১ কোরোন্থি13
1কাহা দিংঙাবিকো আসা লোডিংবাকো পোইংবিকো ক্যাতা য়্যইদো কুংতাহা জেজেংওয়া মাতানাহা, কাহা নাচিরিংপা খ্যাওয়া মোরোং আসা ঝেং-ঝেংপা বেওয়া ঝেয়ালি মেংচেগা।2কাহিংপাহা অগমবাণী য়্যইওয়া সে নিমদোওয়া, আসা তাংসা নাপোকো নুওয়াং আসা তাংসা দুংজিবি গেকো ছুকোদোওয়া, আসা য়্যাগ্যইবি ওয়েংপাকো ছুওয়া কাহিংপা দেংওয়া নিমদোওয়া, আদো কাহিংপাহা জেজেংওয়া মাতানাহা কাহা হাইরে মোকো।3তাংসা পুংজিবি কাহা জোরোংবিহিং চোওপুইয়ে, আসা কুং জুপাহিং মেতা চুংকো পিচাপুইয়ে, আদো কুংতামি জেজেংওয়া মাতানাহা কাহিংয়া হাইরে ত্যইংদ্যা মাজিং।4জেজেংপা জোওয়া দিংঙাহা ধর্য্য আসা লামতুওয়া পারামগা। জেজেংপা জোওয়া দিংঙাহা মোল্যইস্পামগা, গেমসুং মোজোমগা, আসা পুংটা মোজোমগা।5জেজেংপা জোওয়া দিংঙাহা মেংতাওয়া কামতা মেতেইমগা, আপনিকো ত্যইংদ্যা মোমোমগা, আসা সেন্নেপা মেসেদ্রাংপামগা, মেংতাওয়া নুওয়াংবিহিংয়া হিসাব মেএমগা।6জেজেংপা জোওয়া দিংঙাহা মেংতাওয়া নুওয়াংতা মাগাগ্রুমগা, আদো আজিপ্পা নুওয়াংতা য়াংতামগা।7জেজেংপা জোওয়া দিংঙাহা তাংসা নুওয়াংতা সুহায়রেপামগা, আকুহা আপনিকো দেংওয়াহিংয়া হাত্রংরে মায়াংপামগা, তাংসা নুওয়াংতা আশা এমগা, তাংসা নুওয়াংতা সাডুংপা য়ুংমগা।8জেজেংওয়াহা হাত্রংদো য়ুংমগা। সেংজাকো য়্যইদি য়্যইকো দরকার মাজিংরোওয়া, মোকোইওয়া ক্যাবি য়্যইকো য়োইচপুরোওয়া, আসা দুংজিকো য়্যইদিবিরে য়াংপুরোওয়া।9হাংপাতানাহা সেংজাহা য়াংবিহিংয়া তাংসা নুওয়াংবি মাতিংপায়াংতো, আসা নেহা য়াংবিহা সেংজাকোসোহা ইপো মেংচে য়্যইদিংয়ো,10আদো হাত্রং পুরা পিচাওয়া দেরে, আত্রংহা ইপোহা য়াংপুরোওয়া।11হাত্রং কা আপেনি, আত্রংহা কা আপে ত্যাবাপারাং য়্যইমগা, আপে ত্যাবাপারাং নোমগা, আপে ত্যাবাপারাং উই-জাংমগা, আদো কা হাত্রং ওয়াংটেংটেংগেংপা জিং, আত্রংহা আপেকো লোংস্ত্যাইওয়াহা ল্যাপুইয়ে।12নেহা য়াংবিহা আইনাতা ত্যাবাপা মুমরেপা তিংদিংয়ো, আদো আত্রংহা ছোসোপা তিংরোওয়া। ই জাংওয়াহা নেহা কা অ্যাইংসি মেংচে কোইদিংয়ো, আদো আত্রংহা ছোসোপা কোইরোওয়া। হেপা কাহিং সেংজাহা ছোসোপা কোইমে, এপারাং কারে আকুহিংয়া ছোসোপারাং কোইরোওয়া।13আদো সুংচো নুওয়াংহা হাত্রংদো য়ুংরোওয়া-দেংওয়া, আশা আসা জেজেংওয়া। ই সুংচোতাহা হাংসুরোমা টেবোহা জেজেংওয়ারাংগা।
The Seed Company