প্রেরিত14
1আইকোনিয়োন শহরতারে পাউলসো বার্নাবাসহা আতাংকো ত্যাবাপা য়হুদিবিকো জোংসুওয়া সাতা হোয়ে। আবিহা জোংসুওয়া সাতা এপা জোমসা য়্যইসুয়ে, আউতা নিওয়া উইসে য়হুদিবি আসা দোসরা জ্যাকো দিংঙাবিরে প্রভুকোতা দেংয়ে।।2আদো মাদেংওয়া য়হুদিবিহা দোসরা জ্যাকো দিংঙাবিহিং দুদুইপামসা প্রভুকোতা দেংওয়া এ, আপুবিহিং মাসুংপা জোসুয়ে।3আদো পাউলসো বার্নাবাসহা আকু শহরতা উইসে দিন চোইপা য়ুংয়ে। আসা আবিহা প্রভুকো নুওয়াং মাচ্ছুংপা য়্যইয়ে। প্রভুহা আবিহিংয়া আআংপেপেচপুওয়া কামবি জোকো সে পিচামসা আবিকো য়্যইওয়া আসা আকু জেজেংওয়াকো দেরেংবিহিং আজিপ্পারাংগুং তামসা প্রমান জোপিয়ে।4আদো শহরকো দিংঙাবিহা নিহসো পারা জিংপুয়ে। লেরাহা য়হুদিবিকোতা আসা লেরাহা জেংওয়া পোইংবিকোতা হোপুয়ে।5দোসরা জ্যাকো দিংঙাবি আসা মোসুংপা জোওয়া য়হুদিবি আসা আবিকো মাটাবিহা আবিহিংপা চাংসুমসা পাউলসো বার্নাবাসহিংয়া লুংটুই টোমসা স্যাকো হুইসুয়ে।6আদো পাউলসো বার্নাবাসহা ই নুওয়াং হিংয়ে, আসা আবিহা ক্যাপুমসা লুকোনিয়া লুংবিকো লুস্ত্রা আসা দুর্বি শহরকো হুরাপা নিওয়া লোইবিতা হোপুয়ে।7আউতারে আবিহা এনতাওয়া দেরেং হিংপায়ে।8লুস্ত্রা শহরতা ইচো কোকোইসো তেইমকোইওয়া দিংঙা নিমি। আকুহা কেনতানি কোকোই চোংচপুওয়াকো সোতা হাত্রংরে তেইকো মোচুমি।9পাউল য়্যইনুওয়া আকুহা এনতাপা হিংয়ে। পাউলহা আকো য়ুওয়াইতা এনতাপা ন্যইয়ে। আকু দিংঙাহা “কারে সাংচোইপুকোমে” তামসা দেংয়ে তাওয়া পাউলহা সিদা চ্যইয়ে।10পাউলহা সাডিংপা ঙামসা জাংয়ে, “লো, আসা আপনিকো কোকোইতা জা।” এপা জাংওয়া হিংতানি আকু দিংঙাহা তাত্রিংপা লোয়ে, আসা তেইয়ে।11পাউলকো এপাজিংওয়া কাম জোওয়া তিংমসা দিংঙাবিহা আপনিকো লুকোনিয়া ক্যাসো ঙাসুমসা জাংসুয়ে, “চোইসুংবিহা দিংঙা জিংমসা য়োংকোতা লেয়ুং।”12আবিহা বার্নাবাসহিংয়া জিয়ুস চোইসুং তামসা নোয়ে, আসা পাউলরাং এনতাপা হিংপাদিংমকো সোতা আকুহিংয়া হোর্মোস তাওয়া চোইসুং নোয়ে!13জিয়ুস চোইসুংকো দেমসাহা আকু শহরকো আবেইতারাং নিমি। আকু দেমসাকো পাউবিহা মাইবেকো তিসে আসা বের্চেংবি পারামসা শহরকো লাপুংকো আবেইতা ওয়াংয়ে। আবিহা বার্নাবাস আসা পাউলহিং বের্চেংবি বলি পিচাকো তৈয়ার জোসুয়ে।14ই তিংমসা পাউলসো বার্নাবাসহিংয়া তুংসিং চিচপুমসা আপনিকো আংদুং ছিমসা আবিহা এপা জাংমসা দিংঙাবিকো প্যাকোতা ঠুইপুমসা হোয়ে আসা ঙামসা জাংয়ে,15“দিংঙাবাই, নাবিহা এপাজিংওয়া কাম হাংপা জোদাংমগা? কাবিরে নাবি ত্যাবাপারাং কোইচ্যা-বিংচ্যাইওয়াতা কেওয়া দিংঙাবিরাংগা। কাবিহা সেংজাকো পিচাওয়া য়াংতাওয়াকো দেরেং নাবিহিং হিংপারো তামসা ওয়াংমগা। এপাজিংওয়া মোঘ্যইওয়া কাম ল্যামসা লোডিংবাসো বাসিমতি আসা আউতা নিওয়া তাংসাহিং দিংওয়া সেংজাহিং নাইনেরোওয়া।16নাগাইকো দিংঙাবিহিংয়া সেংজাহা আপনিবিকো লিংপাংতা হেপানি, আকু বেপারাং জোকো পিচামি নিও।17আকুহা হাত্রংরে চোসোওয়া আসা এনতাওয়া কামবি জোকোহা মাল্যাতো। আকুহা ডিংবাসো ওয়্যাতি ওয়্যাপামসা লোপাওয়া সময়তা অংটিবি লোপামি নিও। আসা চামচুই-আংমচুইপা চাওয়া আংওয়াবি পিচামসা দিংঙাবিকো তুংসিংহিং গাগ্রুপা জোপামি নিও। এপারাং সেংজাকো কামবিসোরাং আকো প্রমান পিচামগা।”18ই তাংসা নুওয়াং জাংমসা পাউল আসা বার্নাবাসকো সোতা বলি পিচাকো তামসা পারাওয়া বের্চেংহিংয়া য়োইকো চুয়ে।19আকো নোইতাহা ফিসিদিয়াকো এন্টিঅখিয়া আসা আইকোনিয়োন শহরসো ইচো নিহসো য়হুদিবিহা আউতা লেহে। আবিহা দিংঙাবিকো পারাহিংয়া দুদুইপামসা পাউলহিংয়া লুংটুইসো টোমসা স্যাপায়ে আসা সিপুয়ে তাওয়া নোমসা হেইপুমসা শহরকো বাইরেতা বাডোইয়ায়ে।20আদো প্রভুকো য়োংতোংবিহা পাউলকো হুরাপা জাসুনুওয়া আকুহা লোপুমসা শহরতা হোপুয়ে। আকো জুকুংহা আকুহা বার্নাবাস হিংপারাং দুর্বি শহরতা হোয়ে।21পাউলসো বার্নাবাসহা দুর্বি শহরতা এনতাওয়া দেরেং হিংপোংমসা উইসে দিংঙাবিহিং প্রভু ইশুকো য়োংতোং বানাইয়ে। আকো নোইতাহা আবিহা লুস্ত্রা আসা আইকোনিয়োন শহর জিংমসা ফিসিদিয়াকো এন্টিঅখিয়া লায়োংয়ে।22আবিহা আকু জায়গাতা নিওয়া প্রভু ইশুকো য়োংতোংবিহিং দেংওয়াতা সাডিংপা জোপামসা য়ুংকো তামসা ঝিপায়ে। “সেংজাকো রাজ্যতা হোদাংনুরোমা নাগাই য়াংবিহা কোইচ্যা-বিংচ্যাইকো আসা দোসরাকো ঘিইওয়াবিতা সহায়নেরোওয়া” তাওয়া নুওয়াংরে ঝিপায়ে।23আবিহা তাংসা মন্ডলিকো তোইতা কাংকো তামসা মাটা ওয়ারাংপাবি এপিয়ে, আসা আবিহা উপাস য়ুংমসা পাচাইমসা আকু য়োংতোংবিহিং আপনিকো দেংওয়া প্রভুকোতা স্যইপিয়ে।24আকো নোইতা ফিসিদিয়া লুংবি জিংমসা আবিহা পামফিলিয়া লুংবিতা লায়োমসা ওয়াংয়ে।25পর্গা তাওয়া লুংবিতারে আবিহা প্রভুকো য়্যইদি হিংপায়ে। আকো নোইতাহা আবিহা অটালিয়া শহরতা লেহে।26আউসোহা আবিহা তিকো জাহাজতা বাইমসা এন্তিঅখি য়া শহরতা লাকাপুয়ে। আকু এন্টিঅখিয়া শহরকো প্রভুকোতা দেংওয়াবিহা পাউল আসা বার্নাবাসহিংয়া সেংজাকো জেজেংওয়াসো জেংমসা দেরেংকো কামতা নিংপুমি নিমি, আসা আকু কাম তাংসা জোমসা আবিহা আউতারাং লায়োংপে।27এন্টিঅখিয়াতা হুরাপামসা লায়োংপুনতেনুওয়া পাউল আসা বার্নাবাসহা আকু মন্ডলিকো তাংসা দিংঙাবিহিং মোউয়ে। সেংজাহা আবিকোসো হেপা-হেপা জিংওয়া কাম জোমে, আসা দোসরা জ্যাকো দিংঙাবিহিংনে দেংওয়াতা ন্যাতা ওয়েপিয়ে তাওয়া নুওয়াংহা আবিহিং হিংপোংয়ে।28আবিহা উইসে দিন চোইপা এন্টিঅখিয়াকো প্রভুকোতা দেংওয়াবিহিংপা য়ুংয়ে।
The Seed Company