২ তিমোথী4
1সেংজাকো নাগাইতা ঙাজ্যইং আসা সিপুমবিকো ইন্সাফ জোওয়া ইশু খ্রীষ্টকো নাগাইতা, আকো আগমন আসা রাজ্যহিং তুংসিংতা এমসা কা নাতিহিংয়া আজ্ঞা পিচারোওয়া,2কা নাতিহিংয়া সেংজাকো এনতাওয়া দেরেংহিং হিংপাকো আজ্ঞা পিচাদাংয়ো, সময়তা জিংদো সময়তা মোকোদো, এনতাওয়া দেরেং হিংপাকো মাল্যা। আবিহিং ঝিপানুওয়া তিমেপা য়ুংমসা কোইপা, আসা সাডুংপা জোপি।3নেহা দিংঙাবিহা আজিপ্পা ঝিপাওয়াহিংয়া সহায়কো মাছুওয়া সময়রে দেপাদাংয়ো। আবিহা আপনিকো ইচ্ছাকো নুনুই হুইরোওয়া। আবিহা আপনিহিং গাগ্রুপাওয়া নুওয়াং সহায়ওয়া ঝিপাওয়াবিহিংনাং সিওচেহা মোউরোওয়া।4আবিহা আজিপ্পা নুওয়াংহিংয়া হিংমক্যইরোওয়া, আদো হাত্রংরে মাত্যইওয়া মিংচিবি মেংচে হিংকো কেংরোওয়া।5আদো নাতিহা তাংসা নুওয়াংবিতা সাডুংপা য়ুং, কোইচ্যাওয়া সহায়মসা য়ু, এনতাওয়া দেরেং হিংপাওয়া কাম জো, আপনিকো মুংওয়া সেই সেওয়াকো কাম পুরা জো।6কুংহা বলি জিংকো সময় জিংতেও। কুংহা ইসো হোকো সময় জিংতেও।7কাহা ঠুইওয়াতা এনতাপা ঠুইমি নিও। কাহা ঠুইওয়া কামহা ত্যইপামি নিও আসা দেংওয়াহিং প্যইমসা এমি নিও। এনতাপা লুইসুমি নিও,8নেহা ইসো য়ুতাহা কুং সোতা তাংজিকো মুকুট এমি নিও, তাংজিকো ন্যায় জোওয়া প্রভুরাং কাহিয়া আকু দিনতা মুকুট লুপাপিরোওয়া। কাহিং মেংচে মোকো, আকো লেকো ন্যাতা কাংওয়াবি তাংসাহিংনাং ই মুকুট লাগাইপিরোওয়া।9নাতিহা হাসে চুবা সেন্নেপা কাহিং দোসপোংকো কোশিষ জো,10হাংপাতানাহা ডেমাসহা নেকো নিদিংওয়া বাসিমতিকো নুওয়াংবিহিং জেজেংপা জোমসা কাহিং পেইতেমসা আকুহা থেসলোনিকেতা হোপুয়ে। ক্রেসেন্সহা গালাতিয়াতা আসা তিতসহা দলমাতিয়াতা হোমি নিও।11কাহিংপাহা নেহা লুক মেংচে নিও। মর্কুসহিংয়া নাতিহা চিত্তা পারামসা ওয়াং, আকুহা কাহিংয়া কুং কামতা সিওপা য়ুজ্রুকো চুরোওয়া।12তুখিকসহিংয়া কাহা এপিসিসতা নিংপুমি নিও।13ত্রোআসতা কার্পসকোতা হুইতেওয়া কুং আংদুং নাতি ওয়াংপানু পামসা ওয়াং। আউতা নিওয়া হিগাবি আসা বেকোংতা লাওয়া হিগা মালারিংপা পামসা ওয়াংপি।14তামাকো কাম জোওয়া আলেকজান্ডারহা কাহিংয়া সিওপারাং মেংতাপা জোয়ে। আকো জোওয়া কামকো দন্ডহা আকুহিংয়া প্রভুরাং পিচারোওয়া।15আকুহা য়োংকো নুওয়াংকো তোইতা সিওপারাং বিরোধী জিংপুমি নিও। আকুহিংপাহা নাতিরে হোশিয়ার য়ুং।16নাগাই কাহিং প্যইপুনুওয়া কুং কাটুসোহা হাংসুরে মায়্যইজ্রুতো। তাংসা কাহিংয়া হুইতেয়ে, ইকো দোষহা আবিকো তোইতা মাহুইকো।17আদো প্রভুরাং কাহিংপা জিংমসা কাহিংয়া সে পিচায়ে। আকো সোতারাং কাহা দোসরা জ্যাকো দিংঙাবিহিংয়া এনতাওয়া দেরেং এনতাপা হিংপাকো ছুয়ে। এপারাং আকুহা কাহিংয়া কুংওয়াকো নামুসো বাচাইপিয়ে।18ওই, প্রভুরাং কাহিংয়া তাংসা দুষ্ট নুওয়াংবিসো বাচাইপিয়ে। আকুহা কাহিংয়া জোগায়মসা আপনিকো সেংজাকো রাজ্যতা পুরারোওয়া। আকোহা হাত্রংদো মহিমা জিংকো। আমেন।19প্রিসকিলা, আকিলাস আসা আওনেসিফরসকো সাকো প্যাপ্যাম্যাম্যাহিংয়া কুং অভিবাদন নিও তামসা জাংপি।20ইরাস্তসহা কোরোন্থিতারাং য়ুংমি নিও, ত্রফিমোসহা হাইওয়াকো সোতা আকুহিংয়া কাহা মিলেতোসতারাং হুইতেহে।21সেইগু ব্যইনুরোমা নাগাই নাতিহা সেন্নেপা চোইপোংকো কোশিষ জো। য়ুবুলস, পুরেস, লিনুস, ক্লোডিয়া আসা ইতা নিওয়া তাংসা এবি হুম্রিবিহা নাতিহিংয়া অভিবাদন তামসা কাইপুমি নিও।22প্রভুহা নাকো লাংবেহিংপা নিকো। আসা নাবি তাংসাহিংপা আকো অনুগ্রহ নিকো।
The Seed Company