১ থেসলোনি3
1আকো সোতা কাবিহা নাবিকোসো ওয়েংমসা য়ুংকো সহায়কো মাছুওয়াকো সোতা কাবিহা এথেন্স শহরতা তিমোথী মাতাপারাং য়ুংপুরোওয়া তামসা নোয়ে।2আসা কাবিকো এ তিমোথীহা খ্রীষ্টকো এনতাওয়া দেরেং হিংপাওয়া সেংজাকো ডেইয়াগা। নাবিহিং সাডুংপা জোমসা দেংওয়াতা নাগাই গ্যইপাকো কাবিহা আকুহিংয়া নাবিকোতা নিংপুমি নিও,3হাংপাতানাহা আকুহিংয়া ইকো সোতা নিংপুমগা। হাত্রং নাবিকোতা কোইচ্যাওয়াবি ওয়াং, আত্রংহা হাংসুরে নাবিকো দেংওয়াহা নুনুই মাজিংকো তাওয়া কাবি ইচ্ছা জোমগা। কোইচ্যাওয়াবিহা য়োংকোতাহা ওয়াংকোহা ওয়াংমগা, তামসা নাবিরে গেমি নিও,4হাংপাতানাহা কাবিহা নাবিহিংপা নিনুরাং কোইচ্যাওয়াবিহা ওয়াংরোওয়া তামসা নাগাইসোরাং জাংপুনতেমি নিমগা। আজিপ্পারাং, কাবিকো জাংমবেপারাং জিংপুয়ে তামসা নাবিরাং গেমি নিও।5আকো সোতারাং কাহা সিওপা য়োহকো মোচুপুমসারাং নাবিকো দেংওয়া কোইকো তামসা তিমোথীহিং নিংপুমগা। পরিকছা জোওয়া জেসাংহা নাবিকো দেংওয়াহিং ল্যহপামসা কাবিকো কোইচ্যাওয়াহিং এপারাং হ্যাপাপুকোদোওয়া তাওয়া নোমসা কাহা চুসুংপুমি নিমি।6আদো তিমোথীহা নাবিহিং দোসপামসা নেগাতিগা দেরেমি নিও। নাবিকোতাহা নেচোইপা সিওপা দেংওয়া আসা জেজেংওয়া নিও তামসা আকুহা কাবিহিং হিংপাওয়া দেরেংহা এনতাপা নিও। কাবি ত্যাবাপারাং নাবিরে কাবিহিংয়া দোসপাকো সিওপারাং কেংদিংমকোগুং।7আকো সোতা ও ডুওয়া এবাই আসা হুম্রিবাই, নাবিকো দেংওয়াহা সাডুংপা নিও তাওয়া হিংমসা কাবিহা লোচোপেংঙেংপা আসা কোইচ্যানেদো গাগ্রুপা জিংপুমি নিও,8হাংপাতানাহা নাবিকো প্রভুকোতা সাডুংপা নিও তাওয়া নুওয়াং হিংনুওয়া কাবিহা চুবে সাদি মুংচামি ত্যাবাপা জিংপুয়ে।9নাবিকো সোতারাং কাবিহা য়োংকো সেংজাকো নাগাইতা গাগ্রুদিংয়ো। ইকো সোতাহা কাবিহা সেংজাহিংয়া হাসে গারানি তাদো লিওপারাং জিংরোওয়া।10নাবিহিংপা দোসপাকো ছুকো তামসা কাবিহা জেইসুং লিশুং সেংজাকোতা পাচাইদিংয়ো। দোসপাকোমি চুনাহা নাবিকো দেংওয়াতা হাং-হাং ঘ্যইকোমে আকুহা তাংসা জোকো ছুকোগা।11য়োংকো সেংজা আপা আসা প্রভু ইশুরাং কাবিহিংয়া নাবিহিংপা দোসপাকো ন্যাতা ওয়েপিকো।12কাবি নাবিহিংয়া জেজেংপা জোমি ত্যাবাপা নাবিকো প্যাকোতা ইচোহা ইচোহিংপা আসা তাংসা দিংঙাবিহিংপারে এপারাং সিও-সিওপারাং জেজেংপা জোকো প্রভুহা য়ুজ্রুকো।13আকুহা এপারাং য়োংকো প্রভু ইশু আপনিকো তাংসা পবিত্র দিংঙাবিহিংপা লেনুওয়া য়োংকো সেংজা আপাকো নাগাইতা নাবিকোহা দোষ মাতাওয়া, পবিত্র, আসা তুংসিং সাডুংপা জোওয়া নিকো।
The Seed Company