১ থেসলোনি5
1ও ডুওয়া এবাই আসা হুম্রিবাই, ই দিনবিহা হাত্রং আসা হানি সময়তা জিংকোমে তামসা নাবিহিংয়া লামসা এমঘ্যইরোওয়া।2কুইমবি লিশুং কুকো লেমি ত্যাবাপারাং প্রভুকো দিনরে লেরোওয়া। ইহা নাবি আপনিবিরাং এনতাপা গেমি নিও।3দিংঙাবিহা তাংসাতা তিমেপা নিনা, হাইতারে গলমাল মোতো তামসা জাংওয়া নিরোওয়া। আত্রংতারাং একবিরি চেং বুংওয়া মেমেহিং ফেমা সুলোমি ত্যাবাপা, হাংসুরে মোনোমি চুইনু দাংপুওয়াকো দিনরে লেরোওয়া, আসা নাবিহা হাংতারে ক্যাকো মোচুরোওয়া।4আদো ও ডুওয়া এবাই আসা হুম্রিবাই, নাবিহা নাটুংওয়াতা মোতোতো। আকো সোতা প্রভু লেনুকো দিনতাহা একবিরি কুইওয়াবি ত্যাবাপা দেরেদো নাবিহা আআংপেপেপা জিংমঘ্যই,5হাংপাতানাহা নাবিহা হাহাইওয়া আসা জেইশুংকো চেংবিগা। য়াংবিহা লিশুং আসা নাটুংওয়াকো চেংবি মোকো।6আকো সোতা দোসরাবিবেপা য়াংবিহা জিমিদুমতুরোওয়া, আদো হোশিয়ার আসা মাজিংপা য়ুংনেরোওয়া,7হাংপাতানাহা জিংওয়া দিংঙাবিহা লিশুংরাং জিংমগা আসা য়ু আংমসা গাইমবিরে লিশুংরাং য়ু গাইমগা।8আদো য়াংবিহা জেইশুংকো চেংবি জিংওয়াকো সোতা য়াংবিহা সিদা চ্যইনেরোওয়া। য়াংবিকো দেংওয়া আসা জেজেংওয়াহা তুংসিংতা চাকো আংদুং লুউমি ত্যাবাপা সাডুংপা নিনেরোওয়া। আসা য়োংকো মুক্তিকো আশাহা চাকো তাপ্রো লুউমি ত্যাবাপা লুনেরোওয়া।9সেংজাহা য়াংবিকো তোইতা আপনিকো সেদ্রাংওয়া হুইপাকো জেংওয়া মোকো, আদো প্রভু ইশু খ্রীষ্টকোসো মুক্তি মুংচাকো তামসা জেংমগা।10প্রভু ইশু লেনুহা য়াংবি সিপুদো মিসিদো আকুহিংপারাং বাচেরোওয়া, আকুরাং য়োংকো সোতা সিপুমগা।11আকো সোতা নাবিহা নেকো জোদিংমি ত্যাবাপা ইচোহা ইচোহিং সাহস পিচাওয়া সাডুংপা জোওয়া কাম জো।12আদো ও ডুওয়া এবাই আসা হুম্রিবাই, কাবিহা নাবিহিং জাংচারোওয়া, নাবিকো প্যাকোতা কোইচ্যাদিংওয়া, হাংসু প্রভুকো আগুওয়াবি নি, আসা নাবিহিং চেতাউনি পিচাদিং আবিহিং আদর জো।13আবিকো জোওয়া কামকো সোতা আবিহিংয়া জেজেংপা জোমসা সিওপারাং আদর পিচা। আসা আবিহিংপা চাংসুমসা চিত্তা য়ুং।14ও ডুওয়া এবাই আসা হুম্রিবাই, কাবিহা নাবিহিংয়া ইচো নুওয়াং আজ্ঞা জোরোওয়া, নাবিহা ডুমকোইমবিহিং য়েং, হরেস চাপুনতেমবিহিং সাহস পিচা, আসা মোচুপুনতেমবিহিং য়ুজ্রু। আবি তাংসাহিং সহায়মসা তিংপা।15ই নুওয়াং প্যারাপা, নাতিহিং মেংতাপা জোপুয়ে তামসা নাতিরে আকুহিংয়া মেংতাপা মোজো, আদো ইচোহা ইচোহিং আসা তাংসাহিং হাত্রংদো এনতাপা জোকো ইচ্ছা জো।16হাত্রংদো গাগ্রুপা য়ুং।17পাচাইকোহা হাত্রংরে মাল্যাই।18হাই-হেপা জিংপুদো সেংজাহিং গারানি তামসা জাং, হাংপাতানাহা খ্রীষ্ট ইশুতা জিংমসা নাবিকো জোনেওয়া সেংজাকো ইচ্ছারে ইরাংগা।19পবিত্র লাংবেকো কামহিং মোয়োই।20সেংজাকো কাটুসো লেওয়া য়্যইওয়া নুওয়াংহিং মোল্যইস্যইপা।21তাংসা নুওয়াংবিহিং এনতাপা নোমসা কাং, এনতাওয়া নুওয়াং বেনাহা তুংসিংতা এ্যহ।22আসা তাংসা মেংতাওয়া নুওয়াংবিসো তানাং য়ুং।23তিমেওয়াকো সেংজা আপনিরাং নাবিহিংয়া তাংসাতা পবিত্র এ্যহকো, আসা নাবিকো লাংবে, সাদি আসা জুপাহিংয়া য়োংকো প্রভু ইশু খ্রীষ্ট মালারেনু চোইপা নির্দোষ এওয়া নিকো,24নাবিহিং মোউওয়া সেংজাকোতাহা নাবিহা দেংকো চুরোওয়া। আকুরাং নাবিহিংয়া ই তাংসা জোপিরোওয়া।25ও ডুওয়া এবাই আসা হুম্রিবাই, কা পাউল, তিমোথী আসা সিলাসকো সোতারে পাচাইপি।26আউতা নিওয়া তাংসাহিং কাবিহা নাবিহিং জেজেংপা জোমি নিও তামসা জাংপি।27কা প্রভুতা জিংমসা জাংচারোওয়া, ই লাওয়া চিঠি পড়াইমসা তাংসা সেংজাকোতা দেংওয়াবিহিং হিংপাপি।28য়োংকো প্রভু ইশু খ্রীষ্টকো অনুগ্রহ নাবিহিংপা নিকো।
The Seed Company