২ তিমোথী1
1কা পাউলহা সেংজাকো ইচ্ছাসো খ্রীষ্ট ইশুকোতা নিওয়া সাদিকো নাপোইওয়াকো এনতাওয়া দেরেং হিংপাকো, খ্রীষ্টকো জেংওয়া পোইং জিংমগা।2দেংওয়াতা কুং জেজেংওয়া চেংওয়া তিমোথীহিং কা ই চিঠি লাদাংয়ো। সেংজা আপা আসা কাবিকো প্রভু ইশু খ্রীষ্টহা নাতিহিংয়া অনুগ্রহ, লামতুওয়া আসা তিমেওয়া পিচাকো।3হাত্রং কা নাতিহিং হাত্রংদো আপনিকো পাচাইওয়াবিতা নো, আত্রংহা কা সেংজাহিং গারানি তামগা, হাংসুকো সেওয়া কুং আজা-আটাবি জোমি ত্যাবাপা চোসোওয়া নোচেংসো কা জোদিংমমে।4নাকো কাইওয়া নোনুওয়া, নাতিহিং দোসপাকো কুংহা টেবো ইচ্ছা নিও। দোসপাকো মুংনাহা কা সিওপারাং য়াংতাকোগা।5কাহিংয়া নাকোতা নিওয়া আকু আজিপ্পা দেংওয়াকো প্যারাতাংচাংমি। আকু দেংওয়া, হানি নাগাই নাকো আজা লোইস আসা আয়ু য়ুনিসকোতারে নিমমে, কাহা দেংমি নিও, আকু দেংওয়াহা নাকোতারে নিও।6আকো সোতা কা নাতিহিংয়া ন্যাসারাং প্যারাতাংপা দিংয়ো, কা নাকো তোইতা খুই ওইনুওয়া সেংজাকো নাতিহিং পিচাওয়া ঙেরোংহিং নাতিহা জগায়মসা এ্যহ,7হাংপাতানাহা সেংজাহা য়াংবিহিংয়া চুসুংওয়াকো লাংবে মোকো, আদো সে, জেজেংওয়া আসা আপনিকো ইচ্ছাহিং য়োইওয়া লাংবে পিচামি নিও।8আকো সোতা য়োংকো প্রভুকো গাওয়াই পিচাকো আসা কাহিং জেলতা সুংপুওয়াতা মেলেফেঘ্যই, আকুরোমাহা নাতিরে সেংজাকো সেসো এনতাওয়া দেরেং হিংপাকো কোইচ্যা।9সেংজারাং য়াংবিহিং বাচাইমসা আপনিকো দিংঙা জিংকো মোউমগা। য়াংবিকো জোওয়া কামসো মোকো, আদো আকো আপনিকো নোচেংসো আসা অনুগ্রহসো সেংজাহা য়াংবিহিংয়া আপনিকো বানাইকো মোউমগা। বাসিমতি দিংনুরোমা নাগাইসো য়াংবিহিংয়া খ্রীষ্ট ইশুহা ই অনুগ্রহহা পিচাওয়া নিমগা।10আদো য়োংকো মুক্তিহা প্রভু খ্রীষ্ট ইশু লেপুনতেনুকো নোইতা মেংচে তিংয়ো। খ্রীষ্টহা সিদিংহিংয়া ওয়েংপায়ে, আসা এনতাওয়া দেরেং হিংপামসা হাত্রংরে মিসিওয়া সাদি তিংপায়ে।11সেংজাহা কাহিংয়া ই এনতাওয়া দেরেং হিংপাওয়া ইচো নাংপোইং, জেংওয়া পোইং আসা ঝিপাওয়া জিংকো খুইমগা।12আকো সোতা কা ই নুওয়াংবিতাহা কোইচ্যাদিংয়ো, আদো কা ই নুওয়াংতা মেলেফেমগা, হাংপাতানাহা কা হাংসুকোতা দেংমি নিমমে, আকুহা কা গেদিংয়ো। সেংজাহা কুংতা ত্যইওয়া নুওয়াংহিংয়া আকুরাং আকু দিনকো সোতা জগায়মসা এরোওয়া। ইতাহা কা ডুক্কাই নিও।13কুং নাতিহিং পিচাওয়া আজিপ্পা ঝিপাওয়া উদারণ ত্যাবাপা খ্রীষ্ট ইশুকোতা নিওয়া দেংওয়া আসা জেজেংওয়াসো প্যইমসা এ্যহ।14নাকোতা ত্যইওয়া এনতাওয়া নুওয়াংবিহিংয়া য়াংবিকো নাপোতা য়ুংওয়া পবিত্র লাংবেকো সেসো জগায়মসা এ্যহ।15এশিয়াতা নিমবিহা তাংসা কাহিং হুইতেওয়াহা নাতিহা গেমিরাং নিও, আবিহিংপাহা ফুগেলস আসা হর্মোগেনসরে নিমগা।16আওনেসিফরসকো সাকো প্যাপ্যাম্যাম্যাকো তোইতাহা প্রভুকো লামতুওয়া নিকো, হাংপাতানাহা আকুহা কাহিংয়া তেপ্রে-তেপ্রেপা ওয়াংমসা হোসলা পিচায়ে। আসা কা জেলতা সুংচপুদো আকুহা মেলেফেতো।17আকুহা রোমতা দেয়োংতানি কাহিং মো-মোমসা দোসপাপুয়ে।18খ্রীষ্টকো আগমনকো দিনতা প্রভুকোসো আকুহা অনুগ্রহ মুংচাকো ছুকো। নাতিহা গেমিরাং নিও, এপিসিসতা নিনুরে আকুহা কাহিংয়া উইসে নুওয়াংবিতা সহায়তা জোওয়া নিমগা।
The Seed Company