২ থেসলোনি2
1ও ডুওয়া এবাই আসা হুম্রিবাই, কাবিহা য়োংকো প্রভু ইশু খ্রীষ্ট লেরো তাওয়াকো বিষয়তা আসা আকুহিং দোসপাকো ওয়াংবিহা চিত্তা দোসপারোওয়া তাওয়াকো বিষয়তা জাংচারোওয়া,2য়োংকো প্রভু লেকো তোংতেয়ো তানুওয়া নাবিহা মাআতেঘ্যই আসা আরাংপারাংপা মাজিংগে। লেরাহা লাংবেকো দর্শনসো, লেরাহা য়্যইদিসো আসা লেরা চিঠিহা কাবিকোসো ওয়াংমগা তাদো নাবিহা মাদেংঘ্যই।3আদো নাবিহিংয়া হাংসুরে হেপা জোমসারে ধোকা পিচাকো মাচুকো, হাংপাতানাহা নাগাইহা সেংজাহিং বিরোধ জোমসা পাপ জোওয়া আকু দাংপুওয়াকো চেংওয়া মাতিংরেনু চোইপা আকু দিনহা মাদেয়োংরোওয়া।4হানিহিং দিংঙাবি সেংজা নোদিংমমে, আসা হুইদিংমে, আকু তাংসাহিং আকুহা বিরোধ জোরোওয়া, আসা আবিরোমা টেবো নোরোওয়া। আসা আকুহা সেংজাকো দেমসাতা হোমসা সেংজাকো গাদিংতা গারোওয়া, আসা আপনিহা আপনিরাং সেংজাগা তামসা জাংরোওয়া।5নাবিহা প্যারামাতাংগা? কা নাবিহিংপা নিনুরাং কাহা ই তাংসা নুওয়াংবিহা নাবিহিংয়া জাংপুনতেওয়া নিমগা।6আকুহা আপনিকো সময়তা তিংকো তামসা হানি নুওয়াংসো আকুহিং নেচোইপা য়োইদিংমমে, আকুহা নাবিরাং গেমি নিও।7আকু লিংপাং মামানেওয়া পাপি দিংঙাহা আপনিকো কামবিহা নাপো-নাপো সিদা মাচ্যইপা নাগাইসোরাং জোদিংয়ো। আদো আকুহিং য়োইমসা এওয়া সে মাওয়েংনু চোইপা আকো মেংতাওয়া কামবিহা বাইরেতা মাতিংরোওয়া।8আকো নোইতাহা আকুহিং য়োইমসা এওয়া সে ওয়েংপুনতেনুওয়া আকু পাপকো দিংঙাহিং তিংরোওয়া। আদো হাত্রং প্রভু ইশু লারেমসা লে, আত্রংহা আকো হাহাইওয়া আসা আকো নামুকো লুংসো আকু পাপি দিংঙাহিংয়া দাংপাপুরোওয়া।9আকু পাপি দিংঙাহা শয়তানকো সেপামসা লেরোওয়া, আকুহা উইসে প্যায়োংকো চিহ্ন আসা আআংপেপেচপুক্যইওয়া কামবি তিংপারোওয়া।10দাংপুমসা হ্যাপুকোবিহিং আকুহা তাংসাহিং মেংতাপা ধোকা পিচারোওয়া, আত্রংহা আবিহা ল্যহচপুরোওয়া, হাংপাতানাহা আবিহা মুক্তি পিচাওয়া আজিপ্পাহিং গ্রহন জোকো মেকেংতো।11আকো সোতা সেংজাহা আবিহিংয়া টেবো ধোকাতা পরেকো পিচারোওয়া। আসা আবিহা আকু প্যায়োংকো নুওয়াংবিতা দেংচপুরোওয়া।12আবিহিংয়া আজিপ্পাতা মাদেংপা মেংতাওয়াতা য়াংতাওয়াকো সোতা দন্ড পিচারোওয়া।13প্রভুকো জেজেংপা জোওয়া ও ডুওয়া এবাই আসা হুম্রিবাই, নাবিকো সোতাহা কাবিহা হাত্রংদো সেংজাহিং গারানি তানেরোওয়া, হাংপাতানাহা নাবিহিংয়া পবিত্র লাংবেসো ছোসোপা জোওয়া আসা আজিপ্পাতা দেংওয়া এমসা উদ্ধার মুংকো সেংজাহা নাবিহিংয়া নাগাইসোরাং জেংমি নিও।14আকো সোতারাং কাবিকো হিংপাওয়া এনতাওয়া দেরেংসো য়োংকো প্রভু ইশু খ্রীষ্টকো সন্মান নাবিরে মুংকো সোতারাং আকুহা নাবিহিংয়া ই উদ্ধারতা মোউমগা।15আকো সোতা ডুওয়া এবাই আসা হুম্রিবাই, নাবিহা সাডুংপা জিংমসা য়ুং, হানি কাবি নামুসো ঝিপামে, আসা চিঠি লামসা কাবি নাবিহিং ঝিপামে, আকু নুওয়াংবিহিংয়া এনতাপা প্যইমসা এ্যহ।16য়োংকো প্রভু ইশু খ্রীষ্ট আপনিরাং আসা য়াংবিহিং জেজেংপা জোওয়া সেংজা আপাহা, আকো অনুগ্রহসো হাত্রংরে মামাচাওয়া উৎসাহ আসা এনতাওয়া আশা পিচামি নিও।17আকোসোরাং তাংসা এনতাওয়া কামবিতা নাবিহা সাডুংওয়া আসা সে মুংচাকো।
The Seed Company