প্রেরিত13
1এন্টিঅখিয়া শহরকো মন্ডলিতাহা অগমবক্তাবি আসা ঝিপাওয়া দিংঙাবি উইসে নিমি। আবিহা বার্নাবাস, কালা তাওয়া সিমিয়োন, কুরেনিকো লুকিয়োস, আসা জাইপু হেরোদহিংপা ডেওয়া মোনেন, আসা শাউল নিমি।2আবিহা প্রভুহিং পাচাইমসা উপাস য়ুংদিংনুওয়া পবিত্র লাংবেহা আবিহিং জাংয়ে, “হিং, কা বার্নাবাস আসা শাউলহিং হানি কামকো সোতা জেং, আকু কাম জোকোরাং আবিহিং পিচা।”3আবিহা ন্যাসারাং উপাস আসা পাচাইমসা বার্নাবাস আসা পাউলকো তোইতা খুই ওইমসা আবিহিং কামতা নিংপুয়ে।4পবিত্র লাংবেকো নিংপুওয়া বার্নাবাস আসা শাউলহা এন্টিঅখিয়া শহরসো নোপুয়ে। আবিহা সিলুকিয়োস শহরতা হোয়ে, আসা আউসোহা আবিহা ঝাহাদিকো ন্যাতাসো হোমসা সাইপ্রস তাওয়া বোইদাতা হোয়ে।5সোলামিস শহরতা দেয়োংতেনুওয়া আবিহা য়হুদিয়াকো জোংসুওয়া সাবিতা হোমসা সেংজাকো য়্যইদি হিংপায়ে। আকু কামতা আবিহিং য়ুজ্রুকোহা আবিহা মর্কুস তাওয়া য়হুন্নাহিং পুরাওয়া নিমি।6হাত্রং আবি তাংসা সাইপ্রস বোইদা পেংতেমসা পাপোস শহর চোইপা দেয়োং, আত্রংহা আউতা আবিহা ইচো বার-ইশু তাওয়া জাদু তিংপোইওয়া য়হুদিহিং দোসুয়ে। আকুহা আপনিহিংনাং কা ইচো সেংজাকো অগমবক্তাগা তামসা নোচাংমি, আদো আকুহা ইচো প্যায়োংকো অগমবক্তা নিমি।7আকু জাদু তিংপোইওয়াহা সাইপ্রস বোইদাকো টেবো কাইজি সার্গিয়াস পাউলুসকো সাতা হোচাংমি। সার্গিয়াস পাউলুসহা ইচো দুংজি নিওয়া দিংঙা নিমি। আকুহিংয়া সেংজাকো য়্যইদি হিংকো ইচ্ছা জিংমকো সোতা আকুহা বার্নাবাস আসা শাউলহিং মোউয়াকো নিংপুয়ে।8আদো এলুমাস জাদুগরহা (গ্রিক ক্যাসোহা ই জাংওয়াহা এপারাং জিংমগা) বার্নাবাস আসা শাউলহা সেংজাকো য়্যইদি য়্যইমসা টেবো কাইজি সার্গিয়োস পাউলুসহিং দেংওয়াসো লাপোংকো কেংয়ে।9শাউল (হাংসুহিং পাউল তামমে) আকুহা পবিত্র লাংবেসো মেইমসা এলুমোসকো তোইতা মিসরোইপা ন্যইমসা জাংয়ে,10“নাতিহা জেসাংকো চেংওয়া, তাংসা তাংজিকো নুওয়াংহিং মিছিওয়া, ল্যহপাওয়া আসা মেংতাওয়াসো মেইপুওয়া! নাতিহা প্রভুকো এনতাওয়া ন্যাতাহিংয়া মেংতাপা জোকো মাল্যাকোগা?11নেহা কাং, প্রভুকো সেদ্রাংওয়াহা নাকো তোইতা হুইমি নিও, আসা নাতিহা নেহা আম্যইকো সোতা সিনিকো হাহাইওয়া নাকো মিচোসো মাতিংপা জিংপুরোওয়া।” আসা আত্রংতারাং আকো মিচোহা গইংটুমসা নাটিংপা জিংপুয়ে, আসা হাংসু কাহিং তোইংপিকোমে তামসা ইতা উতা মেংচোইয়ে।12প্রভুকো তোইতা ঝিপাওয়া নুওয়াংতা সে তিংমসা টেবো কাইজিহা আআংপেচপুয়ে, আসা আকুহা ইশুহিং দেংয়ে।13পাউলসো আকো ব্যারোবিহা পাপোস শহরসোহা নোওয়াই বাইপামসা পামফিলিয়া লুংবিকো পর্গা শহরতা দেকায়ে, আসা মর্কুস তাওয়া য়হুন্নাহা পাউলসো বার্নাবাসহিং হুইতেমসা য়রুশালেমতা লাকাপুয়ে।14আদো আবিহা পর্গাসো নোপামসা ফিসিদিয়াকো এন্টিঅখিয়াতা হোয়ে, আসা সানুকো দিনতা জোংসুওয়া সাকো নাপোতা হোমসা গায়ে।15মোসাকো পিচাওয়া লিংপাংতা আসা অগমবক্তাবিকো হিগা পড়াইপুনতেনুওয়া জোংসুওয়া সাকো মাটাবিহা পাউলসো বার্নাবাসহিং মোউমসা এপা জাংয়ে, “ও এবাই, নাবিহিংপাহা দিংঙাবিহিং সাডুংপা জোওয়া হাইক্রি নুওয়াং নিনাহা জাংপুই।”16আত্রং জামসা পাউলহা খুইসো লাবে চামসা জাংয়ে, “ও ইস্রাইলকো আপু এবাই আসা সেংজাকোসো চুসুংবাই! এনতাপা কুং নুওয়াং হিংপি।17ইস্রাইল জ্যাবিকো সেংজাহা য়োংকো আটা আজাবিহিং জেংয়ে আসা আবিহা মিশ্র লোইতা য়ুংদিংনুওয়া আবিহিং টেবো জ্যা বানাইয়ে। আসা সেংজাহা আপনিকো সে তিংপামসা আবিহিং আকু লোইসো নোপামসা পারায়ে।18আবিহা চিচ্চোওয়া জায়গাতা লোকাই নিহকাই চোইপা য়ুংনুওয়া আকুহা আবিহিংয়া এনতাপা কাংপিয়ে।19আকো নোইতা আকুহা কনান লোইতা নীচো জ্যাবিহিং দাংপামসা আবিকো লোইবিহা য়োংকো আটা আজাবিহিং পিচায়ে।20আত্রং চোইপাহা ৪৫০ বর্ষা পেংপুদাংতেমি। আকো নোইতাহা সেংজাহা আবিকো প্যাকোতা ন্যায় জোওয়া কাইজি জাপাপিয়ে। আকু কাইজিবিহা ইচোকো নোইতা ইচো জোমসা অগমবক্তা শামুয়েলকো পালো চোইপা কাম জোসুয়ে।21আকো নোইতা য়োংকো আটাবিহা জাইপু য়ায়ে, আসা সেংজাহা বেন্জামিনকো জিরিসো কিসকো চেংওয়া শাউলহিং লোকাই নিহকাই চোইপা আবিকো তোইতা কাংকো জাইপু জাপায়ে।22সেংজাহা আকুহিংয়া ওয়েংপামসা দাউদহিং জাইপু বানাইয়ে। দাউদকো তোইতা সেংজাহা এপা জাংমি নিও, ‘কাহা য়িশৈকো চেংওয়া দাউদহিংয়া কুং তুংসিং নাংসোরাং মোওয়াবেপারাং দোচায়ে। আকুরাং কুং তাংসা জোকো কেংওয়াবি জোরোওয়া।’23আপনিকো জাংওয়া সেই সেংজাহা ইস্রাইলবিকো সোতা দাউদকো জিরিসো ইচো মুক্তি পিচাওয়া নিংপুয়ে, আকুহা ইশুরাংগা।24ইশু লেনুরোমা নাগাই বাপ্তিস্মা পিচাওয়া য়হুন্না লেয়ে। আকুহা আপনি আপনিকো পাপহিং কাবিহা পাপ জোমরাংগা তাওয়া নোমসা সেংজাকোতা বাপ্তিস্মা লাংমসা লায়োংকো তামসা দিংঙাবিহিং হিংপায়ে।25য়হুন্নাহা আপনিকো কাম জোওয়া ত্যইপাপুদাংতেনুওয়া জাংতেমি নিমগা, ‘নাবিহা কাহিংয়া মুক্তিদাতা তামসা নোমগা? কাহা আকু মোকোমি। আদো কুং নোইতা ইচো দেরেরোওয়া আকো কোকোইকো কোরোং লুউকো বেপারে কা মোতো।’26“ও, অব্রাহামকো চেংচুংবাই, আসা সেংজাহিং তাচাওয়া দোসরা জ্যাকো ডুওয়া এবাই, সেংজাহা ই মুক্তিকো দেরেংহা য়াংবিকো সোতারাং কাইপুমি নিও।27আদো য়রুশালেমতা য়ুংওয়া আপু এবি আসা আবিকো মাটাবিহা ইশুহিং মুক্তি পিচাওয়াগা তামসা মানাইতো। অগমবক্তাবিকো তাংজিকো হিগাতা লাওয়া নুওয়াংবিহা সানুকো দিনবিতা পড়াইচাংদো আবিহা মোকোইতো। ইশুহিং স্যামসা আবিহা তাংজিকো হিগাতা আকো তোইতা লাওয়া নুওয়াংহিংয়া তাংসা জোয়ে।28স্যানেকো বেপা হাইরে দোষ মোমুংদো আবিহা ইশুহিংয়া স্যানেরোওয়া তামসা কাইজি পিলাতোসকোতা জাংয়ায়ে।29আসা আকো তোইতা তাংজিকো হিগাতা লাওয়া তাংসা নুওয়াং জোপুনতেনুওয়া আবিহা আকুহিংয়া ক্রুসসো ধুইমসা তোম্যইতা এহে।30আদো সেংজাহা ইশুহিংয়া সিপুওয়াসো ঙাপায়ে।31আপনিহিংপা গালীলসো য়রুশালেমতা ওয়াংমবিহা উইসে দিন চোইপা আকুহিং দোসপাকো মুংয়ে, আসা আকুহিং তিংওয়া দিংঙাবিহা নেহা ইস্রাইল লোইকো দিংঙাবিকো সোতাহা প্রমানগা।32নেহা কাবিহা নাবিহিংয়া ই এনতাওয়া দেরেং হিংপারোওয়া। সেংজাহা য়োংকো আটা-আজাবিহিংপা নাপোইতেওয়াহা য়োংকো সোতারাং তাংসা জিংয়ো। আকু চেংচুংবিহা য়াংবিরাংগা।33ইশুহিং সিওয়াসো ঙাপানুওয়া আকুহা আকু নাপোইতেওয়াহা য়োংকো সোতারাং তাংসা জোমগা। নেহা সেংজাহা আকুহিং সিওয়াসো ঙাপারোওয়া তাওয়া নুওয়াকো বিষয়তা ভজন সংগ্রহকো হিগাতা এপা লামি নিও: ‘নাতিহা কুং চেংওয়াগা, কা হিনিহা নাকো আপা জিংমি নিও।’34সেংজাহা আকুহিংয়া মাঅ্যাপ্যাপা সিপুওয়াসো ঙাপাওয়াকো তোইতা এপা জাংমি নিও,‘কা নাবিহিংয়া দাউদহিং পিচাওয়া পবিত্রআসা চোসোওয়া আশিষ নাবিকো প্যাকোতা নিংপুরোওয়া।’35“দোসরা হিগাতারে দাউদ জাইপুহা এপা লামি নিও: ‘ও সেংজা, নাতিহা আপনিকো পবিত্র দিংঙাকো জুপাহিংয়া হাত্রংরে মাঅ্যাপারোওয়া।’36ই নুওয়াংহা দাউদহা আপনিকো বিষয়তা জাংওয়া মোকো, হাংপাতানাহা সেংজাকো ইচ্ছাতা কাম জোপুনতেনুওয়া আকুহা সিপুয়ে আসা আকো জুপাহা আপনিকো আটা আজাবিহিংপারাং লিইমসা অ্যাপুয়ে।37আদো সেংজাহা হাংসুকো জুপাহিং সিওয়াসো ঙাপা, আকো জুপাহা মাঅ্যাতো।38আকো সোতা ডুওয়া এবাই, নাবিহা কোইকো জো, হাংপাতানাহা আকু ইশুসোরাং পাপ ছমা জিংমগা তামসা কা নাবিহিংয়া জাংরোওয়া।39হানি পাপ মোসাকো লিংপাংতা ওয়েংপামক্যই, আকু পাপহা ইশুহা আকোতা দেংওয়াবিহিংয়া তাংসা পাপসো ওয়েংপামি নিও।40আকো সোতা চুসুংমসা য়ুং, মেনাহা অগমবক্তাবিকো হিগাতা জাংমি ত্যাবাপা ই নুওয়াংহা নাবিকো তোইতা হুইরেগে।41‘ও মোসোংপা জোমবাই, আআংপেপেপা জিং,আসা দাংপুমসা হাপুই! হাংপাতানাহানাবিকো সময়তাহা কা ইচো কামজোরোওয়া, আকু কামকো সোতা নাবিহিংয়াহাংসু হিংপাদো নাবিহা হাত্রংরে মাদেংরোওয়া।’”42পাউলসো বার্নাবাসহা দেমসাসো নোমসা হাদাংনুওয়া ওয়াংপাওয়া সানুকো দিনতারে ই নুওয়াং হিংপাপি তামসা দিংঙাবিহা আবিহিং পাচাইচায়ে।43জোংসুওয়া ত্যইনতেনুওয়া উইসে য়হুদিবি আসা য়হুদি লিংপাং মানেওয়া জ্যাকো দিংঙাবিরে উইসে পাউলসো বার্নাবাসকো নুনুই হুইপুয়ে। পাউলসো বার্নাবাসহা আবিহিংপা য়্যইমসা সদাইবিরি সেংজাকো লামতুওয়াতা য়ুংকো তামসা জাংয়ে।44আসা ন্যাসা সানুকো দিন দেয়োংনুওয়া আকু শহরকো সিওচে দিংঙাবিহা সেংজাকো য়্যইদি হিংকো লেহে।45আদো য়হুদি মাটাবিহা আকু এসে দিংঙাবিহিং তিংনুওয়া মিচামসা পাউলসো বার্নাবাসকো তোইতা মোসুংপা জোয়ে। আবিহা মোসুংপা জোমসা পাউলহিং লেফেপায়ে।46আদো পাউলসো বার্নাবাসহা মুচ্ছুংপা জাংয়ে, “সেংজাকো য়্যইদিহা নাগাইহা নাবিহিংনাং হিংপানেকোগা। আদো নাবিহা ইহিংয়া হিংকো মেংকেংপা, আপনিহিংনাং হাত্রংরে মিসিওয়া সাদি নোমকো সোতা কাবিহা দোসরা জ্যাকো দিংঙাবিকোতা হিংপাকো হোপুরোওয়া।47প্রভু কাবিহিংয়া এপা জোকোরাং জাংমি নিও, ‘বাসিমতিকো আরিকোংপে চোইপা দিংঙাবিহা উদ্ধার মুংচাকো তামসা কা নাবিহিংয়া দোসরা জ্যাকো দিংঙাবিকো প্যাকোতা হাহাইওয়া পিচাকো জেংমি নিও’।”48ই নুওয়াং হিংমসা দোসরা জ্যাকো দিংঙাবিহা য়াংতায়ে আসা সেংজাকো য়্যইদিহিং তাচায়ে। আসা হাত্রংরে মিসিকো সোতা নাগাইসোরাং সেংজাসো জেংচপুমবিহা ইশুকো তোইতা দেংয়ে।49আসা আকু লুংবিকো তাংসাতা সেংজাকো য়্যইদিবি বেইপুয়ে।50আদো য়হুদিবিহা সেংজাহিং তাচাওয়া মাটা মেমেবিহিং আসা শহরকো মাটা দিংঙাবিহিং দুদুইপামসা পাউল আসা বার্নাবাসকো তোইতা মাতুপা জোরায়ে, আসা আকু নিহসোহিং আকু লোইসো ঘিমসা তানাং নিংপুয়ে।51আদো পাউল আসা বার্নাবাসহা আকু দিংঙাবিহিংয়া সেংজারাং ন্যায় জোরোওয়া তামসা জাংতেমসা আবিকো কোকোইকো দুনা য়িতেমসা আইকোনিয়োন শহরতা হোপুইয়ে।52আইকোনিয়োনকো প্রভুতা দেংওয়াবিহা পবিত্র লাংবেসো মেইপুমসা য়াংতাসুয়ে।
The Seed Company