২ কোরোন্থি4
1সেংজাহা আপনিকো লামতুওয়াসো কাবিহিং ই কাম জোকো পিচামি নিও। আকো সোতা কাবিহা নিরাশ মাজিংরো।2কাবিহা লেফেনেওয়া আসা কুসোই-ম্যই সোইওয়া কামবিহা ল্যাপুনতেহে। কাবিহা ল্যহপাওয়া কাম মোজোমগা, আসা সেংজাকো য়্যইদিহিং তুইপেং-দাংপেং মোজোমগা। আকুরোমা কাবিহা আজিপ্পাকো য়্যইদিকো ঘোষনা জোমসা সেংজাকো মিচোকো নাগাইতা তাংসা দিংঙাকো নোচেংতা আপনিহিং ত্যইমি নিও।3কাবিকো হিংপাওয়া এনতাওয়া দেরেংহা ঘুমটোসো তুংচাপুমি নিনাহা, আকুহা দাংপুমবিকো সোতা মেংচে তুংচাপুমি নিও।4আবিকো বিষয়তা জাংরোতানাহা খ্রীষ্ট, হাংসু সেংজাকো স্বরূপ ত্যাবাপা নিমমে, আকো মহিমাকো এনতাওয়া দেরেং আবি মাতিংকো তামসা ই বাসিমতিকো চোইসুংহা মাদেংওয়াবিকো নোচেংহিংয়া মাতিংপা জোপুমি নিও।5কাবিহা আপনিকো বিষয়তা মাহিংপারোওয়া, আদো ইশু খ্রীষ্টকো সোতারাং কাবিহা নাবিকো ডেইয়া জিংমসা ইশু খ্রীষ্টরাং প্রভুগা তাওয়া দেরেং হিংপামগা।6হানি সেংজাহা “নাঘিওয়াসো হাইহাইপুকো” তামসা জাং, আকুহা কাবিকো তুংসিংতা হাহাইপামি নিও, তাকি য়াংবিহা আকো মহিমাহিং গেকো ছুকো, হানি ইশু খ্রীষ্টকো য়ুওয়াইতা তিংমমে।7য়োংকো তুংসিংতাহা ই হাহাইওয়া লালাইদিংয়ো, আদো য়াংবি আপনিহা মোংটোকো য়োতি ত্যাবাপা নিও, হাংতা ই পাংক্যইওয়া পুংজি এমি নিমমে। ইসোহা তিংপামগা সেহা সেংজাকো খুইতারাং নিও, য়াংবিকো খুইতাহা মোতো।8কাবিহা তাংসাসো কোইচ্যা-বিংচ্যাওয়াতা নিও, আদো চোচোনোনোপা মাজিংয়াংতো। আরাংপারাংপা জিংপুমি নিও, আদো নিরাশ মাজিংয়াংতো।9কাবিহা সিওপারাং সতায়চাপুমি নিও, আদো মাপেইচায়াংতো। কাবিহিংয়া সিওপারাং ডুপুমি নিও, আদো কাবিহা মাশিয়াংতো।10ইশুকো সাদি কাবিকো জুপাতা তিংকো তামসা কাবিহা আকো সিপুওয়াহিংয়া সদাইদিন কাবিকো জুপাতা পুমসা তেইমগা।11হাংপাতানাহা কাবিকো ই সিনেওয়া জুপাতাহা ইশুকো সাদি তিংকো তামসারাং কাবিহা হাত্রংদো আকো সোতারাং সিদিংকো নামুতা দেকাচাংমগা।12এপা জোমসারাং সিদিংহা কাবিকোতা কাম জোদিংয়ো, আদো নাবিকোতাহা সাদিহা কাম জোদিংয়ো।13“কাহা দেংমি নিও, আকো সোতা কাহা য়্যইয়ে” তামসা তাংজিকো হিগাতা লাওয়া দিংঙাকোতা দেংওয়াকো লাংবে জিংপুমি ত্যাবাপা কাবিকোতারে দেংওয়াকো লাংবে নিও। আকো সোতারাং কাবিহা দেংমগা আসা য়্যইমগা।14কাবিহা গেমি নিও, সেংজারাং ইশুহিংয়া সিপুওয়াসো ঙারোপামগা। আকু সেংজারাং কাবিহিংনে ইশুহিংপা ঙারোপামসা নাবি আসা কাবি তাংসাহিং আপনিকোতা পারারোওয়া।15ই তাংসা নাবিকো সোতারাং জিংমগা, হাংপাতানাহা হাসে সিওপা দিংঙাবিহা সেংজাসো অনুগ্রহ মুংচা, আউসে সিওপারাং আবিহা সেংজাকো সন্মানকো সোতা সেংজাহিং গারানি তারোওয়া।16আকো সোতারাং কাবিহা হাত্রংরে নিরাশ মাজিংমগা। কাবিকো জুপা হুইপুমসা হ্যাপুদো কাবিকো নাপোকো লাংবেহা সদাইদিন চুবে জিংমসা হ্যাদিংয়ো।17হাংপাতানাহা য়োংকো ফেলেংওয়া আসা অ্যাম্যইকো দুঃখসোহা য়োংকো সোতা তুলনা জোকো মাছুওয়া অর্থাৎ অনন্ত মহান মহিমাকো তৈয়ার জোদিংয়ো।18কাবিহা তিংওয়া নুওয়াংতা মোকো, আদো মাতিংওয়া নুওয়াংহিং ধ্যান পিচামগা, হাংপাতানাহা তিংওয়া নুওয়াংহা অ্যাম্যইকো সোতা মেংচেগা, আদো মাতিংওয়া নুওয়াংহা অনন্ত চোইপা য়ুংমগা।
The Seed Company