১ তিমোথী3
1ই জাংদিহা দেংকো চুক্যইপা নিও, লেরা দিংঙাবেমি বিশপকো কাম জোকো কেংদানাহা আকুহা এনতাওয়া কাম জোকো ইচ্ছা জোমগা।2আকো সোতা বিশপহা হাংসুরে দোষ লাগাইকো মাছুওয়া, ইচো মেংচে মেকো ওয়া, আপনিকো সেদ্রাংওয়াহিং য়োইওয়া, আপনিহিং য়োইকো চুওয়া, আদর নিওয়া, আরসিং ওয়াংওয়াবিহিং এনতাপা কাংওয়া আসা ঝিপাকো চুওয়া নিনেরোওয়া,3আদো গাইব্রে আসা সেদ্রাংপাওয়া মোকো, আদো আকুহা নম্র নিওয়া, মাস্যাসুওয়া, ন্যাস্যাতা মিমিচাওয়া,4আপনিকো সাহিং এনতাপা কাংকো চুওয়া আসা আপনিকো চেংওয়া চেমেবিহা আকুহিংয়া আদর জোমসা আজ্ঞা পালন জোওয়া জিংকো।5হাংপাতানাহা লেরা দিংঙামি আপনিকো সাহিংনাং এনতাপা কাংকো মোচুনাহা, আকুহা সেংজাকো মন্ডলিহিংয়া হেপা কাং-য়োকো ছুকোগা?6আকুহা চুবে দেংওয়া দিংঙা জিংমতুরোওয়া, মোকোনাহা পুংটা জিংপুমসা আকুহা শয়তানহিং মুংওয়া দন্ডরাং মুংরোওয়া।7বিশপকো কাম জোওয়া দিংঙাহা মন্ডলিকো প্যাকোতা মেংচে মোকো, আদো বাইরেকো দিংঙাবিকো মিচোকো নাগাইতারে আকুহা এনতাওয়া আদর নিওয়া জিংনেরোওয়া, মোকোনাহা আকুহা নিন্দা আসা শয়তানকো পাসোতা পরেরোওয়া।8এপা জোমসারাং মন্ডলিতা ডেইয়া জোওয়া ডিকোনবিরে দোসরাকো নাগাইতা আদর মুংওয়া নিনেরোওয়া। নিদ্যা য়্যইওয়া মোকো, সিওপা পুটকুই আংওয়া, আসা পুংজিহিং মিচাওয়া মোকো,9আদো আবিহা আপনিকো কোইকো মোচুক্যইওয়া দেংওয়াকো আসল নোচেংহিং জোগায়মসা এওয়া নিনেরোওয়া।10নাগাইহা আবিকো জাচরে জিংকো। আকো নোইতামি আবিহা আপনিহিং দোষ মাতাওয়া প্রমাণ তিংপাক্যইনাহা আবিহা মন্ডলিকো ডেইয়া ডিকনকো কাম জোকো।11আবিকো মেবিরে এপারাং এনতাওয়া য়ুংওয়া-তেইওয়া আসা দোসরাহিং নিন্দা মোজোওয়া নিনেরোওয়া। আবিহা আপনিকো সেদ্রাংওয়াহিং য়োইকো চুওয়া জিংনেরোওয়া, আসা তাংসা নুওয়াংবিতা দেংকো চুওয়া নিনেরোওয়া।12ডিকোনহা ইচো মেংচে মেকো ওয়া জিংকো, আকুহা আপনিকো চেংওয়া-চেমেবিহিং আসা আপনিকো সাহিং এনতাপা কাং-য়োওয়া নিনেরোওয়া।13এনতাপা সেওয়া জোওয়া ডিকনবিকো ইজ্জতরে এনতাপারাং জিংরোওয়া, আসা আবিহা ইশু খ্রীষ্টকোতা নিওয়া আপনিকো দেংওয়াকো তোইতা দোসরাহিংনে মাচ্ছুংপা জাংকো চুরোওয়া।14ই চিঠি লাদো কা সেন্নেপা নাবিকোতা ওয়াংকো আশা এমি নিও।15আদো হাইক্রি জিংপুমসা কা ওয়াংকো গোইপুনাহা সেংজাকো সাতা এনতাপা তেইওয়া-য়ুংওয়া হেপা জিংনেকোমে, ই চিঠিসো গেচায়েকো জো। সেংজাকো সাহা ঙাজ্যইং সেংজাকো মন্ডলিগা। ই সেংজাকো সাহা, আজিপ্পাকো বেই আসা হুটিংরেগা।16কাবিহা স্বীকার জোরোওয়া, কাবিকো দেংওয়াকো নাপোকো নুওয়াংহা এসেপাকো টেবো নিও:খ্রীষ্টহা দিংঙা জিংমসা তিংরেহে,পবিত্র লাংবেসো তাংজি জিংপুয়ে,লোডিংবাকো পোইংবিসো তিংয়ে।তাংসা জ্যাকো দিংঙাবিকোতা আকো দেরেং দেকায়ে,বাসিমতিকো দিংঙাবিহা আকুহিংয়া দেংয়ে,আসা আকুহা মহিমাতা লোডিংবাতা তোরোইচাপুয়ে।
The Seed Company