১ কোরোন্থি6
1নাবিকো প্যাকোতা ইচোহা দোসরা এহিংপা স্যাসুওয়া নিনাহা, নাবিহা ন্যায়কো সোতাহা সেংজাকো দিংঙাবিকোতা মোহোপা, সেংজাহিং মাদেংওয়া দিংঙাকোতা ন্যায় য়াকাকো হোকো হেপা ইচ্ছা জোংগা?2সেংজাকো দিংঙাবিহা বাসিমতিকো ন্যায় জোমগা তাওয়া নুওয়াং নাবিহা মেগেমগা? এপামি বাসিমতিকো ন্যায় জোনাহা, আপেচাওয়া স্যাসু-ত্যইংসুওয়াবিহা নাবিহা ন্যায় জোমক্যইকোগা?3য়াংবিহা লোডিংবাকো পোইংবিকো ন্যায় জোওয়াবিগা তাওয়া নুওয়াংহা নাবিহা মেগেমগা? ই সাদিকো নুওয়াংবিকো ন্যায়হা ঝন জাংতোংপা জিংনেকোগা।4এপাজিংওয়া স্যাসুওয়া নাবিকোতা নিনাহা, আকু স্যাসুওয়াবিহা হাংপা আকু দিংঙাবিকো প্যাকোতা এচাংমগা, হানি দিংঙাবিহিং মন্ডলিবিহা হাইরে দাম মেএমমে?5নাবিহা ই নুওয়াংতাহা লেফেনেকোগা। নাবিকোতাহা আপু-এবিকো স্যাসুওয়া চাংসপাকো ছুওয়া ইচো দুংজি নিওয়া দিংঙারে মাতাংগা?6ইচো খ্রীষ্টান এহা ইচো দোসরা এহিংপা স্যাসুমসা তুইপেং সেংজাহিং মাদেংওয়াবিকোতা আপনিকো স্যাসুওয়া চাংসপাকো পুরাকোগা?7নাবিকো স্যাসুওয়াসোহা নাবিরাং পোঙায়ে তামসা কোইপাদিংয়ো। আকু পোঙাওয়ারোমাহা অন্যায় জিংপুওয়ারাং এনতারোওয়া। আকুরোমা দোসরাহা য়াংবিহিং খতি জোপুওয়ারাং এনতারোওয়া।8আদো নাবিহা আপু-এবিরাং ইচোহা ইচোহিং অন্যায় জোমগা, আসা ইচোহা ইচোহিং ল্যইপামগা।9অন্যায় জোওয়াহা সেংজাকো রাজ্যতা হোচা মামুংমগা তাওয়াহা নাবিহা মেগেমগা? আপনিহিং ধোকা মিচা। লাংচ্যা কাম জোওয়াবি, মুর্তিহিং হুইওয়াবি, নুংনাংসুওয়াবি, পোজা পোজা নুংনাংসুওয়া,10কুইওয়াবি, বাংওয়াবি, গাইওয়াবি, মিছিপা জোওয়াবি আসা মেংদাংবিহা সেংজাকো রাজ্যতা হোচা মামুংরোওয়া।11নাবিতাহা লেরাহা ইচো সময়তাহা এপা নিমগা। আদো নাবিকো পাপহা দুয়ো, সেংজাকোতা স্মর্পন জোয়ো, আসা প্রভু ইশু খ্রীষ্টকো মিংতা য়োংকো সেংজাকো লাংবেসো নির্দোষ ঘোষিত জোয়ো।12লেরাহা জাংসুমদোওয়া, “কাহা হাই জোপুদো তুরোওয়া।” আদো তাংসা নুওয়াংসো নাবিহিংয়া এনতাপা মোজোমগা। কারে জাংকো ছুকোগা, “কাহা হাই জোদো তুরোওয়া।” আদো কাহা হাই নুওয়াংকোরে ডেইয়া জিংকো মেকেং।13নাবিহা জাংমগা, “চাওয়া আংওয়াহা ফেমাকো সোতাগা আসা ফেমাহা চাওয়া আংওয়াকো সোতাগা।” আদো সেংজাহা ই নিহসোহিংসা দাংপাপুরোওয়া। জুপাহা নুংনাংসুকো সোতা মোকো, আদো প্রভুকোগা, আসা প্রভুকো সেওয়া জোকো সোতাগা।14সেংজাহা আপনিকো সেসো প্রভুহিংয়া সিপুওয়াসো ঙাপামি নিও, আসা য়াংবিহিংনে আকো সেসো ঙারোপারোওয়া।15নাবিকো জুপাহা খ্রীষ্টকো অঙ্গগা তামসা নাবিহা মেগেমগা? এপা বেনাহা কাহা খ্রীষ্টকো অঙ্গহিং পুমসা নুংনাংরি মেমেকো অঙ্গহিংপা ইচো বানাইকোগা? ইহা তুওয়া নুওয়াংরাং মোকো।16নুংনাংরিকোতা হোওয়াহা নুংনাংরিহিংপারাং ইচো জুপা জিংমি তাওয়া নুওয়াংহা নাবিহা মেগেমগা? তাংজিকো হিগাহা ছোসোপা জাংমগা, “নিহসো মিলেমসা ইচো জুপা জিংমগা।”17আদো খ্রীষ্টহিংপা চাংসুওয়াহা আকুহিংপারাং লাংবেতা ইচো জিংওয়াগা।18বাসিমতিকো মেংতাওয়া কামবিসো বার্গাং য়ুং। লেরা পাপবিহা দিংঙাহা আপনিকো জুপাসো বাইরে জোমগা, আদো নুংনাংসুওয়া দিংঙাহা আপনিকো জুপাকো তোইতা পাপ জোমগা।19নাবিকো জুপাহা পবিত্র লাংবেকো দেমসাগা, হানি পবিত্র লাংবে নাবি সেংজাকোসো মুংচামি নিমমে, আসা আকুহা নাবিকো জুপাকো নাপোতা য়ুংমগা তাওয়া নুওয়াংহা নাবিহা গেনেরোওয়া। আকো সোতা নাবিকো জুপারে নাবিকো মোকো।20নাবিহিংয়া সেংজাহা মোল তামসা চোইমগা। আকো সোতা নাবিকো জুপাতাহা সেংজাকো মহিমা জিংকো।
The Seed Company