১ য়হুন্না3
1কাং, য়াংবিহিংয়া সেংজাহা সিওপারাং জেজেংপা জোমি নিও, আকো জেজেংওয়াকো সোতারাং য়াংবিহা সেংজাকো চেংবি জিংপুমগা, আসা ইহা আজিপ্পারাংগা। বাসিমতিহা সেংজাহিং মানাইওয়াকো সোতা য়াংবিহিংনে মানাইমগা।2ও জেজেংওয়া ব্যারোবাই, নেহা য়াংবিহা সেংজাকো চেংবিরাংগা। আদো নোইতাহা য়াংবিহা হাং জিংপুকোমে, আকুহা মাতিংপায়াংতো। আদো খ্রীষ্ট লেপুনতেনুওয়া য়াংবিরে আকু ত্যাবাপারাং জিংপুরোওয়া, হাংপাতানাহা আকু হেপা নিমমে, য়াংবিহা এপারাং আকুহিংয়া তিংমগা।3খ্রীষ্টকোতা এপা জিংওয়া আশা এমবিহা তাংসা আপনিহিং খ্রীষ্ট ত্যাবাপা পবিত্র জোমসা এমগা।4পাপ জোচাংওয়া দিংঙাবিহিংয়া লিংপাং মামানেওয়া দোষ জিংমগা, হাংপাতানাহা লিংপাং মামানেওয়াহা পাপগা।5নাবিহা গেমিরাং নিও, দিংঙাকো পাপ ওয়েংপাকোরাং খ্রীষ্টহা তিংরেমগা আসা আকোতাহা পাপরাং মোতো।6আকো সোতা খ্রীষ্টকোতা য়ুংদিংওয়া দিংঙাবিহা পাপ মোজোমগা। পাপ জোমবিহা আকুহিং তিংকোরে মিতিংয়াংতো আসা নাইকোরে মানাইমগা।7ও জেজেংওয়া চেংবাই, হাংসুরে নাবিহিংয়া ধোকা পিচামক্যইকো! ঠিক কাম জোওয়া দিংঙারাং খ্রীষ্ট ত্যাবাপা ঠিক জিংরোওয়া।8পাপ জোদিংওয়াবিহা শয়তানকো দিংঙাগা। শয়তানহা শুরুসোরাং পাপ জোপামসা ওয়াংমি নিও। আকো সোতা শয়তানকো কামহিং দাংপাকো সেংজাকো চেংওয়াহা বাসিমতিতা তিংরেমগা।9সেংজাকো চেংবিহা পাপ জোওয়া জোওয়া মোজোমগা, হাংপাতানাহা আবিকোতাহা সেংজাকো লোংস্ত্যাইওয়া নিমগা। আবিহা পাপ জোকো মাছুমগা, হাংপাতানাহা সেংজারাং আবিকো আপাগা।10সেংজাকো চেংবি আসা শয়তানকো চেংবিহা ইসোরাং নাইকো ছুমগা, সেংজাকো নাগাইতাহা ঠিক কাম মোজোওয়া আসা আপনিকো এহিং জেজেংপা মোজোওয়াবিহা সেংজাকো চেংবি মোকো।11ইচোহা ইচোহিং জেজেংপা জোনেমগা তাওয়া নুওয়াংহা নাবিহা শুরুসোরাং হিংমি নিও।12য়াংবিহা কয়িন ত্যাবাপা জিংমতুরোওয়া। আকুহা শয়তানকো চেং জিংমসা আপনিকো এ হাবিলহিং স্যায়ে। কয়িনহা হাংপা আপনিকো এহিং স্যাপুমগা? হাংপাতানাহা আকো কামহা ঠিক মাতামগা। আদো আকো একো কামহা ঠিক নিমগা।13ও ডুওয়া এবাই আসা হুম্রিবাই, বাসিমতিকো দিংঙাবি নাবিহিং মিছিমেপা জোনুওয়া নাবিহা আআংপেপেচপা মাজিংঘ্যই।14য়াংবিহা ডুওয়াবি হুম্রিবিহিং জেজেংপা জোওয়াকো সোতারাং য়াংবিহা সিপুওয়াসোহা সাদিতা সুইপুনতেওয়া নিও তাওয়া সিদা চ্যইমগা। জেজেংপা মোজোওয়া দিংঙাবিহা নেচোইপা সিদিংকো বন্দনতারাং নিও।15আপনিকো ডুওয়া হুম্রিবিহিং মিছিপা জোমবিহা দিংঙা স্যাওয়াগা আসা দিংঙা স্যাওয়াকোতাহা হাত্রংরে মাসিওয়া সাদিহা মাতামগা তাওয়াহা নাবিরাং গেমি নিও।16খ্রীষ্টহা য়াংবিকো সোতা আপনিকো প্রাণ পিচামগা। আকো সোতা য়াংবিহা জেজেংওয়াহিং কোইমি নিও। য়াংবিরে আপনিকো ডুওয়া হুম্রিবিকো সোতা আপনিকো প্রাণ পিচানেরোওয়া।17বাসিমতিকো পুংজিবি নিওয়াবিহা আপনিকো একো ঘ্যইওয়া তিংমসারে তুংসিংহা লুংটুই ত্যাবাপা জোনাহা এপাজিংওয়া দিংঙাকোতাহা হেপা সেংজাহিং জেজেংওয়া নিকোগা?18ও কুং চেংবাই, নাবিহা য়্যইওয়া আসা জাংওয়াবিতা মেংচে জেজেংপা মোজো, য়োংকো জেজেংওয়াহা আজিপ্পা জিংনেরোওয়া। এপা জিংওয়া জেজেংওয়ারাং কামসো তিংমগা।19ইসোরাং য়াংবিহা আজিপ্পাকো দিংঙাবিগা তাওয়া সিদা চ্যইমগা আসা সেংজাকো নাগাইতা ডুক্কই জিংমগা।20য়াংবিহিংয়া আপনিকো তুংসিংসোরাং দোষি তিংপানাহা, সেংজাহা য়োংকো তুংসিংরোমা টেবোগা। আকুহা তাংসা নুওয়াং গেমগা।21কুং জেজেংওয়া ব্যারোবাই, য়োংকো তুংসিংমি য়াংবিহিং দোষি মাতিংপানাহা য়াংবিহা সেংজাকো নাগাইতা হোকো সাহস ওয়াংমগা, আসা য়াংবিকো য়াওয়া তাংসা নুওয়াং আকোসো মুংমগা।22য়াংবিহা হাই য়া, আকুহা আকোসোরাং মুংচামগা, হাংপাতানাহা য়াংবিহা আকো আজ্ঞা মানেমগা আসা আকুহিং মিকাজাইওয়া কাম জোমগা।23সেংজাকো আজ্ঞাহা আকো চেংওয়া ইশু খ্রীষ্টকো মিংতা দেংওয়া আসা খ্রীষ্টকো আজ্ঞা য়াংবিহিং পিচাওয়া ত্যাবাপা ইচোহা ইচোহিং জেজেংপা জোওয়াগা।24সেংজাকো আজ্ঞাবি মানেওয়া দিংঙাহা সেংজাকোতারাং য়ুংমগা আসা আকোতাহা সেংজা য়ুংমগা। এপারাং সেংজাহা য়োংকোতা য়ুংমগা তাওয়া নুওয়াংহা আকো পিচাওয়া লাংবেসোরাং য়াংবিহা সিদা চ্যইমগা।
The Seed Company