১ কোরোন্থি7
1নেহা কা নাবিকো লাওয়া নুওয়াংকো বিষয়তা জাংরোওয়া। লেরাহা জাংমি নিও দিংঙাহা বিয়ৌ মোজোপা য়ুংনাহা এনতাওয়াগা।2আদো নুংনাংসুওয়াতা মোচুইকো তামসা তাংসা বিয়ৌ জোপুকো। তাংসা মেমে দিংঙাকোরে আপনিকো ওয়া নিকো, আসা তাংসা পোজা দিংঙাকোরে আপনিকো মে নিকো।3পোজা দিংঙাহা ওয়াকো তাংসা কর্তব্য পুরা জোকো। মেমে দিংঙারে মেকো জোনেওয়া কর্তব্য পুরা জোকো। আসা নিহসোসা ইচোহা ইচোকো ঘ্যইওয়া সেই জোকো।4মেকো জুপাহা মেকো মোকো, আদো আকো ওয়াকোগা। এপাজোমসারাং ওয়াকো জুপাহা ওয়াকো মোকো, আদো আকো মেকোগা।5ইচোহা ইচোহিংপা চিত্তা জিংওয়াতা ইন্কার মোজো, আদো নাবি নিহসোসা হুইসুমসা পাচাইকো সোতা আম্যই লারাংসা য়ুংনেদো দোসরা সময়তাহা চিত্তা য়ুং। মোকোনা নাবিহা আপনিকো ইচ্ছাহিং য়্যইমক্যইওয়াকো সোতা শয়তানহা নাবিহিং ফসাইকো মৌকা মুংরোওয়া।6কা ই নুওয়াংহা আজ্ঞা জোমসা মোকো, আদো সল্লাহ জোমসা জাংদিংয়ো।7চুনাহা তাংসা কা বেপা জিংনারাং এনতাকোগা, আদো তাংসা দিংঙাবিহা সেংজাসো লারাংসা লারাংসা ঙেরোং মুংচামি নিও। ইচোকোতা ইচো ঙেরোং নিনাহা দোসরাহিংপারে দোসরা ঙেরোং নিও।8নেহা কা বিয়ৌ মাজিংয়াংওয়াবিহিং আসা মুরিংবিহিং জাংরোওয়া, নাবিহা বিয়ৌ মাজোপা কা বেপা য়ুংকোহা এনতাওয়াগা।9আদো নাবিহা আপনিকো ইচ্ছাহিং য়োইমসা একো মোচুরো তানাহা, বিয়ৌ জোচপুকো। আপনিকো ইচ্ছাহিং স্যাওয়ারোমা বিয়ৌ জোচপুওয়ারাং এনতাওয়াগা।10বিয়ৌ জোমবিহিং কুং আজ্ঞা নিও, কুং আপনিকোরাংহা মোকো, প্রভুকোগা। মেহা ওয়াহিং মাপেইকো,11আসা ওয়ারে মেহিং মাপেইকো। হাংসু পেইপু আকুহা বিয়ৌ মোজোপা য়ুংকো। মোকোনাহা ন্যাসারাং লায়োংমসা চাংসুমসা য়ুংকো।12নেহা কা নাবিহিং জাংরোওয়া, খ্রীষ্টকোতা ইচো একো মাদেংওয়া মে নিও আসা আকুহিংপারাং য়ুংকো কেংনাহা আকুহিং মাপেইকো। ইহা কুং সল্লাগা, প্রভুকোসো লেওয়া মোকো।13এপা জোমসারাং খ্রীষ্টতা নিওয়া ইচো মেমেকো ওয়া ইশুহিং মাদেংওয়া নিনাহা আসা আকুহিংপারাং য়ুংরো তামসা জাংনাহা আকুহা আকু ওয়াহিং মাপেইকো,14হাংপাতানাহা মাদেংওয়া ওয়াহা দেংওয়া মেকোসো শুদ্ধ জিংকো ছুরোওয়া আসা মাদেংওয়া মেহা দেংওয়া ওয়াকোসো শুদ্ধ জিংকো ছুরোওয়া। এপা মাজিংনাহা আবিকো চেংওয়া চেমেবিহা অশুদ্ধ জিংকোগা, আদো আবিহা সেংজাকোসো শুদ্ধ জিংমি নিও।15দেংওয়া মেহা ওয়াহিং আসা এপারাং দেংওয়া ওয়াহা মেহিং বাচাইকো ছুরো তাওয়া নাবিহিংয়া প্যারামাতাংগা? আদো মাদেংওয়াবিমি পেইকো কেংনাহা, আকুহিংয়া পেইকো পিচপুই। এপা জিংনুওয়া খ্রীষ্টতা দেংওয়া এবি হুম্রিবিহা হাইকো বন্ধনতারে মাতারোওয়া। হাংপাতানাহা সেংজাহা য়াংবিহিংয়া তিমেওয়াতা য়ুংকো মোউমগা।17প্রভুহা তাংসাহিং হেপাজিংওয়া সাদিতা খুইমি নিমমে আসা সেংজাহা হেপাজিংওয়া পরিস্থিতিতা মোউমি নিমমে, আকু ত্যাবাপারাং আকুহা তেইকো। তাংসা মন্ডলিহিংনা কুং জাংওয়া নুওয়াংহা ইরাংগা।18জুপাতা খতনা জোওয়া দিংঙাবিহিংমি সেংজাহা জেংমি নিনাহা, আকুহা খতনা জিংতেওয়াহিংয়া মোউকো মেকেংকো। খতনা মোজোয়াংওয়া দিংঙাবিহিংমি সেংজাহা মোউমি নিনাহা আকুরে খতনা জিংকো মেকেংঘ্যইকো,19হাংপাতানাহা খতনা জোওয়াসো আসা মোজোওয়াতা হাইরে ফরাক মোতো। সেংজাকো আজ্ঞা মানেকোরাং টেবো নুওয়াংগা।20হানি অবস্থাতা সেংজাহা দিংঙাহিং মোউমিনি, আকু অবস্থাতা তাংসা দিংঙাহা হাত্রংদো নিকো।21প্রভু নাতিহিং মোউনুকো সময়তা নাতিহা ডেইয়া নিমগা? ডেইয়া নিমি চুইদো সিংদুমঘ্যই, আদো ছুটকারামি মুংচানাহা আকো ফাইদা লাং।22হাংপাতানাহা প্রভুতা মোউনুওয়া হানি দিংঙা ডেইয়ানি, নেহা আকুহা প্রভুকো ছুটকারা দিংঙা জিংকো জেংচপুয়ে আসা এপা জোমসারাং ছুটকারা দিংঙাহা খ্রীষ্টকো ডেইয়া জিংপুমি নিও।23সেংজাহা নাবিহিংয়া দাম তামসা চোইওয়াগা, আকো সোতা দিংঙাবিকো ডেইয়া মাজিং। 24আকো সোতা ও ডুওয়া এবাই আসা হুম্রিবাই, হাংসুহিং হানি অবস্থাতাতা মোউওয়ানি, তাংসা আকু অবস্থাতারাং সেংজাহিংপা হাত্রংদো নিকো।25বিয়ৌ মোজোমবিকো বিষয়তা কাহিংয়া প্রভুসোহা হাইরে আজ্ঞা মামুংয়াংতো, আদো কাহা প্রভুকো লামতুওয়া মুংচাওয়াকো সোতা দেংকো চুওয়া দিংঙা জিংমসা কা নাবিহিংয়া কুং সল্লাহ পিচারোওয়া।26নেকো দুঃখহিং কাংনাহা, হানি দিংঙা হেপানি, আউতারাং য়ুংওয়া এনতারোওয়া তাওয়া কা নোরোওয়া।27নাতিহা বিয়ৌ জোপুনতেনাহা আপনিকো মেহিংপা পেইসুমসা য়ুংকো ইচ্ছা মোজোঘ্যই। নাতিহা বিয়ৌ মোজোয়াংনাহা বিয়ৌ জোকো ইচ্ছা মোজোঘ্যই।28আদো নাতিহা বিয়ৌ জোদো আকুহা পাপ মোকো, নামেরি মেমে বিয়ৌ জোপুওয়াতা আকুহা পাপ জোওয়া মাতামগা। আদো বিয়ৌ জোমবিহা ই সাদিতা দুঃখবি ওয়াংদো সহায়নেরোওয়া, আসা কা নাতিহিংয়া ইসো বাচাইকো কেংমগা।29ডুওয়া এবাই আসা হুম্রিবাই, কুং জাংকো কেংওয়া নুওয়াংহা ইরাংগা, সময় মাতাদাংতেও, আসা নেহা ইসো য়ুতাহা মে নিমবিহা আপনিকো মেকো তোইতা মেংচে ধ্যান জোমসা মায়ুংকো।30শোক জোওয়াবিহা শোক মোজোওয়াবি ত্যাবাপা জিংমসা আসা য়াংতা-কেতামবিহা মায়াংতাওয়াবি বেপা জিংমসা য়ুংকো। পিইচা-চোইচাওয়াবিহা আপনিকোতা হাইরে মাতামেপা য়ুংকো।31আসা আবিহা হাংসু বাসিমতিকো সোংসাবি চালাই, আউতাহা আপনিকো হাইরে দরকার মাতামবেপা জোকো, হাংপাতানাহা ই বাসিমতিহা নে আম্যই চোইপা মেংচে য়ুংরোওয়া।32নাবি তাংসা মেসেংদুপা য়ুংকো তামসা কা ইচ্ছা জোমগা। বিয়ৌ মাজিংয়াংওয়া দিংঙাহা প্রভুহিং হেপা গাগ্রুপাকোমে তামসা প্রভুকো নুওয়াংকো বিষয়তা সিংদুমগা,33আদো বিয়ৌ জিংতেওয়া দিংঙাহা হেপা মেহিং গাগ্রুপামসা এনেকোমে তামসা বাসিমতিকো নুওয়াংবিতা সিংদুমগা।34এপাজিংওয়া দিংঙাকো তুংসিংহা নিদ্যাতা হ্যাওয়া নিমগা। বিয়ৌ মাজিংয়াংওয়া মেমে আসা বিয়ৌ জিংমসা পেইপুমতেওয়া মেমেহা জুপা আসা লাংবে নিদ্যাতা হেপা স্মর্পন জোমসা য়ুংকোমে তামসা প্রভুকো নুওয়াংকো বিষয়তা সিংদুমগা। আদো বিয়ৌ জিংতেওয়া মেমেহা হেপা আপনিকো ওয়াহিং গাগ্রুপাকোমে তামসা বাসিমতিকো নুওয়াংকো বিষয়তা সিংদুমগা।35কা ই নুওয়াংহা নাবিকো এনতাওয়াকো সোতা জাংদিংয়ো। কাহা নাবিহিংয়া লিংপাংসো তাইমসা এওয়া মোকো, ইকো সোতাগা কি নাবিহা ইচো তুংসিং জিংমসা প্রভুকো কাটুতা সেওয়া জোমসা এনতাওয়া সাদিতা য়ুংকো ছুকো।36য়দি হাংসু দিংঙা আপনিহিংপা বাংকুতোইপুনতেওয়া মেমেহিংয়া বিয়ৌ মোজোওয়াকো সোতা আপনিহিংনাং মেংতাওয়া নোদিং, আসা য়দি আকু মেমেকো লোরে পেংপুমসামি হ্যাদিংনাহা, আকুমি বিয়ৌ জোকো কেংনাহা আকুহা বিয়ৌ জোকো চুরোওয়া। ইতাহা পাপ মোতো। আবিকো বিয়ৌহা জিংনেকোরাংগা। 37আদো হাংসু দিংঙা আপনিকো তুংসিংহিং পক্কা জোপুনতেমিনি, আসা হাংসু তোতোউসি মোজো, আদো আপনিকো ইচ্ছাহিংয়া য়োইমসা একো ছু, আসা হাংসু মেমে বিয়ৌ মোজোরো তামসা নির্ণয় জোপুনতেওয়ামি নিনাহা, এপা জিংওয়া দিংঙারে তিতিপা জোমরাংগা।38এপারাং হাংসু নামেরি মেমে বিয়ৌ জো, আকুরে তিতিপারাং জোমগা, আদো হাংসু বিয়ৌ মোজো, আকুহা ঝন সিওপারাং তিতিপা জোমগা।39ওয়া মাশিনু চোইপা ওয়াকো অধীনতারাং মেহা য়ুংমগা। আদো ওয়া সিপুনতেনুকো নোইতাহা আকুহা আকো ইচ্ছা জোওয়া দিংঙাহিংপা বিয়ৌ জোকো ছুরোওয়া, আদো আকুহা প্রভুহিং দেংওয়া দিংঙা নিনেরোওয়া।40আদো আকুহা এপারাং য়ুংকো কেংনাহা ঝন য়াংতারোওয়া, ইহা কুং নোচেংগা, আসা কা নোরোওয়া ই তাংসাহা সেংজাকো লাংবেসোরাং পিচামগা।
The Seed Company