১ কোরোন্থি12
1ও ডুওয়াবাই আসা হুম্রিবাই, পবিত্র লাংবেকো ঙেরোংকো বিষয়তা নাবিহা হাইরে মেগেপা য়ুংকো তাওয়া কুং ইচ্ছা মোতো।2নাবিহা গেমিরাং নিও, নাবি প্রভুতা মাদেংয়াংনুওয়া, আত্রংহা নাবিহিংয়া উইসে য়্যইকোরে মায়্যইওয়া মুর্তিবিহিং হুইকো দোসরা লাংবেবি তোইংদিংমগা।3আকো সোতা নাবিহা ই নুওয়াং কোইকো তাওয়া কুং ইচ্ছা নিও, সেংজাকো লাংবেসো য়্যইওয়া হাংসুরে “ইশুহা শ্রাপিত জিংকো” তামসা মাজাংমগা, আসা পবিত্র লাংবেসো মেংচে “ইশুরাং প্রভুগা” তামসা জাংকো ছুমগা।4ঙেরোংবিহা উইসে প্রকার নিও, আদো পবিত্র লাংবেহা ইচোরাংগা।5য়াংবিহা প্রভুহিংয়া উইসে প্রকারসো সেওয়াবি জোকো চুরোওয়া, আদো প্রভুহা ইচোরাংগা, হাংসুহিং য়াংবি সেওয়া জোমমে।6কামবিহা উইসে প্রকারকো নিও, আদো ইচো সেংজারাং য়াংবি তাংসাকোসো কাম জোমগা।7তাংসাকো তোইংদ্যা জিংকো সোতারাং পবিত্র লাংবেকো কাম তিংকো তামসা তাংসাহিং পিচামি নিও।8লেরাহিংয়া পবিত্র লাংবেসো দুংজিকো নুওয়াং য়্যইওয়া, লেরাহিংয়া আকু পবিত্র লাংবে সেই উইসে নোচেং নিওয়া নুওয়াং য়্যইওয়া,9লেরাহিংয়া আকু পবিত্র লাংবেসোরাং দেংওয়া, লেরাহিংয়া আকু ইচো পবিত্র লাংবেসোরাং য়োংন্যা সাংপাওয়া ঙেরোং পিচামি নিও,10লেরাহিংয়া আআংপেপেচপুওয়া কামবি জোওয়া, লেরাহিংয়া সেংজাকো য়্যইদি হিংপাওয়া, লেরাহিংয়া পবিত্র লাংবেসো এনতাওয়াসো ধুইওয়া লাংবেবিহিং ওয়েংপাকো ছুওয়া, লেরাহিংয়া উইসে মেগেওয়া ক্যাবি য়্যইকো ছুওয়া, লেরাহিংয়া আকু ক্যাবিকো অর্থ ওয়েকো ছুওয়া ঙেরোং পবিত্র লাংবেহা পিচামি নিও।11আদো ই তাংসাহা ইচো পবিত্র লাংবেকো কামগা। পবিত্র লাংবেহা তাংসাহিং আকো ইচ্ছা সেই ঙেরোং পিচামগা।12হেপা জুপা ইচোনি, আসা আকোহা উইসে অঙ্গবি নিমগা, আসা জুপাকো তাংসা অঙ্গবি উইসে নিদো জুপাহা ইচো মেংচে নিমগা, খ্রীষ্টকো জুপারে এপারাংগা।13হাংপাতানাহা ইচো পবিত্র লাংবেসোরাং য়াংবি তাংসা ইচো জুপাতারাং বাপ্তিস্মা মুংমি নিও। য়াংবিহা য়হুদি জিংদো, গ্রিক জিংদো, ডেইয়া জিংদো, ছুটকারা জিংদো, য়াংবি তাংসা ইচো পবিত্র লাংবেরাং মুংচামি নিও।14জুপাহা ইচো অঙ্গসোদাং মোকো, আদো উইসে অঙ্গবিসো বনেওয়া নিমগা।15কোকোইমি “কা খুই মোকোমি, আকো সোতা কাহা জুপাকো অঙ্গ মোকোমি” তামসা বেমি জাংনাহা, আকুহা জুপাকো অঙ্গ মাজিংকোগাসা?16আসা নানুংহা “কা মিচো মোকো, আকো সোতা কা জুপাকো অঙ্গ মোকো” তামসামি জাংনাহা, আকুহা জুপাকো অঙ্গ মাজিংকোগা?17তাংসা জুপা মিচোবেমি জিংপুদানাহা হাংসো হিংকোগাসা? আসা তাংসা জুপাবেমি নানুং জিংপুদানাহা হাংসো নুকোগাসা?18আদো সেংজাহা আপনিকো ইচ্ছা সেই জুপাকো তাংসা অঙ্গবিহিংয়া আপনি আপনিকো জায়গাতা এপিমি নিও।19আকু তাংসাবেমি ইচো অঙ্গ জিংপুদানাহা জুপারাং মাজিংকোগা।20আকো সোতা অঙ্গবিহা উইসে নিও, আদো জুপাহা ইচোরাংগা।21মিচোহা খুইহিংয়া “কাহিংয়া নাকো দরকার মোতো” তামসা জাংমক্যইরোওয়া, আসা পোরোরে কোকোইহিংয়া “কাহিংয়া নাকো দরকার মোতো” তামসা জাংমক্যই।22আকুরোমাহা জুপাকো কমজোর অঙ্গবিহিংরাং য়াংবিহিংয়া মাতানাহা মাতুওয়া জিংমগা।23জুপাকো অঙ্গবি হানি য়াংবিহিং লেফেপামমে, আকুহিংয়া য়াংবিহা সিওপারাং আংদুংসো তুংমসা এমগা। আসা হানি জুপাকো অঙ্গবি তিংপাকো মোতু, আকুহিংনাং য়াংবিহা এনতাপা তুংমসা এমগা।24তাংসাকো তিংকো ছুওয়া অঙ্গবিহিংয়া এসেপাকো য়্যারাপামঘ্যইমগা। হানি তিংপাকো মোতুওয়া অঙ্গবিহিং য়াংবিহা সিওপা আদর জোদিংমমে, আকুহিংয়া সেংজাহা য়োংকো জুপাতা মিলাইমসা এমি নিও,25তাকি জুপাতা ওয়েংসুমঘ্যইকো, আদো অঙ্গবিহা ইচোহা ইচোহিং প্যারাপাকো।26ইচো অঙ্গতামি কোইচ্যাওয়া ওয়াংনাহা তাংসা অঙ্গবিরাং তুচামগা, অর্থাৎ ইচো অঙ্গকোমি আদর জিংনাহা তাংসা অঙ্গবিরাং চিত্তা আদর মুংমগা।27এপারাং নাবিহা খ্রীষ্টকো জুপাগা, আসা তাংসা আকো জুপাকো অঙ্গবিরাংগা।28সেংজাহা মন্ডলিতাহা নাগাইহা জেংওয়া পোইংবি, আকো নোইতাহা অগমবক্তাবি, আকো নোইতাহা ঝিপাওয়াবি, আআংপেপেচপুওয়া কাম জোমবি, আসা সাংপাওয়া ঙেরোং মুংওয়াবি, য়ুজ্রুওয়াবি, অধিকার জোওয়াবি, লারাংসা লারাংসা ক্যা য়্যইওয়াবি জাপামি নিও।29তাংসা জেংওয়া পোইংবিগা? তাংসা অগমবক্তাবিগা? তাংসা ঝিপাওয়াবিগা? তাংসা আআংপেপেচপুওয়া কাম জোমবিগা?30তাংসাহিংপা সাংপাওয়া ঙেরোং নিমগা? তাংসা লারাংসা লারাংসা ক্যাবি য়্যইকো ছুমগা? তাংসা আকু ক্যাবিকো অর্থ ওয়েকো ছুকোগা?31আদো ন্যাসারাং হানিরোমা কাম লাগেওয়া ঙেরোংবি মুংচাকো ইচ্ছা জো। আসা কা নাবিহিংয়া সিওপারাং এনতাওয়া ন্যাতা তিংপারোওয়া।
The Seed Company