১ কোরোন্থি9
1কা কুং ইচ্ছাকো চাওয়া-আংওয়াবি চাকো মুংকো ছুটকারাতা মাতাংগা? কা জেংওয়া পোইং মোকোমগা? কাহা কাবিকো প্রভু ইশুহিং মাতিংয়াংগা? নাবিরাং প্রভুকোতাহা কুং কামকো ফলবি মোকোমগা?2লেরাহা কাহিংয়া জেংওয়া পোইং মামানেদো নাবিহা মানেকোদো। নাবিহা খ্রীষ্টকোতা নিওয়াসোরাং কা প্রভুকো জেংওয়া পোইংগা তাওয়া প্রমাণ পিচামগা।3কাহিং বিরোধ জোমবিহিংয়া ইরাং কুং জবাবগা।4কাবিকো কামকো সোতা চাকো-আংকো খর্চাহা কাবি মুংচাকো অধিকার মোতোংগাসা?5দোসরা জেংওয়া পোইংবি, প্রভুকো এবি আসা কেপাসহিং ত্যাবাপা কাবিহিংনে মে গেংমসা তেইকো অধিকার মাতামগাসা?6বার্নাবাস আসা কা মেংচে আপনি সাদিকো সোতা কাম জোনেকোগা?7আপনি খর্চা পিচামসা হাংসু সিপাইকো কাম জোকোগাসা? আংগুরবিরি সেপামসা হাংসু আকো ফল মাচাকোগা? অর্থাৎ পিকা এতা তুইংমসা হাংসু আকো য়ুতি মাআংমগা?8কাহা দিংঙাকো নোচেংসো ই জাংওয়া মোকো, আদো লিংপাংরে ই নুওয়াংরাং জাংমগা।9হাংপাতানাহা মোসাকো লিংপাংতাহা লামি নিও, “দাই জোওয়া পিকাহিংয়া মোলা মালাগাইঘ্যই।” সেংজাহা পিকাবিকো বিষয়তা মেংচে সিংদুমগা?10আকুহা য়োংকো সোতারাং ই নুওয়াং জাংমকোতা? ওই, য়োংকো সোতারাং ইহা জাংমগা, হাংপাতানাহা ছ্যইওয়া আসা পিকাহিং দাই জোওয়াহা অন্নাকো ভাগ মুংচাকো আশাতারাং জোমগা।11কাবিমি নাবিকো প্যাকোতা লাংবেকো অংটি মিমি নিনাহা, কাবিহা নাবিকোসো হাইক্রি সোংসাবি মুংচাকোহা টেবো নুওয়াংগাসা?12দোসরামি নাবিকোসো হাইক্রি মুংচাকো চুনাহা, কাবিহা ঝান সিওপা মুংচানেকোগা, আদো কাবিহা ই অধিকারহা মাচালাইতো, আদো খ্রীষ্টকো এনতাওয়া দেরেংতা বাধা মাজিংকো তামসা কাবিহা তাংসা নুওয়াংবি সাইরেপামগা।13নাবিহা গেমিরাং নিও, দেমসাতা কাম জোমবিহা দেমসাসোরাং চাকো মুংমগা, আসা বেদীতা কাম জোমবিহা বেদীতা বলি জোওয়াসোরাং ভাগ মুংমগা।14এপারাং এনতাওয়া দেরেং হিংপাওয়াবিরে এনতাওয়া দেরেংসোরাং চাওয়া-আংওয়া মুংচানেরোওয়া তামসা প্রভুহা আজ্ঞা জোমি নিও।15আদো ই অধিকারবিতাহা কাহা হাইরে মায়ুচায়াংতো, আসা কুং সোতাহা এপারাং জিংনেরোওয়া তামসা কাহা ই নুওয়াং লাওয়ারে মোকো। এপা জোওয়ারোমাহা কাহা সিপুওয়ারাং এনতারোওয়া। কা গর্ব জোরোওয়া, কি কুং কামকো সোতাহা কাহা নাবিকোসোহা হাইরে মায়ুচায়াংতো।16কা এনতাওয়া দেরেং হিংপানাহা আউতা কাহা পুংটা জোকো হাই কারণরাং মোতো, হাংপাতানাহা এপাহা কাহা জোনেকোরাংগা। এপা এনতাওয়া দেরেংমি মাহিংপানাহা কুংতাহা টেবো কোইচ্যাওয়া ওয়াংকো।17কাবেমি কুং ইচ্ছাসো ই কাম জোনাহা কাহিংয়া ইনাম নিও, আদো কাহা ই কামহিংয়া আপনিকো কর্তব্য নোমসা জোদিংয়ো। সেংজারাং ই কামকো চি ত্যইওয়াকো সোতা কাহা জোয়ে।18সেংজাহা কাহিংয়া ই কর্তব্য পিচাওয়াকো সোতা কাহা হেপা ইনাম মুংকো ছুকোগা? আদো কাহা ন্যাস্যা মায়ুচাপা আসা আকু অধিকারহিং মাচালাইপা এনতাওয়া দেরেং হিংপামসারাং কুং ইচ্ছাসো আকু ইনামহিংয়া প্রাপ্ত জোয়ে।19কা হাংসুকোরে ডেইয়া মোকো, আদো কা উইসেহিং খ্রীষ্টকোতা দেংপাকো সোতা কাহা দোসরাকো ডেইয়া ত্যাবাপা জিংপুমি নিও।20য়হুদিবিকো প্যাকোতা কাম জোনুওয়া আবিহা খ্রীষ্টকোতা দেংকো তামসা কা য়হুদিবি ত্যাবাপা জিংপুয়ে। মোসাকো পিচাওয়া লিংপাং মানেওয়াবিকো প্যাকোতাহা আবিরে খ্রীষ্টহিং দেংকো ছুকো তামসা কা আপনিরে লিংপাংকো অধীনতা মাতাদো কাহা লিংপাংহিং মানেয়ো।21লিংপাং মাতাওয়া দোসরা জ্যাকো দিংঙাবিকো প্যাকোতা কাম জোনুওয়া আবিহা খ্রীষ্টকোতা দেংকো ছুকো তামসা কারে লিংপাংতা মাতাওয়াবি ত্যাবাপারাং জিংপুয়ে। ই জোওয়াহা সেংজাকো লিংপাং কা মামানেরো তাওয়া মোকো, আদো কাহা খ্রীষ্টকো লিংপাং মানেদিংয়ো।22কমজোরিবিকো প্যাকোতা কাম জোনুওয়া আবিহা খ্রীষ্টতা দেংকো ছুকো তামসা কাহা কমজোরিবি ত্যাবাপারাং জিংপুয়ে। এপারাং কা তাংসা দিংঙাবিকো প্যাকোতা হেপা জোমসা জিংদো ইচো মোকোনাহা ইচোহিং খ্রীষ্টকোতা পারাকো ছুকো তামসা তাংসা দিংঙাবি ত্যাবাপা জিংপুয়ে।23এনতাওয়া দেরেংকো সোতারাং কা ই তাংসা জোদিংয়ো, আসা ইসো মুংচাওয়া আশিষতা আবিহিংপা কারে সহভাগী জিংরোওয়া তামসা আশা এমি নিও।24আজিপ্পারাং নাবিহা গেমিরাং নিও, ঠুইনুওয়া তাংসা ঠুইমগা, আদো ইনাম মুংনুওয়া ইচো মেংচে মুংমগা। এপা জোমসারাং নাবিরে ইনাম মুংচারো তামসা ঠুই।25ঠুইওয়াতা ভাগ লাংওয়া দিংঙাহা তাংসা লিংপাংকো পালন জোওয়া নিমগা। আবিহা দাংপুওয়া ইনাম মুংকো সোতা এপা জোমগা। আদো য়াংবিহা হাত্রংরে মাদাংওয়া ইনামকো সোতা জোমগা।26আকো সোতা কা নিশানা কাংমসা ঠুইমগা। কা বিংঙাতা ঘুশি টোমি ত্যাবাপা মোজোমগা।27আদো কা আপনিকো জুপাকো মেংতাওয়া ইচ্ছাহিংয়া য়োইমসা আপনিহিংয়া ডেইয়া বানাইমসা এরোওয়া। মোকোনা দোসরাহিং ঝিপানুওয়া কাহা আপনিহা ইন্কার জিংপুরোওয়া।
The Seed Company