প্রেরিত18
1আকো নোইতা এথেন শহরসো নোপামসা পাউলহা কোরোন্থি শহরতা হোয়ে।2আউতা আকুহা আকিলাস মিং নিওয়া এচো য়হুদিহিং দোসুয়ে। আকিলাসহা পোনতোস তাওয়া জায়গাতা কেওয়া দিংঙা নিমি। আকুহা আপনিকো মে প্রিসকিলাহিংপা ইটালি লোইসো ওয়াংমি নিমি, হাংপাতানাহা রোমি সম্রাট কোলোদিয়োসহা তাংসা য়হুদিবিহিংয়া রোম শহরসো নোপুকো তামসা জাংমি নিমি। পাউলহা আবিহিং দোসপাকো হোয়ে।3আবিহা আংদুংসো তাম্বু চেংমসা গ্যই চোপাওয়া কাম জোমসা য়ুংচাংমি। পাউলরে আবিহিংপা য়ুংয়ে, হাংপাতানাহা আকুরে আবি ত্যাবাপারাং গ্যই বানাইওয়া কাম জোমসা য়ুংচাংমি।4হাত্রংদো সানুকো দিন দেয়োংনুওয়া পাউলহা য়হুদিবিকো জোংসুওয়া সাতা হোমসা য়হুদি আসা গ্রিকবিহিংপা উইসু জাংসুমসা আবিহিংয়া ইশুহিং দেংকো তামসা কোইপাকো কেংচাংমি।5সিলাস আসা তিমোথী মাকেডোনিয়া জায়গাবিসো লেপুনতেনুওয়া পাউলহা আপনিকো এনতাওয়া দেরেংকো কামবি জোয়ে। আকুহা য়হুদিবিহিংয়া ইশুরাং মুক্তি পিচাওয়া জাইপু খ্রীষ্টগা তাওয়া প্রমান জোয়ে।6আদো আবিহা পাউলহিংয়া মেংতাপা জোমসা আকুহিংয়া য়েংসুয়ে। পাউলহা আবিহিংয়া চেতাউনি জিংকো তামসা আপনিকো আংদুংসো দুনা য়িমসা জাংয়ে, “দাংপুনাহা নাবিহা আপনিকো দোষকো সোতা দাংপুরোওয়া। কাহিংয়া দোষ মাজিংরোওয়া। ইসো য়ুতা কাহা দোসরা জ্যাকো দিংঙাবিকোতা হোরোওয়া।”7আকো নোইতা আকুহা আউসো নোমসা হোপুয়ে। আকু জোংসুওয়া সাকো আবেইতা সেংজাহিং তাচাওয়া তিতোস য়ুসতোস মিং নিওয়া ইচো গ্রিক দিংঙাকো সাতা পাউলহা হোয়ে।8য়হুদি জোংসুওয়া সাকো মাটা ক্রিপোস আসা আকো তাংসা প্যাপ্যাম্যাম্যা প্রভুকো তোইতা দেংয়ে। কোরোন্থিকো দোসরা উইসে দিংঙাবিরে পাউলকো ঝিপাওয়া হিংমসা প্রভুকোতা দেংমসা বাপ্তিস্মা লাংয়ে।9সাইয়ু লিসুংহা প্রভুহা পাউলহিংয়া দর্শন পিচামসা জাংয়ে, “হাংসু হিংপারে মাচ্ছুংগে, চেকেপা মায়ুং। আদো এনতাওয়া দেরেংবি হিংপামসা হোতু।10হাংপাতানাহা কা নাতিহিংপারাং নিও আসা হাংসুরে নাতিহিংয়া ডুমকোইরোওয়া, হাংপাতানাহা ই শহরতা কুং উইসে দিংঙাবি নিও।”11আকো সোতা পাউলহা লো ইনিংসো তারি টুরি চোইপা কোরোন্থি শহরতারাং য়ুংমসা সেংজাকো নুওয়াংবি ঝিপায়ে।12আদো আকাইয়া লোইতা গোলিয়োন তাওয়া দিংঙা টেবো কাইজি নিনুকো সময়তা য়হুদিবিহা তাংসা চাংসুমসা পাউলকো তোইতা সেদ্রাংপায়ে আসা আকুহিং প্যইয়ে। আসা আকুহিংয়া ন্যায় জোকো সোতা জোংসুওয়া সাতা পুরামসা জাংয়ে,13“ই দিংঙাহা য়োংকো লিংপাংহিংপা মাতুওয়া সেংজাহিং দেংকো ঝিপামসা দিংঙাবিহিং মোতুপা জোকো কেংদিংয়ো।”14পাউলহা য়্যইদাংমি। আত্রংহা গোলিয়োনহা য়হুদিবিহিং জাংয়ে, “য়হুদিবাই! ইহা মেংতাওয়া কাম অর্থবা টেবো মেংতাওয়াকো নুওয়াং বেনাহা কাহা নাবিকো জাংওয়া হিংমসা ন্যায় জোকো এনতাকোগা।15আদো ই নুওয়াংহা নাবিকো হিগা, মিং আসা লিংপাংকো তোইতা মেংচেগুং। এপা জিংপুনুওয়া নাবি আপনিবিরাং ইকো ন্যায় জো। কাহিংয়া ই নুওয়াংকো ন্যায় জোকো এনতাপা মাজিং।”16এপা জাংমসা গোলিয়োনহা আবিহিংয়া জোংসুওয়া সাসো নোপাপুয়ে।17য়হুদিবিহা জোংসুওয়া সাকো মাটা সোস্তেনিসহিং প্যইমসা জোংসুওয়াকো নাগাইতা ডুপুউয়ে। আদো গোলিয়োনহা হাইরে মিতিংমেপা জোয়ে।18পাউলহা উইসে দিন চোইপা প্রভুকোতা দেংওয়াবিহিংপা চিত্তা কোরোন্থি শহরতা য়ুংয়ে। আকো নোইতাহা আকু আউসো নোপামসা প্রিসকিলা আসা আকিলাহিংপা ঝাহাদিকো ন্যাতা জিংমসা সিরিয়াকো লোইবিতা হোকো নোপুয়ে। নাগাইসোরাং আপনি নাপোইপুনতেমকো সোতা পাউলহা কিংক্রিয়া শহরতা জাহাজ বাইনুরোমা নাগাই আপনিকো পুরিং লুইপায়ে।19আবিহা এপিসিসতা দেয়োংয়ে, আসা পাউলহা আবিহিংয়া আউতারাং হুইতেহে, আসা পাউল আপনিহা জোংসুওয়া সাতা হোমসা য়হুদিবিহিংপা য়্যইসু-জাংসুয়ে।20আবিহা পাউলহিংয়া উইসে দিন চোইপা আবিহিংপা য়ুংপুই তামসা জাংচায়ে, আদো আকুহা মায়ুংতো।21পাউলহা এপা জাংতেমসা আবিকো প্যাকোসো নোপে, “সেংজাকোমি ইচ্ছা নিনাহা কা নাবিকোতা ন্যাসারাং ওয়াংরোওয়া।” আকো নোইতা আকুহা এপিসিসসোহা ঝাহাদিকো ন্যাতা হোয়ে।22কইসোরিয়া শহরতা দেয়োংমসা পাউলহা য়রুশালেমতা হোয়ে। আসা আকো মন্ডলিকো দিংঙাবিহিংপা দোসপায়ে। আকো নোইতা আকুহা এন্টিঅখিয়া শহরতা হোমসা23সাইয়ু নিহয়ু চোইপা আউতা য়ুংয়ে। আকো নোইতা আকুহা গলাতিয়া আসা ফিগরিয়া জায়গা জিংপুমসা হাদিংনুওয়া আকো জায়গা-জায়গাতা নিওয়া প্রভুহিং দেংওয়া তাংসা য়োংতোংবিহিং দেংওয়াতা সাডুংপা জোতেয়ে।24আকো প্যাকোতা আলেকজান্দ্রিয়া শহরতা কেওয়া আপোলোস মিং নিওয়া ইচো য়হুদি এপিসিসতা ওয়াংয়ে। আকুহা এনতাপা য়্যইকো গেওয়া দিংঙা নিমি আসা আকোতাহা তাংজিকো হিগাকো উইসে দুংজিবি নিমি।25আকুহা মুক্তি পিচাওয়া প্রভু ইশুকো নুওয়াংবি ঝিওয়া নিমি। আসা লাংবেতা সাডিংপা জিংমসা ইশুকো নুওয়াংবি এনতাপা ঝিপাচাংমি। আদো আকুহা য়হুন্নাকো পিচাওয়া বাপ্তিস্মা মেংচে গেমি নিমি।26আকুহা য়হুদিবিকো জোংসুওয়া সাতা মাচ্ছুংপা ঝিপায়ে। আকো ঝিপাওয়া হিংনুওয়া প্রিসকিলা আসা আকিলাসহা আকুহিংয়া আস্যই ইদ্যাতা পুরামসা হোয়ে আসা ন্যাসারাং ঝান সেংজাকো নাগাইতা হেপা তেইনেকোমে তামসা কোইপামসা ঝিপায়ে।27আকো নোইতা অপোলোসহা আকাইয়া লোইতা হোরো তামসা নোয়ে। এপিসিসতা নিওয়া য়োংতোংবিহা আকুহিংয়া হোকো তামসা জাংয়ে। আসা অপোলোসহিং লেই তাকো তামসা আকাইয়াকো য়োংতোংবিহিং ইচো চিঠি লায়ে। আকাইয়াতা চোইয়ানতেনুওয়া আউতাহা সেংজাকো অনুগ্রহ নিমকো সোতা দেংওয়াতা ওয়াংবিহিংয়া আকুহা এনতাপা য়ুজ্রুয়ে।28হাংপাতানাহা আউতা নিওয়া য়হুদিবিহিংপা দিংঙাকো নাগাইতা য়্যইসু-জাংসুনুওয়া আকুহা সাডিংপা তাংজিকো হিগাকো নুওয়াংবি তিংপামসা প্রভু ইশুরাং জাইপু খ্রীষ্টগা তামসা প্রমান পিচামসা আবিহিং চেকেপা য়ুংনেক্যইপা জোপুয়ে।
The Seed Company