প্রেরিত16
1পাউল দুর্বি শহর জিংমসা লুস্ত্রা শহরতা দেয়োংয়ে, আদো লুস্ত্রাতাহা তিমোথী মিং নিওয়া প্রভুহিং দেংওয়া ইচো এ য়ুংমি নিমি, আকো আয়ুরে প্রভুকোতা দেংওয়া য়হুদি নিমি। আসা আপাহা গ্রিক নিমি।2লুস্ত্রা আসা আইকোনিয়োন তাওয়া শহরতা প্রভুহিং দেংওয়াবিহা তিমোথীহিংয়া এনতাওয়া দিংঙাগা তামসা নোচাংমি।3পাউলহা আপনিকো হাদাংওয়াতা তিমোথীহিং চিত্তা পুরারো তামসা নোয়ে। আসা য়হুদিবিহিং হাইরে বাধা মাজিংকো তামসা আকুহা তিমোথীকো জুপাতা য়হুদিবিকো লিংপাংতা ত্যাবাপা খতনা জোপিয়ে, হাংপাতানাহা আকু জায়গাবিতা য়ুংওয়া তাংসা য়হুদিবিহা তিমোথীকো আপাহা গ্রিক তামসা গেদিংমি।4আকো নোইতা আবিহা শহর-শহরতা হোয়ে আসা তাংসা জায়গাতা নিওয়া প্রভুহিং দেংওয়াবিহিং য়রুশালেমতা জেংওয়া পোইং আসা মন্ডলিকো মাটা ওয়ারাংপাবিকো জোনেরো তাওয়া নুওয়াবি জোকো তামসা হিংপায়ে, আসা ইহা জোনেরোওয়া তামসারাং জাংয়ে।5এপারাং মন্ডলিকো দিংঙাবিকো দেংওয়া সাডিংপা জিংপুয়ে, আসা সদাইবিরি প্রভুহিং দেংওয়া দিংঙাবিহা বেইপুয়ে।6পবিত্র লাংবেহা পাউল, সিলাস আসা তিমোথিহিং এশিয়াকো লোইবিতা এনতাওয়া দেরেং হিংপাকো মিচামকো সোতা আবিহা ফিগরিয়া আসা গালাতিয়া লোই জিংপুমসা হোয়ে।7আসা মাইসিয়া লুংবিতা দেকানুওয়া আবিহা বেথিনিয়া লুংবিতা হোরো তামসা নোয়ে। আদো ইশুকো লাংবেহা আবিহিং আউতারে হোচাকো মিচাতো।8এপা জিংপুনুওয়া আবিহা মাইসিয়া জিংপুমসা গেংপা লেতা ঝাহাদিকো আরিকো ত্রোআস শহরতা ঊইয়ে।9আত্রংকো লিসুংরাং পাউলহা মাংবুইওয়াতা প্রভুকোসো দর্শন মুংয়ে। আকুহা মাকেডোনিয়া লোইবিকো ইচো দিংঙাহিং জামসা এপা জাংচাদিংওয়া তিংয়ে, “লামতুপা জোমসা মাকেডোনিয়া ওয়াংপি আসা কাবিহিং য়ুজ্রুপি।”10পাউলহা এপাজিংওয়া দর্শন মুংনুওয়া কাবিহা সেন্নেপা মাকেডোনিয়া হোনেরো তামসা চারামারা জোয়ে, হাংপাতানাহা আকো দিংঙাবিহিংয়া প্রভুকো এনতাওয়া দেরেং হিংপাকো সেংজাহা মোউমি নিও, তামসা জাংওয়া নুওয়াংহা কাবিহা সিদা চ্যইমি নিমি।11ত্রোআসসোহা নোওয়াইতা বাইমসা কাবিহা গেংপা সামোত্রাকে বোইদাতা হোয়ে। আকো জুকুংহা নিয়াপোলিস শহরতা দেকায়ে।12আউসোহা কাবিহা তেইপুমসা মাকেডোনিয়া লুংবিকো মাটা শহর ফিলিপ্পীতা দেকায়ে। আকু শহরহা রোমিবিকো খুইতা নিমি। আউতা কাবিহা সাইয়ু নিহয়ু চোইপা য়ুংয়ে।13সানুকো দিনতা শহরকো বাইরেতা জোরাকো আরিতা য়হুদিবিকো পাচাইওয়া জায়গা নিমমে তামসা নোমসা কাবিহা আউতা হোয়ে, আসা আউতা নিওয়া মেমেবিহিংপা গামসা কাবিহা ইশুকো নুওয়াং য়্যইসু-জাংসুয়ে।14কাবিকো নুওয়াং হিংবিকো প্যাকোতা থিয়াটিরা তাওয়া জায়গাকো লিডিয়া মিং নিওয়া ইচো মেমে নিমি। আকুহা ফিলিপ্পিতা লেমসা বেইগুনি রোংকো আংদুংবি পিচাচাংমি। লিডিয়াহা সেংজাহিং দেংওয়া মেমে নিমি। আকুহিংয়া পাউলকো জাংওয়া নুওয়াংতা এনতাপা হিংকো তামসা সেংজাহা আকো তুংসিং ওয়েপিয়ে।15লিডিয়া আসা আকো সাকো দিংঙাবিরে বাপ্তিস্মা লাংয়ে। আকো নোইতাহা আকুহা কাবিহিং জাংয়ে, “নাবিহা কাহিংয়া আজিপ্পারাং প্রভুকোতা দেংওয়া য়ুংব্রি তামসা নোনাহা কুং সাতা লেমসা য়ুংরেপি।” এপারাং আকুহা কাবিহিংয়া আকো সাতা য়ুংপুই তামসা সুজায়ে।16সাইয়ুহা পাচাইওয়া জায়গাতা হোদাংনুওয়া কাবিহা ইচো ডেইয়ামু মেমেহিং দোসুয়ে। আকুহিংয়া মেংতাওয়া লাংবে দ্যইংচপুমি নিমি, আসা মেংতাওয়া লাংবেকো সেসোরাং আকুহা দিংঙাবিকো দেপাওয়া দিনবিতা হাং জিংকোমে তাওয়া মোনাকাংমসা আপনিকো গিরিবিহিং উইসে ন্যাস্যা কামাইমসা ত্যইচাংমি।17আকুহা পাউল আসা কাবিকো নুনুই হুইপামসা এপা ঙামসা জাংয়ে, “ইবিহা টেবো সেংজাকো ডেইয়াবিগা। ইবিহা মুক্তি মুংচাওয়া নুওয়াংবি হিংপামগা।”18উইসে দিন চোইপা আকু মেমেহা এপা জাংমসারাং ঙাদিংমি। নোইস্যাতাহা এপা ঙাদিংওয়া হিংমক্যইপুমসা পাউলহা আকু মেমেকোতা ন্যইমসা মেংতাওয়া লাংবেহিং এপা জাংয়ে, “নাতিহিংয়া ইশু খ্রীষ্টকো মিংতা কা জাংরোওয়া, নাতিহা ই মেমেকোসো নোপুমসা হ্যাতু।” পাউল এপা জাংওয়া কোকোইত্তা মেংতাওয়া লাংবেহা আকু মেমেকো জুপাসো নোপুমসা হ্যাপে।19আসা গিরিবিকোহা আকু মেমেকোসো ন্যাস্যা কামাইওয়া ন্যাতারাং য়াংপে, তাওয়া নুওয়াং সিদা চ্যইমসা আবিহা পাউল আসা সিলাসহিং প্যইমসা হেইপুমসা শহরকো হাতিকো প্যাকোতা মাটা দিংঙাবিকো নাগাইতা পুরায়ে।20এপা পাউল আসা সিলাসহিংয়া শহরকো রোমি কাইজিবিকো নাগাই জাপামসা আবিহা জাংয়ে, “ইবিহা য়হুদিবিরাংগা। আদো য়োংকো শহরতা মেংতাপা জোমসা স্যাসপা-ত্যইংসপাদিংয়ো।21ইবিহা য়াংবিকো রোমি সরকারকো আইনতা জোমতুওয়া নুওয়াংবি ঝিপাদিংয়ো।”22আত্রংরাং উইসে দিংঙাবিহা পাউলসো সিলাসহিংয়া য়েসপায়ে, আসা কাইজিবিহা পাউলসো সিলাসহিংয়া আংদুং লুমসা সাটাসো পোওকো জাংয়ে।23আবিহা সিওপা সাটাসো ডুপুনতেনুকো নোইতাহা পাউলসো সিলাসহিং জেলতা পুরায়ে, কাইজিবিহা ই নিহসোহিং নোমকোইপা জেলতা সুংপুই তামসা জেলকো মাটাহিং জাংয়ে।24ই জাংওয়া হিংমসা জেলকো মাটাহা পাউল আসা সিলাসহিংয়া জেলকো তাংসারোমা নাপোকো সিরিতা পুরামসা আবিকো কোকোইতা কেংপ্রাকো চোর্দি টামসা এপুয়ে।25আত্রংকো লিসুংহা পাউল আসা সিলাসহা সেংজাহিং পাচাইমসা লেহদি লেদিংমি, দোসরা আবিহিংপা নিওয়া কৈদিবিহা হিংদিংমি।26আত্রংরাং একবিরি চুসুং-মাইসুংক্যইপা নিংঙা হায়ে আসা জেলকো তাংসা জায়গাবি য়াপুয়ে। আত্রংতারাং তাংসা লাপুংবিহা ওয়েচাপুয়ে আসা কৈদিবিহিং জিংওয়া সাংগ্লিবিহা হোইচপুয়ে।27জেলকো মাটা দিংঙাহা হেরোনুওয়া আউতা আকুহা তাংসা লাপুং ওয়েচাপুওয়া তিংয়ে। তাংসা কৈদিবিহা ক্যাপুয়ে তাওয়া নোমসা আকুহা তাত্রিংপা আপনিকো কাসুমা নোপামসা আপনিরাং সিকো কেংয়ে।28ই তিংমসা পাউলহা আকুহিং ঙামসা জাংয়ে, “ও উটকেওয়া এপা মোজোগ্যই। কাবি তাংসা ইতা নিয়ো।”29ই হিংমসা মাটাহা দিব্রি য়ামসা ঠুইপামসা নাপোতা ওয়াংয়ে আসা চুসুংপুমসা ফিফিং-দোদোউপা পাউল আসা সিলাসকো কোকোইতা নোংরেহে।30আকো নোইতা আকুহা আবিহিং বাইরেতা পারামসা জাংয়ে, “ব্যারোবাই, মুক্তি মুংচাকোহা কা হাং জোনেকোগা?”31আবিহা জাংয়ে, “প্রভু ইশুকো তোইতা দেং আসা নাতিহা উদ্ধার মুংচারোওয়া, এপারাং নাকো সাকো দিংঙাবিরে উদ্ধার মুংচারোওয়া।”32আসা পাউলসো সিলাসহা আকো সাকো দিংঙাহিংয়া এনতাওয়া দেরেং হিংপায়ে।33আকো নোইতাহা জেলকো মাটাহা পাউল আসা সিলাসহিং পুরামসা আত্রংকো লিশুংরাং আবিকো মাকাবি দুপিয়ে। আসা আকুসো আকো সাকো তাংসা দিংঙাবিহা বাপ্তিস্মা লাংয়ে।34আকুহা পাউলসো সিলাসহিংয়া আপনিকো সাতা পুরামসা চাকো পিচায়ে। আকুসো আকো সাকো দিংঙাবিহা সেংজাহিং দেংওয়াকো সোতা আবিহা তাংসা গাগ্রুপুয়ে।35আকো জুকুং হাপকুং শহরকো কাইজিবিহা পাউল আসা সিলাসহিং ল্যাপিকো তামসা সিপাইবিহিং জেল কাংওয়া মাটাকোতা নিংপুয়ে।36আকো সোতা জেলকো মাটাহা পাউলহিং জাংয়ে, “নাতিসো সিলাসহিং ল্যাপিকো তামসা শহরকো কাইজিবিহা দেরেং কাইপুমি নিনা। নেহা নাবিহা এনতাপা হাতু।”37আদো আকু দেরেং পাওয়া সিপাইহিংয়া পাউলহা জাংয়ে, “কাবিহা রোমিতা য়ুংওয়া দিংঙা জিংদো আবিহা কাবিকোতা হাইরে দোষ মাতাদো দিংঙাবিকো প্যাকোতা সিয়োপা ডুয়ে আসা কাবিহিং জেলতা সুংয়ে। আসা নেহা চিচোপা কাবিহিং ল্যাকো কেংদিংগা? কাবিহা মাহ্যারো। আকু দেরেং কাইপুওয়া কাইজিবিরাং ওয়াংমসা কাবিহিং নোপোংকো।”38পাউলকো জাংওয়া নুওয়াংহা আকু সিপাইবিহা হোমসা আকু শহরকো কাইজিবিহিং হিংপায়ে। পাউল আসা সিলাসহা রোমিকো দিংঙা গুং তামসা সিদা চ্যইনুহা আবিহা চুসুংপুয়ে।39আকো সোতা আবিহা জেলতা লেমসা পাউল আসা সিলাসহিংপা ছমা য়ায়ে আসা আবিহিং বাইরেতা নোপামসা কাবিকো শহরসো নোপু তামসা জাংচায়ে।40জেলসো নোপুনতেনুওয়া পাউল আসা সিলাসহা লিডিয়াকো সাতা হোয়ে। আউতাহা ন্যাসারাং আবিহা প্রভুকোতা দেংওয়াবিহিংপা দোসপায়ে, আসা আবিহিং ঝিপামসা আসা সাডিংপা জোমসা ফিলিপ্পী তাওয়া লোইসো নোপুয়ে।
The Seed Company