১ থেসলোনি2
1ও ডুওয়া এবাই আসা হুম্রিবাই, কাবি নাবিকোতা ওয়াংওয়াহা এপারাং ম্যাহ্যাতো, তামসা নাবি আপনিবিরাং গেমি নিও।2কাবিহিংয়া নাগাইসোরাং ফিলিপ্পী শহরতা কোইচ্যাপায়ো আসা লেফেপায়ো তাওয়া নুওয়াংহা নাবি আপনিবিরাং গেমি নিও, আদো হাসে দিংঙাবি মেংতাপা জোদো সেংজাহা কাবিহিংয়া সাডুংপামি নিও, আকো সোতা কাবিহা এনতাওয়া দেরেং হিংপাকো নাবিকোতা ওয়াংকো চুয়ো,3হাংপাতানাহা কাবিকো এনতাওয়া দেরেং হিংপাওয়াহা প্যায়োং আসা মেংতাওয়া নোচেংসো নোওয়া মোকো, না ইহা ল্যহপামসা নাবিকোসো হাইক্রি পুচাকো হিংপাওয়ারে মোকো।4আদো হেপা এনতাওয়া দেরেং কাবিকো তোইতা ত্যইকো সোতা সেংজাহা কাবিহিং জেংমিনি, এপারাং দিংঙাবিহিং গাগ্রুপাকো মোকো, আদো কাবিকো তুংসিংকো নুওয়াং গেওয়া সেংজাহিং গাগ্রুপাকো কাবিহা য়্যইমগা।5নাবিহা গেমিরাং নিও, কাবিহা নাবিহিংয়া হাত্রংরে নোইপাওয়া নুওয়াং মায়্যইতো, আসা হাইক্রি মুংচাকো সোতা মিচামসারে মোকো। ই নুওয়াংকো গাওয়াইহা সেংজারে নিও,6খ্রীষ্টকো জেংওয়া পোইং জিংওয়াকো সোতা কাবিহা নাবিকো তোইতা অধিকার জোকো চুকোগা, আদো কাবিহা দিংঙাবিকোসো মিং মুংকো মোকো, নাবিকোসোরে মোকো আসা দোসরা দিংঙাবিকোসোরে মোকো।7আদো নাবিকো নাগাইতাহা কাবিহা চেং ত্যাবাপা নিমগা, আসা ইচো আয়ুহা আপনিকো চেংহিং লামতুপা জোমসা য়্যারাপামি ত্যাবাপা কাবিরে নাবিকো নাগাইতা লামতুপা জোমি নিও।8আজিপ্পারাং নাবিহিংয়া কাবিহা জেজেংপা জোমি নিও। নাবিহিংয়া কাবিহা এসেপাকো জেজেংওয়াকো সোতা সেংজাকো এনতাওয়া দেরেং মেংচে মোকো, আদো ঘ্যইদানাহা কাবিকো সাদিবিরে পিচাকো তৈয়ার নিমগা,9হাংপাতানাহা ও ডুওয়া এবাই আসা হুম্রিবাই, নাবিহা গেমিরাং নিও, সেংজাকো এনতাওয়া দেরেং হিংপানুহা নাবিকো তোইতা হাংসুহিংনে ব্যা মাজিংকো তামসা কাবিহা আপনিবিরাং জেইসুং লিসুং মোছুম্যান্যাপা কাম জোয়ো।10নাবিহিংপা য়ুংনুওয়া কাবিহা পবিত্র, তাংজি আসা দোষ মাতাপা য়ুংওয়া নিমগা, ই নুওয়াংকো গাওয়াইহা নাবি আসা সেংজারে নিও,11হাংপাতানাহা নাবিরাং গেমি নিও, আপাহা আপনিকো চেংওয়া চেমেবিহিং এনতাপা আজ্ঞা জোমি ত্যাবাপা কাবিরে নাবি তাংসাহিং সাডুংপা জোমসা ঝিপামসা আজ্ঞা জোয়ে।12আকো সোতা সেংজাকো নাগাইতাহা নাবিকো লোংস্ত্যাইওয়াবিহা য়োগ্য়্য নিকো তামসা, আকুহা নাবিহিংয়া আপনিকো রাজ্য আসা মহিমাতা মোউমগা।13আকো সোতা কাবিহা নাবিহিংয়া সেংজাকো য়্যইদি ঝিপানুওয়া নাবিহা ইহিংয়া দিংঙাকো য়্যইদি মোকো, আদো সেংজাকো য়্যইদিগা তামসা হিংয়ো। আজিপ্পারাং ইহা সেংজাকো ঝিপাওয়ারাংগা। নেরে ই য়্যইদিহা নাবি দেংওয়াবিকো প্যাকোতা কাম জোদিংয়ো। আকো সোতারাং কাবিরে সেংজাহিং গারানি তাদিংয়ো।14হাংপাতানাহা ও ডুওয়া এবাই আসা হুম্রিবাই, নাবিরে খ্রীষ্ট ইশুকোতা দেংওয়া য়হুদিয়াতা সেংজাকো মন্ডলিবি ত্যাবাপা উদারণ কাংওয়া জিংমি নিও, য়হুদিয়াকো মন্ডলিবিহা আপনিকো জ্যাকো দিংঙাবিকোসো কোইচ্যামি ত্যাবাপা নাবিরে আপনিকো দিংঙাবিকোসো কোইচ্যামি নিমগা।15ই য়হুদিবিরাং প্রভু ইশুহিং আসা অগমবক্তাবিহিং স্যায়ে, আসা কাবিহিংনে কোইচ্যাপায়ে। ইবিহা সেংজাহিংয়া গাগ্রুপাকো মাচুতো আসা তাংসা দিংঙাবিহিং বিরোধ জোয়ে।16আবিহা কাবিহিংয়া দোসরা জ্যাকো দিংঙাবিকোতা মুক্তিকো এনতাওয়া দেরেং হিংপাকো য়োইকো কেংয়ে। এপারাং আবিহা আপনিকো পাপহিংয়া সিও-সিওপা মেইপায়ে। নোইস্যাতাহা সেংজাকো সেদ্রাংহা আবিকো তোইতা হুইয়ো।17ও ডুওয়া এবাই আসা হুম্রিবাই, নাবিহিংপা ওয়েংসুমসা জুপাতা আম্যই মাদোসুদো, কাবিহা নাবিহিংয়া হাত্রংদো তুংসিং নাপোতা নোমি নিও, আকো সোতা কাবিহা নাবিহিংয়া সিওপারাং দোসপাকো কেংদিংয়ো।18কাবিহা নাবিকোতা ওয়াংকো কেংয়ো। কা পাউলহা হাসে ওয়াংকো কেংদো শয়তানহা কাবিহিংয়া ওয়াংকো মিচাতো।19য়োংকো প্রভু ইশু লেনুকো দিনতাহা কাবিকো আশা, গাগ্রুওয়া, সন্মানকো মুকুটহা নাবিরাং মোকোতাসা?20আজিপ্পারাং কাবিকো সন্মান আসা গাগ্রুওয়াহা নাবিরাংগা।
The Seed Company