১ তিমোথী4
1নেহা পবিত্র লাংবেহা চোসোপারাং এপা জাংমি নিও, নোই-নোইতাহা দিংঙাবিহা দেংকোরে ল্যাপুরোওয়া, আবিহা দুদুইপাওয়া লাংবেকো নুনুই হুইরোওয়া আসা জেসাংকো ঝিপাওয়া মানেরোওয়া।2এপা ঝিপাওয়াবিহা প্যায়োং য়্যইওয়া তেইপি দিংঙাবিকোসো ওয়াংরোওয়া, হাংসুকো নোচেং লোউচাক্যইওয়া চা ইংমসা এওয়া ত্যাবাপা নিমমে।3আবিহা বিয়ৌ জোমতুরোওয়া আসা হাইক্রি চাওয়া-আংওয়াবিরে চামতুরোওয়া তামসা ঝিপারোওয়া, আদো দেংওয়া আসা আজিপ্পাহিং নাইওয়াবিহা গারানি তামসা ই চাওয়া-আংওয়াবি চাকো চুরোওয়া, হাংপাতানাহা সেংজারাং ই তাংসা চাওয়া-আংওয়াবি দিংমগা।4সেংজাকোসো দিংওয়া তাংসা নুওয়াংবিহা এনতাপা নিও। সেংজাহিং গারানি তামসা চানাহা হাই নুওয়াংরে ইন্কার জোনেকো বেপা মোতো।5হাংপাতানাহা সেংজাকো য়্যইদি আসা পাচাইওয়াসোরাং আকুহিংয়া চোসোপা জোমগা।6দেংওয়াকো ঝিপাওয়া আসা নাকো জাংপামসা ওয়াংওয়া আজিপ্পাকো দেরেংতা নাতিহা দেদিংমি নিও। ই নুওয়াংবি নাতিহা দেংওয়া ডুওয়া আসা হুম্রিবিহিংনে ঝিপাদানাহা নাতিহা খ্রীষ্ট ইশুকো সোতা এনতাপা ডেইয়া জোওয়া জিংরোওয়া।7ভক্তি মাতাওয়া আসা অর্থ মাতাওয়া মিংচিবিসোহা তানাং য়ুং। আকুরোমা আপনিহিং ভক্তি জিংওয়া তালিম পিচা।8জুপাকো তালিমতাবেমি তেইনাহা অ্যাস্যইস্যইতা মেংচে তোইংদ্যা জিংরোওয়া। আদো লাংবেকো তালিমতাবেমি তেইনাহা উইসে নুওয়াংতা ত্যইংদ্যা জিংমগা। ইহা নেকো আসা দেপাওয়া নোইকো সাদিকো সোতারে ত্যইংদ্যা জিংরোওয়া তামসা নাপোইমি নিও।9ই জাংদিহা দেংকো চুক্যইপা নিও, আসা তাংসারাং মানেনেরোওয়া।10হাংপাতানাহা ই উদ্দেশ্যসো কাবিহা কোইচ্যামগা আসা কোশিষ জোমগা, হাংপাতানাহা কাবিকো আশাহা ঙাজ্যইং সেংজাকোতা এমি নিও, আকুরাং তাংসা দিংঙাকো, বিশেষ জোমসা আকো তোইতা দেংমবিকো মুক্তিদাতাগা।11ই নুওয়াংবিকোরাং আজ্ঞা জো আসা ঝিপা।12ওয়াংটেংটেংগেংপা নিও তামসা হাংসুরে নাতিহিংয়া মল্যইস্যইপাকো, দেংওয়াবিকো নাগাইতা য়্যইওয়া-জাংওয়াতা, য়ুংওয়া-তেইওয়াতা আসা জেজেংওয়াতা, দেংওয়াতা আসা ছোসোওয়াতা নাতিহা ইচো উদারণ জিং।13কা মেলেনু চোইপা তাংজিকো হিগা পড়াইপামসা হিংপা, সাডুংপা জো, আসা ঝিপাকো জো।14নাতিহিংপা নিওয়া ঙেরোংহিং মিছিমেপা মোজো, হানি ঙেরোং এল্ডারবি আবিকো খুই নাকো তোইতা ওইনু অগমবাণীসো নাতিহিং মুংচাওয়া নিমমে।15নাকো ধ্যান আসা নিওয়া সেই তাংসা সে ই ঝিপাওয়া নুওয়াংবিতারাং লাগাই আসা নাতি উন্নতি জিংওয়া তাংসা দিংঙাবি তিংকো।16আপনিকো বিষয়তা আসা আপনিকো ঝিপাওয়াকো বিষয়তা হোশিয়ার য়ুং। ই নুওয়াংবি হাত্রংদো জোনাহা নাতিহা আপনিহিংনে আসা হিংবিহিংপারাং বাচাইকো ছুরোওয়া।
The Seed Company