১ পত্রস3
1এপারাং ও মেবাই, নাবিহা ওয়াকো অধীনতা য়ুংনেরোওয়া, আসা এপা জোমসারাং নাবিকো য়ুংওয়া-তেইওয়াবি তিংমসা সেংজাকো য়্যইদিহিং পালন মোজোওয়া নাবিকো ওয়াবিরে সেংজাহিং দেংরোওয়া।2হাংপাতানাহা নাবিকো তেইওয়া-য়ুংওয়াবি হাসেকো শুদ্ধ নিমমে আসা হাসেকো আদরনীয় নিমমে, আকুহা আবি আপনিবিরাং তিংরোওয়া।3নাবিহা বাইরে তিংওয়া পুরিংবিহিং সজায়ওয়া, সুনকো তিসেবি আসা পাংক্যইওয়া আংদুংবি লুউমসা লেইপ্যা জোওয়া মোকো,4আদো নাবিকো জেজেংক্যইওয়াহা তুংসিং নাপোসো নিহকো, হানি হাত্রংরে য়োংপুমসা ম্যাহ্যাওয়া নম্র আসা শান্ত লাংবেকো জেজেংক্যইওয়ামে, আসা ইহা সেংজাকো নাগাইতা উইসে দামকো নিও।5হাংপাতানাহা নাগাইকো সেংজাকোতা ভরসা জোওয়া পবিত্র মেমেবিহা আপনিকো ওয়াকো অধীনতা য়ুংমসা আপনিহিং সিঙ্গার জোয়ে।6সারারে এপারাং নিমগা। আকুহা অব্রাহামকো আজ্ঞা পালন জোমগা, আকুহিংয়া “কুং গিরি” তামসা জাংমগা। হাইসোরে মাচ্ছুংপা ঠিক কাম জোনাহা নাবিরে সারাকো চেমেবি জিংরোওয়া।7ওয়াবিরে আপনিকো মেবি কমজোর নিও তাওয়া নুওয়াং লারিংমদিংরোওয়া। আবিহা মেবিকো আদর জোনেরোওয়া, হাংপাতানাহা আবিরে নাবিহিংপা চিত্তা সেংজাকো জীবন দান মুংচারোওয়া। এপারাং নাবিকো পাচাইওয়াতা হাইরে বাধা মাওয়াংকো তামসা ইচোহা ইচোহিংপা এনতাপা ব্যবহার জোকো জো।8নোইস্যাতা কা জাংরোওয়া, নাবিহা তাংসা ইচো তুংসিং জিংমসা ইচোহা ইচোকো দুঃখহিং কোইওয়া জিংনেরোওয়া। আপু এবিহিং ত্যাবাপা ইচোহা ইচোহিং জেজেংপা জো আসা ইচোহা ইচোহিংপা লামতুওয়া আসা নম্র জিং।9হাংসুরে মেংতাওয়াকো বদলি মেংতাপা মোজো, আসা অপমানকো বদলি অপমান মোজো, আদো আবিহিংয়া আশিষ পিচা, হাংপাতানাহা সেংজাহা নাবিহিং মোউনুরে আশিষ পিচাকো মোউমগা।10হাংপাতানাহা তাংজিকো হিগাহা জাংমগা, “হাংসু সাদিহিং জেজেংপা জো, আসা এনতাওয়া দিনবিহিং কাংকো ইচ্ছা জো, আবিহা আপনিকো লেবেহিং দুষ্ট নুওয়াং য়্যইকো আসা নামুহিং ল্যহপাকো পিচামতুরোওয়া।”11দুষ্ট কাম ল্যামসা আকুহা আসল কাম জোকো, আকুহা তিমেওয়া মোউকো আসা আকো নুনুইরাং হুইকো।12হাংপাতানাহা প্রভুসেংজাহা তাংজি নিওয়া দিংঙাবিহিংয়া কাংমগা আসা আবিকো পাচাইওয়া হাত্রংদো হিংমগা, আদো প্রভুসেংজাকো য়ুওয়্যাইহা দুষ্ট কাম জোমবিকো বিরোধতা নিমগা।13নাবিমি ভলাইকো কাম জোকো ইচ্ছা জোনাহা নাবিহিংয়া হাংসু খতি জোকোগাসা?14আদো তাংজিকো কাম জোনুরে দুঃখ মুংনাহা নাবিহা আশিষিত জিংরোওয়া। আবিকো ধমকিসো মাচ্ছুংঘ্যই আসা সিংদুমঘ্যই।15আদো আপনিকো তুংসিংতা খ্রীষ্টহিং প্রভু মানেমসা ভক্তি এ্যহ, নাবিকো নাপোতা নিওয়া আশাকো বিষয়তা হাংসু উইবা, আকো বিষয়তা জাংকো তৈয়ার য়ুং, আদো আকু কামহা নম্র আসা আদরসো জো।16আদো এপা ল্যানুওয়া নম্র জিংমসা আদরসো জোকো জো। আপনিকো নোচেংহিং ছোসোপা একো জো। এপা জিংনুওয়া নাবিকো খ্রীষ্টহিংপা হুইদিংওয়া এনতাওয়া তেই-য়ুংওয়াহিং তিংমসা নাবিহিং বাদনাম জোওয়াবিহা আপনিবিরাং লেফেপুরোওয়া।17সেংজাকোমি এপারাং ইচ্ছা নিদানাহা, দুষ্ট কাম জোমসা দুঃখ মুংওয়ারোমা ভলাই কাম জোমসা দুঃখ মুংওয়ারাং আসলগা।18হাংপাতানাহা খ্রীষ্টহা য়োংকো পাপকো কারণ সদাইবিরিকো সোতা ইকোই সিপুয়ে। নাবিহিং সেংজাকোতা পারাকো খ্রীষ্টহা পাপ মাতোদো পাপিবিকো সোতা সিপুয়ে। আকুহা দিংঙাকো জুপাতা জিংমসা সিপুয়ে, আদো লাংবেসো ঙারোয়ে।19আকুহা আকু লাংবেসোরাং হোমসা বন্দনতা পরেওয়া লাংবেবিহিং হিংপায়ে।20ই লাংবেবিহা সেংজাকো আজ্ঞা পালন মোজোওয়া লাংবেবিগা, হানি নাগাইকো সময়তা নোহাকো জাহাজ বানাইনু পাপসো হুরাপাকো দোওয়া তামসা ধর্য্য জোমসা সেংজাহা ন্যাতা কাংদিংমমে, আদো জম্মা য়্যাচো দিংঙা মেংচে ব্যান্যা হ্যাওয়াসো বাচেমগা।21ই তিসোহা বাপ্তিস্মাহিং কোইপামগা, হাংসু নাবিহিং বাচাইমে। ইহা জুপাকো জিতিহিং দুমবেপা মোকো, আদো ইহা চোসোওয়া নোচেংসো সেংজাকোতা জোওয়া প্রতিজ্ঞাগা। ই তাংসা নাবিহা ইশু খ্রীষ্টকো সিপুওয়াসো ঙারোওয়াকো সোতা মুংচামগা।22আকুহা লোডিংবাতা হোপুয়ে আসা সেংজাকো দাংক্রেং কাটুতা গামি নিও, আসা তাংসা লোডিংবাকো পোইংবি আসা লোডিংবাকো অধিকারবি, আসা তাংসা সেবিহা আকো অধীনতা নিও।
The Seed Company