২ কোরোন্থি1
1সেংজাকো ইচ্ছাসো খ্রীষ্ট ইশুকো জেংওয়া পোইং কা পাউল আসা কাবিকো এ তিমোথীকোসো, কোরোন্থিতা নিওয়া সেংজাকো মন্ডলিহিং, আসা আকাইয়া রাজ্যতা নিওয়া তাংসা সেংজাকো দিংঙাবিহিং,2কাবিকো সেংজা আপা আসা প্রভু ইশু খ্রীষ্টহা নাবিহিং অনুগ্রহ আসা তিমেওয়া পিচাকো।3য়োংকো প্রভু ইশু খ্রীষ্টকো আপা সেংজাকো প্রশংসা জিংকো। আকুহা লামতুওয়াকো আপা আসা পুরা সান্ত্বনা পিচাওয়া সেংজাগা।4আকুহা কাবিহিংয়া তাংসা কোইচ্যাওয়াবিতা সান্ত্বনা পিচামগা, হাংপাতানাহা কাবিরে সেংজাকোসো মুংচাওয়া আকু সান্ত্বনাসো দোসরা কোইচ্যাওয়াতা পরেমবিহিং সান্ত্বনা পিচাকো ছুকো তামসাগা।5হাংপাতানাহা হেপা কাবি খ্রীষ্টকো কোইচ্যাওয়াতা সিওপা সহভাগী জিং, এপারাং খ্রীষ্টকোসোরাং সান্ত্বনাতারে কাবিহা সিওপারাং সহভাগী জিংরোওয়া।6কাবিমি কোইচ্যানাহা ই কোইচ্যাওয়াহা নাবিহিং সান্ত্বনা আসা উদ্ধারকো সোতাগা। কাবিমি সান্ত্বনা মুংচানাহা আকুহা নাবিকো সান্ত্বনাকো সোতাগা। নাবিকো মুংওয়া সান্ত্বনাসোহা কাবিকো পুউওয়া দুঃখবি নাবি পুউনুওয়া ধর্য্য জোমসা সহায়কো সহায়তা জোরোওয়া।7আকো সোতা নাবিকোতা নিওয়া কাবিকো আশাহা হাত্রংরে মায়াংরোওয়া, হাংপাতানাহা কাবিহা গেদিংয়ো, হেপা নাবি কাবিকো কোইচ্যাওয়াতা সহভাগী জিং, এপারাং কাবিকো সান্ত্বনাতারে নাবিহা সহভাগী জিংরোওয়া।8ডুওয়া এবাই আসা হুম্রিবাই, কাবিহা এশিয়াতা পুউওয়া দুঃখকো বিষয়তা নাবিহা মেগেপা য়ুং তাওয়া কাবিহা ইচ্ছা মোজো, হাংপাতানাহা আউতা কাবিহা এসেপাকো সহায়কো মাছুক্যইওয়া দুঃখ সহায়য়ে, কাবিহা বাচেরোওয়া তামসা আশারাং মাতামগা।9কাবিহা “নেহা সিনেকোরাংগুং” তাওয়া জিংপুনতেমগা। কাবিহা আপনিকো তোইতা ভর মোপোরেতো, আদো সিপুমবিহিং সাদি পিচামসা ঙারোপাওয়া সেংজাকো তোইতা কাবিহা ভরসা একো তামসা ইহা এপা জিংরেমগা।10আকুহা কাবিহিংয়া এপা জিংওয়া চুসুং-মাইসুংক্যইওয়াসো বাচাইপিয়ে, আসা বাচাইপিরোওয়া। আকো তোইতারাং কাবিহা কাবিকো ভরসা এমি নিও, আকুহা কাবিহিংয়া ন্যাসারাং বাচাইপিরোওয়া।11আকো সোতা নাবিরে কাবিহিংয়া পাচাইওয়াতা সহায়তা জোনেরোওয়া। এপামি পাচাইপিনাহা কাবিকো সোতাহা সিওপারাং পাচাইপিওয়াকো সোতা সেংজাহা কাবিহিংয়া আশিষ পিচারোওয়া আসা উইসে দিংঙাবিহা কাবিকো সোতা গারানি তারোওয়া।12ই নুওয়াংকো তোইতা কাবিহা মেকেদাইপা জাংকো ছুরোওয়া, আসা কাবিকো নোচেংরে আকো গাওয়াই পিচারোওয়া, ই বাসিমতিতা মেংচে মোকো, আদো নাবিকো নাগাইতারে কাবিকো য়ুংওয়া-তেইওয়াবিহা ছোসোপা এয়ো। ই আজিপ্পাকো তুংসিংহা কাবিহা সেংজাকোসো মুংমগা। ইহা সেংজাকো অনুগ্রহসো মুংমগা, দিংঙাকো দুংজিসো মোকো,13হাংপাতানাহা নাবি পড়াইকো আসা কোইকো মাছুওয়া হাই নুওয়াংরে কাবি নাবিহিংয়া মালারোওয়া। আসা কাবি আশা জোরোওয়া, নাবিহা চোসোপা কোইকোদোওয়া তামসা,14কি হেপা নাবি কাবিহিং আইংসি মেংচে কোইদিংমে, এপারাং কাবিকো প্রভু ইশু লেনুকো দিনতা নাবিহা কাবিহিং ছোসোপা কোইরোওয়া, আসা নাবিহা কাবিকো তোইতা পুংটা জোকো ছুরোওয়া, হেপা কাবি নাবিকো সোতা পুংটা জোমমে।15য়াংবিহা ইচোহা ইচোহিং কোইরোওয়া তাওয়া নুওয়াং কাহিংয়া পুরা ভরসা নিমকো সোতারাং, কাহা নাবিহিংয়া দোসপাকো ওয়াংকো ইচ্ছা জোমগা। এপারাং নাবিহিংয়া ন্যাসারাং তোইংদ্যা জিংকোগা।16মাকেডোনিয়া হোদাংনুওয়া নাবিকোতা ওয়াংমসা দোসপারোওয়া আসা আউসোহা নাবিকোতা লারেপুরোওয়া আসা আউসোহা য়হুদিয়া কুং হোদাংওয়াতা নাবিহা কাহিং নিংপিরোওয়া তাওয়া কা ইচ্ছা জোমি নিও।17নাবিহা নোদিংমদোওয়া ই য়োজনাহা কা হাংপা বদলি জোমমে। ই কাম জোকো কেংনুওয়া কাহা হাইরে মোনোপা নাবিকোতা ওয়াংকো তৈয়ার জিংদিংয়ো তাওয়া নাবিহা নোমগা? কাহা আপনিকো য়োজনা বানাইনুওয়া বাসিমতিকো দিংঙা ত্যাবাপা ইচো নামুসো লেচোংহা “কোমমে” লেচোংহা “মোকোমমে” তামসা জাংওয়াগা?18সেংজাহা দেংকো ছুওয়া জিংমি ত্যাবাপা কাবিকো য়্যইদিতারে লেচোংহা “কোমমে” লেচোংহা “মোকোমমে” তাওয়া মাজিংয়াংতো।19হাংপাতানাহা সিলাস, তিমোথী আসা কা নাবিকো প্যাকোতা ঝিপাওয়া সেংজাকো চেংওয়া ইশু খ্রীষ্টকোতাহা “কোমমে” আসা “মোকোমমে” তাওয়াহা মায়ুংমগা। আদো আকোতাহা হাত্রংদো “কোমমে” তাওয়া মেংচে য়ুংমগা।20হাংপাতানাহা সেংজাকো তাংসা নাপোইওয়াবিহা খ্রীষ্টকোতাহা “কোমমে” তাওয়া মেংচে জিংমগা, আকো সোতারাং ইশু খ্রীষ্টকোসো আসা সেংজাকো আদরকো সোতা য়াংবিহা “আমেন” তামসা জাংমগা।21আদো কাবিহিংয়া নাবিহিংপা খ্রীষ্টকোতা সাডুংপা জোওয়া আসা য়াংবিহিং অভিষেক জোওয়াহা সেংজারাংগা।22আকুহা য়াংবিকো তোইতা আপনিকো ছাপ লাগাইমি নিও, আসা য়াংবিকো তুংসিংতা বাইনা জিংকো তামসা পবিত্র লাংবে পিচামি নিও।23কুং গাওয়াইহা সেংজা নিও, নাবিহিং হোমরাইপা মাজিংকো তামসারাং কাহা কোরোন্থিতা মোওয়াংমগা।24কাবিহা নাবিকো দেংওয়াকো তোইতা অধিকার জোকো মেকেংদাংতো, নাবিকো গাগ্রুওয়াকো সোতা নাবিহিংপারাং চাংসুমসা কাবিহা কাম জোরোওয়া, হাংপাতানাহা আপনিকো দেংওয়াতাহা নাবিহা সাডুংপা নিও।
The Seed Company