১ কোরোন্থি16
1য়হুদিয়াতা য়ুংওয়া সেংজাকো দিংঙাবিকো সোতা ন্যাস্যা দুংপাওয়াকো বিষয়তা কা গালাতিকো খ্রীষ্টকো মন্ডলিবিহিং জাংমি ত্যাবাপারাং জো।2হাতি ইয়্যাকো নাগাইকো দিন নাবিহা আপনি আপনিকো কামাইওয়াসো আস্যস্যই ওয়েংপামসা দুংপাকো জো। এপামি জোনাহা কা দেয়োংনুওয়া নাবিহা ন্যাস্যা জুউমঘ্যইরোওয়া।3কা ওয়াংপুনতেনুকো নোইতাহা কুং চিঠিহিংপা নাবিকো জেংওয়া দিংঙাবিকোতারাং আকু ভেটিহা য়রুশালেমতা কাইপুরোওয়া।4আদো য়দি নাবিহিংয়া কারে হোনেরোওয়া তামসামি জিংদিংনাহা আবিহা কাহিংপা হোকো ছুরোওয়া।5নেহা কা গেংপা মাকেডোনিয়া জিংপুমসারাং হোরো তামসা নোদিংয়ো, কা আউসো লারেনুওয়া নাবিহিং দোষপারোওয়া।6আসা নাবিকোতারাং লেমসা য়ুংনেকোদোওয়া, সায়েত সেইগু চোইপারাং য়ুংনেকোদোওয়া। আকো নোইতা কা হাংতা হ্যাদো নাবিহা কাহিং য়ুজ্রুকো চুরোওয়া,7হাংপাতানাহা নাবিকোসো নোমসা আম্যহম্যহকো সোতা দোসপাকো মোকো, আদো প্রভুকো ইচ্ছা জিংনাহা উইসে দিন চোইপা নাবিহিংপারাং য়ুংরো তামসা আশা এমি নিয়ো।8আদো পেন্টিকোসকো দিন চোইপা কা এপিসিসতা নিরোওয়া।9হাংপাতানাহা বিরোধ জোওয়াবি হুইসে নিদো আউতা প্রভুকো টেবো কাম জোকো এনতাওয়া মৌকা মুংমি নিয়ো।10নাবিকোতা থিমোথী ওয়াংদানাহা আকুহিংয়া হাইসোরে হোমরাইপা জিংকো মাপিচা, হাংপাতানাহা কা বেপারাং আকুরে প্রভুকো সোতা কাম জোদিংয়ো।11হাংসুরে আকুহিং মেংতাপা মোজোকো, আদো এনতাপা আকুহিংয়া আপনিকো হোদাংওয়াতা নিংপি, আসা আকুহা কুংতা ওয়াংকো ছুকো, হাংপাতানাহা ডুওয়াবি, হুম্রিবি আসা কারে আকু ওয়াংকোদোওয়া তামসা খুইদিংয়ো।12নেহা এ অপোলোসকো বিষয়তা কাহিংয়া হাইক্রি জাংকো নিও, কাহা আকুহিংয়া দোসরা এবিহিংপা দোষপাকো ওয়াংকো সিওপারাং সুজাদিংমগা, আদো নে এত্রং ওয়াংকোহা আকুহিংয়া ইচ্ছা মাজিংতো। আদো মৌকা মুংতানি আকুহা ওয়াংরোওয়া।13হোশিয়ার জিংমসা দেংওয়াতা সাডুংপা য়ুং। মাচ্ছুংপা আসা সাডুংপা জিং।14নাবি হাই জোবা আকুহা জেজেংওয়াসো জো।15ডুওয়া এবাই আসা হুম্রিবাই, নাবিহা গেমিরাং নিও, স্তিফানসসো আকো সাকো দিংঙাবিহা আকাইয়াতা হাংসুরোমা নাগাই দেংওয়াতা নিমগা। আবিহা সেংজাকো দিংঙাবিহিং য়ু্জ্রুকো সোতাহা আপনিকো সাদিহিংনে ত্যইপুমি নিয়ো।16এপাজিংওয়া দিংঙাবিকো জাংওয়া নুওয়াং হিং। এপাজিংওয়া সেওয়া জোওয়া আসা দোসরাহিং য়ুজ্রুওয়া দিংঙাবিকো নুওয়াংরে হিং।17স্তিফানস, ফোরটুনাটস আসা অখাইকস ওয়াংনুওয়া কাহা সিওপারাং গাগ্রুপা জিংপুয়ে, হাংপাতানাহা আবিহা নাবি মাতাদো কাহিং ঘ্যইওয়া তাংসা সোংসাবি পিচামি নিও।18হাংপাতানাহা আবিহা কুং আসা নাবিকো লাংবেহিংনে সাডুংপা জোপিয়ে। এপাজিংওয়া দিংঙাবিহিংয়া আদর জোনেরোওয়া।19এশিয়াকো মন্ডলিহা নাবি তাংসাহিংয়া অভিবাদন কাইপুমি নিও। আকিলাসসো প্রিসকা আসা আবিকো সাতা নিওয়া মন্ডলিবিহা প্রভুকো মিংতা নাবিহিংয়া অভিবাদন তামসা কাইপুমি নিও।20তাংসা ডুওয়াবি আসা হুম্রিবিহা নাবিহিংয়া অভিবাদন তামসা জাংমি নিও। নাবিহা ইচো ইচোহিং জেজেংওয়াসো অভিবাদন জো।21কুং আপনিকো অভিবাদনহা কা আপনিকো খুইসো লাদিংয়ো।22হাংসু প্রভুহিং জেজেংপা মোজো, আকো তোইতাহা টেবো কোইচ্যাওয়া ওয়াংকো। ও প্রভু, লেপুই!23প্রভু ইশুকো লামতুওয়া নাবিহিংপা নিকো।24খ্রীষ্ট ইশুকোতা কুং জেজেংওয়া নাবি তাংসাহিংপা হাত্রংদো নিকো। আমেন।
The Seed Company