২ কোরোন্থি5
1হাংপাতানাহা কাবিহা গেমি নিও, কাবিকো য়ুংদিংওয়া ই জুপাকো সাহা দাংপুমসা হ্যাপুদো লোডিংবাতা হাত্রংদো য়ুংওয়া সেংজাকো পিচাওয়া সা নিও, ইহা হাত্রংদো য়ুংওয়া জুপাগা, হানি খুইসো বানাইওয়া মোকোমমে।2আজিপ্পারাং কাবিহা ই জুপাতা য়ুংনেনুওয়া দুঃখিত নিও, আসা কাবিহা আকু লোডিংবাতা নিওয়া জুপাহিং আংদুংবেপা লুচাকো ইচ্ছা জিংপুমি নিও।3এপারাং কাবিকো জুপাহিংমি লুপাপিনাহা জুপা মাতাপা মাজিংরোওয়া।4হাংপাতানাহা ই জুপাতা নিনুহা য়াংবিহা সিংদুওয়াসো এচপুমি নিও। য়াংবিহা পাইক্রি জিংকো তামসা মোকো, আদো য়াংবিহা লোডিংবাকো আংদুং লুচা মুংকো তামসাগা, তাকি হানি সিদিংতানি, আকুহা সাদিতা হোচা মুংকো।5নেহা কাবিহিং ই নুওয়াংকো সোতা তৈয়ার জোপিওয়াহা সেংজারাংগা, হাংসু কাবিহিং বাইনাতা পবিত্র লাংবে পিচামি নিমমে।6আকো সোতা কাবিহা সিওপারাং ভরসা নিও। কাবিহা গেদিংয়ো, হাংপাতানাহা য়াংবি হাত্রং চোইপা জুপাতা য়ুংমমে, আত্রং চোইপা প্রভুকোসোহা বার্গাং জিংরোওয়া।7আকো সোতা কাবিহা তিংওয়াসো মোকো, আদো দেংওয়াসো বাচেমগা,8কাবিহিং সিওপারাং ভরসা নিও, আকুরোমাহা জুপাসো বার্গাং জিংমসা প্রভুহিংপা চিত্তা য়ুংকো কাবিহা ইচ্ছা জোমগা।9আকো সোতা ই জুপাতা জিংদো, কিতা বার্গাং জিংদো, আকুহিং য়াংতাপাকোরাং কাবিকো উদ্দেশ্যগা।10হাংপাতানাহা য়াংবিহা তাংসা খ্রীষ্টকো ন্যায়কো নাগাইতা জাকানেরোওয়া। এপারাং য়াংবি তাংসা জুপাতা নিনুহা আপনিকো কাম জোওয়া সেই এনতাওয়াসো ধুইওয়া হানি কাম জোমি নিমমে আকো ফল মুংরোওয়া।11আকো সোতা সেংজাকোসো চুসুংওয়া তাওয়াহা হাংমমে, আকু গেমসারাং কাবিহা দোসরাবিহিংনে এপারাং জোকো কোইপামগা। সেংজাহা কাবিহিংয়া এনতাপা নাইমগা আসা কা আশা জোরোওয়া, নাবিকো নাগাইতা কুং সাদিরে আসল নিও তামসা নাবিহা গেমিরাং নিও।12কাবিহা ন্যাসারাং আপনিকো নুওয়াংবি নাবিকো নাগাইতা টেবো জোদাংওয়ারে মোকো। আকুরোমা কাবিকো তোইতাহা নাবিহিং পুংটা জোকো মৌকা পিচাদিংয়ো। তাকি নাবিহা আবিহিং জবাব পিচাকো ছুকো, হাংসু নাপোকো নুওয়াংতা মোকোপা, তিংদিংওয়া নুওয়াংতা পুংটা জোমমে,13কাবিমি নোচেংতা মাতানাহা আকুহা সেংজাকো সোতারাং মাতাতো। কাবিমি নোচেংতা নিনাহা আকুহা নাবিকো সোতারাং নোচেংতা নিও।14খ্রীষ্টকো জেজেংওয়াসো কাবিহিংয়া বাধ্য জোপামগা, কাবিহা গেমি নিও, হাংপাতানাহা তাংসাকো সোতা ইচো সিনেওয়াকো কারণ তাংসা সিপুয়ে।15আকুহা তাংসাকো সোতারাং সিমি নিও। বাচেমবিহা নেহা আপনিকো সোতা মোকো, আদো আবিকো সোতা সিমসা ঙারোওয়া খ্রীষ্টকো সোতারাং বাচেনেরোওয়া।16ইসোয়ুতাহা কাবিহা হাংসুহিংনে দিংঙাকো ন্যইওয়াসো ম্যন্যইরোওয়া। কোকোহা ইকোইহা কাবিরে খ্রীষ্টহিংয়া এপারাং ন্যইমগা। নেহা কাবিহা আকুহিংয়া এপা ম্যন্যইমগা।17আকো সোতা হাংসু দিংঙা খ্রীষ্টকোতা নি, আকুহা চুবে সৃষ্টি জিংওয়াগা। জেবে নুওয়াংবিহা য়াংপুমসা হ্যাপুয়ে, নেহা কাং, তাংসা চুবে জিংপুনতেহে।18ই তাংসা জোওয়াহা সেংজারাংগা। আকুহা কাবিহিং খ্রীষ্টকোসো আকুহিংপা ন্যাসারাং চাংসপামসা এহে আসা দোসরাবিহিংনে আকুহিংপা ন্যাসা চাংসপামসা এওয়া কাম কাবিহিং পিচায়ে।19ইশু খ্রীষ্টতা জিংমসা সেংজাহা তাংসা দিংঙাবিহিং ন্যাসা চাংসপামসা এদিংমগা। আবিকো পাপকো হিসাবহা সেংজাহা এওয়া মোতো। সেংজাহা দিংঙাবিহিংপা চাংসপামসা এরোওয়া তামসা দোসরাবিহিং জাংওয়া কাম আকুহা কাবিহিং পিচামি নিও।20কাবিহা খ্রীষ্টকো কাটুসো জিংমসা জাংচারোওয়া। নাবিহিংপা কাবি মোকো, আদো সেংজারাং কাবিকোতা জিংমসা নাবিহিং জাংমি ত্যাবাপা কাবিহা খ্রীষ্টকো মিংতা নাবিহিং সিওপারাং জাংচারোওয়া, সেংজাহিংপা দুসমন ল্যামসা চাংসুমসা য়ুংপুই।21খ্রীষ্টকোতাহা পাপরাং মোতোমগা, আদো সেংজাহা খ্রীষ্টকোতা কাবিহিংয়া আপনিকো নাগাইতা ঠিক তিংপাকো খ্রীষ্টকো তোইতারাং য়োংকো পাপ এপিমি নিও।
The Seed Company