১ পত্রস2
1আকো সোতা তাংসা দুষ্টতা, কপটি আসা ইর্ষা, তাংসা নিন্দাবিহিং ল্যা।2চুবে কেওয়া চেং য়ো সেকেংমি ত্যাবাপা নাবিহা শুদ্ধ লাংবেকো য়ুতি সেকেংকো জো, হানি সেংজাকো য়্যইদিমে, আকুসোহা নাবিহা আপনিকো মুক্তিতা ডেপুমসা হোকো ছুরোওয়া।3হাংপাতানাহা প্রভুহা লামতুপা জোমগা তাওয়া স্বাদ নাবিহা মুংমি নিও।4প্রভুকোতা ওয়াং, হাংসু ঙাজ্যইং লুংটুইমে, দিংঙাবিকোসো ইন্কার জিংপুওয়া, আদো সেংজাকো মিচোকো নাগাইতাহা আকুহা জেংচপুওয়া আসা পাংক্যইওয়াগা।5নাবিরে ঙাজ্যইং লুংটুইবি জিংমসা হোতু আসা লাংবেকো দেমসা বানাইকো আপনিহিং সেংজাকোতা স্যইপুই। আউতাহা নাবিহা ইশু খ্রীষ্টকোসো সেংজাহিং মন পরেওয়া লাংবেকো বলিদান চড়াইওয়া পবিত্র পাউকো কাম জোরোওয়া।6হাংপাতানাহা তাংজিকো হিগাহা জাংমগা, “কাং! কুং জেংওয়া আসা সিওপা পাংক্যইওয়া আরিকো লুংটুই কা সিয়োনতা চুউদাংয়ো। আসা হাংসু আকো তোইতা দেং, আকুহা হাত্রংরে লেফেমঘ্যইরোওয়া।”7আকো সোতা নাবিহা হাংসু দেং, আবিকো সোতাহা আকুহা পাংক্যইওয়াগা, আদো মাদেংবিকো সোতাহা “হানি লুংটুইহিং সা বানাইমবিহা মোঘ্যইরো তামসা হুইতেমমে, আকুরাং আরিকো মাটা লুংটুই জিংপুয়ে।”8তাংজিকো হিগাহা জাংমগা, “ইরাং দিংঙাবিহিং কুটিপাওয়া লুংটুইগা। ই পাত্যারুংতারাং উইসে দিংঙাবিহা ইপুচাংমগা।” সেংজাকো য়্যইদিহিং আবি মাদেংওয়াকো সোতা আবিহা কুটিরোওয়া। আবিকো সোতাহা এপারাং য়োজনা জোওয়া নিমগা।9আদো নাবিহা জেংওয়া দিংঙা, জাইপুকো পাউ, পবিত্র জ্যা, সেংজা আপনিকো প্রজাগা, নাবিহিংয়া আকুহা নাগীওয়াসোহা আকো হাহাইওয়াতা পারায়ে, তাকি নাবিহা আকো আআংপেপেচপুক্যইওয়া কামকো ঘোষনা জোকো ছুকো।10ইকোইহা নাবিহা সেংজাকো প্রজা মাতামগা। আদো নেহা নাবিহা প্রজা জিংমি নিও। ইকোইহা নাবিহা লামতুওয়া মামুংয়াংমগা, আদো নেহা নাবিহা লামতুওয়া মুংমি নিও।11ও জেজেংওয়া ব্যারোবাই, কা নাবিহিংয়া জাংচারোওয়া, কি বিদেশীবি আসা প্রবাসীগা তাওয়া গেমসা নাবিকো লাংবেকো বিরোধতা লুইসুওয়া পাপকো ইচ্ছাকো অভিলাষাবিসো বার্গাং য়ুং।12খ্রীষ্টহিং মাদেংওয়া দিংঙাবিকো নাগাইতা নাবিকো য়ুংওয়া-তেইওয়াবিহা এপা এনতাপা জিংকো, আবিহা নাবিহিংয়া মেংতাওয়া কাম জোয়ো তাদো, নাবিকো এনতাওয়া কাম তিংকো ছুকো, আসা সেংজা ন্যায় জোকো লেনুওয়া আবিহা সেংজাকো মহিমা জোকো।13প্রভুকো আদরকো সোতা তাংসা অধিকার জোওয়াবিকো অধীনতা য়ুং, জাইপুকো অধীনতা য়ুং, হাংসুহিংপা হাংসুরোমা তোইতা অধিকার নিমমে,14আসা দোসরা হাকিমবিকো অধীনতারে, হাংসু মেংতাপা কাম জো আবিহিংয়া দন্ড পিচাকো আসা এনতাপা কাম জোমবিহিংয়া তাচাকো সোতা সেংজাসোরাং খুইমি নিমগা।15তাউজিবিকো মোকোইপা য়্যইওয়া নুওয়াংবিহিংয়া নাবিকো এনতাওয়া কামসো চেকেপা য়ুংপাওয়া সেংজাহা ইচ্ছা জোমগা।16স্বতন্ত্র দিংঙাবি ত্যাবাপা য়ুং, আদো স্বতন্ত্র নিয়ো তামসা দুষ্ট কামহা মোজো, আদো সেংজাকো ডেইয়াবি ত্যাবাপা জিং।17তাংসা দিংঙাবিহিং আদর জো। সেংজাহিং দেংওয়া তাংসাহিং জেজেংপা জো। সেংজাকোসো চুসুং, জাইপুহিং আদর জো।18ও ডেইয়াবাই, নাবিহা আপনিকো গিরিবিকো অধীনতা য়ুং আসা আবিকো আদর জো। জেজেংপা জোওয়া আসা ভলাই জোওয়া গিরিবিহিং মেংচে মোকো, আদো জেজেংপা মোজোওয়া গিরিবিহিংনে আদর জো,19নাকো পুউমগ্যইওয়া টেবো দুঃখরে সেংজাকো ইচ্ছারাংগা তামসা পুউনাহা সেংজাহা আবিহিংপা য়াংতারোওয়া।20হাংপাতানাহা নাবিহা মেংতাওয়া কাম জোমসা সজায় মুংনুওয়া ধর্য্য জোমসা সহায়ওয়াতা হাং টেবো নুওয়াং জিংগাসা? আদো এনতাওয়া কাম জোমসারে দুঃখ মুংনুওয়া ধর্য্য জোমসা সহায়নাহা সেংজাহা য়াংতারোওয়া।21ইকো সোতারাং সেংজাহা নাবিহিং মোউমগা, হাংপাতানাহা খ্রীষ্টরে নাবিকো সোতা দুঃখ সহায়মসা উদারণ জিংমি নিও। এপাজিংনুওয়া নাবিরে আকো তিংপাওয়া ন্যাতাতা তেইনেরোওয়া।22“আকুহা হাই পাপরে মোজোতো, আসা আকো নামুসো ল্যহপাওয়া নুওয়াংহা হাংসুরে মোদোতো।”23লেরাবি আকুহিং অপমান জোদো আকুহা এপাজিংওয়া জবাব মিচাতো। দুঃখ মুংদো আকুহা ধমকি মিচাতো, আদো আকুহা এনতাপা ন্যায় জোওয়া সেংজাকোতারাং ভরসা এয়ো।24খ্রীষ্টহা য়োংকো পাপ আপনিকো জুপাতা পুউমসা কেংপ্রাকো ক্রুসতা সিপুয়ে। এপা জিংপুনুওয়া য়াংবিরে পাপকো সোতা সিপুয়ে আসা সেংজাহিং মন পরেওয়া এনতাওয়া কামকো সোতা বাচেয়ো। আকো মেংটাবিসো নাবিহা সাংয়ো।25হাংপাতানাহা নাবিহা ন্যাতা ওইরোইপুওয়া লুকাবি ত্যাবাপা নিমগা, আদো নেহা নাবিকো লাংবেকো গোইত্র আসা রক্ষা জোপিওয়াকোতা লায়োংমি নিও।
The Seed Company