১ থেসলোনি4
1নোইস্যাতাহা ও ডুওয়া এবাই আসা হুম্রিবাই, নাবিহা কাবিকোসো সেংজাকো জেজেংওয়া এনতাপা য়ুংওয়া তেইওয়া আসা আকুহিং য়াংতাপাওয়া নুওয়াংবি ঝিমি নিও। আজিপ্পারাং নাবিকো য়ুংওয়া তেইওয়াবিহা সেংজাহা জেজেংরোওয়া। কাবিহা প্রভু ইশুকোতা জিংমসা জাংচারোওয়া, আকু য়ুংওয়া-তেইওয়াবিহা সিওপা এনতাপা জিংপুমসা হোকো,2হাংপাতানাহা কাবিহা নাবিহিংয়া প্রভু ইশুসো আজ্ঞা মুংমসা হানি নুওয়াংবি ঝিপামে আকুহা নাবিরাং গেদিংয়ো।3নাবিহা পবিত্র জিংকো তামসা সেংজাহা ইচ্ছা জোমগা, আকো সোতা নাবিহা নুংনাংসুওয়াসো তানাং য়ুং।4নাবিহা সেংজাহিং নাইকোরে মানাইওয়া দোসরা দিংঙাবিকো জোমি ত্যাবাপা জুপাকো মেংতাওয়া ইচ্ছাহিং য়োইমক্যইমেপা মোজো, আদো পবিত্র জিংমসা আপনিকো মেহিংপা আদরতা য়ুংকো গেনেরোওয়া।6ই নুওয়াংতাহা হাংসুরে ধোকা পিচামসা আপনিকো দেংওয়া এহিং মেংতাপা মোজোকো। ই নুওয়াংতাহা সেংজাহা সিওপারাং দন্ড পিচারোওয়া। কাবিহা নাগাইসোরাং ই নুওয়াংকো তোইতাহা নাবিহিংয়া চোসোপা ঝিপামসা জাংপুনতেমগা,7হাংপাতানাহা সেংজাহা য়াংবিহিংয়া অপবিত্র জিংকো মোকো, আদো পবিত্র জিংমসা য়ুংকো মোউমগা।8আকো সোতা ই য়্যইদি মাহিংওয়াহা দিংঙাহিং মোকো, আদো সেংজাহিংনাং মামানেওয়াগা, হানি সেংজা নাবিহিং আপনিকো পবিত্র লাংবে পিচামমে।9সেংজাকোতা দেংওয়াবিকো প্যাকোতাহা ইচোহা ইচোহিং জেজেংপা জোমসা য়ুংকো তামসাহা লামঘ্যইরোওয়া, হাংপাতানাহা সেংজা আপনিরাং নাবিহিংয়া আপনি আপনিকো প্যাকোতা জেজেংপা জোকো ঝিপামি নিও।10আজিপ্পারাং নাবিহা মাকেডোনিয়াকো তাংসা সেংজাকোতা দেংওয়াবিহিংয়া এপারাং জেজেংপা জোমি নিও। আদো ডুওয়া এবাই আসা হুম্রিবাই, ন্যাসারাং সিও-সিওপা জেজেংপা জো তামসা কাবিহা নাবিহিংয়া জাংচারোওয়া।11কাবিকো নাবিহিং জাংমবেপারাং নাবিহা তিমেপা য়ুংকো ইচ্ছা জো, আসা আপনি আপনিকো কামতা প্যারাপামসা আপনিকো খুইসোরাং কাম জো।12এপামি জোনাহা দোসরা মাদেংওয়া দিংঙাবিকো নাগাইতারে নাবিকো আদর নিরোওয়া। আসা নাবিহিং ঘ্যইনুরে দোসরাকো তোইতা আশা জোমসা য়ুংমঘ্যইরোওয়া।13আদো ডুওয়া এবাই আসা হুম্রিবাই, দেংমসা সিপুনতেওয়া দিংঙাবিকো বিষয়তা কাবিহা আবিহিংয়া জাংরোওয়া, দোসরা আশা মাতাওয়া দিংঙাবি ত্যাবাপা নাবিহা লোচোপেংঙেংপা মাজিংগে,14হাংপাতানাহা য়াংবিহা দেংমগা, ইশুহা সিমসারে ন্যাসারাং ঙারোমি নিও। আসা এপারাং সেংজাহা আকোতা দেংমসা সিপুমবিহিংয়া ইশুহিংপারাং ঙাপারোওয়া।15প্রভুকো য়্যইদিসোরাং কাবিহা নাবিহিং জাংরোওয়া, প্রভু লেনুকো দিনতাহা সিপুমবিহিং হুইতেমসা মিসিওয়াংওয়াবিহা নাগাই গ্যইপুমসা হোমক্যইরোওয়া16আত্রংকো দিনহা ব্যান্ন্যাপা ইয়্যই আজ্ঞা জাংওয়া হিংরোওয়া, আসা মাটা লোডিংবাকো পোইংকো ঙাওয়া আসা সেংজাকো পেপনে মুইনুওয়া প্রভুহা লোডিংবাসো লেরোওয়া। আত্রংরাং খ্রীষ্টকোতা দেংমসা সিপুমবিহা হাংসুরোমা নাগাই ঙারোরোওয়া।17আত্রংহা য়াংবি মিসিয়াংওয়াবিহা আসা ল্যইতেমবিহা প্রভু ইশুহিং ডিংবাতা দোসপাকো আবিহিংপা চিত্তা তোরোইচপুরোওয়া, আসা এপারাং য়াংবিহা হাত্রংদো প্রভুহিংপারাং য়ুংরোওয়া।18আকো সোতা ই য়্যইদিবিসোরাং ইচোহা ইচোহিং সাহস পিচা।
The Seed Company