২ তিমোথী3
1নোইস্যাকো দিনবিতাহা সিওপারাং কোইচ্যানেওয়া সময়বি ওয়াংরোওয়া তামসা নাতিহা সিদা চ্যইনেরোওয়া।2আত্রংকো সময়কো দিংঙাবিহা আপনিহিং মেংচে জেজেংপা জোওয়া, ন্যাস্যাহিং জেজেংপা জোওয়া, পুংটা জোওয়া, দোসরাকো নুওয়াং মাহিংওয়া, দোসরাহিং নিন্দা জোওয়া, আপা আয়ুকো আজ্ঞা পালন মাজোওয়া, য়ুজ্রুদো মাসুংপা জোওয়া, আসা অপবিত্র জোওয়া জিংপুরোওয়া।3হাংসুহিংনে জেজেংপা মোজোওয়া, লামতুপা মাজোওয়া, দোসরাকো নোইতা লুজুই ল্যাওয়া, লাংচ্যা জিংমসা তেইওয়া, চুসুংমাইসুংক্যওয়া আসা এনতাওয়া নুওয়াংহিং মাসুংপা জোওয়া।4আবিহা দোসরাহিং ধোকা পিচামসা আপনিকো জোদাংবেওয়া সেই জোওয়া, আসা পুংটা জোমসা তেইওয়া, আসা সেংজাহিং মোকো, আদো লেংকে-গাকেপা জোকোরাং ইচ্ছা জিংরোওয়া।5আবিহা ভক্তি জোমি ত্যাবাপা তিংপারোওয়া, আদো আকো সেহিংয়া মামানেরোওয়া, এপাজিংওয়া দিংঙাবিকোসোহা তানাং য়ুং,6আবিকো প্যাকোতা লেরা-লেরা দিংঙাবিহা সা-সাতা হোমসা পাপসো মেইপুমি নিওয়া আসা পাপ জোকো ইচ্ছা জিংওয়া মেমে দিংঙাবিহিং আপনিকো অধীনতা এরোওয়া।7আকু মেমে দিংঙাবিহা ঝিকোহা হাত্রংদো ঝিরোওয়া, আদো আজিপ্পা তাওয়াহা হাত্রংরে নাইকো মাছুরোওয়া।8য়ান্নেস আসা য়ামব্রেসহা হেপা মোসাহিং বিরোধ জোমমে, এপারাং ই দিংঙাবিরে আজিপ্পাহিং বিরোধ জোরোওয়া, ইবিকোহা দুংজিরাং দাংপুমসা হ্যাপুনতেও, আসা আপনিকো দেংওয়ারাং য়াংপাপুনতেহে।9আদো আবিহা সদাইদিন এপা জোকো মোচু, হাংপাতানাহা য়ান্নেস আসা য়ামব্রেসকো ত্যাবাপারাং ইবিকো তোউজি জোওয়াহা তাংসা দিংঙাবি সিদা চ্যইরোওয়া।10নেহা নাতিহা কুং ঝিপাওয়াতা, কুং তেইওয়া-য়ুংওয়াবিতা, কুং নোচেংহিং লাংমি নিও। কুং দেংওয়া, সহায়ওয়া সে, জেজেংওয়া আসা কোইচ্যাওয়াবিতা সাডুংপা জিংওয়াহা নাতিহা গেমিরাং নিও।11ফিসিদিয়াকো এন্টিঅখিয়া, আইকোনিয়োন আসা লুস্ত্রাতা কা হেপা কোইচ্যামে, আকুহা নাতিহা এনতাপা গেমি নিও। আদো আকু তাংসা কোইচ্যাওয়াসো প্রভুহা কাহিং বাচাইমি নিও।12খ্রীষ্ট ইশুতা ভক্তিকো সাদিতা হাংসু য়ুংকো কেং, আবিকোতাহা কোইচ্যাওয়াহা ওয়াংকোহা ওয়াংরোওয়া।13আদো দুষ্ট আসা ল্যহপাওয়া দিংঙাবিহা দোসরাহিং ল্যহপাওয়া ল্যহপাওয়াতা আপনিরে সিওপারাং দুষ্ট জিংপুরোওয়া।14আদো নাতিহা আপনিকো ঝিওয়াতা আসা দেংওয়াকো আজিপ্পাতা সাডুংপা জিংমসা য়ুং, হাংসু-হাংসুকোসো নাতিহা ঝিচা মুংমে, আকুহা নাতিহা গেমিরাং নিও,15নাতিহা আপেচনুসোরাং পবিত্র তাংজিকো হিগাকো নুওয়াংবি গেমি নিও, ই নুওয়াংবিসোরাং খ্রীষ্ট ইশুতা দেংনু মুংওয়া মুক্তিকো তোইতা গেওয়া দুংজি পিচামগা।16সেংজাকো প্রেণাসো লাওয়া তাংজিকো হিগাহা ঝিপাকো, অর্থি পিচাকো, মিলাইকো আসা এনতাওয়া সাদিকো সোতা তালিম পিচাকো সিওপারাং ত্যইংদ্যা জিংক্যইপা নিও,17হাংপাতানাহা সেংজাকো দিংঙাহা তাংসা এনতাওয়া কামবি জোকো চুওয়া জিংকো তামসারাং ই তাংজিকো হিগা পিচামগা।
The Seed Company