প্রেরিত12
1আত্রংকো দিনবিতাহা হেরোদ জাইপু অগ্রিপাহা মন্ডলিকো প্রভুতা দেংওয়াবিহিং প্যইমসা মেংতাপা জোয়ে।2আকুহা য়হুন্নাকো ডুওয়া য়াকুবহিংয়া কাসুমাসো স্যাপায়ে।3ই কামকো সোতা আকুহা য়হুদিবিহিং গাগ্রুওয়া তিংমসা পত্রসহিংনে প্যইমসা এহে। ই জিংপুওয়াহা (সোরা মোলুওয়া কোব্রেং চাওয়া মানক্যাকো সময়তা নিমি।)4আসা ষোলো জনা সিপাইবিহিংয়া দিচো-দিচো পারা জোমসা খুইপায়ে। নিস্তার মানক্যাকো নোইতাহা আকুহিংয়া য়হুদিবিকো নাগাইতা ন্যায় জোকো পারারো তামসা হেরোদহা নোদিংমি।5এপারাং পত্রস জেলতা নিনুওয়া আকো সোতা মন্ডলিবিহা সেংজাকোতা তাংসা ইচো তুংসিং জিংমসা পাচাইসুদিংমি।6হেরোদহা পত্রসহিংয়া দিংঙাবিকো নাগাই নোপারো তাওয়া সাইয়ু নাগাইকো লিসুংরাং পত্রসহা নিহদি সাংগ্লিসো তাইপুমসা নিহসো সিপাইবিকো প্যাকোতা জিংদিংমি নিমি। লেরা সিপাইবিরে মাটা লাপুংকো নাগাইতা জামসা আকুহিং খুইদিংমি।7একবিরি প্রভুকো ইচো লোডিংবাকো পোইং আউতা তিংরেয়ে আসা আকু সিরিতাহা হাহাইপা জিংপুয়ে। সেংজাকো পোইংহা পত্রসহিংয়া দাইপায়ে আসা “সেন্নেপা লো” তামসা আকুহিং টুউয়ে। আত্রংহা খুইতা তাইদিংওয়া সাংগ্লিবিরে হ্যইচপুমসা হুইচায়ে।8লোডিংবাকো পোইংহা পত্রসহিং জাংয়ে, “আংদুংসো জুতা লুচা।” পত্রসহা লুচায়ে। লোডিংবাকো পোইংহা ন্যাসারাং জাংয়ে, “আংদুং গুইমসা কুং নুনুই হুইপা।”9আসা পত্রসহা লোমসা লোডিংবাকো পোইংকো নুনুই নুনুই হুইপুমসা সিরিসো বাইরে নোমসা লেহে। আদো লোডিংবাকো পোইংকো জোওয়া কামহা আজিপ্পাগুং তাওয়া আকুহা সিদা মোচ্যইয়াংমি। আদো আকুহা মাংবুইদিংয়ো তামসা নোদিংমি।10আবিহা নাগাইকো আসা প্যাকোকো সিপাইবিকো খুইওয়া লাপুং পেংমসা জেলকো মাটা লাপুংকো আবেইতা দেয়োংয়ে। আত্রংহা আকু লাপুংহা আপনিরাং ওয়েচপুয়ে, আসা আবিহা বাইরে নোয়ে। ইচো শহরকো ন্যাতা জিংমসা হোদিংনুওয়া লোডিংবাকো পোইংহা আকুহিং আত্রংতারাং হুইতেমসা হোপুইয়ে।11আত্রংরাং পত্রসহা “আজিপ্পারাং প্রভুহা আপনিকো পোইংহিং নিংপুমসা কাহিং হেরোত জাইপুকো খুইসো আসা য়হুদিবি হাং জোদাংমে আকু তাংসাসো কাহিং ওয়েংপাপিমকো গুং তাওয়া প্যারাতাংয়ে।”12ই নুওয়াং আকুহিং সিদা চ্যইনুহা আকুহা মর্কুস তাওয়া য়হুন্নাকো আয়ু মরিয়োমকো সাতা হোয়ে। আউতাহা উইসে দিংঙাবি জমা জিংসুমসা পাচাইসুদিংমি।13পত্রস লাপুংতা জামসা লাপুংহিং বেদিংনুওয়া রোদা মিং নিওয়া ইচো ডেইয়ামুহা লাপুং ওয়েকো লেহে।14পত্রসকো আওয়াজ নাইমসা আকুহা গাগ্রুমসা লাপুং মাওয়েপা নাপোতা ঠুইপুমসা “পত্রস লাপুংতা জাদিংনা তামসা দেরেং পিচায়ে।”15আদো আবিহা আকুহিংয়া জাংয়ে, “নাতিহা চোইরুং বুপুংগা?” আদো আকুহা আজিপ্পারাং পত্রসরাং তামসা মোজুইম্যারাইপা জোয়ে, আত্রংহা আবিহা জাংয়ে, “আকুহা পত্রসহিং কাংওয়া লোডিংবাকো পোইং দোকোগা।”16আদো পত্রসহা লাপুংতা জামসারাং লাপুংহিং বেদিংমি। লাপুং ওয়েনুওয়া আকুহিং তিংমসা আবিহা আআংপেপেচপুয়ে।17আকুহা চেকেপা য়ুং তামসা খুইসো লাবে চায়ে, আসা আকুহিং প্রভুহা হেপা জেলসো নোপামে আবিহিং ল্যায়ে। “ই নুওয়াংকো দেরেংহা য়াকুব আসা দোসরা এবিহিংনে হিংপাতু,” তামসা পত্রসহা আউসো নোপুমসা দোসরা জায়গাতা হোপুয়ে।18হাপকুং জেংপুনতেনুওয়া “পত্রসহিং হাং জিংপুমে” তামসা সিপাইবিকো প্যাকোতাহা চেলোউ-মেলোউপা জিংপুয়ে।19হেরোদহা আকুহিং মোকাকো তামসা জাংয়ে, আদো সিপাইবিহা পত্রসহিংয়া দোপামক্যইতো। হেরোদহা সিপাইহিং য়েংমসা ইবিহিং স্যাকো তামসা জাংয়ে। আকো নোইতা হেরোদহা য়রুশালেম হুইতেমসা কইসোরিয়াতা হোমসা আউতারাং য়ুংপুয়ে।20হেরোদহা তুরোস আসা সিদোন শহরকো দিংঙাবিহিংপা সিওপা সেদ্রাংপুমি নিমি। আকু নিহসো শহরকো দিংঙাবিহা চাওয়া আংওয়াবিহা হেরোদকো লুংবিবিসোরাং নোপানেচাংমি। আকো সোতা আকু শহরকো মাটাবিহা হেরোদ জাইপুহিংপা চাংসুকো কেংয়ে। আবিহা জাইপুকো দিংঙা বলস্তসহিং খুইতা এমসা জাইপুহিং দোসপোংকো কেংয়ে।21হেরোদহা আকুহিংপা সাইয়ু দোসপারো তাওয়া দিনতাহা এনতাওয়া আংদুং লুমসা আকো গাদিংতা গায়ে, আসা আবিকো নাগাইতা য়্যইয়ে।22দিংঙাবিহা “ইহা সেংজাকো য়্যইওয়াগা, দিংঙাকো মোকো!” তামসা জাইপুহিং তাচায়ে।23আদো সেংজাহিং মাতাচামকো সোতা আত্রংরাং প্রভুকো ইচো লোডিংবাকো পোইংহা আকুহিংয়া দেংজা আপুয়ে। আত্রংরাং সেকোউ সেকোউপা পেতা হোপুমসা আকুহা সিপুয়ে।24আদো সেংজাকো য়্যইদিহা বেইপুয়ে। আসা উইসে চুবে দিংঙাবিরে সেংজাতা দেংয়ে।25বার্নাবাসসো শাউলহা আউতা তাংসা কাম জোওয়া তোইপাতেমসা য়রুশালেমসো এন্টিঅখিয়াতা লায়োংয়ে। আবিহা মর্কুস তাওয়া য়হুন্নাহিংনে পারায়ে।
The Seed Company