১ তিমোথী6
1ডেইয়াহা আপনিকো গিরিকো তাংসা নুওয়াংতা মান-সম্মান জোনেরোওয়া তাওয়া কোইনেরোওয়া। এপাজিংনু মেংচে হাংসুরে সেংজাকো মিং আসা কাবিকো পিচাওয়া ঝিপাওয়াহিং দোষ লাগাইকো মাছুরোওয়া।2দেংওয়া আপু-এরাংগা তামসা আপনিকো দেংওয়া গিরিকো লিয়োপা আদর মোজো। আবিকো সিওপা সেওয়া জোকো জো, হাংপাতানাহা আবিহিং ত্যইংদ্যা জিংওয়াহা আপনিকো জেজেংওয়া দেংওয়া ডুওয়া এবিহিং ত্যইংদ্যা জিংওয়াগা।3লেরাবেমি লাডু ঝিপাওয়াবি ঝিপাদিংনাহা, আদো কাবি প্রভু ইশু খ্রীষ্টকো আজিপ্পাকো ঝিপাওয়া আসা কাবিকো জোনেওয়া ভক্তিকো ঝিপাওয়া মামানেদানাহা,4আকুহা হাইরে মেগেমসা পুংটা জিংপুওয়া নিমগা। আকুহা তোইংদ্যা মাতাওয়াতা য়্যই-জাংসুমগা, আসা ইচো ইচো য়্যইদিকো তোইতা স্যাসুকোমি মেকেংমগা। ইসোহা মিচাওয়া, স্যাসুওয়া, য়েংওয়া আসা মেংতাওয়া শংঙ্কা মেংচে জোপামগা।5এপা জিংওয়া দিংঙাবিহা ন্যাকা-নুকুপা মেংচে য়্যইমগা। আদো আবিকো দুংজিরাং য়াংপুনতেওয়া নিমগা। আবিহা আজিপ্পাহিং য়াংপাপুনতেওয়া নিমগা, আবিহা ভক্তি জোকোহা পুপুউ জিংওয়া নুওয়াং তামসা নোমগা।6আপনিহিংপা হাসেনি আউতা সন্তুষ্ট য়ুংওয়ারাং ভক্তিতা ত্যইংদ্যা জিংওয়াগা।7কেনুওয়া য়াংবিহা হাং পামসা লেংগা? আসা সিপুনুওয়া হাং পুমসা হোকোগা?8এপা বেনাহা য়াংবিহিংয়া চাকো আসা লুচাকো মুংনাহা আউতারাং য়াংবিহা সন্তুষ্ট জিংনেরোওয়া।9আদো পুপুউ জিংকো কেংওয়া দিংঙাহা পাপ জোওয়া নুওয়াংতা ফাসেমগা। আকুহা তোউজি আসা খতি জোওয়া ইচ্ছাবিকো পাসোতা পরেমগা। ই মেংতাওয়া ইচ্ছাসোহা আকুহিংয়া চোসুং-মাইসুংক্যইওয়া দাংপুওয়া আসা নরকতা চোইপামগা।10হাংপাতানাহা তাংসা কিসিমকো মেংতাওয়াকো মাটারাং পুংজিবিহিং জেজেংওয়াগা। লেরা দিংঙাবিহা পুংজি কামাইকো মিচাওয়াতা দেংকোরে ল্যাপুনতেয়ো। আসা সিওপা সিংদুওয়াকো সোতা আবিকো তুংসিংরাং চিচাদিংমি নিও।11আদো তিমোথী, নাতিহা সেংজাকো দিংঙাগা, আকো সোতা নাতিহা মেংতাওয়া নুওয়াংবিসো তানাং য়ুং, তাংজিতা, ভক্তিতা, দেংওয়াতা, জেজেংওয়াতা, সহায়ওয়াতা আসা নম্রতাতা আপনিকো তুংসিংহিং লাগাই।12দেংওয়াকো লুইসুওয়াতা এনতাপা লুইসুকো হাত্রংরে মিসিওয়া সাদিহিং প্যইমসা এ্যহ, হাংপাতানাহা সেংজাহা নাতিহিংয়া ইকো সোতারাং মোউমগা, আসা নাতিরে উইসে দিংঙাবিকো নাগাইতা আপনিকো আজিপ্পাকো গাওয়াই পিচামি নিও।13তাংসাহিং সাদি পিচাওয়া সেংজা আসা পন্তিয়োস পিলাতোসকো নাগাইতা গাওয়াই পিচাওয়া খ্রীষ্ট ইশুকো মিংতা14কা নাতিহিংয়া আজ্ঞা পিচাদাংয়ো, নাতিহা য়োংকো প্রভু ইশু খ্রীষ্ট মেলেনু চোইপা নাকো মুংওয়া আজ্ঞা এনতাপা মানে আসা নাতিহিংয়া হাংসুরে দোষ লাগাইকো মাছুকো।15সেংজাহা আকুহিংয়া ঠিক সময়তা ন্যাসারাং নিংপুরোওয়া। সেংজারাং তাংসা সেকো গিরিওয়াগা, জাইপুবিকোরে টেবো জাইপুগা, আসা প্রভুবিকোরে টেবো প্রভুগা।16আকুহা হাত্রংদো য়ুংওয়া আসা হাংসুরে হোকো মাছুওয়া হাহাইওয়াতা য়ুংমগা। আকুহিংয়া হাংসুরে নেচোইপা মাতিংয়াংতো আসা তিংকোরে মাছু। হাত্রংদো য়ুংওয়া সে আসা আদরহা আকোতারাং য়ুংকো। আমেন।17নেকো ই বাসিমতিতা পুপুউ নিওয়াবিহিং পুংটা মাজিংকো জাং, আবিকো পুংজিবিহা তুতেংজু চোইপা মায়ুংরোওয়া। আদো য়াংবিকো গাগ্রুওয়াকো সোতা তাংসা তেংমসা লাক্যইপা পিচাওয়া সেংজাকোতারাং ভরসা এ্যহ তামসা আজ্ঞা পিচা।18দিংঙাবিহিং ভলাই জিংওয়া কাম জোকো, এনতাওয়া কামতা পুপুউ জিংকো, সাংমেওয়া তুংসিং জিংকো আসা দোসরাহিং পিচাকো তৈয়ার জিংকো তামসা আবিহিং জাং।19এপারাং আবিহা নোইতা আপনিকো আজিপ্পা সাদিতা কাম লাগেওয়া পুংজিবি দুংপাকো আসা আবিহা আজিপ্পাহিং জোগায়মসা একো ছুরোওয়া।20তিমোথী, নাকোতা ত্যইওয়া নুওয়াংহিংয়া এনতাপা প্যইমসা এ্যহ। লেরা দিংঙাবিহা বাসিমতিতা ভক্তি মাতাওয়া আসা তোউজি নুওয়াংসো হাংসু দুংজিকো বিরোধ জো, আবিসো তানাং য়ুং।21হাংপাতানাহা লেরাবিহা এপাজিংওয়া নুওয়াংকো নুনুই হুইওয়াকো সোতা দেংওয়াকো ন্যাতারাং য়াংপাপুনতেও। নাবি তাংসাহিংপা সেংজাকো অনুগ্রহ নিকো।
The Seed Company