১ কোরোন্থি8
1নেহা মুর্তিকো নাগাই লেংপাওয়া চাওয়া-আংওয়াকো বিষয়তা য়াংবিহা গেমি নিও, নাবিহা আজিপ্পারাং জাংয়ে, “য়াংবি তাংসা জ্ঞান মুংচামি নিও।” আদো জ্ঞানসোহা পুংটা পারামগা, আদো জেজেংওয়াসোহা উন্নতি পারামগা।2আদো হাংসু আপনিহিং “কা আজিপ্পারাং গেমি নিও” তামসা জাং, আকুহা গেনেকো নুওয়াংহা হাইরে গেওয়া মাতামগা।3আদো হাংসু সেংজাহিং জেজেংপা জো, সেংজাহা আবিহিংয়া আপনিকো দিংঙা বানাইমগা।4মুর্তিকো নাগাই লেংপাওয়া চাওয়া-আংওয়াবিহা চাকো তুকোমে না মাতুকোমে তাওয়াকো বিষয়তা কা জাংদিংয়ো। বাসিমতিতা মুর্তিহা হাইরে মোকো, ইচো সেংজা ল্যামসা হাংসুরে মোতো, ইহা য়াংবি গেমি নিও।5ডিংবাতা আসা বাসিমতিতা মিং মেংচেকো চোইসুংবি নিমদোওয়া। আজিপ্পারাং দিংঙাবিহা এপাজিংওয়া উইসে চোইসুংবি আসা প্রভুবিহিং মানেমগা।6আদো য়োংকো সোতাহা ইচো সেংজা আপা মেংচে নিও। আকুরাং তাংসাহিং দিংমগা আকোসোরাং য়াংবিহা বাচেমগা। য়োংকো সোতাহা ইচো প্রভু ইশু খ্রীষ্ট নিও। আকোসোরাং তাংসা জিংমসা লেমগা আসা আকোসোরাং য়াংবিহা বাচেমগা।7আদো তাংসা দিংঙাবিকোতাহা ই জ্ঞান মাতামগা। আদো লেরা দিংঙাবিহিংয়া মুর্তিহিং হুইওয়া লোংস্ত্যাইওয়া নিমগা, নাবিহা এপাজিংওয়া চাওয়া-আংওয়াবি চানুওয়া আজিপ্পারাং মুর্তিকো নাগাই লেংপাওয়া তামসা নোমগা, আসা আবিকো এনতাওয়াসো ধুইওয়া নোচেং কমজোর জিংপুওয়াকো সোতা আবিহা অশুদ্ধ জিংপুয়ে তামসা নোমগা।8আদো চাওয়া-আংওয়াসোহা য়াংবিহিংয়া সেংজাকোতা মাপুরামগা। মাচামসারে য়াংবিহিংয়া হাইরে তোইংদ্যা মোতো আসা চামসারে হাইরে তোইংদ্যা মোতো।9আদো হোশিয়ার জিং, নাবিকো হানি চাওয়া-আংওয়াবিকো ছুটনি, আকু চাওয়া-আংওয়াসোহা নাবিকো কমজোর দেংওয়াবিহিং বাধাকো কারণ মাজিংকো।10হাংপাতানাহা দেংওয়াতা কমজোর নিওয়া দিংঙাবিহা নাবি দুংজি নিওয়া দিংঙাবিহিং মুর্তিকো দেমসাতা গামসা চাওয়া তিংনাহা, মুর্তিকো নাগাই লেংপাওয়া চাওয়া-আংওয়াহা আবিরে চাকো ইচ্ছা জোরোওয়া।11আসা নাকো দুংজিকো সোতা আকু দেংওয়াতা কমজোর নিওয়া এহা দাংপুরোওয়া, হাংসুকো সোতা খ্রীষ্ট সিপুমমে।12নেহা এপা আপনিকো দেংওয়াবিকো তোইতা পাপ জোনুওয়া আসা আবিকো কমজোর নোচেংহিং বাধা জিংওয়া কাম জোনাহা, নাবিহা খ্রীষ্টকো বিরোধতা পাপ জোমগা।13আকো সোতা চাওয়া-আংওয়াসোহা কুং দেংওয়াবিকো দেংওয়াহিংমি বাধা জোদিংনাহা কা আবিকো দেংওয়াবিহিং বাধা মাজিংপাকো সোতা হাত্রংরে বিয়া মাচারোওয়া।
The Seed Company