১ কোরোন্থি10
1ও ডুওয়া এবাই আসা হুম্রিবাই, কা ই নুওয়াংকো বিষয়তা নাবি মেগেপা য়ুংকো তাওয়া ইচ্ছা মোতো। য়োংকো আটা আজাবিহা তাংসা মোসাকো নুনুই হুইপুয়ে, আবিহা ঝাহাদিকো প্যাকোসো হ্যাপুইয়ে আসা ডিংবাকো মুউওয়াহা আবিহিংয়া আগুওয়াই জোয়ে। ইহা আবিকো সোতাহা বাপ্তিস্মা ত্যাবাপা নিমগা।3তাংসা ইচো লাংবেকো চাওয়া-আংওয়াবি চায়ে।4আসা লাংবেকো তিরে আংয়ে, হাংপাতানাহা আবিহিংপা দাদাপা তেইওয়া লাংবেকো পাত্যারুংকো তি আবিহা আংয়ে আসা আকু পাত্যারুংহা খ্রীষ্টরাং নিমগা।5আদো আবিকো প্যাকোতা সিয়োচেহিংপা সেংজাহা গাগ্রুপা মাজিংতো, আসা আবিহা চিচ্চোওয়া জায়গাবিতা দাংপুয়ে।6ই তাংসা য়াংবিকো সোতা উদারণ জিংমি নিও। য়াংবিরে আবি ত্যাবাপা মেংতাওয়া ইচ্ছা এমদিংরোওয়া।7আসা আবিকো প্যাকোতা লেরাহা মুর্তিহিং হুইমবিবেপা নাবিহা মাজিং। হেপা তাংজিকো হিগাতা লামি নিমমে, “দিংঙাবিহা চাকো আসা আংকো গায়ে, আসা য়ৌইকো লোয়ে।”8য়াংবিহা নুংনাংসুওয়া কাম জোমদিংরোওয়া। নুংনাংসুওয়াতা নিওয়াকো সোতা আবিহা সাইয়ুতা তেইস হাজার দিংঙা সিপুয়ে।9নাবিকো প্যাকোতা লেরাকো জোমবেপা য়াংবিহা প্রভুসেংজাকো পরিক্ছা মোজোসি। প্রভুহিং পরিক্ছা্ জোওয়াকো সোতারাং আবিহিংয়া পুইয়াবিসো দাংপাপুমগা।10আবিবেপা য়াংবিহা ন্যাক্যানুকুপা য়্যইমতুরোওয়া। হেপা আবিকো প্যাকোতা লেরাহা য়্যইমমে, আসা আবিহিংয়া এপা য়্যইপুমকো সোতারাং দাংপাওয়া লোডিংবাকো পোইংহা স্যাপুয়ে।11আবিকোতা জিংওয়া ই তাংসা নুওয়াংহা উদারণকো সোতা জিংমগা আসা য়াংবিহিং হোশিয়ার জোপাকো লামগা। য়াংবিহা নেহা ই সময়বিকো অন্ত্য দেয়োংতেয়ে।12আকো সোতা হাংসু কা প্রভুতা সাডুংপা জাদিংমি নিও তামসা নো, আকুহা হোশিয়ার য়ুংকো, মোকোনাহা আকুহা ইপুরোওয়া।13দিংঙাকোতা লেওয়া পরিকছা ল্যামসা নাবিহা দোসরা পরিক্ছাতা মোপোরেয়াংতো। আদো সেংজাকো তোইতাহা দেংকো ছুরোওয়া, আসা সহায়কো মাচুরোবেওয়া পরিক্ছা নাবিহিং জিংকো মাপিচারোওয়া। আকুহা পরিক্ছাসো পেংকো ন্যাতারে নোপাপিরোওয়া আসা পরিক্ছা জিংনুওয়া নাবিহা সহায়কো ছুরোওয়া।14আকো সোতা কুং জেজেংওয়া ব্যারোবাই, মুর্তিহিং হুইকো ল্যাপুই।15কাহা নাবিহিংয়া নোচেং নিওয়া দিংঙা নোমসা জাংদিংয়ো। কুং জাংওয়া নুওয়াংহা নাবি আপনিরাং এনতাপা নোকো জো।16আকু প্রভু ভোজকো কচৌরা, হাংতা য়াংবি আশিষ য়ামমে, আকুহা খ্রীষ্টকো বলিদানকো আশিষতা ভাগ লাংওয়া মোকোমগা? য়াংবিকো ছিওয়া আকু কোব্রেং চানুওয়া, খ্রীষ্টকো জুপাহিংপা ভাগ জিংওয়া মোকোমগা?17হাংপাতানাহা কোব্রেংহা ইচোরাংগা, য়াংবি উইসে নিদো জুপাহা ইচোরাংগা, হাংপাতানাহা য়াংবি তাংসা ইচো কোব্রেংসোরাং চামগা।18ইস্রাইল জ্যাবিহিং কাং, আকু দিংঙাবি হাংসু বলিদানসো চা, আবিহা চিত্তা সেংজাকোরাং আরাধনাতা সহভাগী জিংমগা।19কা হাং জাংকো কেংদিংগা? মুর্তিকো নাগাই লেংপাওয়া চাওয়া-আংওয়াবিহা হাইক্রিগাসা? মুর্তিরে হাইক্রিগাসা?20কুং জাংকো কেংওয়া নুওয়াং হাংতানাহা দোসরা দিংঙাবিহা সেংজাহিং মোকো, জেসাংহিং বলি পিচামগা। আকো সোতা নাবিরে জেসাংহিংপা ভাগ মালাংকো তামসা কা ইচ্ছা জোরোওয়া।21নাবিহা সেংজাকো চোপোই আসা জেসাংকো চোপোই নিদ্যাসো আংকো মোচুরোওয়া। আসা সেংজাকো টেবিল আসা জেসাংকো টেবিলসোসা চামক্যইরোওয়া।22কি নাবিরে ইস্রাইলিবি ত্যাবাপা প্রভুসেংজাহিং সেদ্রাংপাকো কেংদিংগা? কি নাবিহা আকো পিচাওয়া দন্ডহা সহায়কো ছুকো বেপা জিংদিংগা?23নাবিহা লেরাহা “য়াংবিহা হাই জিংদো জোকো ছুমগা” তামসা জাংমগা। আদো তাংসা নুওয়াংসোহা সুধার মোজোমগা। “য়াংবিহা হাই জিংদো জোকো ছুমগা” তামসা জাংমগা। আদো তাংসা নুওয়াংসোহা য়াংবিহিংয়া ত্যইংদ্যা মোজোমগা।24হাংসুরে আপনিকো সোতা মেংচে এনতাপা জিংকো তামসা জাংমদিংমগা, আদো দোসরাকো সোতারে এনতাপা জিংকো তামসা নোনেরোওয়া।25কা নাবিহিংয়া ই সল্লা পিচারোওয়া, হাতিতা পিচোইওয়া হাইকো বিয়া চুইদো ইহা বলি পিচাওয়াকো বিয়াগা তামসা মাউইপা চাপুই,26হাংপাতানাহা “বাসিমতি আসা আউতা নিওয়া তাংসারাং প্রভুকোগা।”27প্রভুহিং মাদেংওয়াবিকোতা হাংসু নাবিহিং চাকো মোউ, আবিকোতা নাবিমি হ্যাদাংবেপা তিংনাহা হ্যাতু, আসা হাই পিচাবা বলি পিচাওয়াকো বিয়াগা তামসা মাউইপা চাপুই।28আদো হাংসু দিংঙা “ইহা মুর্তিকো নাগাই লেংপাওয়া বিয়াগা” তামসামি জাংনাহা, আকু জাংওয়া দিংঙাকো সোতা আসা আকো নোচেংকো সোতা মাচাগ্যই।29কুং জাংওয়াহা নাকো নোচেংকো সোতা মোকো, আদো আকু জাংওয়া দিংঙাকো নোচেংকো সোতাগা।
নাবিহা জাংমদোওয়া, দোসরাকো নোচেংসোহা কুং ছুটকারাহিংয়া হাং জিংকোগা?30কা চাদাংনুওয়া গারানি তামসা চানাহা গারানি তামসা চাওয়াতা হাংপা দোসরাবিহা দোষ পিচাকোগা?31টেবো নুওয়াংহা ইরাংগা, চাওয়া-আংওয়া আসা হাই জোপুদো সেংজাকো আদরকো সোতারাং জো,32আসা নাকো সাদিসো য়হুদিবিহিং, দোসরা জ্যাবিহিং আসা সেংজাকো মন্ডলিবিহিং বাধা মাজিংকো।33কা জাংচারোওয়া, কুং জোমবেপা জো, কাহা আপনিকো সোতা গাগ্রুপাকো মামোতো, আদো তাংসা মুক্তি মুংচাকো তামসা দিংঙাবিকো সোতা গাগ্রুওয়া মোমগা।
নাবিহা জাংমদোওয়া, দোসরাকো নোচেংসোহা কুং ছুটকারাহিংয়া হাং জিংকোগা?30কা চাদাংনুওয়া গারানি তামসা চানাহা গারানি তামসা চাওয়াতা হাংপা দোসরাবিহা দোষ পিচাকোগা?31টেবো নুওয়াংহা ইরাংগা, চাওয়া-আংওয়া আসা হাই জোপুদো সেংজাকো আদরকো সোতারাং জো,32আসা নাকো সাদিসো য়হুদিবিহিং, দোসরা জ্যাবিহিং আসা সেংজাকো মন্ডলিবিহিং বাধা মাজিংকো।33কা জাংচারোওয়া, কুং জোমবেপা জো, কাহা আপনিকো সোতা গাগ্রুপাকো মামোতো, আদো তাংসা মুক্তি মুংচাকো তামসা দিংঙাবিকো সোতা গাগ্রুওয়া মোমগা।
The Seed Company