২ তিমোথী2
1আকো সোতা দেংওয়াতা কুং জেজেংওয়া চেংওয়া তিমোথি, খ্রীষ্ট ইশুকো পিচাওয়া অনুগ্রহতা নাতিহা সাডুংপা জিং,2উইসে সাক্ছিকো নাগাইতা নাতিহা কুংসো হাই নুওয়াং হিংমিনি, আকুহা নাতিহা দোসরাহিংনে ঝিপাকো ছুওয়া ভরসা নিওয়া দিংঙাবিহিং ত্যইপুই।3খ্রীষ্ট ইশুকো ছোসোওয়া সিপাই জিংমসা কোইচ্যা-বিংচ্যাওয়াতা কাবিহিংপা সহভাগী জিং।4সিপাইতা ভর্তি জিংওয়া সিপাইহা দোসরা কামতা মোওইরোইমগা, হাংপাতানাহা আকুহিং ভর্তি জোওয়া সেনাপতিহিং য়াংতাপাকোরাং আকো ইচ্ছা নিমগা।5খেলতা ভাগ লাংবিহা খেলাকো নিয়ম মামানেচেহা ইনাম মুংকো মাছুমগা।6চেপা লুপক্যইপা লোংনিংতা কাংপাওয়ারাং হাংসুরোমা নাগাই অংসে মুংচানেরোওয়া।7কা হাং জাংদিংমে নাতিহা আকু নোকো জো, হাংপাতানাহা তাংসা নুওয়াংবিতা প্রভুহা নাতিহিংয়া কোইকো ছুওয়া সে পিচারোওয়া।8দাউদকো চিমাকো সিপুওয়াসো ঙারোওয়া ইশু খ্রীষ্টহিং প্যারাপামসা য়ুং, কুং হিংপাওয়া এনতাওয়া দেরেংহা ইরাংগা।9আকু এনতাওয়া দেরেং হিংপাওয়াকো সোতারাং কাহা কোইচ্যানেমগা, এসে মেংচে মোকো, অপরাধ জোমবি ত্যাবাপা সাংগ্লিসো জিংচপুমসা জেলতা সুংচপুমি নিও। আদো সেংজাকো য়্যইদিহিংয়া সাংলিসো জিংকো মাছুমগা।10আকো সোতা সেংজাকো জেংওয়াবিকো সোতা কা তাংসা নুওয়াং সহায়মগা, এপারাং নাবিরে হাত্রংদো য়ুংওয়া মহিমাহিংপা খ্রীষ্ট ইশুকোতা নিওয়া মুক্তি মুংকো ছুকো।11আজিপ্পা জাংদি নিও:“য়াংবিমি আকুহিংপা সিপুনাহাআকুহিংপারাং ঙারোরোওয়া।12য়াংবিমি আকুহিংপা কোইচ্যাক্যইনাহাআকুহিংপারাং রাজ জোরোওয়া।য়াংবিমি আকুহিং মোঘ্যইরো তানাহাআকুরে য়াংবিহিংয়া মোঘ্যইরো তারোওয়া।13য়াংবিকো তোইতা দেংকো মাচুদো,আকো তোইতাহা দেংকো চুরোওয়া,হাংপাতানাহা আকুহা আপনিকো জাংওয়া নুওয়াংহা আজিপ্পারাং জোমগা।”14নাকো দিংঙাবিহিং ই নুওয়াংবিতা কোইপাপি। আসা আবিহিং প্রভুকো নাগাইতা আজ্ঞা জোমসা জাং, আবিহা ইচো ইচো য়্যইদিতা মাস্যাসুকো, আওসোহা ভলাই মাজিংমগা, আদো ইসোহা হিংওয়া দিংঙাবিহিংয়া বিগারেপুমগা।15লেফেমগ্যইওয়া আসা আজিপ্পাকো দেরেংহিং টিটিপা চালাইওয়া ডেইয়া ত্যাবাপা সেংজাহিং এনতাপা জিংক্যইপা আকো নাগাইতা আকো নুওয়াং য়্যইকো তৈয়ার জিংকো কোশিষ জো।16বাসিমতিকো তোউজি নুওয়াংবিসো তানাং য়ুং, হাংপাতানাহা এপাজিংওয়া নুওয়াংবিসোহা দিংঙাবিহিংয়া সেংজাকোসো তানাং তানাং পুরামগা।17এপা জিংওয়া ঝিপাওয়াহা অ্যাপুমসা বেইপুওয়া মাকা ত্যাবাপা জিংমগা। হুমেনিয়স আসা ফিলেতসকো ঝিপাওয়ারে এপারাং নিও।18আবিহা আজিপ্পাহিংয়া ল্যাপুনতেমি নিও, সিমসা ঙারোওয়া কামহা নাগাইসোরাং জিংপুনতেও, নেহা মাজিংরোওয়া তামসা ঝিপামসা আবিহা লেরা দেংওয়াবিহিংয়া বিগারেপুয়ে।19আদো সেংজা আপনিরাং লাগাইওয়া আপনিকো সাডুংওয়া ডেবেহা হাত্রংদো সাডুংপা জিংমসা য়ুংমগা, ইতা এপা লামি নিও, “প্রভুহা আপনিকো দিংঙাবিহিংয়া নাইমগা” আসা “সেংজাকো মিং লাংওয়া দিংঙাবিহা মেংতাওয়া তাংসা কামবিসো তানাং য়ুংনেমগা।”20টেবো সাতাহা সুন আসা জাতাংকো য়োটিবিদাং মাতামগা। আদো কেংপ্রা আসা মোংটোকো য়োটিবিরে নিমগা। লেরাহা আদরকো সোতা আসা লেরাহা অনাদরকো সোতা।21তাংসা কিসিমকো মেংতাওয়াবিসো ছোসোপা জিংমসা য়ুংওয়া দিংঙা নিনাহা আকুহা টেবো আদরকো য়োটি ত্যাবাপা জিংরোওয়া, হাংপাতানাহা আকুহা আপনিহিং হাহাপা এমসা তাংসা এনতাওয়া কামকো সোতা গিরিওয়াকো জেজেংওয়া জিংরোওয়া।22আকো সোতা ওয়াংটেংটেংগেংনু ওয়াংওয়া মেংতাওয়া ইচ্ছাহিং ল্যা, আসা চোসোওয়া তুংসিংসো প্রভুকো মিং লাংওয়াবিহিংপা চিত্তা তাংজিতা, দেংওয়াতা, জেজেংওয়াতা আসা তিমেওয়াকো ন্যাতাতা তেই।23আদো গেকোরে মাগেহওয়া তোউজি স্যাসু-ত্যইংসুওয়াবিসো তানাং য়ুং, নাতিহা গেমিরাং নিও, এপাজিংওয়া নুওয়াংবিসোহা স্যাসুনেওয়া মেংচে জিংমগা।24প্রভুকো কাম জোওয়া দিংঙাহা স্যাসুমতুমগা। আকুহা তাংসাহিংপা চাংসুওয়া নিনেমগা, আসা ঝিপাকো চুওয়া আসা তাংসা নুওয়াং সহায়কো ছুওয়া নিনেমগা।25আকুহা বিরোধ জোমবিহিং নম্র জিংমসা কোইপাকো ছুওয়া নিনেরোওয়া। এপা জিংনু মেংচে সেংজাহা বিরোধীবিকো তুংসিংহিং হুরাপাকো ছুকোদোওয়া আসা আবিহা আজিপ্পাহিং নাইকো ছুকোদোওয়া।26এপারাং আবিহা আপনিকো সোজোইংতা ওয়াংমসা শয়তানকো পাসোসো ক্যাকো ছুরোওয়া, হাংতানাহা আবিহিংয়া শয়তানহা আপনিকো কামকো সোতা প্যইমসা এমি নিমগা।
The Seed Company