১ পত্রস5
1আকো সোতা খ্রীষ্টকো দুঃখকো সাক্চি আসা দেপাওয়া মহিমাকো সহভাগী জিংওয়াকো সোতা আসা কারে নাবি ত্যাবাপা ইচো মাটা ওয়ারাংপা জিংওয়াকো সোতা নাবি মাটা ওয়ারাংপাবিহিং বিনতি জোরোওয়া।2নাবিহা দোসরাকো সুজানেওয়াসো মোকো, আদো আপনিকো ইচ্ছাসো, সেংজাকো ইচ্ছা জোমি ত্যাবাপা নাবিকো জিম্মাতা পিচাওয়া পারাকো গোইত্র জিং। ন্যাস্যাতা মিচামসা মোকো, আদো সেওয়া জোকো তুংসিং লাংমসা ই কাম জো।3নাবিকো জিম্মাতা নিওয়াবিকো তোইতা অধিকার জোওয়া মোকো, আদো আকু দিংঙাবিকো নাগাইতা আপনিরাং উদারণ জিং।4আসা হাত্রং মাটা গোইত্র তিংরে, আত্রংহা নাবিহা মহিমাকো মোয়োংওয়া মুকুট মুংচারোওয়া।5এপা জোমসারাং ও ওয়াংতেংটেংগেংওয়া দিংঙাবাই, নাবিরে মাটা ওয়ারাংপাবিকো অধীনতা য়ুং। নাবিহা ইচোহা ইচোহিং নম্র জিংমসা তিংপা, হাংপাতানাহা তাংজিকো হিগাহা জাংমগা, “সেংজাহা পুংটা জোওয়াবিহিংয়া বিরোধ জোমগা, আদো নম্রবিহিংয়া অনুগ্রহ জোমগা।”6আকো সোতা সে নিওয়া সেংজাকো খুইকো লিতা য়ুংমসা নম্র জিং, আসা আকুহা নাবিহিংয়া ঠিক সময়তা তোইতা তোরোইরোওয়া।7আপনিকো তাংসা সিংদুওয়াহা সেংজাকো নাগাইতা এপুই, হাংপাতানাহা আকুরাং নাবিহিংয়া কাং-য়োরোওয়া।8হোশিয়ার য়ুং, আসা চালাক জিং। নাবিকো দুসমন শয়তানহা জ্যাওয়া সিংহ ত্যাবাপা হাংসুহিং দোসুকোমে আসা চাকোমে তামসা মৌকা মোমসা তেইদিংয়ো।9দেংওয়াতা সাডুংপা জিংমসা শয়তানহিং বিরোধ জো, হাংপাতানাহা বাসিমতিতা নিওয়া তাংসা সেংজাহিং দেংওয়াবিরে দুঃখ মুংমি নিও তাওয়াহা নাবিহা গেমিরাং নিও।10তাংসা অনুগ্রহকো সেংজাহা খ্রীষ্ট ইশুকোতা নাবিহিংয়া অনন্ত মহিমাকো সোতা মোউমি নিও। নাবিহা আইংসি দুঃখ জোপুনতেনুওয়া আকুরাং নাবিহিংয়া ন্যাসারাং চুবে বানাইরোওয়া, স্থির বানাইরোওয়া আসা শক্তিশালি বানাইরোওয়া।11তুতেংজু সেহা আকোরাং জিংকো। আমেন।12কুং দেংকো ছুওয়া এ সিলাসকো সহায়তাসো কাহা ই আপেচিংওয়া চিঠি নাবিহিং লামি নিও। কাহা ই তাংসা সেংজাকো আজিপ্পা অনুগ্রহকো গাওয়াই পিচাকো আসা নাবিকো সাহসহিং সাডুংপা জোকো তামসা লামগা। ই অনুগ্রহতা সাডুংপা জিংমসা জা।13নাবিহিং ত্যাবাপা জেংওয়া বেবিলোনতা নিওয়া মন্ডলিবি আসা কুং চেংওয়া মর্কুসরে নাবিহিং অভিবাদন কাইপুমি নিও।14খ্রীষ্টকো জেজেংওয়াসো ইচোহা ইচোহিং চুম্মন জোমসা অভিবাদন জো। খ্রীষ্টকোতা নিওয়া নাবি তাংসাহিংপা তিমেওয়া নিকো।
The Seed Company