১ কোরোন্থি11
1কা খ্রীষ্টকো জোমি ত্যাবাপা জোমগা, নাবিরে কুং জোমি ত্যাবাপা জো।2হাত্রংদো কাহিং প্যারাপাওয়াকো সোতা আসা কুং ঝিপাওয়া মানেওয়াকো সোতা কা নাবিহিংয়া প্রশংসা জোরোওয়া।3আদো নাবিহা সিদা চ্যইকো, হাংপাতানাহা খ্রীষ্টহা তাংসা পোজাকো মাটাগা, মেকো মাটাহা ওয়াগা আসা সেংজাহা খ্রীষ্টকো মাটাগা।4পোরো তুংমসা পাচাইওয়া অথবা অগমবাণী য়্যইওয়া পোজাহা আপনিকো মাটা খ্রীষ্টহিং লেফেপাওয়াগা।5আপনিকো পোরো মাতুংপা পাচাইওয়া আসা আগমবাণী য়্যইওয়া মেমেহা আপনিকো ওয়াহিং লেফেপাওয়াগা। এপা জিংওয়া মেমেবিহা পোরো লুইপাপুওয়া মেমেবি বেপাগা।6হানি মেমে আপনিকো পোরোহিং মাতুং, আকুহা আপনিকো পুরিংহা চ্যাপুকো। পুরিং চ্যাপাওয়া আসা লুইপাওয়াহা আকো সোতাহা লেফেনেওয়া নুওয়াংগা। আকো সোতারাং আকুহা পোরো তুংনেরোওয়া।7পোজা দিংঙাহা পোরো তুংমঘ্যইরোওয়া, হাংপাতানাহা পোজা দিংঙাহিংয়া সেংজাকো স্বরূপতা আসা আকো সন্মানকো সোতা বানাইমগা। মেমেহিংয়া পোজাকো সন্মানকো সোতা বানাইমগা।8হাংপাতানাহা পোজাহা মেমেকোসো দিংওয়া মোকো, আদো মেমেহা পোজাকোসো দিংওয়াগা।9আসা পোজাহা মেমেকো সোতা বানাইওয়া মোকো, আদো মেমেহা পোজাকো সোতা বানাইওয়াগা।10আকো সোতা আসা লোডিংবাকো পোইংবিকো সোতারে অধীনতাকো চিহ্ন তিংপাকো মেমেবিহা পোরো তুংনেরোওয়া।11আদো প্রভুকো নাগাইতাহা মেমেহিংয়া পোজা ঘ্যইমগা আসা পোজাহিংয়া মেমে ঘ্যইমগা।12হাংপাতানাহা হেপা পোজাকোসো মেমেহিং দিংমমে, এপারাং পোজাহা মেমেকোসো কেমগা। আদো তাংসা সেংজাকোসোরাং লেমগা।13নাবি আপনিবিরাং নো, মেমে দিংঙাহা পোরো মাটুংপা সেংজাহিং পাচাইওয়াহা সহায়কোগাসা?14হাংপাতানাহা প্রাকৃতিকরাং নাবিহিং ঝিপারোওয়া, পোজা দিংঙাকো উইডাং পুরিং নিওয়াহা লেফেনেওয়া নুওয়াংগা তামসা।15মেমে দিংঙাকো উইডাং পুরিং নিওয়াহা আকো সোতাহা পোতাওয়াগা, হাংপাতানাহা মেমেকো পুরিংহা সেংজারাং আকুহিংয়া পোরো তুংচাকো পিচামগা।16আদো হাংসু ইকো বিষয়তা য়্যইসু-জাংসুকো কেং, আবিহিংয়া কা জাংরোওয়া, য়াংবিকোতা এপাজিংওয়া হানিরে লিংপাং মোতো, আসা সেংজাকো মন্ডলিতারে মোতো।17আদো কুং জাংওয়া নুওয়াংতা কা নাবিহিংয়া মাতাচারোওয়া, হাংপাতানাহা নাবিহা মন্ডলিতা জমা জিংসুনুওয়া এনতাওয়াকো সোতা মাজিংমগা, আদো আকুহা সিওপা মেংতাওয়াকো সোতারাং জিংমগা।18হাংপাতানাহা নাগাইহা, মন্ডলিতা চিত্তা জমা জিংনুওয়া নাবিকো প্যাকোতা মাচাংসুচাংমি তাওয়া কা হিংমি নিও, ই নুওয়াংহা আস্যস্যই জিংদো কারে দেংরোওয়া।19কি নাবিহিংয়া এপাজিংগা, সেংজাকো জেংওয়া দিংঙাহিং নাইকো সোতাহা নাবিকো প্যাকোতাহা স্যাসুওয়াহা নিনেকোগা?20হাত্রং নাবি চিত্তা জমা জিংমসা চাসু আসা আংসু আকুহা প্রভু ভোজ মোকো,21হাংপাতানাহা চাকো গানুওয়া তাংসা আপনিকো চাওয়াবি চাপুনতেচাংমগা, আসা লেরাহা হাপাংপা নিমগা, আসা লেরাহা য়ুসো গাইপুনতেওয়া নিমগা।22চাকোসো আংকোহা নাবিকো আপনিকো সা মাতাংগাসা? নাবিহা সেংজাকো মন্ডলিবিহিং হাইরে মোকো তামসা চিয়োপা নোমগা? আসা হাইরে মাতামবিহিং লেফেপাকো কেংমগা? কা নাবিহিংয়া হাং জাংকোগা? এপা জোওয়াকো সোতা কা নাবিহিংয়া তাচাকোগা? কা হাত্রংরে মাতাচা।23কুং ই ঝিপাওয়া প্রভুসোরাং মুংচাওয়াগা। প্রভু ইশুহিং প্যইচপুনুকো লিসুং আকুহা কোব্রেং চুংয়ে,24আসা গারানি তামসা পাচাইনুকো নোইতাহা আকুহা কোব্রেং ছিমসা জাংয়ে, “ইহা নাবিকো সোতা পিচাওয়া কুং জুপাগা। ইহা কাহিং প্যারাপাকো সোতা জোকো জো।”25এপা জোমসারাং কোব্রেং চাপুনতেনুকো নোইতাহা আকুহা কচৌরা চুংমসা এপা জাংয়ে, “ই কচৌরাহা সেংজা আসা দিংঙাকো প্যাকোতা নাপোইওয়া চুবে করারকো চিহ্নগা, হানি কুং য়ুতিসো বানাইমমে। হাত্রং হাত্রং নাবি ই আং, কাহিং প্যারাপামসা আংচাংকো জো।”26হাংপাতানাহা হাত্রং হাত্রং নাবি ই কোব্রেং চা আসা ই কচৌরাসো আং, প্রভু মেলেনু চোইপা নাবিহা আকো সিপুওয়াকো দেরেং হিংপারোওয়া।27আকো সোতা হাংসু হাংসু য়োগ্য়্য মাতাপা প্রভুকো কোব্রেং চা আসা আকো কচৌরাসো আং, আবিহা প্রভুকো জুপা আসা য়ুতিকো বিরুদ্ধতা পাপ জোওয়া জিংরোওয়া।28তাংসা দিংঙাবিহা আপনিহিং নাগাই জাচেমসা কোব্রেং চাকো আসা কচৌরাসো আংকো,29হাংপাতানাহা য়াংবিহা প্রভুকো জুপাগা তামসা মোকোইপা প্রভু ভোজ চাদানাহা আসা আংদানাহা আপনিকো তোইতা দন্ড পারারোওয়া।30আকো সোতা নাবিকোতাহা উইসে কমজোর, আসা হাইওয়া নিও আসা লেরাহা সিপুইনতেয়ে।31য়দি নাগাইসোরাং আপনিহিং এনতাপামি জাঁচেনাহা সেংজাহা দোষি মাতিংপারোওয়া।32বাসিমতিকো দিংঙাবিহিংপা মাদাংকো তামসা য়াংবিহিংয়া প্রভুহা ন্যায় জোরোওয়া আসা য়াংবিহিং অনুশাসন জোরোওয়া।33আকো সোতা কুং ডুওয়া এবাই আসা হুম্রিবাই, নাবিহা এপা প্রভু ভোজ চাকো-আংকো জমা জিংনুওয়া, ইচোহা ইচোহিং খুই।34য়দি হাংসু হাপাংপুওয়া নি আকুহা সাতারাং চাপুকো আসা প্রভু ভোজ চানুওয়া নাবিহা সেংজাকোসো দোষি মাজিংকো। লেরা নুওয়াংকো তোইতাহা কা ওয়াংমসারাং মিলাইপিরোওয়া।
The Seed Company