১ কোরোন্থি14
1আকো সোতা জেজেংওয়াকো নুনুই হুই আসা লাংবেকো ঙেরোংবি মুংচাকো ইচ্ছা জো। ই ঙেরোংবিতাহা সিওচেহা সেংজাকো য়্যইদি য়্যইওয়া ঙেরোং মুংচাকো ইচ্ছা জো।2হাংপাতানাহা মেগেওয়া ক্যাতা য়্যইওয়াহা দিংঙাবিহিংপা মোকো, আদো সেংজাহিংপারাং য়্যইমগা। আকুহা হাং য়্যইদিংমে হাংসুরে মোকোইমগা, পবিত্র লাংবেসো আকুহা নাপোকো নুওয়াংবিরাং য়্যইমগা।3আদো হাংসু সেংজাকো য়্যইদি য়্যই, আবিহা দিংঙাবিহিংপারাং য়্যইমগা। আবিহা লাংবেতা নাগাই গ্যইপাওয়া, সাডুংপাওয়া আসা সান্ত্বনাকো সোতা য়্যইমগা।4মোকোইওয়া ক্যাতা য়্যইওয়াহা আপনিকো লাংবেহিংয়া নাগাই গ্যইপামগা। আদো সেংজাকো য়্যইদি য়্যইওয়াহা মন্ডলিকো দিংঙাবিহিং লাংবেতা নাগাই গ্যইপামগা।5কা নাবি তাংসা মেগেওয়া ক্যাসো য়্যইকো তাওয়া ইচ্ছা জোরোওয়া, আদো আকুরোমা সিওপাহা সেংজাকো য়্যইদি য়্যইকো তাওয়া কা ইচ্ছা জোরোওয়া। কোইকো মাছুওয়া মেগেওয়া ক্যাতা য়্যইওয়ারোমাহা সেংজাকো য়্যইদি য়্যইওয়া টেবোগা। য়দি মেগেওয়া ক্যা য়্যইনুওয়া, আউতাহা কোইওয়া ক্যাতা অর্থ ওয়েপিওয়া দিংঙারে নিনাহা ইসোহা মন্ডলিকো ভলাই জোমগা।6ডুওয়াবাই আসা হুম্রিবাই, কাহা নাবিকোতা মোকোইওয়া ক্যাতা য়্যইমসা লেয়ে, আদো নাবিকো প্যাকোতা সেংজাকো কাটুসো হাইক্রি নুওয়াংকো প্রকাশ, দুংজিকো য়্যইদি, সেংজাকো য়্যইদি মায়্যইনাহা আসা কামি নাবিহিং মাঝিপানাহা নাবিহিংয়া কুংসোহা হাং ত্যইংদ্যা জিংকোগাসা?7বাসি মোকোনাহা খারিবি বেওয়া সোংসাবিসো এনতাপা ধুন মোনোনাহা, আকুহিংয়া হাংসু জাংকো চুকোগা হাং খ্যাদিংমে তামসা?8পেপনেসোমি ছোসোপা ধুন মোনোনাহা লুইসুকো সোতাহা হাংসু তৈয়ার জিংকোগা?9নাবিহিংপারে এপারাং জিংরোওয়া। নাবিমি মোকোইক্যইওয়া ক্যা আপনিকো লেবেসো য়্যইনাহা নাবিহা হাং য়্যইদিংমে হাংসু কোইকোগা? নাবিহা ইচোদাং বিংঙাহিংপা য়্যইমেপা জিংরোওয়া।10বাসিমতিতাহা উইসে ক্যাবি নিও, আদো আকু তাংসা ক্যাবিকোহা অর্থ নিও।11য়্যইওয়া ক্যাকো নুওয়াংকো অর্থমি কা মোকোইনাহা য়্যইওয়াকো সোতাহা কাহা বিদেশী জিংপুরোওয়া। আসা আকু য়্যইওয়াহা কুং সোতাহা বিদেশী জিংপুরোওয়া।12এপারাং নাবিরে পবিত্র লাংবেকো ঙেরোংবিকো সোতা ইচ্ছা জিংওয়াকো সোতা আকু ঙেরোংহিংয়া মন্ডলিবিহিং নাগাই গ্যইপাওয়া কামতা চালাইকো জো।13আকো সোতা মোকোইওয়া ক্যাতা য়্যইওয়াহা আকো অর্থ ওয়েকো ছুকো তামসা পাচাইকো।14হাংপাতানাহা কাহা মোকোইওয়া ক্যাতা পাচাইনুওয়া কুং লাংবেসো পাচাইমগা, আদো কু নোচেংহা হাইরে মোকোইমগা।15নেহা কাহা হাং জোকোগাসা? কা লাংবেসো পাচাইরোওয়া, আসা নোচেংসোরে পাচাইরোওয়া। লাংবেসোরে তাচারোওয়া, আসা কা নোচেংসোরে তাচারোওয়া।16মোকোনাহা নাতি লাংবেতা সেংজাহিং তাচানুওয়া কোইকো মাছুওয়া দোসরা দিংঙাবিহা নাতি এনতাপা গারানি তামসা জাংদো হেপা “আমেন” তামসা জাংকোগা? হাংপাতানাহা নাকো য়্যইওয়াহা আকুহা নাতিহা হাং য়্যইদিংমে হাইরে মোকোইরোওয়া।17নাতিহা এনতাপা গারানি তাকোদোওয়া, আদো আকুহা দোসরা দিংঙাকো সোতাহা হাইরে ত্যইংদা মাজিংরোওয়া।18কা সেংজাহিং গারানি তারোওয়া, হাংপাতানাহা নাবি তাংসারোমা কাহা সিওপা মোকোইওয়া ক্যাতা য়্যইমগা।19আদো মন্ডলিতা মোকোইওয়া ক্যাতা দশ হাজার য়্যইদি য়্যইওয়ারোমা আপনিকো নোচেংসো দোসরাবিহিং ঙাচো য়্যইদি ঝিপাকো ছুকো তামসা কা য়্যইকো কেংরোওয়া।20ডুওয়া এবাই আসা হুম্রিবাই, নোচেংতা চেংবি ত্যাবাপা মাজিং। মেংতাওয়াকো সোতা চেংবিবেপা জিং, আদো নোচেংতা ওয়ারাংপাবি ত্যাবাপা সাডুংপা জিং।21লিংপাংকো হিগাতা এপা লামি নিও,“মোকোইওয়া ক্যা য়্যইওয়া দিংঙাবিকোসোআসা বিদেশীবিকো নামুসো কা ই দিংঙাবিহিংপা য়্যইরোওয়া,আদো আবিহা কুং নুওয়াং মাহিংরোওয়া”তামসা প্রভুসেংজাহা জাংমগা।22আকো সোতা মোকোইওয়া ক্যাতা য়্যইওয়াহা সেংজাকোতা দেংবিকো সোতা মোকো, আদো মাদেংবিকো সোতাহা চিহ্নগা। সেংজাকো য়্যইদি য়্যইকোহা মাদেংমবিকো সোতা মোকো, আদো সেংজাকোতা দেংবিকো সোতাগা।23মন্ডলিতা তাংসা জোংসুমসা মোকোইওয়া ক্যাতা য়্যইনাহা, মাদেংওয়া দিংঙাবি আসা মোকোইওয়া দিংঙাবি আউতা লেনাহা আবিহা নাবিহিংয়া চোইরুং তামসা মাজাংকোগা?24আদো তাংসা সেংজাকো য়্যইওয়া নুওয়াং য়্যইদিংনুকো সময়তাহা লেরা মাদেংওয়া দিংঙাবি আসা বাইরেকো দিংঙাবি আউতা ওয়াংনুওয়া, এপা তাংসা দিংঙাবিকো য়্যইদিসো আকুহা আপনিকো পাপহিং নাইরোওয়া, আসা আপনিহিং এনতাপা জাঁচ জোরোওয়া।25আকো তুংসিংকো নাপোকো নুওয়াংবি তিংরোওয়া, আসা আকুহা চুনুইমসা “সেংজা নাবিকো প্যাকোতা নিনা” তামসা জাংরোওয়া।26ডুওয়া এবাই আসা হুম্রিবাই, কা নেহা হাং জোনেকোগা? নাবি চিত্তা জোংসুনুওয়া তাংসাকোসো লেহদি, ঝিপাওয়া, অর্থ ওয়েওয়া, মোকোইওয়া ক্যাতা আসা আকো অর্থ ওয়েওয়া জিংরোওয়া। ই তাংসাহা মন্ডলিহিং সাডুংপাকো সোতা জোকো জো।27লেরাবেমি মোকোইওয়া ক্যাতা য়্যইদানাহা নিহসো মোকোনাহা সুংচো নোই-নাগাই জোমসা য়্যইকো, আসা ইচোহা আকো অর্থ ওয়েমসা য়্যইকো।28আদো অর্থ ওয়েওয়া আউতা হাংসুরে মোতোনাহা আকু য়্যইওয়া দিংঙাহা মন্ডলিকো প্যাকোতা চেকেপা য়ুংকো, আসা আকুহা আপনিহিংপা আসা সেংজাহিংপা য়্যইকো।29অগমবাণি য়্যইওয়া নিহসো মোকোনাহা সুংচো জিংকো, আসা দোসরাহা আবিকো য়্যইওয়াহিং এনতাপা জাঁচ জোকো।30আদো আউতা নিওয়া দিংঙাবিকোতা সেংজাকো য়্যইদি য়্যইদিংনুওয়া আউতা গাদিংওয়া হাংসুকোতা বিশেষ সেংজাকো য়্যইদি লে, আকুহা য়্যইকো। হাংসু য়্যইদিংমে আকুহা চেকেপা য়ুংকো।31নাবিহা তাংসা নোই-নাগাই জোমসা সেংজাকো য়্যইদি য়্যইকো ছুরোওয়া, আসা এপারাং তাংসারাং ঝিকো ছুরোওয়া আসা তাংসা সাডুংপা জিংকো ছুরোওয়া।32অগমবক্তাবিহা আপনি হাত্রং য়্যইনেকোমে আপনিহিং অধীনতা এমগা,33হাংপাতানাহা সেংজাহা গলমালকো সেংজা মোকোমগা, আদো তিমেওয়াকো সেংজাগা।
সেংজাকো দিংঙাবিকো তাংসা মন্ডলিবিহিং লিংপাংতা জাংওয়া সেই,34মেমেবিহা মন্ডলিতা চেকেপা য়ুংকো। আবিহিংয়া য়্যইকো অনুমতি মোতো, আদো লিংপাংতা জাংমি ত্যাবাপা অধীনতা য়ুংকো।35হাইক্রি নুওয়াংকো বিষয়তা আবি উইকো কেংনাহা সাতা আপনি আপনিকো ওয়াবিহিং উইকো, হাংপাতানাহা মন্ডলিতা মেমেবি য়্যইওয়াহা লেফেনেওয়া নুওয়াংগা।36সেংজাকো য়্যইদিহা নাবি কোরোন্থিবিকোসো শুরু জিংমগা? না নাবিকোতা মেংচে ই লেমগা?37হাংসু দিংঙা আপনিহিং অগমবক্তা মোকোনাহা লাংবেতা নিওয়া দিংঙা তামসামি নোনাহা কুং লাওয়া নুওয়াংহা প্রভুকো আজ্ঞাগা তামসা গ্রহন জোকো।38আদো হাংসু ই জাংওয়া নুওয়াংবি মাহিং, আকো জাংওয়া নুওয়াংরে মাহিংগে।39আকো সোতা ডুওয়া এবাই আসা হুম্রিবাই, সেংজাকো য়্যইদি য়্যইকো সিওপারাং ইচ্ছা জো আসা মোকোইওয়া ক্যাতা য়্যইওয়াবিহিং মোয়োই।40আদো তাংসা কামবিহা গোলমাল মোজোপা এনতাপা জিংনেরোওয়া।
সেংজাকো দিংঙাবিকো তাংসা মন্ডলিবিহিং লিংপাংতা জাংওয়া সেই,34মেমেবিহা মন্ডলিতা চেকেপা য়ুংকো। আবিহিংয়া য়্যইকো অনুমতি মোতো, আদো লিংপাংতা জাংমি ত্যাবাপা অধীনতা য়ুংকো।35হাইক্রি নুওয়াংকো বিষয়তা আবি উইকো কেংনাহা সাতা আপনি আপনিকো ওয়াবিহিং উইকো, হাংপাতানাহা মন্ডলিতা মেমেবি য়্যইওয়াহা লেফেনেওয়া নুওয়াংগা।36সেংজাকো য়্যইদিহা নাবি কোরোন্থিবিকোসো শুরু জিংমগা? না নাবিকোতা মেংচে ই লেমগা?37হাংসু দিংঙা আপনিহিং অগমবক্তা মোকোনাহা লাংবেতা নিওয়া দিংঙা তামসামি নোনাহা কুং লাওয়া নুওয়াংহা প্রভুকো আজ্ঞাগা তামসা গ্রহন জোকো।38আদো হাংসু ই জাংওয়া নুওয়াংবি মাহিং, আকো জাংওয়া নুওয়াংরে মাহিংগে।39আকো সোতা ডুওয়া এবাই আসা হুম্রিবাই, সেংজাকো য়্যইদি য়্যইকো সিওপারাং ইচ্ছা জো আসা মোকোইওয়া ক্যাতা য়্যইওয়াবিহিং মোয়োই।40আদো তাংসা কামবিহা গোলমাল মোজোপা এনতাপা জিংনেরোওয়া।
The Seed Company