১ য়হুন্না2
1আপেচাওয়া কুং জেজেংওয়া চেংবাই, নাবিহা পাপ মোজোকো তামসা নাবিহিংয়া ই লাদাংয়ো। আদো হাংসু পাপ জোসুদো সেংজাহিং য়োংকো কাটুসো জিংমসা জাংজ্রুওয়া ইচো নিও, অর্থাৎ তাংজি নিওয়া ইশু খ্রীষ্ট।2আকুহা য়োংকো পাপহিং ওয়েংপাকোরাং বলিদান জিংপুমগা। য়োংকো সোতা মেংচে মোকো, আদো তাংসা দিংঙাবিকো সোতারেগা।3য়াংবিহা আকো আজ্ঞাবেমি মানেনাহা আজিপ্পারাং য়াংবিহা আকুহিংয়া নাইমি নিও তামসা সিদা চ্যইরোওয়া।4হাংসু “কা আকুহিংয়া নাইমি” তামসা জাং, আদো আকো আজ্ঞাহিং মামানেনাহা, আকুহা প্যায়োংপাগা, আসা আকোতাহা আজিপ্পা মোতোরোওয়া।5আদো হাংসু আকো য়্যইদিহিং মানে, আকুহা সেংজাহিং পুরা জেজেংপা জোওয়া নিমগা। এপা জোমসারাং য়াংবিহা আকোতা নিও তামসা গেরোওয়া।6সেংজাকোতা নিও তাওয়া দিংঙাহা খ্রীষ্টকো ত্যাবাপারাং তেইওয়া য়ুংওয়া নিনেরোওয়া।7ও কুং জেজেংওয়া এবাই, নাবিহিং লাওয়া ই আজ্ঞাহা চুবে মোকো। আদো শুরুসোরাং নিওয়া জেবে আজ্ঞারাংগা, আসা নাবিকো হিংওয়া ঝিওয়ারাং জেবে আজ্ঞাগা।8আদো কুং লাদাংওয়া আজ্ঞাহা চুবেগা। ইকো আজিপ্পাহা খ্রীষ্টকোতা তিংরেমি নিও, আসা নাবিকোতারে তিংদিংয়ো, হাংপাতানাহা নাঘিওয়াহা য়াংপুমসা হ্যাদিংয়ো আসা হাহাইওয়াহা দেপাদাংতেও।9লেরাহা হাহাইওয়াতা নিও তামসা জাংমগা, আদো আপনিকো এহিং আচকাপা জোনাহা আকুহা নেচোইপারাং নাঘিওয়াতা নিও।10হাংসু আপনিকো এহিং জেজেংপা জো, আকুহা হাহাইওয়াতা য়ুংমগা, আসা আকোতাহা দোসরাহিং বাধা জিংওয়া হাই নুওয়াংরে মাতামগা।11আদো হাংসু আপনিকো এহিং আচকাপা জো, আকুহা নাঘিওয়াতা নিও, আসা নাঘিওয়াতা তেইমগা, আসা আকুহা হাংতা হ্যাদিংমমে, হাইরে সিদা মোচ্যইমগা, হাংপাতানাহা আকুহা নাঘিওয়াকো সোতা মিচো মাতিংমগা।12ও কুং আপেচাওয়া চেংবাই, কা নাবিহিংয়া লাদিংয়ো, হাংপাতানাহা আকো মিংকো সোতা নাবিকো পাপহা ছমা জিংমি নিও।13ও আপাবাই, কা নাবিহিং লাদিংয়ো, হাংপাতানাহা শুরুসোরাং নিদিংওয়াহিংনাং নাবিহা নাইদিংয়ো। ও ওয়াংটেংটেংগেংবাই, কা নাবিহিং লাদিংয়ো, হাংপাতানাহা নাবিহা আকু দুষ্ট শয়তানহিংয়া জিয়োমি নিও।14কুং, আপেচাওয়া চেংচুংবাই, কা নাবিহিংয়া লাদিংয়ো, হাংপাতানাহা নাবিহা আপাহিং নাইমি নিও। ও আপাবাই, কা নাবিহিংয়া লাদিংয়ো, হাংপাতানাহা শুরুসোরাং নিওয়াহিং নাবিহা নাইমগা। ওয়াংটেংটেংগেংবাই, কা নাবিহিংয়া লাদিংয়ো, হাংপাতানাহা নাবিহা সাডুং-কেডুংপা নিও, আসা সেংজাকো য়্যইদিহা নাবিকোতা য়ুংমগা, আসা নাবিহা আকু দুষ্ট শয়তানহিংয়া জিয়োমি নিও।15বাসিমতিতা আসা আউতা নিওয়া হাইক্রিহিং জেজেংপা মোজোঘ্যই। হাংসু দিংঙা বাসিমতিহিং জেজেংপা জো, সেংজা আপাকো জেজেংওয়া আকোতা মোতোরোওয়া।16হাংপাতানাহা বাসিমতিতা নিওয়া নুওয়াংবিহা মিচোকো মিচাওয়া, জুপাকো মেংতাপা ইচ্ছা জোওয়া আসা সাদিকো পুংটা ই নুওয়াংবিহা সেংজা আপাকোসো লেওয়া মোকো। ইহা বাসিমতিসো ওয়াংওয়াগা।17বাসিমতি আসা আউতা নিওয়া তাংসা মেংতাওয়া ইচ্ছাবিহা দাংপুমসা হ্যাপুরোওয়া, আদো সেংজাকো ইচ্ছাতা য়ুংদিংওয়া দিংঙাবিহা হাত্রংদো য়ুংরোওয়া।18ও কুং চেংবাই, ইহা নোইস্যাকো সময়গা। খ্রীষ্টকো বিরোধীবি ওয়াংপাদাংওয়া নিও তামসা নাবিহিংয়া জাংওয়া নিমগা। খ্রীষ্টকো, বিরোধীবিহা নাগাইসোরাং ওয়াংপুনতেয়ো। ইসোরাং য়াংবিহা ইহা নোইস্যাকো দিনগা তামসা সিদা চ্যইরোওয়া।19আবিহা য়োংকোসো নোপুমসা হ্যাপুয়ে, হাংপাতানাহা আবিহা য়োংকো মাতামগা। আকো সোতারাং আবিহা য়াংবিহিংয়া হুইতেমসা হোপুইয়ে। আবিবেমি য়োংকোবেনাহা য়াংবিহিংপারাং চিত্তা য়ুংকোগা। আদো আবিহা য়োংকো মোকো তাওয়া নুওয়াংহা ছোসোপা জিংকো তামসা আবিহা য়াংবিহিং হুইতেমসা হোপুমগা।20আদো নাবিহিংয়া খ্রীষ্টহা পবিত্র লাংবে হোপিমি নিও আসা আজিপ্পাহা নাবি তাংসা গেদিংয়ো।21নাবিহা আজিপ্পাহিং মেগেরো তামসা কা লাওয়া মোকো, আদো নাবিহা আজিপ্পাহিং নাইদিংয়ো তামসারাং লামগা। আজিপ্পাসোহা আজ্যাপা মোনোমগা তাওয়া নুওয়াংরে নাবিহা গেমি নিও।22আজ্যাপাহা হাংসুগা? আজ্যাপাহা আকুগা, হাংসু ইশুরাং খ্রীষ্টগা তাওয়া নুওয়াং ইন্কার জোমমে। আপা আসা চেংওয়াহিং হাংসু ইন্কার জো, খ্রীষ্ট বিরোধীহা আকুরাংগা।23চেংওয়াহিং ইন্কার জোওয়া হাংসু দিংঙাকোতারে আপা মোতো। হাংসু চেংওয়াহিং স্বীকার জো, আকুহিংপাহা আপা নিও।24হানি নুওয়াং শুরুসো নাবিহিংমি নি, আকুহা নাবিহিংপা হাত্রংদো নিকো। নাবিকো শুরুসো হিংওয়া নুওয়াংমি নাবিকোতা নিনাহা নাবিহা চেংওয়া আসা আপাকোতা য়ুংরোওয়া।25আকো য়াংবিহিংপা প্রতিজ্ঞা জোওয়াহা ইরাংগা: অর্থাৎ হাত্রংরে মিসিওয়া সাদি।26নাবিহিং ল্যহপাওয়াবিকো বিষয়তা কা নাবিহিং লাদিংয়ো।27আদো নাবিকো তোইতাহা খ্রীষ্টহা পবিত্র লাংবে হোপিমি নিও। নাবিকোতা পবিত্র লাংবে নিনু চোইপা হাংসুরে নাবিহিংয়া ঝিপামঘ্যইরোওয়া, হাংপাতানাহা পবিত্র লাংবেরাং নাবিহিংয়া তাংসা নুওয়াং ঝিপারোওয়া। আকো ঝিপাওয়া নুওয়াংহা আজিপ্পা নিও, আজ্যাপা মাজিংমগা। পবিত্র লাংবেকো ঝিপাওয়া হিংমসা খ্রীষ্টকোতা য়ুংকো জো।28ও আপেচাওয়া চেংবাই, আকোতা য়ুংকো জো আসা আকু য়াংবিকোতা তিংরেনুওয়া য়াংবিহা সাহস মুংচারোওয়া, আসা আকো লারেওয়া আকু দিনতাহা আকো নাগাইতা য়াংবিহিংয়া লেফেমঘ্যইরোওয়া।29আকুহা তাংজি নিওয়া দিংঙাগা তাওয়া নুওয়াংহা নাবিমি গেনাহা সেংজাকো নাগাইতা এনতাপা জিংওয়া কাম জোমবিহা সেংজাকো চেংবিরাংগা।
The Seed Company