প্রেরিত17
1পাউল আসা সিলাসহা অম্পিপোলিস আসা এপোল্লোনিয়াকো ন্যাতা জিংমসা থেসলোনিকে শহরতা দেকায়ে, আউতাহা য়হুদিবিকো জোংসুওয়া সা নিমি।2আতাংকো ত্যাবাপা পাউলহা আকু জোংসুওয়া সাতারে হোয়ে। আকুহা আউতাহা হাতি সুংইয়্যা চোইপা পবিত্র সানুকো দিনবিতাহা তাংজিকো হিগাকো নুওয়াংবিসো আবিহিংপা য়্যইসু জাংসুয়ে।3আকুহা তাংজিকো হিগাসো প্রমান পিচামসা আবিহিং এপা জাংমসা ঝিপায়ে, “মুক্তি পিচাওয়া জাইপু খ্রীষ্টহা কোইচ্যামসা সিনেকো আসা ঙারোনেকোগা, ই কুং হিংপাওয়া ইশুরাং আকু মুক্তি পিচাওয়া জাইপু খ্রীষ্টগা।”4আকো নোইতা লেরা য়হুদিবিহা প্রভুহিং দেংয়ে। আসা এপা জোমসারাং সেংজাহিং তাচাওয়া উইসে গ্রিক আসা এনতাপা মিং নিওয়া মেমেবিরে প্রভুকোতা দেংমসা পাউল আসা সিলাসহিংপারাং হোয়ে।5আদো দোসরা য়হুদিবিহা আবিকো কাম জোওয়াতা মিচামসা আকু জায়গাকো মেংতাওয়া দিংঙাবিহিং মোউমসা শহরতা মোতুপা জোরায়ে। আবিহা পাউল আসা সিলাসহিংয়া উইসে দিংঙাবিকো নাগাইতা পারামসা জোংসপামসা ডুকো য়াসোনকো সাতা ঠুইসপুয়ে।6আদো আবিহা পাউল আসা সিলাসহিংয়া আউতা মোদোতো। আউতা মোদোনুওয়া আবিহা য়াসোন আসা দোসরা প্রভুহিং দেংওয়াবিহিং ত্যাত্যা-বিংত্যাপুমসা শহরকো মাটাবিকোতা পুরামসা মোতুওয়া নুওয়াং জাংয়ে, “তাংসা বাসিমতিতা তুইপেং-দাংপেং জোওয়া ই দিংঙাবিহা নেহা য়োংকো শহরবিতারে দেয়োংতেয়োং।7ই য়াসোনহা আবিহিংয়া আপনিকো সাতা তুইমসা এমকোগুং। ইবিহা রোমি জাইপুকো জাংওয়ারে মাহিংপা ইশু তাওয়া ইচো জাইপু নিও তামসা জাংচামি।”8ই হিংমসা শহরকো প্যাকো প্যাকোকো দিংঙাবি আসা শহরকো মাটাবিহা আঙিং-উংয়িংপা জিংপুয়ে।9নোইস্যাতা মাটাবিহা য়াসোন আসা দোসরাহিংয়া ন্যাস্যা তাপামসা ল্যাপুয়ে।10মারি মোপুনতানি প্রভুতা দেংওয়াবিহা পাউল আসা সিলাসহিংয়া বেরিয়া শহরতা নিংপুয়ে, আউতা দেকামসা আবিহা য়হুদিবিকো জোংসুওয়া সাতা হোয়ে।11আকু জোংসুওয়া সাকো দিংঙাবিহা থেসলোনিকেকো দিংঙাবিরোমাহা এনতাপা নিমি। আবিহা সেংজাকো য়্যইদি হিংপাওয়াতা হিংতাপা জোমসা এনতাপা হিংয়ে। পাউলকো জাংওয়া নুওয়াংবিহা তুমে না মোতুমে তামসা আবিহা তাংজিকো হিগা সদাইবিরি ওয়েমসা পড়াইচাংমি।12আকো সোতা উইসে য়হুদিবিহা প্রভুকোতা দেংয়ে। এপা জোমসারাং এনতাওয়া মিং নিওয়া উইসে গ্রিক মেমেবি আসা গ্রিক পোজাবিরে প্রভুকোতা দেংয়ে।13আদো থেসলোনিকেতা নিওয়া য়হুদিবিহা বেরিয়াতারে পাউলহা সেংজাকো নুওয়াং হিংপাদিংয়ে তাওয়া হিংয়ে। আবিহা বেরিয়াতা লেমসা দিংঙাবিহিং পাউলকো তোইতা স্যাইসপাকো তামসা দুদুইপায়ে।14ই তিংতানি প্রভুহিং দেংওয়াবিহা পাউলহিংয়া সেন্নেপা ঝাহাদিকো ন্যাতা হ্যাকো নিংপুয়ে। আদো সিলাসসো তিমোথীহা আকু বেরিয়াতারাং য়ুংতেহে।15পাউলহিং স্যাকো হোওয়া আপু এবিহা আকুহিংয়া এথেন শহর চোইপা সাতেহে। আউতা দেকামসা পাউলহা আপনিহিংপা ওয়াংওয়া আপু এবিহিং সিলাস আসা তিমোথীহিং হাসে চুবা সেন্নেপা ওয়াংকো তামসা দেরেং কাইপুয়ে।16পাউলহা এথেন শহরতা সিলাস আসা তিমোথীহিং খুইদিংনুরাং শহরতা মুর্তিহিং হুইওয়া মেইপুওয়া তিংমসা আকুহিংয়া তুংসিং চিচাপুয়ে।17আকো সোতা পাউলহা য়হুদিবিকো জোংসুওয়া সাতা হোমসা য়হুদি আসা সেংজাহিং তাচাওয়া গ্রিক জ্যাকো দিংঙাবিহিংপা ইশুকো তোইতা য়্যইসু জাংসুয়ে। এপা জোমসারাং সদাইদিন শহরকো টেবো হাতিতা ওয়াংওয়া হ্যাওয়া দিংঙাবিহিংপা আকুহা য়্যইসু-জাংসুয়ে।18ইচো নিহসো ইপিকুইরি আসা সতোইকি তাওয়া দর্শনকো উটকেওয়াবিরে পাউলহিংপা য়্যইসু-জাংসু দাংয়ে, আসা আবিকো প্যাকোতা লেরাহা জাংসুয়ে, “ই পেরে-পেরে ক্যইওয়াহা হাং জাংদাংগা?” লেরাহা, “ইহা চুবে চোইসুংবিকো নুওয়াং হিংপা দিংয়ো!” তায়ে। পাউলহা ইশুকো তোইতা আসা আকো সিপুমসা ঙারোওয়াকো দেরেং হিংপাওয়াকো সোতা আবিহা এপা জাংমগা।19এপা জিংপুনাহা আবিহা পাউলহিংয়া শহরকো অরিয়োপাগোস তাওয়া জোংসুওয়া সাতা পুরামসা জাংয়ে, “নাকো হিংপাওয়া ই চুবে ঝিপাওয়া কাবি গেকো কেংমি।20আকুহা কাবিকো সোতাহা চুবেরাংগা, আকো সোতা নাতিরাং জাং, নাকো জাংদাংওয়া নুওয়াংহা হাংমমে, আকুহা কাবি গেকো কেংমি।”21হাংপাতানাহা এথেনসকো দিংঙাবি আসা আউতা য়ুংওয়া প্রিংঙাবিহা সদাইদিন চুবে চুবে নুওয়াংবি য়্যইমসা হিংপামসা দিনবি পেংপাচাংমি।22আকো সোতা পাউলহা আকু জোংসুওয়াকো নাগাই জামসা জাংয়ে, “ও এথেনস শহরকো দিংঙাবাই, নাবিহা তাংসা তাংজিহিং জেজেংপা জোওয়া দিংঙা গুং তামসা কা গেয়ো।23হাংপাতানাহা ই শহরতা কোইনুওয়া কাহা নাবিকো জেসাং হুইওয়া জায়গাবিরে কাংয়ে। ইচো জায়গাতা বলি পিচাওয়া ভেদিতাহা ‘মানাইওয়া সেংজাহিং’ তামসা লামি নিয়ুং। নাবিকো মানাইপা হুইওয়া আকু সেংজাকো নুওয়াংরাং কা নে নাবিহিং হিংপাদিংয়ো।24বাসিমতি আসা ইতা নিওয়া তাংসাহিং দিংওয়া সেংজারাং লোডিংবা আসা বাসিমতিকো গিরিগা। আকুহা দিংঙাবিকো বানাইওয়া দেমসাতা মায়ুংমগা।25আকুহিংয়া দিংঙাবিকো পিচাওয়া হাইক্রি সোংসাবি মোগ্যইমগা। আকুহা দিংঙাবিহিং সাদি, প্রান আসা য়াংবিহিং ঘ্যইওয়া তাংসা পিচামগা।26বাসিমতিতা তাংসা দিংঙাবি য়ুংচাকো তামসা আকুহা ইচো দিংঙাসোরাং তাংসা জ্যাবিহিং দিংয়ে। আবিহিং য়ুংকো সময় আসা গাকো জায়গাবিরে আকুহা নাগাইসোরাং পিচাপুনতেমি নিও।27দিংঙাবি আকুহিংয়া মোকো আসা দোচাকো ছুকো তামসা আকুহা এপা জাংয়ে। আদো সেংজাহা য়াংবিসো তানাং মোতো।28হাংপাতানাহা য়াংবিহা আকোতারাং বাচেমগা আসা আকোতারাং তেইমগা। য়োংকোতা হাই নিবা আকোতা জিংমসারাং নিও। ই নুওয়াংতা নাবিকো কবিতা লাওয়া দিংঙাবিরে এপা জাংমি নিও, ‘আজিপ্পারাং য়াংবিহা আকো চেংচুংরাংগা।’29এপারাং সেংজাকো চেংচুবি জিংওয়াকো সোতা য়োংকো সেংজাহিংয়া দিংঙাকো দুংজিকো খুইসো চোপাওয়া সুন, জাতাং আসা লুংটুইকো মু্র্তিবিহিং ত্যাবাপা নোমদিংরোওয়া।30আকো সোতা মেগেমসা য়ুংনুওয়া মেগেপা জোসুওয়া কামবিহিংয়া সেংজাহা হাইরে প্যারা মাপাতো। আদো নেহা সেংজাহা তাংসা জায়গাকো দিংঙাবিহিং আপনি আপনিকো পাপহিং কাবিহা পাপ জোমরাংগা তামসা পাপহিং ল্যামসা লায়োংকো জাংতেমি নিও।31হাংপাতানাহা বাসিমতিকো তাংসা দিংঙাবিকো ন্যায় জোওয়া দিন আকুহা জেংপুনতেমি নিও, আসা আত্রংকো দিনহা আকু আপনিরাং জেংওয়া দিংঙাসো এনতাপা ন্যায় জোরোওয়া। আকু দিংঙাহিং ন্যায় জোওয়া অধিকার নিও, তাংসা দিংঙাবিহিং প্রমান পিচাকো সোতা সেংজাহা আকুহিংয়া সিপুওয়াসো ঙারোপামি নিও।”32সিপুওয়াসো দিংঙাহা ঙারোমগা তাওয়া হিংমসা ইচো নিহসো দিংঙাবিহা পাউলকো জাংওয়াতা অ্যাজ্যাপাগে তামসা লেংসুয়ে। আদো লেরা-লেরাহা জাংয়ে, “ইকো নুওয়াংকো তোইতা ন্যাসারাং কাবিহা হিংরো” তামসা জাংসুয়ে।33আকো নোইতা পাউলহা আবিকো প্যাকোসো নোপুয়ে।34আদো লেরা দিংঙাবিহা পাউলকো নুওয়াং হিংমসা আকো নুনুই হুইপুয়ে আসা প্রভুকো তোইতা দেংয়ে। আবিকো প্যাকোতা শহরকো অরিয়োপাগস তাওয়া লাচি জাংওয়াতা দিয়ুনুসিয়োস তাওয়া দিংঙা আসা দামারিস তাওয়া ইচো মেমে নিমি। ই ল্যামসা দোসরা দিংঙাবিরে প্রভুকোতা দেংয়ে।
The Seed Company