১ পত্রস4
1হেপা খ্রীষ্টহা জুপাতা দুঃখ মুংমমে, আকু কিসিমকো নোচেং পুউমসারাং নাবিরে সাডুংপা জিং, হাংপাতানাহা হাংসু জুপাতা দুঃখ পুমি নিমমে, আকুহা পাপ জোকো ল্যাপুনতেওয়া নিমগা।2এপারাং আবিহা আপনিকো বাচেওয়া সাদিহা ন্যাসারাং দিংঙাকো মেংতাওয়া ইচ্ছাতা মোকো, আদো সেংজাকো ইচ্ছাতা সাদি পেংপারোওয়া।3হ্যাপুনতেওয়া সময়বিতাহা নাবিহা সেংজাহিং মাদেংওয়াবি ত্যাবাপা নাবিহা নুংনাংসুওয়াতা নিমগা, আজকাক্যইওয়া অভিলাষাতা নিমগা, গাইব্রে নিমগা, য়ু-পুটকুই আংওয়া পাটিতা নিমগা আসা আচকাক্যইওয়া মু্র্তিহিং হুইওয়া নিমগা।4আদো নেহা নাবিহা আবিহিংপা মেংতাওয়া ন্যাতাতা মাতেইওয়া তিংমসা আবিহা আআংপেপেচপুমি নিও, আকো সোতা আবিহা নাবিকো নুনুউ মেংতাওয়া নুওয়াং জোমগা।5আদো ঙাজ্যইং আসা সিপুওয়াবিকো ন্যায় জোওয়া সেংজাকো নাগাইতা ইকো বিষয়তা আবিহা লেখা পিচানেরোওয়া।6আকো সোতারাং সিপুনতেওয়াবিহিং এনতাওয়া দেরেং হিংপামগা, তাকি আবিহা দিংঙাবি ত্যাবাপা জুপাতা সিপুদো, লাংবেতাহা আবিহা সেংজা ত্যাবাপা য়ুংকো ছুকো।7তাংসা নুওয়াংবিকো অন্ত আবেইতা দেয়োংতেও। আকো সোতা আপনিকো পাচাইওয়াকো সোতা ছোসোওয়া তুংসিং আসা হোশিয়ার জিংমসা য়ুং।8হানিরোমা টেবো নুওয়াংহা ইচোহা ইচোকো তোইতা নাবিকো জেজেংওয়াহা তুংসিং নাপোসো নিকো, হাংপাতানাহা জেজেংওয়াসোহা উইসে পাপহিংয়া তুংমসা এপুমগা।9ইচোহা ইচোহিং নাব্যইসো মায়্যইপা আপনিকো সাতা স্বাগত জো।10সেংজাকো অনুগ্রহতা তাংসা কিসিম-কিসিমকো ঙেরোংকো জিম্মা মুংচামি নিও। আপনিকো মুংচাওয়া বিশেষ ঙেরোং দোসরাকো ভলাইকো সোতা চালাই।11য়্যইওয়া ঙেরোং মুংওয়া দিংঙাহা সেংজাকো য়্যইদি য়্যইমি ত্যাবাপা য়্যইকো, সেওয়া জোওয়া দিংঙাহা সেংজাকো সেসো আকুহা সেওয়া জোকো, তাকি ই তাংসা নুওয়াংতা ইশু খ্রীষ্টকোসো সেংজাহিংনাং প্রশংসা জিংকো। আকোরাং মহিমা আসা সেহা হাত্রংদো জিংকো। আমেন।12ও জেজেংওয়া ব্যারোবাই, দুঃখ-কষ্টসো নাবিকোতা পরিকচ্ছা দেয়োংদো, নাবিহা হাত্রংরে মোনোওয়া নুওয়াং জিংপুয়ে তামসা আআংপেপেচপা মাজিংগে।13আদো খ্রীষ্টকো দুঃখতা কারে সহভাগী জিংমি নিও তামসা গাগ্রুকো জো, আসা আকো টেবো মহিমা তিংরেনুওয়া নাবিহা সিওপারাং গাগ্রুকো ছুরোওয়া।14খ্রীষ্টকোতা দেংনুওয়া নাবিকো বেইজ্জত জিংনাহা, আপনিহিং কা আশিষিত নিও তামসা নোকো জো, হাংপাতানাহা সেংজাকো মহিমাকো লাংবেহা নাবিহিংপা য়ুংমি নিও।15নাবিকো প্যাকোতামি দুঃখ ওয়াংমি নিনাহা দিংঙা স্যাওয়া, কুইওয়া, মেংতাপা কাম জোওয়া অথবা দোসরাকো কামতা খুই ওয়্যাওয়া জিংমসা দুঃখ মামুংকো।16আদো খ্রীষ্টান জিংওয়াকো কারণ দুঃখমি মুংনাহা মেলেফেঘ্যই। আদো খ্রীষ্টকো মিং লাংচা মুংনুওয়া সেংজাহিং গারানি তামসা জাং।17হাংপাতানাহা ন্যায় সেংজাকো আপনি দিংঙাকোসোরাং শুরু জিংকো সময় জিংতেয়ো। য়োংকোসোরাং ন্যায় জিংদাংনাহা সেংজাকো এনতাওয়া দেরেংহিং মামানেমবিকোহা ঝান হাসেকো ন্যায় জিংকোমে?18তাংজিকো হিগাহা জাংমগা, “তাংজি নিওয়া দিংঙাহিং বাচাইকোহা মাছু-মান্যাপা জিংনাহা, তাংজি মাতাওয়া আসা পাপি দিংঙাকোহা ঝান হাং জিংকোমে?”19আকো সোতা সেংজাকো ইচ্ছাতা দুঃখ মুংওয়াবিহা এনতাওয়া কাম মাল্যাপা তাংসাহিং দিংওয়া সেংজাকোতা ভরসা এহকো ছুনেমগা। আকুহা আপনিকো প্রতিজ্ঞাহা পুরা জোমগা।
The Seed Company