১ কোরোন্থি15
1ও ডুওয়া এবাই আসা হুম্রিবাই, কুং হিংপাওয়া এনতাওয়া দেরেংহা কা নাবিহিং প্যারাতাংপাকো কেংরোওয়া, হানি এনতাওয়া দেরেং নাবি গ্রহন জোমি নি, আসা আউতা নাবি দেংমসা য়ুংদিংমি নি।2ই এনতাওয়া দেরেংসোহা নাবিকো উদ্ধার জিংমি নিও, আউতামি দেংমসা মায়ুংনাহা, নাবিকো দেংওয়াহা হাইরে টেকামাচুইপা জিংপুরোওয়া।3কুং মুংচাওয়া হানিরোমা টেবো নুওয়াংহা কা নাবিকোতা ত্যইমি নিও, পবিত্র তাংজিকো হিগাতা জাংমি ত্যাবাপা খ্রীষ্টহা য়োংকো পাপকো সোতা সিপুমি নিও।4আকুহা লিচাপুয়ে, আসা পবিত্র তাংজিকো হিগাতা জাংওয়া সেই সাসুংয়ুতা আকুহা সিমসা ন্যাসারাং ঙারোয়ে।5আকুহা পত্রসকোতা, আসা বার্চো য়োংতোংবিকোতা তিংরেয়ে।6আকো নোইতা আকুহা ইচো সময়তারাং পাঁচশোরোমা সিওপা ডুওয়াবি আসা হুম্রিবিকোতা চিত্তা তিংয়ায়ে, আবিকো প্যাকোতাহা লেরাহা সিপুনতেও সিওচেহা নেচোইপা নিও।7আকো নোইতা আকুহা য়াকুব আসা তাংসা জেংওয়া পোইংবিকোতা তিংয়ায়ে।8তাংসারোমা নোইস্যাতাহা কা তারি মাচাংপা কেওয়া দিংঙা ত্যাবাক্যইওয়াকোতারে আকুহা তিংরেয়ে।9জেংওয়া পোইংবিতাহা হাংসুরোমা চিয়োওয়াহা কারাংগা। কাহা জেংওয়া পোইং জিংকো য়োগ্য়্যরে মোতো, হাংপাতানাহা কাহা সেংজাকো মন্ডলিহিং কোইচ্যাপায়ে।10আদো কা হাই জিংদো আকু সেংজাকো অনুগ্রহকো সোতা নিও, আসা কুং তোইতা নিওয়া আকো অনুগ্রহহা এপারাং মাহ্যাতো। কাহা আবি তাংসারোমা সিওপা কোইচ্যায়ে। ইহা কুংসো জিংওয়া মোকো, আদো কাহিংপা নিওয়া সেংজাকো অনুগ্রহসোগা।11আকো সোতা কা জিংদো, আবি জিংদো, নাবিহিং হাই এনতাওয়া দেরেং হিংপা, আকুহা নাবিরাং দেংমি নিও।12সিপুমবিকোসো খ্রীষ্টহা ঙারোমি নিও, তামসা য়াংবিমি দেরেং হিংপামি নিনাহা হেপা নাবিকো প্যাকোতাহা লেরাহা সিওয়াসোহা মাঙারোরো তামসা জাংকো চুকোগা?13সিপুওয়াসো মাঙারোমি তামসামি জাংনাহা খ্রীষ্টরে সিওয়াসো ঙারোওয়া মোকো।14খ্রীষ্টমি সিওয়াসো মাঙারোনা তামসা জাংনাহা কাবিকো দেরেং হিংপাওয়া আসা নাবিকো দেংওয়ারে টেকামাচুইপা জিংপুরোওয়া।15আকুরোমা সিওপা কাবিহা সেংজাকো তোইতাহা অ্যাজ্যাপা জিংপুরোওয়া, হাংপাতানাহা কাবিহা খ্রীষ্টহিংয়া সিওয়াসো ঙারোপামি নিও তামসা গাওয়াই পিচামি নিও। আদো আজিপ্পা নুওয়াং জাংনাহা সেংজাহা সিপুওয়াবিহিং সাদিতা মাঙারোপানাহা, খ্রীষ্টহিংনে ঙারোপাওয়া মোকো,16হাংপাতানাহা সিপুওয়াবি সিপুওয়াসো মাঙারোনা তামসা জাংনাহা খ্রীষ্টরে সিওয়াসো ঙারোওয়ারাং মোকো।17আসা খ্রীষ্টবেমি সিপুওয়াসো ঙারোওয়া মোকোনাহা নাবিকো দেংওয়ারে টেকা মাচুইপা জিংরোওয়া, আসা নেরে নাবিহা পাপতারাং নিও।18আসা খ্রীষ্টবেমি সিপুওয়াসো মাঙারোনাহা খ্রীষ্টহিং দেংমসা সিপুওয়াবিরে উদ্ধার মোমুংচায়াংতো।19ই সাদিকো সোতা মেংচে য়াংবিহা খ্রীষ্টকোতা আশা এমি নিনাহা, য়াংবিহা দোসরা দিংঙাবিরোমা সিওপা লামতুনেপা নিও।20আজিপ্পা নুওয়াং জাংনাহা খ্রীষ্টহা সিপুওয়াবিকোসো ঙারোমি নিও। আসা আকুহা য়াংবিহিংয়া প্রমান জোয়ে কি দোসরা সিপুমবিরে সিওয়াসো সাদিতা ঙারোরোওয়া।21হেপা দিংঙাকোসো সিদিং লে, এপারাং সিদিংসো ঙারোওয়ারে দিংঙাকোসোরাং লেহে।22হাংপাতানাহা হেপা আদমকোসো তাংসা দিংঙাবি সিপুমমে, এপারাং খ্রীষ্টকোসো তাংসা দিংঙাবিহিং ঙারোপারোওয়া।23আদো য়াংবি তাংসারাং আপনি আপনিকো সময় অনুসার খ্রীষ্টহা হাংসুরোমা নাগাই ঙারোমি নিও আসা আকো নোইতা আকু লারেমসা লেনুওয়া আকো দিংঙাবি ঙারোরোওয়া।24আত্রংহা অন্ত লেরোওয়া। আকু সময়তা তাংসা মাটা, তাংসা অধিকার, আসা তাংসা সে দাংপামসা সেংজাকো রাজ্যহা সেংজা আপাকোতা ত্যইপুরোওয়া।25হাংপাতানাহা আকো দুসমনবিহিং আকো কোকোইকো লিতা মেএনু চোইপা আকুহা অধিকার জোনেরোওয়া।26হানিরোমা নোইস্যাতা দাংপানেওয়া দুসমনহা সিদিংরাংগা।27হাংপাতানাহা তাংজিকো হিগাতা লাওয়া নিও, “সেংজাহা তাংসা নুওয়াংবিহা আকো অধীনতা এমি নিও।” আদো ই নুওয়াংবিহা ছোসোপা নিও, কি “তাংসা নুওয়াংবিহা আকো অধিকারতা নিও” তাওয়া মোকো, আদো সেংজা আপনিহা আকো অধিকারতা মোতোতো, তাংসা নুওয়াং সেংজারাং খ্রীষ্টকো অধিকারতা এপিমি নিও।28হাত্রং তাংসা নুওয়াং ইশুকো অধিকারতা পারা, আত্রংহা ইশু আপনিরাং সেংজাকো অধিকারতা জিংপুরোওয়া, হাংসু তাংসা সোংসাবি আকো অধিকারতা এমি নিমমে, আকুরাং তাংসাকো তোইতা অধিকার জোরোওয়া।29সিপুমবিমি মাঙারোদানাহা আবিকো সোতাহা দিংঙাবিহা হাংপা বাপ্তিস্মা লাংকোগা? ইসোহা হাং তোইংদ্যা জিংকোগা?30কারে হাংপাসা হাত্রংদো চুসুং-মাইসুংক্যইওয়াতা নিংগা?31ডুওয়া এবাই আসা হুম্রিবাই, আজিপ্পারাং কা নাবিহিংয়া জাংরোওয়া, সদাইদিন কা সিদিংহিংপা লুইসুদিংয়ো। সেংজাহা গেমি নিও প্রভু ইশু খ্রীষ্টতা নাবিকো দেংওয়াকো কারণকো সোতা কাহা গাগ্রুপা জিংমি নিও। এপা জোমসারাং আকুহা গেমি নিও কি কুং সমস্যাহা হাসেকো টেবো নিমমে।32দিংঙা ত্যাবাপারাং য়্যইদানাহা, এপিসিসকো চুংচাতা সেংচেংবিহিংপা কুং লুইসুওয়াসোহা হাং তোইংদ্যা জিংগা? সিপুওয়াবিমি সিপুওয়াসো মাঙারোনাহা, “য়াংবিহা চাপুরো আসা আংপুরো, হাংপাতানাহা জুকুংহা য়াংবিহা সিপুরোওয়া।”33নাবিহা ধোকাতা মায়ুং। মেংতাওয়াহিংপা তেইনাহা নাকো এনতাওয়া লোংস্ত্যাইওয়াহিংনে দাংপাপুমগা।34এনতাপা নোকো জো, নেহা ইসো য়ুতাহা পাপ মোজো, হাংপাতানাহা লেরাকোতাহা সেংজাকো দুংজি মোতো, আবিহিং লেফেপাকো সোতা কা ই নুওয়াং জাংমগা।35আদো লেরা দিংঙা উইকো চুরোওয়া, “সিপুওয়াবিহা হেপা ঙারোকো চুকোগা, আসা আবিহা হেপা জিংওয়া জুপা জিংকোগা?”36ও তোউজি! নাতি হাই অংটি তিং, আকুহা হাত্রং চোইপা মিসি, আত্রং চোইপা আকু অংটিহা মানিংরোওয়া।37আকুহা গেহুং জিংদো, আসা দোসরা কিসিমকো অন্নারাং জিংদো, নাতি হাই অংটি তিং, আকুহা নোইতা জিংওয়া জুপা মোকো, আদো অংটি মেংচে তিংমগা।38আদো আপনিহিং ইচ্ছা জিংমি ত্যাবাপা সেংজাহা আকুহিং ইচো জুপা পিচারোওয়া, আসা তাংসা কিসিমকো অংটি সেইরাং আকুহিংয়া সিংতেং পিচারোওয়া।39তাংসা জুপাহা ইচো ত্যাবাপারাং মাজিংমগা। দিংঙাকো জুপাসো সেংচেং-পাচেংকো জুপাহা লারাংসা লারাংসা জিংমগা, জিয়া আসা নায়াবিকো জুপাবিরে লারাংসা লারাংসা জিংমগা।40ডিংবাতা তারি, সানি, পুইমাবি নিও, আসা বাসিমতিতারে এপারাং উইসে জুপাবি নিও, আদো ডিংবাকো তারি, সানি, পুইমাবিকো জেজেংক্যইওয়া আসা বাসিমতিতা নিওয়া জুপাবিকো জেজেংক্যইওয়াবিহা লারাংসা লারাংসা নিও।41সানিকো চ্যাচ্যাওয়া, তারিকো চ্যাচ্যাওয়া লারাংসা লারাংসা নিও, আসা পুইমাবিরে আপনিকো জায়গাতাহা আপনিরাং লারাংসা কিসিমকো নিও, হাংপাতানাহা ইচো পুইমাহা দোসরা পুইমারোমা লারাংসা লারাংসা নিমগা।42সিপুনতেমবিকো সিপুওয়াসো ঙারোওয়ারে এপারাং জিংমগা। হানি জুপা সিপুমসা লিপুনতেনুওয়া অ্যাপু, আকুহা ঙারোনুওয়া হাত্রংরে মাশিওয়া সাদিতা ঙারোওয়া।43লিইনুওয়া আকুহা মেংতাপা আসা সে মাতাপা নিমগা, আদো ন্যাসারাং ঙারোনুওয়া এনতাওয়া আসা সে নিওয়া জিংমগা।44প্রাকৃতিক জুপাহিংয়া লিইপুরোওয়া আসা লাংবেকো জুপাহা বাচেরোওয়া। জুপা নিমবেপারাং লাংবেরে নিও।45তাংজিকো হিগাতা এপা লামি নিও, “নাগাইকো দিংঙা আদমহা ঙাজ্যইং প্রাণীগা” নোইস্যাকো আদম খ্রীষ্টহা সাদি পিচাওয়া লাংবেরাং জিংপুয়ে।46তাংসারোমা নাগাইহা জুপা লেমগা, আকো নোইতা মেংচে লাংবেকো জুপা লেমগা।47নাগাইকো দিংঙা আদমহা বাসিমতিকো মোংটোসো দিংমি নিমগা, আদো নোইকো দিংঙা খ্রীষ্টহা লোডিংবাসো লেমগা।48বাসিমতিকো দিংঙাবিহা মোংটোসো দিংওয়া দিংঙাবেপারাংগা, এপারাং লোডিংবাকো দিংঙাবিহা লোডিংবাসো লেওয়া দিংঙাবেপারাংগা।49নেহা য়াংবিহা মোংটোসো দিংওয়া দিংঙা ত্যাবাপারাং নিও, এপারাং নোইতাহা য়াংবিহা লোডিংবাকো দিংঙাকো জুপাতা চুবে জুপা জিংপুরোওয়া।50নেহা ডুওয়া এবাই আসা হুম্রিবাই, কুং জাংকো কেংওয়া নুওয়াংহা ইরাংগা, য়োংকো ই প্রাকৃতিক জুপা পুমসা সেংজাকো রাজ্যতা হোকো মাছু, এপারাং দাংপুমসা হ্যাপুওয়া জুপারে হাত্রংরে মাদাংওয়াতা ভাগ মামুংরোওয়া।51হিং, কা নাবিহিংয়া ইচো নাপোকো নুওয়াং জাংরোওয়া, য়াংবি তাংসা মাসিরোওয়া, আদো য়াংবি তাংসা পরিবর্তন জিংরোওয়া।52আম্যইতারাং, মিচো ইকোই মিমিনতানি, পেপনেকো আওয়াজতারাং পরিবর্তন জিংরোওয়া, আত্রংহা নোইস্যাকো সময়তা পেপনে খ্যারোওয়া, আসা সিপুমতেমবিহা সাদিতা ঙারোরোওয়া, আসা য়াংবি ঙাজ্যইং নিমবিহা তাংসা পরিবর্তন জিংমসা হোরোওয়া,53হাংপাতানাহা ই সিপুমসা হ্যাওয়া জুপাহা হাত্রংরে মাশিওয়া জুপাতা পরিবর্তন জিংনেরোওয়া।54আসা আকু সিমসা হ্যাওয়া জুপাহা হাত্রংরে মিশিওয়াতা পরিবর্তন জিংনুওয়া, ই লাওয়া নুওয়াংহা পুরা জিংপুরোওয়া, “সাদিহা সিদিংহিংয়া হুইজপুয়ে।”55“ও সিদিং, নাকো জিয়োওয়াহা হাংতা নিংগা?ও সিদিং, নাকো সে হাংতা নিংগা?”56সিদিংকো সেহা পাপসো মুংচামগা আসা পাপকো সেরাং সেংজাকো লিংপাংসো মুংচামগা।57আদো সেংজাহিং গারানিকো! আকুরাং য়োংকো প্রভু ইশু খ্রীষ্টসো জিয়োপারোওয়া।58আকো সোতা কুং জেজেংওয়া ডুওয়া এবাই আসা হুম্রিবাই, নাবিহা সাডুংপা আসা স্থির য়ুং। প্রভুকো কামতা হাত্রংদো নাগাই গ্যই, হাংপাতানাহা প্রভুকো সোতা নাবিকো কোইচ্যাওয়াহা টেকা মাচুইপা মাজিংরোওয়া তামসা তিংমি নিও।
The Seed Company