইতা লেপুনতেনুওয়া নাবিহা সেংজাকো সে মুংচারোওয়া। আকো নোইতা নাবিহা য়রুশালেমতা তাংসা য়হুদিয়াতা আসা সামরিয়া লুংবিবিতা, আসা বাসিমতিকো আরিকোংপে চোইপা কুং য়্যইদিকো গাওয়াই জিংরোওয়া।”9এসে জাংপুনতেনুকো নোইতা আবিহা ইশুহিং ন্যইওয়া-ন্যইওয়া কোকোইত্তা আকুহা লোডিংবাতা তোরোইচপুয়ে, আসা ডিংবা মুউওয়াতা আবিহা ইশুহিংয়া মিতিংপা জিংপে।10দিংঙাবিহা ডিংবাতা ম্যইসরোইপা নোইসুদিংনুওয়া হাংপাওয়া আংদুং লুওয়া নিহসো লোডিংবাকো পোইংবি আবিকো নাগাইতা জারেহে।11আবিহা জাংয়ে, “ও গালীলকো দিংঙাবাই, নাবিহা হাংপা জামসা ডিংবাতা ন্যইসুদিংগা? ইশুহা লোডিংবাতা হোপুয়ে। আকুহিং নাবি হেপা নে হোদিংওয়া তিং, এপারাং আকুহা সাইয়ুহা লেরোওয়া।” ইশু লোডিংবাতা হোওয়া12আকো নোইতা জেংওয়া পোইংবিহা জেইতুন তাওয়া য়্যাগ্যইহিং হুইতেমসা য়রুশালেমতা হোপুয়ে। আউসো য়রুশালেম চোইপা হোকোহা আদা ঘন্টা ঘ্যইমি।13য়রুশালেম চোইয়ামসা আবিহা আপনিকো য়ুংওয়া সাকো তোইকো ইচো সিরিতা গাসুয়ে। আউতা নিওয়াবিহা পত্রস, য়হুন্না, য়াকুব, আন্দ্রিয়াস, ফিলিপ, থোমা, বারতোলোমাই, মথি, এলপোসকো চেংওয়া য়াকুব, লোইহিং জেজেংপা জোওয়া সিমোন আসা য়াকুবকো চেংওয়া য়হুদা নিমি।14আবিহিংপা লেরা মেমেবি, ইশুকো আয়ু মরিয়োম আসা আকো এবিহা ইচো তুংসিং জিংমসা পাচাইসুচাংমি।15সাইয়ু নিহয়ুকো নোইতা একশো বিশ জনা প্রভু ইশুকোতা দেংওয়া দিংঙাবিকো প্যাকোতা পত্রসহা জামসা জাংয়ে,16“ডুওয়া এবাই আসা হুম্রিবাই, তাংজিকো হিগাতারে পবিত্র লাংবেসোরে দাউদ জাইপুরে য়হুদাকো তোইতা জাংতেমি নিমগা। আকু নুওয়াংবিহা তাংসা জিংনেকোরাংগা আসা জিংকোরে জিংপে। ইশুহিং প্যইওয়া দিংঙাবিহিং অগুওয়া জোমসা তেরোইওয়া য়হুদাহা17য়াংবি ত্যাবাপারাং প্রভুকো বার্চো য়োংতোংবিতাহা আকুরে ইচো নিমগা। য়াংবি তাংসাহিংপারাং প্রভুকো কাম জোকো আকুরে জেংচাপুমি নিমগা।”18(য়হুদাহা মেংতাপা কাম জোমসা কামাইওয়া ন্যাস্যাসো ইচো লুংনিং চোইয়ে। আকু লুংনিংতারাং আকুহা পোরো লেতা জোমসা হুইচামসা সিপুয়ে আসা আকো ফেমা টুইপুমসা য়োংবে গাচপুয়ে।19য়রুশালেমতা য়ুংওয়া তাংসা দিংঙাবিকোতা ই নুওয়াং বেইপুয়ে, আসা আবিহা আকু লুংনিংকো মিংহা আপনিকো ক্যাতা আকেলদামা এহে। ই জাংওয়াহা য়ুতিকো লুংনিং।)20পত্রসহা জাংয়ে, “নেহা ভজন সংগ্রহকো হিগাতা জাইপু দাউদহা এপা লামি নিও,‘আকো সাহা চিচ্ছোকোআউতা হাংসুরে য়ুমঘ্যইকো।ন্যাসারাং, আকো জোদিংওয়া কামহা দোসরা পুচাকো তামসারে লামি নিও।’21“আকো সোতা, ইশু ন্যাসারাং ঙারোওয়াকো নুওয়াংকো প্রমান জিংকো য়াংবিকো প্যাকোসো ইচো দিংঙাহিং জেংনেরোওয়া। আকু দিংঙাহা এপা জিংনেরোওয়া, হাংসু য়হুন্নাকো বাপ্তিস্মা পিচাওয়াকো সময়সোহা প্রভু ইশুকো লোডিংবাতা হোওয়া দিন চোইপা আকুহা য়াংবিহিংপা তেইদিংনুওয়া য়াংবিকো প্যাকোতা নিনেরোওয়া।”23ই নুওয়াং হিংনুকো নোইতাহা আউতা নিওয়া দিংঙাবিহা নিহসো দিংঙাহিং নাগাই জাপায়ে। ইচোহা য়োসেফ, আকুহিংয়া (বারসাবাস য়োসেফ তামগা, আকো গুরুতামেং মিংহা য়ুসতোসগা) আসা দোসরাহা মোতিয়াস নিমি।24আবিহা এপা জাংমসা পাচাইয়ে, “ও প্রভু, নাতিহা তাংসা দিংঙাকো তুংসিংকো নুওয়াং গেমগা। আকো সোতা প্রভু, কাবিহিং তিংপাপি, য়হুদাকো জায়গাতা ই নিহসোতাহা খ্রীষ্টকো পোইং জিংমসা সেওয়া জোকোহা নাতিহা হাংসুহিং জেংমি নিংগা। হাংপাতানাহা য়হুদাহা ইশুহিং ল্যাপুয়ে য়হুদা হাংতা হোনেকোমে আউতারাং হোপুয়ে।”26আবিহা আবি নিহসোকো প্যাকোতা সোকুতা লামসা বাডোইয়ে, আসা আকু সোকুহা মোতিয়াসকো মিংতা হুইয়ে, আসা আকুহা এগারচো জেংওয়া পোইংবিহিংপা আকো মিংহা চেংচপুয়ে।
The Seed Company