১ তিমোথী5
1আপনিরোমা ডিয়োওয়া দিংঙাবিহিং মেয়েং, আদো আবিহিংয়া আপনিকো আপা ত্যাবাপা নোমসা কোইপাপি, আপনিরোমা চিয়োমবিহিংয়া আপনিকো এবি ত্যাবাপা নোমসা ব্যবহার জো।2এপা জোমসারাং আপনিরোমা ডিয়োওয়া মেমেবিহিংয়া আয়ু ত্যাবাপা আসা আপনিরোমা চিয়োওয়া মেমেবিহিংপাহা পবিত্রতাসো আপনিকো হুম্রিবি নোমসা ব্যবহার জো।3আপনিকো হাংসুরে মাতাওয়া মুরিংবিহিং কাংকো জো।4আদো হাংসু মুরিংকো চেংওয়া চেমে আসা চুওয়া চুমেবিনি, আকু চেংওয়া চেমে আসা চুওয়া চুমেবিহা আপনিকো পাপ্যামাম্যাবিহিং কাংকো। এপা জোমসারাং নাগাইহা আবিহা আপনিকো সাতারাং ভক্তি তিংপাকো ঝিকো আসা আয়ু আপাকো ঋণ তাকো, হাংপাতানাহা এপা জোনাহা সেংজারে গাগ্রুমগা।5আপনিকো হাংসুরে মাতাওয়া মুরিংহা আপনিকো আশাহা সেংজাকোতা মেংচে এওয়া নিমগা। আসা আকুহা জেইসুং লিসুং সেংজাকোতা পাচাইমগা।6আদো আপনিকো সাদি লেংকে-গাকেওয়াতা পেংপাওয়া মুরিংহা বাচেদিংদো সিপুনতেওয়া সেইগা।7আবিহা দোষ মোজোপা য়ুংকো তামসা আবিকো সোতা নাতিহা ই আজ্ঞা জো।8লেরা-লেরাহা আপনিকো দিংঙাবি আসা বিশেষ জোমসা আপনিকো প্যাপ্যাম্যাম্যাহিংনে মাকাংমগা। এপা জিংওয়াবিহা দেংওয়াহিংনে ইন্কার জোমগা। আসা আবিহা মাদেংবিরোমা মেংতাওয়াগা।9লো সুংকাইরোমা সিওপুনতেওয়া মুরিং, ইচো মেংচে পোজাহিংপা বিয়ৌ জিংওয়া নিওয়া, আকো মেংচে মন্ডলিকো হিগাতা মিং লা।10আসা আকুহা এনতাওয়া কাম জোওয়া, চেংওয়া চেমে ডেপাওয়া, সাতা ওয়াংওয়া দিংঙাবিহিং কাং-য়োংওয়া, পবিত্র দিংঙাবিকো তুরুই দুওয়া, জোরোংবিহিং সহায়তা জোওয়া আসা হাইতা জিংদো এনতাওয়া কামতা ধ্যান জোওয়াকো প্রমাণ নিনেরোওয়া।11আদো লো লিয়োওয়া নামেরি মুরিংবিকো মিংহা মুরিংবিকো হিগাতা মালাঘ্যই, হাংপাতানাহা হাত্রং আবি আপনিকো জুপাকো ইচ্ছাহিং য়্যইমক্যইওয়াকো সোতা আবিহা খ্রীষ্টকোসো তানাং জিংপুমসা বিয়ৌ জোকো কেং,12আত্রংহা আপনিকো নাগাইকো নাপোইওয়া মামানেওয়াকো সোতা আবিহা দন্ডতা পরেরোওয়া।13আকু ল্যামসা আবিহা সা-সাতা কোইওয়া জিংমসা ডুমক্যইপা জোওয়া মেংচে মোকো, আদো লামুইওয়া, দোসরাকো কাম জোদিংওয়াতা য়োইওয়া, য়্যইমতুওয়া নুওয়াংবি য়্যইওয়া জিংপুরোওয়া।14আকো সোতা লিয়োওয়া লোহকো মুরিংবিহা বিয়ৌ জোচপুকো তামসা কা জাংরোওয়া, এপা জোমসারাং আবিহা চেংওয়া চেমেবি চেংপামসা সাবিহিং কাং-য়োওয়া জিংকো, এপা জিংনু মেংচে য়োংকো বিরোধীবিহা য়াংবিহিং নিন্দা জোকো মাছুরোওয়া।15হাংপাতানাহা লেরা মুরিংবিহা নাগাইসোরাং শয়তানকো নুনুই হোপুনতেমি নিও।16আদো হাংসু দেংওয়া মেমেকো আপনি দিংঙা মুরিংবি নিনাহা, আকুহা আবিহিং কাং-য়োকো, এপামি কাংনাহা মন্ডলিহা ব্যা পুমঘ্যইরোওয়া। আকো সোতা হাংসু মুরিংকো হাংসুরে মোতো, আকুহিং মেংচে মন্ডলিহা কাং-য়োকো।17মন্ডলিহিং এনতাপা কাং-য়োওয়া মাটা ওয়ারাংপাবিহা নিহদ্যা সিওপা আদরকো য়োগ্য়্য জিংনেরোওয়া, বিশেষ জোমসা, হাংসু য়্যইদি হিংপাওয়াতা আসা ঝিপাওয়াতা কোইচ্যাদিংমে।18হাংপাতানাহা পবিত্র তাংজিকো হিগাতাহা লামি নিও, “ছ্যইকো লাপাওয়া পিকাকো নামুতা মোলা মালাগাই” আসা “বেরেং হ্যাওয়া দিংঙাহা ন্যাস্যা মুংচানেরোওয়া।”19নিহসো সুংচোকো প্রমাণ মাতানাহা মাটা ওয়ারাংপাবিকো বিরোধতা পাওয়া দোষবিহা হাত্রংরে স্বীকার মোজো।20পাপ জোদিংওয়াবিহিংয়া তাংসাকো প্যাকোতা য়েং, আসা আকু তিংমসা মন্ডলিকো তাংসা দিংঙাবিরে চোসুংরোওয়া।21কা নাতিহিংয়া সেংজা, খ্রীষ্ট ইশু আসা পবিত্র লোডিংবাকো পোইংবিকো নাগাইতা ই ঝিপাওয়া মানেকো আজ্ঞা জোরোওয়া। এপা জোনুওয়া নাতিহা হাংসুহিংনে ভেদ ভাউ আসা পক্ছপাত মোজোপা ই লিংপাংহিং নাতিহা পালন জো।22তুরুই-মুরুইপা জোমসা তাংজিকো উটকেওয়া মাবানাই। দোসরা দিংঙাকো পাপতা আপনিহিং সহভাগী মোজো। আপনিহিং পবিত্র এ্যহ।23আদো তি মেংচে মোকোপা, হাইচাংওয়াকো সোতা আসা নাকো ফেমাকো সোতা অ্যাস্যই অ্যাস্যই জোমসা আংগুরকো য়ু আংচাংকো জো।24লেরা-লেরা দিংঙাকো পাপহা ছোসোপা তিংওয়া নিমগা, আসা আবিহা নাগাইসোরাং দোষি জিংপুমগা। আদো লেরা দিংঙাকো পাপহা নোই নোইতা মেংচে তিংরোওয়া।25এপারাং লেরা দিংঙাকো এনতাওয়া কামবিহা নাগাইসোরাং চোসোপা তিংরোওয়া। আসা মাতিংওয়া কামবিরে গুংমসা য়ুংমক্যইরোওয়া।
The Seed Company