২ কোরোন্থি2
1আকো সোতা ন্যাসারাং নাবিহিং হোমরাইপা মাজিংকো তামসারাং কা আউতা মাওয়াংরো তাওয়া নোয়ে।2হাংপাতানাহা কামি নাবিহিং তুংসিং চিচপানাহা কুং তুংসিং চিচপাপুওয়া আকু দিংঙা ল্যামসা দোসরা হাংসু কাহিং য়াংতাপাকোগা?3আসা কা হাই নুওয়াং লা, আকুহা ইকো সোতা লামগা, কা ওয়াংনুওয়া হানি দিংঙাবিসো কা য়াংতাওয়া মুংচানেকোমে আবিকোসোহা কাহা তুংসিং চিচামঘ্যইকো, হাংপাতানাহা কুং য়াংতাওয়ারাং নাবি তাংসাকো য়াংতাওয়া জিংরোওয়া তাওয়া কাহিংয়া নাবি তাংসাকো তোইতা পক্কা ভরসা নিও।4কাহা টেবো কোইচ্যামসা তুংসিংতা চিচওয়া পুমসা মিচোসো মিইতি জ্যইপামসা নাবিহিং ই চিঠি লামগা। নাবিকো তুংসিং চিচপাকো মোকো, আদো কাহা হাসেকো নাবিহিং জেজেংপা জোমি নিমমে, নাবি সিদা চ্যইকো তামসা ই চিঠি লামগা।5আদো লেরাহা লেরাহিং তুংসিং চিচপাওয়া নিনাহা আকুহা কাহিং মোকো, আদো আজিপ্পারাং সিওপা কড়া জোমসা মাজাংকো বেনাহা নাবি তাংসাহিংনাং তুংসিং চিচপামি নিও।6নাবি লারাই য়ুসুমসা পিচাওয়া সজায়রাং আকুহিংয়া তেংরোওয়া।7নেহা আকুহিংয়া নাবিহা মাপ পিচামসা সান্ত্বনা পিচানেরোওয়া। মোকোনাহা আকুহা সিওপা তুংসিং চিচপামসা সিংদুওয়া জিংপুরোওয়া।8আকো সোতা নাবিহা আকুহিংয়া সিওপারাং আজিপ্পা জেজেংপা জো, তামসা কা জাংচারোওয়া।9কুং জাংওয়া তাংসা নুওয়াং জোকোমে না মোজোকোমে তামসা জাচ জোকোরাং কাহা ই চিঠি লামগা।10হাংসুহিং নাবি ছমা পিচা, কারে আকুহিংয়া ছমা পিচারোওয়া। কা হানি নুওয়াংতা মাপ জোনেকো নিমমে, আকুহা নাবিকো সোতা খ্রীষ্টকো নাগাইতা কা মাপ জোমি নিও।11তাকি শয়তানহা য়াংবিহিং ফসাইওয়া মৌকা মামুংকো, হাংপাতানাহা য়াংবিহা আকো য়োজনাবিহা গেমি নিও।12খ্রীষ্টকো এনতাওয়া দেরেং হিংপাকো ত্রোআসতা ওয়াংনুওয়া প্রভুরাং কাহিংয়া আকো কাম জোকো মৌকা পিচায়ে।13আদো আউতাহা কুং এ তিতোসহিং মাতিংনুওয়া কুং তুংসিংহা তিমেপা মাজিংতো। আকো সোতা আবিকোসো ওয়েংসুমসা কাহা মাকেডোনিয়া হোপুইয়ে।14আদো সেংজাহিং গারানি, আকুহা কাবিহিংয়া হাত্রংদো খ্রীষ্টকোতা জিয়োপাকো সোতা ত্যইংপিরোওয়া, আসা ও্যহও্যইপা মেহনাংওয়া ত্যাবাপা তাংসাতা খ্রীষ্টকো দুংজিসো মেইপাকো আকুহা কাবিহিংয়া কামতা লাগাইকো বেইপায়ে।15হাংপাতানাহা উদ্ধার মুংদিংবি আসা দাংপুমসা হ্যাদিংবিকো প্যাকোতারে কাবিহা সেংজাকো সোতা খ্রীষ্টকো ও্যহও্যইওয়া ত্যাবাপাগা।16ঙাজ্যইংবিকো সোতাহা সাদিকো ও্যহও্যইওয়াগা আসা দাংপুমবিকো সোতাহা সিদিংকো গাবাইনাংক্যইওয়াগা। এসেপাকো টেবো চি লাংকোহা হাংসুরে মাছুরোওয়া।17হাংপাতানাহা উইসে দিংঙাবি ত্যাবাপা কাবিহা সেংজাকো য়্যইদিকো বেপার জোওয়া মোকো, আদো সেংজারাং কাবিহিংয়া নিংপুমগা আসা আকো নাগাইতারাং কাবিহা খ্রীষ্টকো ডেইয়া জিংমসা মোল্যহপাপা য়্যইমগা।
The Seed Company